1-2. Saida mak la hanesan entre Liurai Acab no Liurai Manasés? Ita sei hatán pergunta saida deʼit?

ITA sei koʼalia kona-ba liurai rua neʼebé moris iha tempu uluk. Liurai ida ukun Izraél suku sanulu, no liurai ida seluk ukun Judá suku rua. Maski sira moris iha tempu neʼebé la hanesan, maibé sira halo buat barak neʼebé hanesan. Sira naʼin-rua kontra Jeová no book povu atu halo sala. Sira naʼin-rua adora maromak falsu sira no mós oho ema seluk. Maibé iha buat ida neʼebé la hanesan. Liurai ida kontinua halo hahalok aat toʼo nia mate, maibé liurai ida seluk arrepende an no hetan perdua ba ninia hahalok aat. Sé mak liurai rua neʼe?

² Sira mak Liurai Acab neʼebé ukun Izraél suku sanulu no Liurai Manasés neʼebé ukun Judá suku rua. Buat neʼebé la hanesan entre liurai rua neʼe bele hanorin ita kona-ba arrepende an. (Após 17:30; Rom 3:23) Arrepende an katak sá? No oinsá mak ita bele hatudu katak ita arrepende an? Resposta ba pergunta sira-neʼe mak importante tanba ita hakarak Jeová perdua ita. Atu hetan resposta ba pergunta sira-neʼe, ita sei haree saida mak ita bele aprende husi Liurai Acab no Liurai Manasés. Tuirmai ita sei aprende kona-ba buat neʼebé Jesus hanorin kona-ba arrepende an.

3. Liurai Acab hatudu hahalok saida?

³ Acab mak liurai númeru hitu neʼebé ukun Izraél suku sanulu. Nia kaben ho Jezabel. Jezabel mak liurai Sidon nia oan-feto. Sidon mak nasaun riku iha Izraél nia parte norte. Tanba Acab kaben ho Jezabel, karik neʼe loke dalan ba Izraél atu sai riku. Maibé neʼe mós book nasaun Izraél atu kontra liután Jeová. Jezabel adora maromak Baal no anima Acab atu promove relijiaun neʼe. Adorasaun neʼe inklui prostituisaun no hasaʼe oan sira nuʼudar sakrifísiu. Bainhira Jezabel sai liurai-feto, Jeová nia profeta  hotu iha perigu laran. Jezabel oho profeta barak. (1 Reis 18:13) Bíblia hatete: “Acab halo buat neʼebé aat tebes iha Jeová nia haree, no nia aat liu fali ema sira hotu antes nia.” (1 Reis 16:30) Jeová la taka matan no hatene Acab no Jezabel nia hahalok. Maibé Jeová hatudu laran-sadiʼa no haruka profeta Elias hodi anima sira no povu atu troka sira-nia hahalok no serbí Jeová. Maibé Acab no Jezabel lakohi rona.

4. Jeová deside atu fó kastigu saida ba Acab? No Acab halo saida?

⁴ Ikusmai, Jeová la hatudu tan pasiénsia. Jeová haruka profeta Elias atu fó sai ba Acab no Jezabel katak Jeová sei kastigu sira. Sira-nia família tomak sei mate. Profeta Elias nia liafuan book Acab nia laran. No Acab neʼebé uluk foti an sai haraik an.—1 Reis 21:19-29.

5-6. Oinsá ita hatene katak Acab la arrepende ho laran?

⁵ Maski Acab hatudu haraik an, maibé tuirmai ninia hahalok sira hatudu katak nia la arrepende an ho laran. Nia la koko atu halakon adorasaun ba Baal. Nia la anima povu atu adora Jeová. Nia mós halo buat seluk tan neʼebé hatudu katak nia la arrepende an ho laran.

⁶ Loron ida, Acab konvida Liurai Jeosafát husi Judá atu apoia nia halo funu hasoru ema Síria. Liurai Jeosafát fiar Jeová, tan neʼe nia fó sujestaun atu koʼalia uluk ho Jeová nia profeta. Foufoun Acab lakohi no hatete: “Sei iha mane ida tan neʼebé Ita bele husu kona-ba Jeová nia hanoin, maibé haʼu odi nia, tanba nia nunka fó sai profesia neʼebé diʼak kona-ba haʼu, só aat deʼit.” Maski nuneʼe, sira koʼalia ho profeta Micaias. Acab koʼalia loos, profeta Micaias fó sai buat neʼebé aat kona-ba nia. Maibé duké arrepende an no husu perdua husi Jeová, Acab hatama profeta Micaias ba komarka. (1 Reis 22:7-9, 23, 27) Maski Acab hatama profeta Micaias ba komarka, maibé Acab labele hanetik profesia neʼe atu sai loos. Kuandu Acab bá halo funu, nia mate.—1 Reis 22:34-38.

