1, 2. (a) Jesus hatán oinsá kuandu Pedro anima nia atu hatudu laran-sadiʼa ba ninia an? (Haree dezeñu iha leten.) (b) Tanbasá mak Jesus hatán hanesan neʼe?

JESUS nia dixípulu sira hakfodak bainhira rona Jesus hatete katak lakleur tan nia sei hasoru terus no mate. Dixípulu sira hanoin katak Jesus mak sei harii fali Izraél nia ukun. Tan neʼe apóstolu Pedro dehan: “Naʼi, hatudu laran-sadiʼa ba Ita-nia an. Susar sira-neʼe sei la kona Ita.” Maibé Jesus hatán: “Sees tiha husi haʼu, Satanás! Ó hanesan fatuk sidi nian ba haʼu tanba ó-nia hanoin la tuir Maromak nian, maibé tuir ema nian.”​—Mateus 16:21-23; Apóstolu 1:6.

² Jesus nia liafuan hatudu ho klaru katak, Jeová nia hanoin la hanesan duni ho mundu nia hanoin neʼebé Satanás kontrola daudaun. (1 João 5:19) Pedro anima Jesus atu hanoin an deʼit hanesan ema barak iha mundu neʼe. Maibé Jesus hatene Jeová nia hanoin la hanesan. Jeová hakarak Jesus prepara an hodi hasoru terus no mate neʼebé lakleur atu akontese ba nia. Jesus nia resposta hatudu ho klaru katak nia simu deʼit Jeová nia hanoin no lakohi simu mundu nia hanoin sira.

3. Tanbasá la fasil atu hanoin hanesan Jeová, maibé fasil atu hanoin tuir ema iha mundu?

 ³ Oinsá ho ita? Ita hanoin hanesan Jeová ka hanesan ema iha mundu? Ita hakaʼas an atu halo buat neʼebé Maromak simu. Maibé oinsá ho ita-nia hanoin? Ita troka ita-nia hanoin no atitude hodi sai hanesan Jeová nian ka lae? Presiza hakaʼas an atu bele halo nuneʼe. Maibé, fasil atu hanoin tuir ema iha mundu, tanba mundu nia hanoin mak haleʼu daudaun ita. (Éfeso 2:2) No mós ema iha mundu dala barak hanoin an deʼit, no neʼe bele sai tentasaun ba ita atu hanoin hanesan sira. Sin, la fasil atu hanoin hanesan Jeová, maibé fasil atu hanoin tuir ema iha mundu.

4. (a) Saida mak sei akontese se ita husik mundu influénsia ita-nia hanoin? (b) Ita sei koʼalia kona-ba saida iha lisaun neʼe?

⁴ Se ita mak husik mundu atu influénsia ita-nia hanoin, ita mós sei hanoin an deʼit no hakarak halo desizaun rasik kona-ba saida mak loos no sala. (Marcos 7:21, 22) Tan neʼe mak importante atu haburas hanoin “tuir Maromak nian” laʼós “tuir ema nian”. Lisaun neʼe sei ajuda ita atu haree tanbasá mak diʼak atu hanoin hanesan Jeová. No tanbasá halo nuneʼe sei la halakon ita-nia liberdade maibé lori benefísiu ba ita. Ita mós sei haree oinsá mak ita bele hasees an atu la husik mundu troka ita-nia hanoin. Iha lisaun tuirmai, ita sei aprende oinsá atu iha Jeová nia hanoin kona-ba buat oioin no oinsá halo Jeová nia hanoin sai ita-nian.

5. Tanbasá mak ema balu lakohi ema ida atu influénsia sira-nia hanoin?

⁵ Ema balu lakohi ema ida atu influénsia sira-nia hanoin. Sira dehan: “Haʼu bele hanoin rasik.” Karik sira koʼalia hanesan neʼe atu hatudu katak sira hakarak halo desizaun rasik no sira iha direitu atu halo nuneʼe. Sira lakohi ema seluk atu kontrola sira ka troka sira atu sai hanesan ema seluk. *

6. (a) Jeová fó liberdade saida ba ita? (b) Liberdade neʼe la iha limite ka lae?

