1, 2. (a) Saida mak la hanesan kona-ba Jeová nia povu nia esperansa no mundu nia esperansa? (b) Ita sei koʼalia kona-ba pergunta importante saida deʼit?

JEOVÁ fó ita esperansa neʼebé furak tebes kona-ba futuru. Nia promete katak nia sei halo ninia naran sai santu no kumpre ninia hakarak hotu kona-ba lalehan no rai. (Mateus 6:9, 10) Neʼe mak esperansa furak liu neʼebé ita hotu hein ho namanas atu sai loos. Jeová mós promete katak nia sei fó moris rohan-laek ba ema kose-mina atu moris iha lalehan no bibi seluk atu moris iha rai. (João 10:16; 2 Pedro 3:13) Nuʼudar ita hein, ita mós hakarak atu haree oinsá mak Jeová dirije no tau matan ba ninia povu iha loron ikus sira-neʼe.

² Ema neʼebé la adora Jeová mós iha esperansa, maibé sira la hatene ho loloos kona-ba sira-nia esperansa neʼe bele sai realidade ka lae. Porezemplu, iha ema rihun ba rihun neʼebé joga osan hein katak sira bele manán, maibé la iha ema ida mak hatene katak sira sei manán duni. Maibé ema neʼebé iha fiar ba Jeová, sira fiar metin katak buat hotu neʼebé nia promete ona sei sai loos. (Ebreu 11:1) Saida mak bele hametin ita-nia fiar ba Jeová nia promesa sira? No tanbasá mak ita presiza iha fiar neʼebé metin kona-ba buat neʼebé Jeová promete? Lisaun neʼe sei koʼalia kona-ba pergunta sira-neʼe.

3. Tanbasá mak ita fiar katak Maromak nia promesa hotu sei sai loos?

³ La iha ema ida mak moris mai iha kedas fiar. Tanba fiar mak  hahalok neʼebé mai husi espíritu santu. No espíritu santu mak loke ita-nia laran hodi haburas hahalok neʼe. (Galásia 5:22) Bíblia la temi katak Jeová iha fiar ka nia presiza fiar, tanba nia mak Maromak neʼebé aas liu hotu no nia hatene buat hotu. La iha buat ida mak bele hapara nia atu kumpre ninia hakarak. Bainhira ita-nia Aman lalehan nian promete buat ida, nia la iha duvida katak ninia promesa neʼe sei sai loos. Tan neʼe mak nia dehan: “Buat sira-neʼe sai loos ona!” (Lee Apokalipse 21:3-6.) Ita hatene katak buat neʼebé Jeová hatete atu halo iha futuru, nia sempre kumpre ninia liafuan neʼe, tanba nia mak Maromak neʼebé ita bele tau fiar.—Deuteronômio (Ulangan) 7:9.

4. Maromak nia povu iha tempu antigu iha esperansa saida?

⁴ Livru Ebreu kapítulu 11 fó lista kona-ba ema naʼin-16 nia naran neʼebé fiar metin. Livru neʼe mós temi ema seluk tan neʼebé halo Jeová kontente “tanba sira-nia fiar”. (Ebreu 11:39) Sira hotu hein ba “bei-oan” nia ukun neʼebé Jeová promete. Sira fiar katak bei-oan neʼe mak sei halakon hotu Maromak nia inimigu sira no atu halo mundu sai fali paraízu. (Gênesis [Kejadian] 3:15) Ema sira neʼebé livru Ebreu temi, mate hotu ona, maibé Jeová sei halo sira moris hiʼas fali. Sira sei la bá lalehan tanba iha tempu neʼebé sira mate, “bei-oan” neʼe ka Jesus Kristu seidauk loke dalan ba ema atu bele moris hiʼas ba lalehan. (Galásia 3:16) Tan neʼe, ema sira-neʼe sei hetan moris-hiʼas atu moris iha paraízu furak iha rai ba nafatin.—Salmo (Mazmur) 37:11; Isaías (Yesaya) 26:19; Oséias (Hosea) 13:14.

5, 6. Abraão no ninia família iha esperansa kona-ba saida, no sira halo saida hodi bele iha fiar neʼebé metin? (Haree dezeñu iha pájina 21.)

