1, 2. Kuandu ita laʼo ba oin iha lia-loos, ita aprende kona-ba saida? Fó toʼok ezemplu.

IMAJINA katak ema fó prezente ba labarik ida. Labarik nia inan-aman hatete ba nia: “Dehan obrigadu.” Labarik neʼe halo tuir. Maibé kuandu labarik neʼe sai boot daudaun, nia komprende tanbasá ninia inan-aman hanoin katak importante atu hatudu agradese ba ema seluk. Ikusmai nia rasik hatene atu fó agradese husi laran tanba nia iha hanoin hanesan ninia inan-aman.

² Hanesan neʼe mós, bainhira ita foin aprende kona-ba lia-loos, ita aprende katak importante atu halo tuir Jeová nia mandamentu sira. Maibé kuandu ita laʼo ba oin iha lia-loos, ita mós aprende kona-ba Jeová nia hanoin, saida mak nia simu no la simu, no ninia haree kona-ba buat oioin. Kuandu ita husik Jeová nia hanoin book ita-nia desizaun no hahalok sira, ita hatudu katak Maromak nia hanoin sai ita-nian.

3. Tanbasá la fasil atu halo Jeová nia hanoin sai Ita-nian?

³ Maski ita gosta aprende atu hanoin hanesan Jeová nian, maibé tanba ita la perfeitu, dala ruma la fasil atu halo nuneʼe.  Porezemplu, karik la fasil ba ita atu komprende Jeová nia haree kona-ba morál, rikusoin, serbisu haklaken, uza sala raan, no buat seluk tan. Ita bele halo saida? Oinsá mak ita bele halo Maromak nia hanoin sai ita-nian? No oinsá mak halo nuneʼe bele ajuda ita atu halo buat neʼebé loos ohin loron no iha futuru?

4. Hafoun ita-nia hanoin katak sá?

⁴ Lee Roma 12:2. Apóstolu Paulo esplika kona-ba aprende atu hanoin tuir Jeová envolve saida deʼit. Nia hatete katak ita tenke para atu la “halo tuir mundu ohin neʼe”. Iha lisaun uluk nian ita aprende ona katak, labele simu mundu nia ideia no atitude. Maibé Paulo mós hatete katak ita presiza hafoun ita-nia hanoin. Neʼe signifika katak tenke estuda Maromak nia Liafuan, komprende Maromak nia hanoin, medita kona-ba neʼe, no hakaʼas an atu halo Jeová nia hanoin sai ita-nian.

5. Esplika saida mak la hanesan entre lee deʼit no estuda.

⁵ Estuda mesak laʼós atu lee liu deʼit ka riska resposta sira. Bainhira ita estuda, ita hanoin informasaun neʼe hanorin saida ba ita kona-ba Jeová, ninia dalan, no hanoin sira. Ita hakaʼas an atu komprende tanbasá mak Jeová hakarak ita atu halo buat ruma no tanbasá mak nia la simu buat balu. Ita mós hanoin kona-ba mudansa saida mak ita presiza halo ba ita-nia hahalok no hanoin. Karik ita labele medita kona-ba pontu ida-idak iha estuda hotu. Maibé diʼak atu fahe ita-nia tempu atu estuda hodi uza porsentu 50 atu medita kona-ba buat neʼebé ita lee.​—Salmo 119:97; 1 Timóteo 4:15.

6. Saida mak akontese kuandu ita medita kona-ba Maromak nia Liafuan?

⁶ Kuandu ita medita beibeik kona-ba Maromak nia Liafuan, ita sei haree buat espesiál ruma. Ita sei ‘hatene ho loloos’ ka fó prova rasik katak Jeová nia hanoin mak perfeitu. Ita komesa haree buat hotu tuir Jeová nia haree no ikusmai konkorda ho ninia hanoin. Ita hafoun ita-nia hanoin no haburas fali dalan foun atu hanoin. Neineik-neineik ita halo Jeová nia hanoin sai ita-nian.