⁶ Maski ita hanoin hanesan Jeová, neʼe la dehan katak ita lakon ona ita-nia liberdade atu fó sai opiniaun sira. 2 Korinto 3:17 hatete: “Iha fatin neʼebé iha Jeová nia espíritu, iha mós liberdade iha neʼebá.” Jeová fó liberdade ba ita atu haburas hahalok oioin. Ita bele hili rasik buat neʼebé tuir ita-nia hakarak no gosta atu halo. Neʼe mak dalan neʼebé Jeová kria ita. Maibé neʼe la hatudu katak ita iha liberdade neʼebé la iha limite. (Lee 1 Pedro 2:16.) Bainhira ita presiza hatene saida mak loos ka sala, Jeová hakarak ita uza ninia Liafuan atu dirije ita. Halo hanesan neʼe halakon ita-nia liberdade ka lori benefísiu ba ita?

7, 8. Haburas Jeová nia hanoin sei halakon ita-nia liberdade ka lae? Fó toʼok ezemplu.

⁷ Mai ita halo komparasaun ida kona-ba neʼe. Inan-aman hakaʼas an atu hanorin oan kona-ba morál neʼebé diʼak. Karik sira hanorin oan atu labele bosok, presiza badinas, no hanoin ema seluk. Buat neʼebé sira halo laʼós atu halakon oan nia liberdade, maibé atu prepara oan ba moris neʼebé susesu. Bainhira oan sira sai boot no muda husi uma, sira bele halo rasik sira-nia desizaun sira. Se sira hili atu moris tuir morál neʼebé  inan-aman hanorin ba sira, karik sira sei halo desizaun neʼebé diʼak no hasees an husi problema no susar oioin.

⁸ Hanesan inan-aman neʼebé diʼak, Jeová mós hakarak ninia oan sira atu iha moris neʼebé diʼak liu hotu. (Isaias 48:17, 18) Tan neʼe mak nia hanorin prinsípiu báziku ba ita kona-ba morál no ita-nia hahalok ba ema seluk. Nia konvida ita atu haburas ninia hanoin no moris tuir ninia morál sira. Neʼe la halakon ita-nia liberdade. Maibé ajuda ita atu haburas ita-nia kbiit atu hanoin. (Salmo 92:5; Provérbios 2:1-5; Isaias 55:9) Hodi halo nuneʼe ita bele halo desizaun neʼebé lori kontente ba ita. (Salmo 1:2, 3) Sin, iha Jeová nia hanoin lori benefísiu oioin ba ita.

9, 10. Saida mak hatudu katak Jeová nia hanoin diʼak liu fali mundu nian?

⁹ Razaun seluk tanbasá ita hakarak hanoin tuir Jeová mak, tanba ninia hanoin diʼak liu fali mundu nian. Mundu iha hanoin oioin kona-ba morál, moris família nian, serbisu neʼebé diʼak, no buat seluk tan. Maibé ideia sira-neʼe barak la tuir Jeová nia hanoin. Porezemplu, baibain mundu neʼe anima ema atu halo tuir deʼit sira rasik nia hakarak, no simu hahalok seksuál neʼebé la tuir morál. Dala ruma sira hatete katak feen-laʼen la presiza atu iha razaun diʼak mak bele haketak-malu ka soe-malu se halo nuneʼe bele halo sira kontente liután. Ideia neʼe kontra duni Bíblia nia hanorin. Maibé iha ideia balu husi mundu neʼebé diʼak ba ita ohin loron ka lae?

¹⁰ Jesus hatete: “Ema hatudu sai ninia matenek liuhusi ninia hahalok loos.” (Mateus 11:19) Maski mundu nia teknolojia laʼo ba oin, maibé labele rezolve problema oioin neʼebé hanetik ema atu hetan kontente, hanesan funu, diskriminasaun, no krime. Oinsá mundu nia hanoin kona-ba sala seksuál? Ema barak rekoñese katak sala seksuál sobu família, lori moras, no problema aat seluk tan. Oinsá kona-ba Jeová nia hanoin? Ema Kristaun neʼebé halo tuir Jeová nia hanoin halaʼo moris família neʼebé kontente liu, iha saúde neʼebé diʼak liu, no iha dame ho irmaun-irmán sira iha mundu tomak. (Isaias 2:4; Apóstolu 10:34, 35; 1 Korinto 6:9-11) Ida-neʼe hatudu ho klaru katak Jeová nia hanoin mak diʼak liu fali mundu nian.

