1. Tanbasá mak ita hotu presiza hetan kmaan?

ITA hotu presiza hetan kmaan. Karik tanba ita-nia moris nakonu ho problema oioin, laran-kraik, no laran-taridu. Ka karik ita hasoru daudaun susar tanba moras, idade aumenta, ka ema ruma neʼebé ita hadomi mate. Ema balu hetan terus husi ema seluk. No mós hahalok violénsia aumenta liután. Tempu susar sira-neʼe hatudu duni katak ita moris daudaun “iha loron ikus sira”, no loron ida-idak neʼebé liu lori ita besik liután ba mundu foun. (2 Timóteo 3:1) Maibé karik ita hein ona ba tempu kleur atu haree Jeová nia promesa sira atu sai loos, no ita-nia susar sira aumenta liután. Entaun, ita bele hetan kmaan husi neʼebé?

2, 3. (a) Ita hatene informasaun saida deʼit kona-ba Habakuk? (b) Tanbasá mak diʼak atu koʼalia kona-ba livru Habakuk?

² Atu hatene resposta, mai ita koʼalia kona-ba livru Habakuk. Maski eskritura sira la fó sai informasaun barak kona-ba Habakuk nia moris no atividade sira neʼebé nia halo, maibé livru neʼebé nia hakerek lori kmaan ba ita. Karik ninia naran signifika “Hakoʼak ho laran”. Neʼe bele refere ba dalan neʼebé Jeová fó kmaan mai ita, ka bele mós refere ba dalan neʼebé ita kaer metin ba nia. Habakuk koʼalia ba Jeová no husu pergunta  oioin. Jeová hatán ninia pergunta sira no uza espíritu santu hodi book profeta neʼe hakerek buat neʼebé nia koʼalia ho Habakuk tanba Jeová hatene katak neʼe sei lori benefísiu mai ita.​—Habakuk 2:2.

³ Bíblia la fó sai informasaun seluk kona-ba Habakuk só deʼit buat neʼebé nia hatete ba Jeová bainhira nia sente estrese. Maibé livru neʼebé Habakuk hakerek, sai parte ida ba “buat hotu neʼebé hakerek ona horiuluk kedas” iha Maromak nia Liafuan, “neʼe fó ita esperansa tanba Eskritura sira-neʼe ajuda ita atu tahan no fó kmaan mai ita”. (Roma 15:4) Oinsá mak livru Habakuk bele ajuda ita ida-idak? Livru neʼe ajuda ita atu hatene tau fiar ba Jeová katak sá. No Habakuk nia profesia fó fiar ba ita katak, maski ita hasoru problema ka susar naran deʼit, ita bele iha neon neʼebé hakmatek.

4. Tanbasá mak Habakuk sente estrese?

⁴ Lee Habakuk 1:2, 3. Habakuk moris iha tempu neʼebé susar tebes. Ema barak iha tempu neʼebá hatudu hahalok aat no violénsia, tan neʼe nia sente triste tebes. Nia haree ema Izraél sira trata malu iha dalan neʼebé aat no la iha justisa. Habakuk hanoin: ‘Hahalok aat sira-neʼe toʼo bainhira? Tanbasá mak Jeová demora no la halo buat ruma?’ Habakuk sente lakon ona esperansa. Tan neʼe nia husu makaʼas ba Jeová atu hadiʼa situasaun neʼe. Karik Habakuk komesa hanoin katak Jeová la iha ona interese ba ninia povu ka Jeová demora liu. Dala ruma, Ita mós sente ona hanesan neʼe ka lae?

5. Ita bele aprende lisaun importante saida husi livru Habakuk? (Haree dezeñu iha leten.)

⁵ Habakuk husu pergunta sira-neʼe tanba nia la tau fiar ona ba Jeová no Jeová nia promesa sira ka lae? Lae. Tuir loloos nia husu Jeová atu ajuda nia kona-ba ninia dúvida no problema sira. Ida-neʼe hatudu katak nia seidauk lakon esperansa maibé tau fiar nafatin ba Jeová. Habakuk hanoin barak tanba nia seidauk komprende tanbasá Jeová demora no husik nia hasoru terus sira-neʼe. Tan neʼe Jeová uza espíritu santu hodi book Habakuk atu hakerek nia problema sira, atu nuneʼe ita bele aprende lisaun importante husi livru Habakuk. Lisaun importante mak Jeová lakohi ita sente taʼuk atu fó sai ita-nia problema ka dúvida ba nia. Tuir loloos nia konvida ita atu halo orasaun atu fakar sai ita-nia laran ba nia. (Salmo 50:15; 62:8) Provérbios 3:5 anima ita: “Tau fiar ba Jeová ho ó-nia laran tomak, no labele sadere ba ó-nia matenek rasik.” Habakuk aplika duni liafuan sira-neʼe iha ninia moris.