7, 8. (a) Jeová hanoin oinsá kona-ba rikusoin? (Haree dezeñu sira iha leten.) (b) Se ita iha Jeová nia hanoin, saida mak sei importante liu ba ita?

⁷ Ita-nia hanoin kona ita-nia hahalok. (Marcos 7:21-23; Tiago 2:17) Mai ita haree toʼok ezemplu balu. Evanjellu sira hatudu ho klaru Jeová nia hanoin kona-ba rikusoin. Maromak hili rasik José no Maria atu haboot ninia Oan-Mane maski José no Maria laʼós ema neʼebé riku. (Levítico 12:8; Lucas 2:24) Iha tempu neʼebé Jesus moris, Maria “hatoba nia iha animál nia han-fatin, tanba la iha fatin ba sira hodi hela”. (Lucas 2:7) Se Jeová hakarak, nia bele halo Jesus moris iha uma neʼebé diʼak liu. Maibé buat neʼebé importante ba Jeová mak Jesus bele sai boot iha família neʼebé tau uluk adorasaun ba Maromak.

⁸ Istória kona-ba Jesus nia moris hanorin ita oinsá Jeová nia haree kona-ba rikusoin. Inan-aman balu hakarak sira-nia oan atu iha sasán neʼebé diʼak liu hotu, maski halo nuneʼe bele estraga oan nia relasaun diʼak ho Jeová. Maibé buat neʼebé importante liu ba Jeová mak ita-nia relasaun diʼak ho nia. Ita simu Jeová  nia haree kona-ba neʼe ka lae? Ita rasik nia hahalok hatudu saida?​—Lee Ebreu 13:5.

9, 10. Oinsá mak ita bele hatudu katak ita iha Jeová nia haree kona-ba la halo ema seluk sidi?

⁹ Ezemplu ida tan mak Maromak nia haree kona-ba halo ema seluk sidi. Jesus hatete: “Haʼu dehan ba imi kona-ba kiʼikoan sira neʼebé tau fiar mai haʼu: Se ema ruma halo sira ida sidi, diʼak liu tara fatuk dulas trigu nian ba ninia kakorok no soe nia ba tasi.” (Marcos 9:42) Jesus nia liafuan mak buat neʼebé sériu tebes. Jesus haleno ninia Aman nia hahalok sira iha dalan neʼebé perfeitu. Tan neʼe ita bele fiar katak Jeová mós sente la kontente bainhira ema ida halo Jesus nia dixípulu ida sidi.​—João 14:9.

¹⁰ Ita mós iha Jeová no Jesus nia haree kona-ba la halo ema seluk sidi ka lae? Ita-nia hahalok hatudu saida? Porezemplu, karik ita gosta modelu ida kona-ba hatais ka hadiʼa an. Maibé oinsá se ita hatene katak neʼe bele halo ema balu iha kongregasaun la kontente ka book sira hamosu hanoin neʼebé la morál, ita sei halo saida? Ita-nia domin ba irmaun-irmán sira sei book ita hodi hasees an husi modelu neʼe ka lae?​—1 Timóteo 2:9, 10.

11, 12. Oinsá mak ita bele proteje ita-nia an hodi aprende atu odi buat neʼebé Jeová odi no haburas kontrola an?

¹¹ Ezemplu terseiru mak: Jeová odi hahalok la loos. (Isaias 61:8) Jeová hatene katak tanba la perfeitu, dala ruma la fasil ba ita atu halo buat neʼebé loos. Maski nuneʼe, nia hakarak ita atu iha ninia hanoin no odi buat neʼebé aat. (Lee Salmo 97:10.) Se ita medita tansá Jeová odi buat neʼebé aat, neʼe sei ajuda ita atu halo Jeová nia hanoin sai ita-nian no hetan kbiit atu hasees an husi hahalok sala hotu.