11. Sé mak dirije Moisés nia hanoin, no neʼe lori rezultadu saida?

¹¹ Jeová nia atan sira iha tempu uluk hatene katak Jeová nia hanoin mak diʼak liu hotu. Porezemplu, maski “Moisés simu hanorin tuir ema Ejitu nia matenek hotu”, nia hatene katak matenek neʼebé loos mai husi Jeová. (Apóstolu 7:22; Salmo 90:12) Tan neʼe nia halo orasaun ba Jeová hodi husu: “Halo haʼu hatene Ita-nia dalan sira.” (Éxodo 33:13) Tanba Moisés husik Jeová atu dirije ninia hanoin, Jeová uza nia hodi kumpre Jeová nia hakarak no temi nia iha Eskritura nuʼudar ema neʼebé iha fiar boot.​—Ebreu 11:24-27.

12. Paulo nia desizaun sira bazeia ba saida?

¹² Apóstolu Paulo mak ema neʼebé matenek tebes, hetan edukasaun diʼak, no hatene koʼalia lian Ebraiku no Gregu. (Apóstolu 5:34; 21:37, 39; 22:2, 3) Maibé nia la tuir mundu nia matenek. Nia foti desizaun tuir Maromak nia Liafuan. (Lee Apóstolu 17:2; 1 Korinto 2:6, 7, 13.) Rezultadu mak nia hetan susesu iha  serbisu haklaken no hein namanas atu simu kolen rohan-laek nian.​—2 Timóteo 4:8.

13. Sé mak iha responsabilidade atu troka ita-nia hanoin tuir Maromak nia hanoin?

¹³ Maromak nia hanoin diʼak liu mundu nian. Moris tuir Maromak nia hanoin sei lori kontente no susesu neʼebé boot liu hotu. Maibé Jeová la obriga ita atu hanoin hanesan nia. “Atan laran-metin no matenek” la kontrola ita-nia hanoin, katuas sira mós lae. (Mateus 24:45; 2 Korinto 1:24) Ema Kristaun ida-idak iha responsabilidade atu troka ninia hanoin tuir Maromak nia hanoin. Oinsá mak ita bele halo nuneʼe?

14, 15. (a) Ita tenke medita kona-ba saida atu bele hanoin hanesan Jeová? (b) Tanbasá ladiʼak atu hanoin kona-ba mundu nia ideia sira? Fó toʼok ezemplu.

¹⁴ Roma 12:2 hatete: “Keta halo tuir mundu ohin neʼe, maibé troka imi-nia an hodi hafoun imi-nia hanoin, atu nuneʼe imi bele hatene loloos kona-ba Maromak nia hakarak neʼebé diʼak no perfeitu no halo Maromak kontente.” Eskritura neʼe ajuda ita hodi haree katak, maski antes aprende lia-loos ita iha ona mundu nia hanoin, maibé ita bele troka ita-nia hanoin hodi tuir Maromak nian. Dala ruma ita-nia família ka esperiénsia moris nian bele fó influénsia ba ita-nia hanoin, maibé ita-nia neon laʼós buat neʼebé maten no bele troka beibeik. Dala barak ita-nia neon troka tanba ita hili atu hanoin beibeik buat ruma. Tan neʼe, se ita medita kona-ba Jeová nia hanoin, ita bele haree rasik katak Jeová nia hanoin sempre loos. Ikusmai ita sei hakarak atu iha hanoin hanesan Jeová nian.

¹⁵ Maibé atu hafoun ita-nia neon tuir Jeová nia hanoin, ita tenke hasees an atu la “halo tuir mundu ohin neʼe”. Ita tenke para husi haree, lee, no rona ideia sira neʼebé kontra Maromak nia hanoin. Atu komprende tanbasá halo nuneʼe importante, mai ita kompara ida-neʼe hanesan ai-han. Ema neʼebé hakarak iha saúde neʼebé diʼak, karik deside atu han ai-han neʼebé diʼak. Maibé se nia mós han beibeik hahán neʼebé dodok ona, ninia hakaʼas an atu iha saúde diʼak sei sai saugati deʼit. Hanesan neʼe mós se ita hanoin kona-ba mundu nia ideia sira, ita-nia hakaʼas-an atu aprende Jeová nia hanoin sei sai saugati deʼit.