6. Tanbasá mak importante atu halo orasaun?

⁶ Habakuk hakbesik ba ninia Belun no Aman, Jeová, neʼebé nia tau fiar. Habakuk la estrese deʼit kona-ba ninia situasaun no koko atu hadiʼa rasik. Nia halo orasaun ba Jeová kona-ba ninia sentimentu no problema sira. Neʼe mak ezemplu neʼebé diʼak ba ita. Jeová mak Maromak neʼebé rona ba orasaun, nia konvida ita atu hatudu ita-nia fiar ba nia liuhusi halo orasaun no fó sai buat neʼebé iha ita-nia laran. (Salmo 65:2) Se ita halo nuneʼe, ita bele haree oinsá Jeová hatán ita-nia orasaun sira. Ita sei sente kmaan husi ninia liman neʼebé hakoʼak ita liuhusi ninia matadalan. (Salmo 73:23, 24) Nia sei ajuda ita hatene oinsá nia haree ita-nia situasaun maski ita hasoru daudaun susar ruma. Orasaun mak dalan neʼebé diʼak tebes atu hatudu katak ita tau fiar ba Jeová.

7. Jeová sente oinsá kuandu Habakuk fó sai ninia problema sira?

⁷ Lee Habakuk 1:5-7. Bainhira Habakuk fó sai tiha ba Jeová kona-ba ninia problema sira, karik nia hanoin Jeová sei sente oinsá. Jeová la sai hirus tanba nia mak Aman neʼebé nakonu ho domin, nia komprende kona-ba Habakuk nia sentimentu. Nia hatene katak Habakuk hasoru daudaun terus no husu ajuda. Tan neʼe, Jeová fó sai ba Habakuk katak lakleur tan nia sei fó kastigu ba ema Judeu sira neʼebé la laran-metin. Karik Habakuk mak ema primeiru neʼebé Jeová fó-hatene katak jerasaun neʼebé halo violénsia lakleur tan sei lakon.

8. Tanbasá mak Habakuk hakfodak kona-ba Jeová nia resposta?

⁸ Jeová esplika ba Habakuk katak nia prontu ona atu halo buat ruma. Nia sei fó kastigu ba ema iha Judá neʼebé hatudu hahalok aat no violénsia. Jeová uza liafuan “iha imi-nia tempu” hodi hatudu katak ninia loron tesi-lia nian sei mai durante Habakuk nia moris ka ema Izraél sira neʼebé moris iha tempu maizumenus hanesan ho Habakuk. Habakuk hakfodak kona-ba Jeová nia resposta, tanba buat neʼebé Jeová fó sai hatudu katak ema hotu iha Judá sei hetan terus makaʼas liután. Ema Kaldeia (katak ema Babilónia) mak ema neʼebé siʼak tebes no sira halo violénsia makaʼas liu fali ema Izraél sira neʼebé hatene Jeová nia lei sira. Entaun, tanbasá mak Jeová uza nasaun jentiu neʼebé siʼak tebes atu fó kastigu ba ninia povu? Se Ita mak Habakuk, Ita sei sente oinsá?

9. Karik Habakuk husu pergunta saida tan?

⁹ Lee Habakuk 1:12-14, 17. Maski Habakuk hatene ona katak Jeová sei uza ema Babilónia atu fó kastigu ba ema aat sira iha Judá, nia sei konfuzaun. Maibé ho haraik an nia hatete ba Jeová katak Jeová sai nafatin ninia “Fatuk Boot”. (Deuteronómio 32:4; Isaias 26:4) Habakuk kontinua hatudu fiar katak Jeová mak Maromak neʼebé domin no laran-diʼak, tan neʼe nia la sente taʼuk atu husu pergunta seluk tan ba Jeová, hanesan: Tanbasá mak Jeová husik situasaun iha Judá sai aat liután no ninia povu hasoru terus liután? Tanbasá mak nia la halo kedas buat ruma? Tanbasá mak Maromak neʼebé Kbiit Boot Liu Hotu “nonook deʼit” bainhira ema aat iha fatin hotu? Jeová mak “Maromak neʼebé Santu”, no ninia “matan mak santu liu atu hateke ba buat neʼebé aat”.