¹² Kuandu ita aprende atu odi buat neʼebé aat, neʼe sei ajuda ita atu hatene katak hahalok balu sala maski Bíblia la temi. Porezemplu, iha dansa oin ida neʼebé la morál naran “Lap dancing” * no agora dansa neʼe sai ona buat neʼebé baibain deʼit iha mundu. Ema balu sente katak dansa neʼe laʼós atu halo relasaun seksuál, entaun sira hanoin katak dansa neʼe la sala. Maibé Jeová sente hanesan neʼe ka lae? Hanoin-hetan katak Jeová odi buat hotu neʼebé aat. Tan neʼe, mai ita hasees an husi hahalok sala hotu hodi aprende atu haburas kontrola an no odi buat neʼebé Jeová odi.​—Roma 12:9.

13. Tanbasá mak diʼak atu hanoin oinsá Jeová nia haree kona-ba situasaun oioin neʼebé karik ita sei hasoru iha futuru?

¹³ Kuandu estuda mesak, diʼak atu hanoin oinsá Jeová nia haree kona-ba situasaun oioin neʼebé karik ita sei hasoru iha futuru. Hodi nuneʼe, ita sei la hakfodak se ita hasoru situasaun neʼebé ita presiza foti kedas desizaun. (Provérbios 22:3) Mai ita koʼalia kona-ba ezemplu balu husi Bíblia.

14. Ita aprende saida husi José nia resposta ba Potifar nia feen?

¹⁴ Bainhira Potifar nia feen koko atu tenta José, José hasees an kedas. Klaru katak José medita nanis oinsá Jeová nia  haree kona-ba moris kaben nian. (Lee Génesis 39:8, 9.) José hatete ba Potifar nia feen: “Oinsá mak haʼu bele halo hahalok aat tebes neʼe no halo sala hasoru Maromak?” Ida-neʼe hatudu katak José iha Maromak nia hanoin. Oinsá ho ita? Ita sei halo saida se kolega serbisu hatudu oin moris ba Ita? Ka oinsá se ema ida haruka mensajen ka foto seksuál ba Ita liuhusi telemovel? * Se ita mak aprende ona no halo Jeová nia hanoin sai ita-nian kona-ba buat sira-neʼe no foti desizaun nanis, neʼe sei halo fasil ba ita atu laran-metin.

15. Oinsá mak ita bele laran-metin nafatin ba Jeová hanesan mane Ebreu naʼin-tolu halo?

¹⁵ Ezemplu seluk mak kona-ba mane Ebreu naʼin-tolu naran Sadrak, Mexak, no Abednego. Bainhira Liurai Nabukodonozór fó mandamentu ba sira atu adora estátua boot, sira la halo tuir nia. Sira-nia resposta neʼebé klaru ba liurai hatudu katak sira hanoin nanis kona-ba oinsá atu hatudu laran-metin ba Jeová. (Éxodo 20:4, 5; Daniel 3:4-6, 12, 16-18) Oinsá se Ita-nia patraun husu Ita atu fó osan hodi halo selebrasaun ruma neʼebé iha ligasaun ho relijiaun falsu? Ita sei halo saida? Duké hein toʼo situasaun hanesan neʼe mosu, diʼak liu hanoin didiʼak agora kona-ba Jeová nia hanoin. Tuirmai, kuandu situasaun hanesan neʼe mosu, fasil ba ita atu halo no koʼalia buat neʼebé loos hanesan mane Ebreu naʼin-tolu neʼe.

16. Oinsá mak hatene didiʼak Jeová nia hanoin bele ajuda ita atu prontu iha tempu emerjénsia médiku nian mosu?

¹⁶ Medita kona-ba Jeová nia hanoin mós bele ajuda ita atu hatudu nafatin laran-metin ba Jeová kuandu situasaun emerjénsia médiku mosu. Ita hatene katak ita sei la simu transfuzaun raan tomak ka parte haat husi raan tomak neʼe. (Apóstolu 15:28, 29) Maibé iha tratamentu médiku balu neʼebé iha ligasaun ho raan no ema Kristaun ida-idak presiza halo desizaun rasik neʼebé bazeia ba prinsípiu sira husi Bíblia. Bainhira mak tempu diʼak atu foti desizaun sira? Diʼak atu hein toʼo ita tama ospitál, moras, no  situasaun obriga mak foin halo desizaun ho ansi ka lae? Lae. Agora mak tempu diʼak atu halo riset, prenxe dokumentu médiku neʼebé esplika Ita-nia desizaun, no koʼalia ho Ita-nia doutór. *

17-19. Tanbasá mak importante atu aprende kona-ba Jeová nia hanoin agora? Fó toʼok ezemplu.