7. Depois Acab mate, Jeová fó sai saida kona-ba nia?

⁷ Depois Acab mate, Jeová fó sai ninia hanoin kona-ba Acab. Bainhira Liurai Jeosafát toʼo iha uma ho seguru, Jeová haruka profeta Jeú atu korrije Liurai Jeosafát tanba ajuda Acab. Profeta Jeú hatete: “Tanbasá mak ó ajuda ema aat no hadomi ema neʼebé odi Jeová?” (2 Krón 19:1, 2) Se Acab mak arrepende an duni ho laran, Jeú sei la hatete katak Acab mak ema aat neʼebé odi Jeová. Klaru katak maski Acab hatudu arrepende an uitoan, maibé nia nunka arrepende an ho laran tomak.

8. Ita bele aprende saida husi Acab kona-ba arrepende an?

⁸ Ita bele aprende saida husi Acab? Bainhira Acab hatene katak nia sei hetan kastigu, foufoun nia haraik an. Neʼe hahalok neʼebé diʼak. Maibé ninia hahalok tuirmai hatudu katak nia la arrepende an ho laran. Neʼe hatudu katak bainhira ita arrepende an la toʼo atu husu deʼit deskulpa. Mai ita aprende kona-ba ezemplu seluk neʼebé bele ajuda ita komprende oinsá atu arrepende an ho laran.

9. Liurai Manasés halo hahalok saida?

⁹ Maizumenus tinan 200 liutiha, Manasés sai liurai ba Judá. Karik nia aat liu fali Acab. Bíblia hatete: “Nia halo  hahalok aat barak tebes tuir Jeová nia haree hodi hakanek Ninia laran.” (2 Krón 33:1-9) Manasés harii altár ba maromak falsu sira no nia tau estátua neʼebé reprezenta maromak falsu iha Jeová nia templu. Nia halo masonik, siʼik futuru no halo hahalok matan-dook nian. Nia mós “oho ema laran-moos barak tebes”, inklui “sunu ninia oan-mane rasik iha ahi” nuʼudar sakrifísiu ba maromak falsu sira.—2 Reis 21:6, 7, 10, 11, 16.

10. Oinsá Jeová fó dixiplina ba Manasés? Manasés halo saida?

¹⁰ Hanesan Acab, Manasés mós ulun-toos no lakohi rona ba avizu sira neʼebé Jeová fó sai liuhusi ninia profeta sira. Ikusmai, “Jeová lori liurai Asíria nia xefe tropa nian hodi halo funu hasoru [Judá], no xefe sira-neʼe kaer Manasés ho besi-kaʼit no kesi nia ho korrente rua neʼebé halo husi riti no lori nia ba Babilónia”. Bainhira Manasés iha komarka, karik nia hanoin kleʼan kona-ba ninia hahalok. Nia “hatudu haraik an tebes ba ninia beiʼala nia Maromak”. Nia mós halo buat seluk tan. “Nia husu Jeová, ninia Maromak, atu hatudu laran-sadiʼa ba nia.” Manasés “kontinua halo orasaun ba Maromak”. Manasés komesa halo mudansa. Nia komesa haree Jeová nuʼudar “ninia Maromak”, no kontinua halo orasaun ba Jeová.—2 Krón 33:10-13.

11. Tuir 2 Krónikas 33:15, 16, oinsá Manasés hatudu katak nia arrepende an ho laran?

¹¹ Ikusmai, Jeová hatán Manasés nia orasaun. Bainhira Jeová rona Manasés nia orasaun, nia bele haree katak Manasés arrepende an duni. Tan neʼe, Jeová rona kuandu Manasés husu deskulpa no halo nia sai fali liurai. Manasés uza oportunidade neʼe atu hatudu sai katak nia arrepende an ho laran. Nia halo buat neʼebé Acab nunka halo. Manasés troka ninia hahalok. Nia kontra hasoru adorasaun falsu no anima ninia povu atu adora Jeová. (Lee 2 Krónikas 33:15, 16.) Manasés presiza aten-brani no fiar, tanba durante tinan barak, nia hatudu ezemplu aat ba ninia família, ema-boot sira no mós ninia povu. Maibé kuandu Manasés katuas ona, nia koko hadiʼa problema balu neʼebé uluk nia hamosu. Nia hatudu ezemplu diʼak ba ninia bei-oan Josias neʼebé ikusmai sai liurai neʼebé diʼak tebes.—2 Reis 22:1, 2.

12. Ita bele aprende saida husi Manasés kona-ba arrepende an?

¹² Ita bele aprende saida husi Manasés? Nia haraik an no mós halo orasaun hodi husu Maromak atu hatudu laran-sadiʼa ba nia. Nia mós troka ninia hahalok. Nia koko atu hadiʼa problema sira neʼebé uluk nia hamosu, nia hakaʼas an atu adora Jeová ho laran tomak no  mós ajuda ema seluk atu adora Jeová. Manasés nia ezemplu bele fó kmaan ba ema neʼebé halo ona sala sériu. Istória neʼe hatudu katak Maromak Jeová mak “diʼak no prontu atu fó perdua”. (Sal 86:5) Jeová sei fó perdua ba ema neʼebé arrepende an ho laran.