10. Hanesan Habakuk, karik dala ruma ita sente oinsá?

¹⁰ Karik dala ruma ita mós sente hanesan Habakuk. Ita rona ba Jeová. Tau fiar tomak ba nia, lee no estuda ninia Liafuan neʼebé fó esperansa ba ita. Ita mós rona kona-ba ninia promesa sira liuhusi hanorin neʼebé ninia organizasaun fó sai ba ita. Maibé karik ita sei nafatin hanoin: ‘Ita sei terus toʼo bainhira?’ Saida mak ita bele aprende husi buat neʼebé Habakuk halo tuirmai?

11. Habakuk hakarak tebes atu halo saida?

¹¹ Lee Habakuk 2:1. Kuandu Habakuk koʼalia hotu tiha ho Jeová nia sente neon hakmatek. Tan neʼe, Habakuk hakarak tebes atu hein ba Jeová atu halo buat ruma. Habakuk repete ninia hakarak neʼe hodi dehan: “Haʼu sei kalma nafatin hodi hein ba loron susar nian.” (Habakuk 3:16) Maromak nia atan seluk neʼebé laran-metin mós hein ho pasiénsia ba Jeová. Sira-nia ezemplu  fó laran-manas ba ita atu la rende an hodi hein ba Jeová atu halo buat ruma.​—Miqueias 7:7; Tiago 5:7, 8.

12. Ita bele aprende saida husi Habakuk?

¹² Ita bele aprende saida husi Habakuk nia ezemplu? Primeiru, ita tenke halo orasaun beibeik ba Jeová no fó sai ita-nia problema hotu ba nia. Segundu, ita presiza rona no halo tuir buat neʼebé Jeová hatete ba ita liuhusi ninia Liafuan no organizasaun. No terseiru, ita presiza hein ho pasiénsia ba Jeová no tau fiar katak nia sei halakon ita-nia susar sira iha tempu neʼebé nia deside ona. Se ita halo orasaun ho laran ba Jeová, rona ba nia no hein ho pasiénsia, hanesan Habakuk, ita sei iha neon neʼebé hakmatek hodi tahan. Ita-nia esperansa bele ajuda ita atu hatudu pasiénsia no kontente maski hasoru daudaun problema sira. Ita iha konfiansa katak ita-nia Aman iha lalehan sei ajuda ita.​—Roma 12:12.

13. Oinsá mak Jeová fó kmaan ba Habakuk?

¹³ Lee Habakuk 2:3. Ita fiar katak Jeová kontente ho Habakuk nia desizaun atu hein ba nia. Maromak Kbiit Boot Liu Hotu hatene ho klaru terus neʼebé Habakuk hasoru, tan neʼe ho domin nia fó kmaan ba Habakuk katak nia sei fó resposta ba Habakuk nia pergunta sira. Lakleur tan, Jeová sei fó kmaan ba Habakuk. Buat neʼebé Jeová halo hanesan atu hatete ba Habakuk: “Pasiénsia deʼit no tau fiar mai haʼu. Haʼu sei hatán ó-nia orasaun sira, maski haree hanesan kleur uitoan.” Jeová fó-hanoin ba Habakuk katak nia deside ona iha tempu saida mak nia sei halo ninia promesa sira sai loos. Tan neʼe nia husu Habakuk atu kontinua hein. Profeta neʼe bele tau fiar duni ba Jeová.

14. Ita hakarak halo saida kuandu hasoru susar?

¹⁴ Hein ho pasiénsia ba Jeová no rona didiʼak ba buat neʼebé nia hatete mai ita bele hametin ita-nia fiar no ajuda ita atu sente neon hakmatek maski hasoru daudaun susar sira. Jesus anima ita atu la fokus liu ba “oras no tempu” neʼebé Jeová seidauk fó sai ba ita. (Apóstolu 1:7) Ita presiza tau fiar katak Jeová hatene tempu neʼebé diʼak atu halo buat ruma. Tan neʼe, keta rende an. Maibé hatudu haraik an, fiar, no pasiénsia. Uza didiʼak ita-nia tempu atu serbí Jeová ho laran tomak.​—Marcos 13:35-37; Galásia 6:9.