¹⁷ Ikusliu, hanoin toʼok dalan neʼebé Jesus hatán lalais ba Pedro nia sujestaun neʼebé la matenek: “Naʼi, hatudu laran-sadiʼa ba Ita-nia an.” Ita bele fiar katak Jesus medita dala barak ona kona-ba saida mak Maromak hakarak nia atu halo no profesia oioin kona-ba ninia moris no mate iha rai. Koñesimentu neʼe hametin ninia desizaun atu laran-metin ba Jeová no fó ninia moris nuʼudar sakrifísiu.​—Lee Mateus 16:21-23.

¹⁸ Ohin loron, Maromak hakarak ita atu sai ninia belun no hakaʼas an atu haklaken liafuan diʼak. (Mateus 6:33; 28:19, 20; Tiago 4:8) Maibé, karik ema balu ho hanoin neʼebé diʼak koko anima ita atu la halo buat sira-neʼe, hanesan buat neʼebé Pedro halo ba Jesus. Porezemplu, oinsá se Ita-nia patraun fó serbisu diʼak neʼebé manán osan boot, maibé serbisu neʼe sei hanetik Ita-nia atividade espirituál nian? Ka se Ita eskola hela no hetan oportunidade atu muda sai husi uma atu hetan edukasaun estra. Se ida-neʼe akontese, ita foin mak halo orasaun, halo riset, no koʼalia ba Ita-nia família ka katuas kongregasaun atu foti desizaun ka lae? Diʼak liu aprende oinsá Jeová hanoin kona-ba buat sira-neʼe agora no hakaʼas an atu iha hanoin hanesan Jeová. Se Ita halo nuneʼe, kuandu situasaun hanesan neʼe mosu, karik Ita sei la sente katak buat sira-neʼe sai hanesan tentasaun ba Ita. Ita sei hatene atu halo saida tanba Ita deside nanis ona atu tau fokus hodi serbí Jeová.

¹⁹ Karik Ita bele hanoin kona-ba situasaun seluk tan neʼebé derrepente bele mosu. Ita hatene katak ita labele halo preparasaun ba situasaun hotu. Maibé se ita medita kona-ba Jeová nia hanoin bainhira ita estuda mesak, ita sei hanoin-hetan buat neʼebé ita aprende, no hatene oinsá atu aplika ida-neʼe iha situasaun naran deʼit. Tan neʼe mak bainhira estuda mesak, buka-hatene Jeová nia haree, halo ninia hanoin sai ita-nian, no hanoin oinsá mak iha Jeová nia hanoin sei kona ita-nia hahalok agora no iha futuru.

20, 21. (a) Tanbasá mak ita sei goza liberdade iha mundu foun? (b) Oinsá mak ita bele hetan ksolok ohin loron?

²⁰ Ita hotu hein ho namanas ba mundu foun. Ita barak iha esperansa atu moris ba nafatin iha mundu paraízu. Iha Maromak nia Ukun okos, ita sei sai livre husi susar no terus hotu neʼebé ita hasoru daudaun iha mundu neʼe. No ita sei iha nafatin liberdade atu halo desizaun tuir buat neʼebé ita gosta no hakarak.

²¹ Maibé neʼe la dehan katak ita sei hetan liberdade neʼebé la iha limite. Ema laran-maus sei halo desizaun tuir Jeová nia ukun-fuan no hanoin. Neʼe sei lori ksolok neʼebé boot tebes no nakonu ho dame. (Salmo 37:11) Antes tempu neʼe toʼo mai, ita bele haksolok tanba ita halo Jeová nia hanoin sai ita-nian.