⁵ Ebreu 11:13 koʼalia kona-ba fiar-naʼin sira iha tempu antigu hodi dehan: “Ema sira-neʼe hotu mate iha fiar; no maski sira la haree promesa sira-neʼe sai loos, maibé sira haree neʼe husi dook no haksolok ho promesa sira-neʼe.” Husi ema sira-neʼe, ida mak Abraão. Jesus dehan: “Abraão haksolok tebes ho esperansa atu haree haʼu-nia loron.” (João 8:56) Sara, Isaac, Jacob, no ema seluk tan mós hein atu haree tempu neʼebé Maromak nia Governu sei ukun iha futuru.—Ebreu 11:8-11.

⁶ Abraão no ninia família halo saida hodi bele iha fiar neʼebé metin? Sira aprende beibeik kona-ba Jeová. Dala ruma Maromak koʼalia ba sira liuhusi anju, vizaun, ka mehi. Karik sira mós aprende husi fiar-naʼin seluk ka husi livru antigu balu. Sira nunka haluha kona-ba Maromak nia promesa, no sira medita beibeik kona-ba promesa sira-neʼe. Tanba sira iha fiar neʼebé metin, sira aten-brani atu hasoru susar no terus naran deʼit hodi bele laran-metin ba Jeová.

7. Jeová fó saida deʼit ba ita atu hametin ita-nia fiar, no ita tenke halo saida?

⁷ Ohin loron, Jeová fó Bíblia neʼebé kompletu ba ita atu ajuda ita hodi iha fiar neʼebé metin. Liuhusi Bíblia Jeová hanorin ita oinsá atu halaʼo moris neʼebé kontente. Tan neʼe mak ita presiza lee Maromak nia Liafuan loroloron, no halo tuir ninia matadalan sira. (Salmo [Mazmur] 1:1-3; lee Apóstolu 17:11.) Jeová mós fó ita “ai-han iha tempu loloos” liuhusi “atan laran-metin no matenek”. (Mateus 24:45) Ita tenke halo tuir fiar-naʼin husi tempu antigu hodi lee no medita beibeik kona-ba Maromak nia promesa sira. Halo nuneʼe bele ajuda ita atu laran-metin ba Jeová, no tau esperansa ba tempu neʼebé Maromak nia Governu sei ukun mundu tomak.

8. Oinsá mak orasaun bele hametin ita-nia fiar?

⁸ Halo orasaun mós bele ajuda ita atu iha  fiar neʼebé metin. Fiar-naʼin husi tempu antigu halo orasaun beibeik ba Maromak no bainhira nia hatán sira-nia orasaun, neʼe hametin liután sira-nia fiar. (Neemias 1:4, 11; Salmo [Mazmur] 34:4, 15, 17; Daniel 9:19-21) Ohin loron, ita mós bele halo orasaun ba Jeová no ita fiar katak nia sei hatán ita-nia orasaun. Bainhira Jeová hatán duni ita-nia orasaun iha tempu neʼebé loos, neʼe hametin liután ita-nia fiar. (Lee 1 João 5:14, 15.) No tanba fiar mak hahalok ida neʼebé mai husi espíritu santu, tan neʼe diʼak atu husu beibeik Maromak nia espíritu santu hodi ita bele iha fiar boot liután.—Lucas 11:9, 13.

9. Ita tenke halo orasaun kona-ba saida deʼit?

⁹ Bainhira halo orasaun, ita lakohi husu deʼit Jeová hodi fó buat neʼebé ita presiza. Ita mós tenke fó agradese no hahiʼi nia kona-ba buat furak oioin neʼebé nia kria ba ita. (Salmo [Mazmur] 40:5) Ita presiza halo orasaun kona-ba irmaun-irmán sira iha mundu tomak. Porezemplu, ita presiza hanoin kona-ba “sira neʼebé iha dadur laran”, no mós sira neʼebé dirije ita. Se ita mak haree Jeová hatán ba ita-nia orasaun sira-neʼe, neʼe sei halo ita fiar liután no hakbesik ba nia.—Ebreu 13:3, 7.