16. Ita presiza proteje ita-nia an husi saida?

¹⁶ Ita bele hasees an husi mundu nia ideia hotu ka lae? Labele, tanba ita moris iha mundu neʼe, ita haree ka rona nafatin ideia balu husi mundu neʼe. (1 Korinto 5:9, 10) Iha serbisu haklaken ita rona beibeik ema fó sai ideia no fiar neʼebé sala. Maibé, maski ita labele hasees an husi ideia sala sira-neʼe hotu, ita la presiza hanoin beibeik ka simu ideia sira-neʼe. Hanesan Jesus, ita lakohi duni atu simu hanoin sira neʼebé Satanás hakarak ita atu iha. No ita mós bele proteje ita-nia an hodi la gasta tempu atu hanoin beibeik kona-ba mundu nia hanoin.​—Lee Provérbios 4:23.

17. Oinsá mak ita bele hasees an atu mundu nia hanoin la kona ita?

¹⁷ Porezemplu, ita tenke kuidadu kona-ba hili belun. Bíblia fó avizu katak, se ita sai belun ho ema neʼebé la adora Jeová, sira-nia hanoin neineik-neineik sei kona ita. (Provérbios 13:20; 1 Korinto 15:12, 32, 33) Ita mós tenke kuidadu kona-ba hili atividade halimar nian. Ita tenke hasees an atu la haree programa sira neʼebé apoia evolusaun,  violénsia, ka sala seksuál. Ita lakohi estraga ita-nia neon ho ideia sira neʼebé “kontra koñesimentu kona-ba Maromak”.​—2 Korinto 10:5.

18, 19. (a) Tanbasá mak ita tenke kuidadu kona-ba mundu nia ideia sira neʼebé fó sai iha dalan neʼebé subasubar? (b) Ita tenke husu pergunta saida deʼit ba ita-nia an, no tanbasá?

¹⁸ Ita mós tenke rekoñese no la simu mundu nia ideia sira neʼebé fó sai iha dalan neʼebé subasubar. Porezemplu, notísias balu fó sai informasaun neʼebé apoia opiniaun polítika nian. Balu tan fó sai ideia neʼebé apoia mundu nia planu sira no buat seluk tan neʼebé mundu halo ona. Filme no livru balu fó apoiu ba hanoin neʼebé “tau uluk ita-nia an” ka “tau uluk família” no sira book ema atu hanoin katak halo buat sira-neʼe la sala. Maibé ideia sira-neʼe halo ema haluha Bíblia nia hanorin katak, se ita no ita-nia família hadomi Jeová liu buat hotu, ita sei hetan kontente neʼebé loos. (Mateus 22:36-39) No mós istória balu ba labarik sira, maski barak diʼak, maibé karik istória sira-neʼe bele fó sai informasaun subasubar neʼebé book labarik sira simu hahalok neʼebé la morál.

¹⁹ La sala atu hili atividade halimar nian neʼebé diʼak. Maibé diʼak atu husu ba ita-nia an: ‘Haʼu rekoñese mundu nia ideia sira neʼebé fó sai subasubar ka lae? Haʼu proteje daudaun haʼu-nia oan no haʼu-nia an atu la haree programa balu husi televizaun ka la lee livru balu ka lae? Bainhira haʼu-nia oan hetan influénsia husi mundu haʼu ajuda nia atu iha hanoin hanesan Jeová ka lae?’ Se ita mak rekoñese diferensa entre Maromak nia hanoin ho mundu nia hanoin, ita bele hasees an atu la “halo tuir mundu ohin neʼe”.

20. Atu iha Jeová nia hanoin ka mundu nia hanoin depende ba saida?

²⁰ Hanoin-hetan katak informasaun sira-nia hun iha rua deʼit, ida mak Jeová no ida seluk husi Satanás no ninia mundu. Sé mak troka daudaun ita-nia hanoin? Resposta depende ba ita simu informasaun husi neʼebé. Se ita simu mundu nia ideia sira, mundu sei troka ita-nia hanoin no ita sei hanoin no hatudu hahalok hanesan ema iha mundu neʼe. Tan neʼe importante tebes atu hili ho kuidadu kona-ba buat neʼebé ita atu haree, lee, rona, no hanoin.

21. Ita sei koʼalia kona-ba saida iha lisaun tuirmai?

²¹ Hanesan ita aprende ona atu iha Jeová nia hanoin ita tenke hasees an husi influénsia neʼebé ladiʼak. Ita mós tenke medita kona-ba Maromak nia hanoin atu ninia hanoin bele sai ita-nian. Iha lisaun tuirmai ita sei aprende oinsá atu bele halo nuneʼe.