Iha kalan antes Jesus mate nia fó konsellu ba ninia dixípulu sira katak sira labele buka pozisaun aas iha sira-nia maluk fiar-naʼin nia leet. Nia hatete ba sira: “Liurai nasaun sira-nian domina sira-nia povu, no sira neʼebé iha podér simu naran [Benfeitór]. Maibé imi labele hanesan neʼe.”​—Lucas 22:25, 26, nota-rodapé.

Ema neʼebé simu naran Benfeitór neʼebé Jesus temi mak sé? Osan-besi no manuskritu sira husi ema Gregu no ema Roma nia tempu hatudu katak ema iha tempu neʼebá toman atu hatudu respeitu ba ema-boot no ukun-naʼin sira hodi fó títulu ba sira hanesan Euergetes ka Benfeitór. Ema-boot ka ukun-naʼin simu títulu neʼe tanba sira halo serbisu diʼak hodi ajuda povu.

Liurai balu mós iha títulu Benfeitór. Sira balu mak liurai sira husi rai-Ejitu ho naran Ptolemeu III no Ptolemeu VIII. Ukun-naʼin Roma nian hanesan Júlio César no Augusto mós simu títulu neʼe. Nuneʼe mós ho Herodes Boot, liurai ba Judeia. Herodes ajuda povu durante tempu rai-hamlaha hodi importa trigu-musan no fó roupa ba ema kiak, tan neʼe karik nia simu títulu neʼe.

Matenek-naʼin ida kona-ba Bíblia husi rai-Alemaña naran Adolf Deissmann esplika katak ema iha toman atu uza títulu Benfeitór iha tempu uluk. Nia hatete: “Se ita hakarak buka títulu Benfeitór iha manuskritu tuan sira, fasil deʼit atu hetan títulu neʼe iha manuskritu atus ida liu.”

Entaun, Jesus nia liafuan, “maibé imi labele hanesan neʼe”, katak sá? Jesus haruka ninia dixípulu sira atu la hatudu interese ba ema seluk nia presiza ka lae? Lae duni. Jesus temi liafuan sira-neʼe tanba nia hanoin kona-ba razaun tanbasá mak sira hatudu laran-luak.

Iha Jesus nia tempu, ema riku buka naran-boot hodi fó osan no apoiu ba feira no atividade sira iha estúdiu, harii jardín no templu sira no mós fó apoiu ba atividade sira seluk. Maibé sira halo buat sira-neʼe tanba hakarak ema gosta sira ka sira hakarak manán votu. Livru ida esplika: “Maski ema riku balu hatudu laran-luak hodi fó ba ema seluk husi laran, maibé sira barak liu halo nuneʼe hodi buka sira rasik nia diʼak kona-ba buat polítiku.” Jesus anima ninia dixípulu sira atu hasees an husi toman atu buka oin no buka deʼit sira rasik nia diʼak.

Tinan balu liutiha apóstolu Paulo mós hanorin kona-ba lia-loos importante neʼe, katak ita tenke hatudu laran-luak ho motivu neʼebé loos. Nia hakerek ba ninia maluk fiar-naʼin sira iha Korinto, hodi dehan: “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran haksolok.”​—2 Korinto 9:7.