10. Saida mak ajuda fiar-naʼin sira hatudu aten-brani hodi laran-metin ba Maromak?

¹⁰ Iha Ebreu kapítulu 11, apóstolu Paulo koʼalia mós kona-ba fiar-naʼin balu neʼebé tahan ona hasoru susar oioin, nia dehan: “Feto sira simu fali sira-nia família neʼebé mate ona liuhusi moris-hiʼas; maibé mane seluk hetan terus tanba sira lakohi husik sira-nia fiar hodi sai livre, basá sira buka atu hetan moris-hiʼas neʼebé diʼak liu.” (Ebreu 11:35) Ema barak tahan hasoru susar hodi laran-metin nafatin ba Jeová tanba sira iha fiar neʼebé metin kona-ba moris-hiʼas. Sira fiar katak iha futuru Jeová sei halo sira moris fali no fó moris rohan-laek ba sira. Karik apóstolu Paulo hanoin kona-ba ema hanesan Nabot no Zacarias. Ema tuda sira toʼo mate tan deʼit sira hakarak halo tuir Jeová. (1 Reis [Raja-Raja] 21:3, 15; 2 Crônicas [Tawarikh] 24:20, 21) Daniel ema soe ba leaun nia kuak, no ninia belun sira ema soe ba ahi laran. Sira brani atu fó an ba mate duké husik sira-nia laran-metin ba Jeová. Sira hatudu duni fiar neʼebé metin katak Jeová sei fó ninia espíritu santu ba sira hodi ajuda sira tahan hasoru terus sira-neʼe.—Ebreu 11:33, 34; Daniel 3:16-18, 20, 28; 6:13, 16, 21-23.

11. Tanba fiar, profeta balu tenke hasoru terus saida deʼit?

¹¹ Profeta balu hanesan Mikaias, no Jeremias, “simu terus tanba ema hamoe sira . . . no hatama iha dadur”. Seluk tan hanesan Elias, “laʼo bá-mai iha rai-fuik no iha foho sira no iha fatuk-kuak no rai-kuak sira”. Sira hotu tahan hasoru terus tanba sira ‘laran-metin katak sira-nia esperansa sei sai loos’.—Ebreu 11:1, 36-38; 1 Reis (Raja-Raja) 18:13; 22:24-27; Jeremias (Yeremia) 20:1, 2; 28:10, 11; 32:2.

12. Sé mak hatudu ezemplu neʼebé diʼak liu kona-ba tahan terus, no saida mak ajuda nia hodi tahan?

¹² Jesus Kristu tahan hasoru terus neʼebé boot liu hotu hodi laran-metin ba Jeová. Saida mak ajuda nia hodi bele tahan? Apóstolu Paulo dehan: “Tanba ksolok neʼebé tau ona iha nia oin, nia tahan iha ai-riin terus nian hodi la sente moe, no tuur ona iha Maromak nia kadunan nia sorin loos.” (Ebreu 12:2) Tuirmai apóstolu Paulo fó laran-manas ba ema kristaun atu “hanoin didiʼak” kona-ba Jesus nia ezemplu bainhira hetan terus ruma. (Lee Ebreu 12:3.) Iha tempu neʼebá, ema kristaun barak mós hanesan Jesus, sira mate tan deʼit hakarak hatudu laran-metin ba Jeová, ema ida husi sira mak naran Ántipas. (Apokalipse 2:13)  Ema kristaun sira-neʼe simu ona “moris-hiʼas neʼebé diʼak liu” fali fiar-naʼin sira iha tempu antigu nian tanba sira moris-hiʼas ona ba lalehan. (Ebreu 11:35) Bainhira Maromak nia Ukun harii tiha iha tinan 1914, lakleur ema kristaun kose-mina neʼebé mate ho laran-metin hetan mós moris-hiʼas ba lalehan atu ukun hamutuk ho Jesus.—Apokalipse 20:4.

13, 14. Rudolf Graichen hasoru susar saida deʼit, no saida mak ajuda nia tahan?

¹³ Ohin loron, Jeová nia atan rihun ba rihun halo tuir duni Jesus nia ezemplu. Sira medita beibeik kona-ba Maromak nia promesa bainhira hasoru terus hodi bele laran-metin nafatin ba Jeová. Ezemplu ida mak kona-ba Rudolf Graichen. Nia moris iha rai-Alemaña iha tinan 1925. Bainhira nia sei kiʼik, ninia inan-aman tara dezeñu sira kona-ba buat neʼebé Bíblia promete iha didin lolon. Nia hatete: “Dezeñu ida iha asu-fuik ho bibi-malae, bibi-timur nia oan ho leopardu, karau-oan ho leaun. Sira hotu moris ho dame, no labarik kiʼik ida mak lori sira.” (Isaías [Yesaya] 11:6-9) Dezeñu neʼe ajuda nia hanoin beibeik kona-ba mundu foun no hametin ninia fiar. Tan neʼe mak bainhira nia hetan terus makaʼas ba tinan barak husi Nazi no tuirmai husi governu komunista iha Alemaña  Leste, nia bele laran-metin nafatin ba Jeová.