15, 16. (a) Livru Habakuk temi promesa saida deʼit? (b) Promesa sira-neʼe hanorin saida mai ita?

¹⁵ Jeová promete: “Ema laran-loos sei moris tanba ninia laran-metin” no “mundu tomak sei nakonu ho koñesimentu kona-ba Jeová nia glória”. (Habakuk 2:4, 14) Sin, Jeová promete atu fó moris rohan-laek ba ema neʼebé hatudu pasiénsia no tau fiar ba nia.

¹⁶ Promesa neʼebé temi iha Habakuk 2:4 importante tebes toʼo apóstolu Paulo temi ida-neʼe dala tolu iha ninia karta sira. (Roma 1:17; Galásia 3:11; Ebreu 10:38) Ita bele fiar katak, problema saida deʼit neʼebé ita hasoru, naran katak ita hatudu laran-metin ba Jeová, ita sei haree ninia promesa sira sai loos. Jeová hakarak ita atu tau fokus ba ita-nia esperansa kona-ba futuru.

17. Livru Habakuk fó sai promesa saida mai ita?

¹⁷ Livru Habakuk hanorin lisaun importante tebes ba ita neʼebé moris iha loron ikus sira-neʼe. Jeová promete atu fó  moris rohan-laek ba ema laran-loos neʼebé tau fiar ba nia. Tan neʼe, mai ita kontinua hametin ita-nia fiar ba Maromak maski ita hasoru daudaun susar no problema oioin. Buat neʼebé Jeová koʼalia ba Habakuk hatudu katak nia sei apoia no salva ita. Jeová hatudu laran-diʼak hodi husu ita atu tau fiar ba nia no hein ho pasiénsia ba tempu neʼebé nia deside ona atu lori ninia Ukun hodi ukun mundu tomak. Iha tempu neʼebá mundu sei sai nakonu ho ema neʼebé kontente no dame, ema neʼebé adora Jeová.​—Mateus 5:5; Ebreu 10:36-39.

18. Jeová nia liafuan fó impaktu saida ba Habakuk?

¹⁸ Lee Habakuk 3:16-19. Jeová nia liafuan fó impaktu boot ba Habakuk. Nia medita kona-ba buat furak sira neʼebé uluk Jeová halo ba ninia povu. Agora ninia fiar ba Jeová sai metin liután. Nia hatene katak lakleur tan Jeová sei halo buat ruma. Neʼe fó kmaan ba profeta neʼe, maski nia hatene katak, karik nia sei hasoru terus ba tempu balu tan. Habakuk la duvida tan. Nia tau fiar tomak katak Jeová sei salva nia. Liafuan neʼebé Habakuk temi iha versíkulu 18 mak liafuan neʼebé furak tebes kona-ba fiar. Matenek-naʼin balu hatete katak liafuan neʼe signifika: “Haʼu sei haksoit ho haksolok tanba Naʼi; haʼu sei dansa hadulas tanba haksolok ho Maromak.” Versíkulu 16-19 hanorin lisaun importante tebes ba ita. Jeová halo promesa furak oioin ba ita kona-ba futuru, nia mós fó fiar ba ita katak lakleur nia sei kumpre promesa sira-neʼe.

19. Oinsá mak ita bele hetan kmaan hanesan Habakuk?

¹⁹ Lisaun importante neʼebé ita aprende husi livru Habakuk mak atu tau fiar ba Jeová. (Habakuk 2:4) Ita presiza hametin ita-nia relasaun ho Jeová atu bele kontinua tau fiar ba nia. Tan neʼe ita tenke (1) Halo orasaun beibeik ba Jeová no fó sai ita-nia problema hotu ba nia. (2) Rona no halo tuir buat neʼebé Jeová hatete ba ita liuhusi ninia Liafuan no organizasaun. (3) Hatudu laran-metin no hein ho pasiénsia ba Jeová. Habakuk halo nuneʼe. Maski foufoun nia sente estrese kuandu nia foin koʼalia ba Jeová, maibé ikusmai nia sente kmaan fali no kontente. Se ita halo tuir Habakuk, ita mós sei hetan kmaan husi Jeová, ita-nia Aman iha lalehan. Neʼe mak kmaan neʼebé boot liu hotu iha mundu nakukun neʼe.