¹⁴ Susar boot seluk tan neʼebé Rudolf hasoru mak ninia amá mate ho moras-tifu iha komarka Ravensbrück. Nia mós haree ninia apá nia fiar neineik-neineik sai fraku toʼo ikusmai ninia apá asina deʼit hodi nega no sai husi Testemuña ba Jeová. Bainhira Rudolf sai husi komarka, nia hetan knaar espesiál hodi serbí nuʼudar katuas área nian no tuirmai hetan mós konvite atu tuir eskola Gilead. Depois nia hetan knaar misionáriu nian hodi serbí iha rai-Xile nuʼudar katuas área. Iha neʼebá nia kaben ho irmán misionária ida naran Patsy. Buat neʼebé triste tebes mak, kaben tiha ba tinan ida, sira-nia bebé feto mate. Lakleur ninia feen mós mate ho idade 43 deʼit. Maski Rudolf hasoru terus nabanaban, idade aumenta ba daudauk, no moras, maibé nia serbí Jeová ho laran-metin nafatin nuʼudar pioneiru regulár no katuas kongregasaun ida. Ita bele lee kona-ba ninia istória husi Menara Pengawal 1 Agostu 1997, pájina 20-25. ^[1] (Haree nota husi lisaun.)

15. Ohin loron, iha ezemplu saida neʼebé hatudu katak maski ema fó terus, irmaun-irmán sira nafatin serbí Jeová ho haksolok?

¹⁵ Ohin loron, iha irmaun-irmán barak neʼebé nafatin serbí Jeová ho haksolok maski ema fó terus ba sira. Iha rai-Eritreia, Singapura, no Koreia Súl, ita iha irmaun-irmán atus ba atus neʼebé ema hatama ba komarka tanba sira lakohi hola parte iha funu hodi halo tuir Jesus nia liafuan. (Mateus 26:52) Porezemplu, husi rai-Eritreia mak hanesan irmaun Isaac, Negede, no Paulos. Ema hatama sira iha komarka ba tinan 20 resin ona. Ema trata irmaun sira-neʼe iha dalan neʼebé aat tebes, no toʼo agora sira seidauk kaben no la bele tau matan ba sira-nia inan-aman. Maski nuneʼe, bainhira ita haree sira-nia oin sai iha ita-nia sítiu jw.org, sira iha nafatin oin-midar no kaer metin nafatin ba sira-nia fiar. Haree hanesan neʼe halo guarda sira mós respeitu tebes sira.

16. Fiar-metin bele ajuda ita atu halo saida?

¹⁶ Maski Jeová nia povu barak nunka hetan terus makaʼas hanesan sira neʼebé temi iha leten, maibé sira barak mak moris iha kiak laran, hasoru ona dezastre naturais, ka krize polítiku nian. Seluk tan moris tuir Abraão, Isaac, Jacob, no Moisés nia ezemplu hodi la buka naran boot ka buka rikusoin atu bele serbí Jeová ho laran. Saida mak ajuda irmaun-irmán sira hodi serbí Jeová ho haksolok? Sira-nia domin ba Jeová no fiar-metin ba ninia promesa sira. Sira fiar katak Jeová sei fó kolen ba ninia atan hotu atu iha moris rohan-laek iha mundu foun neʼebé nakonu ho justisa.—Lee Salmo (Mazmur) 37:5, 7, 9, 29. *

17. Oinsá mak ita bele hametin ita-nia fiar, no lisaun tuirmai sei koʼalia kona-ba saida?

¹⁷ Iha lisaun neʼe, ita bele haree duni oinsá mak halo orasaun no medita beibeik kona-ba Jeová nia promesa sira bele ajuda ita atu iha fiar neʼebé metin. Fiar-metin mak bele ajuda ita tahan hasoru susar no terus hodi “laran-metin katak ita-nia esperansa sei sai loos”. Maibé Bíblia mós esplika katak fiar envolve buat seluk tan. Iha lisaun tuirmai sei koʼalia kona-ba neʼe.