13. Konta toʼok ai-knanoik neʼebé ajuda ita komprende kona-ba arrepende an.

¹³ Manasés la husu deʼit deskulpa, maibé nia halo buat ruma. Neʼe hanorin ita lisaun importante kona-ba arrepende an. Hanoin toʼok ai-knanoik tuirmai: Ita bá padaria atu sosa bolu ida. Maibé duké fó bolu, padaria nia naʼin fó manu-tolun ida. Ita kontente ka lae? Klaru katak lae! Maibé oinsá se nia esplika katak manu-tolun mak parte importante ba bolu? Ita kontente ka lae? Lae. Nuneʼe mós ho Jeová, nia hakarak ema neʼebé halo sala atu arrepende an ho laran. Se ema neʼe husu deskulpa, neʼe diʼak tanba neʼe mak parte importante ba arrepende an, maibé neʼe deʼit la toʼo. Saida tan mak ita presiza halo? Mai ita aprende husi Jesus nia ai-knanoik ida.

14. Oinsá mak mane joven iha Jesus nia ai-knanoik komesa hatudu arrepende an?

¹⁴ Iha Lucas 15:11-32, ita bele lee Jesus nia ai-knanoik kona-ba oan-mane ida neʼebé sai husi uma. Mane joven neʼe kontra ninia aman, nia sai husi uma no halo viajen “ba rai dook”. Iha neʼebá, nia halaʼo moris neʼebé la morál. Maibé bainhira nia hasoru susar, nia komesa hanoin kona-ba ninia desizaun. Nia rekoñese katak moris hamutuk ho ninia aman mak diʼak liu. Jesus hatete katak ikusmai mane joven neʼe komprende katak nia halo ona desizaun sala. Nia deside atu fila fali ba ninia aman no husu perdua. Importante ba mane joven neʼe atu rekoñese katak nia halo ona desizaun barak neʼebé sala. Maibé neʼe toʼo ona ka lae? Lae. Nia presiza troka ninia hahalok.

15. Oinsá mak mane joven iha Jesus nia ai-knanoik hatudu katak nia arrepende an ho laran?

¹⁵ Mane joven neʼe hatudu katak nia arrepende an ho laran. Nia halo viajen dook atu fila fali ba ninia aman nia uma. Tuirmai, bainhira nia koʼalia ba ninia aman, nia hatete: “Haʼu halo ona sala hasoru lalehan no mós hasoru Ita. Haʼu la merese tan atu Ita bolu haʼu nuʼudar oan.” (Lc 15:21) Ninia liafuan hatudu katak nia hakarak hadiʼa ninia relasaun diʼak ho Jeová. Nia mós rekoñese katak ninia hahalok hakanek ninia aman nia laran. Nia mós prontu atu serbisu makaʼas hodi bele iha fali relasaun diʼak ho ninia aman no mós prontu atu sai hanesan atan ida. (Lc 15:19) Jesus nia ai-knanoik  neʼe, laʼós deʼit anima ita, maibé mós bele ajuda katuas kongregasaun bainhira sira koko atu buka-hatene se ema ida arrepende an duni ka lae.

16. Tanbasá susar ba katuas sira atu hatene se ema ruma arrepende an?

¹⁶ La fasil ba katuas kongregasaun atu hatene se ema ruma neʼebé halo sala sériu arrepende an duni ka lae. Tanbasá? Tanba katuas sira labele haree ema nia laran, tan neʼe sira tenke buka evidénsia neʼebé hatudu katak irmaun ka irmán neʼe hakribi ninia sala. Dala ruma, irmaun ka irmán ruma halo sala sériu no la moe kona-ba neʼe. Tan neʼe karik katuas sira duvida se ema neʼe arrepende an duni ho laran.

17. (a) Ezemplu saida mak hatudu katak la toʼo atu husu deʼit deskulpa? (b) Tuir 2 Korinto 7:11, ema ida presiza halo saida atu hatudu katak nia arrepende an duni?

¹⁷ Hanoin toʼok kona-ba ezemplu tuirmai. Irmaun ida halo adultériu durante tinan barak. Duké buka ajuda, nia subar ninia hahalok la morál husi ninia feen, belun sira no katuas kongregasaun. Ikusmai, katuas sira hatene buat neʼebé nia halo. Bainhira katuas fó sai ba nia katak sira iha evidénsia neʼebé hatudu nia halo sala, nia rekoñese ninia sala no husu deskulpa. Ida-neʼe prova katak nia arrepende an ka lae? Lae. Katuas sira presiza haree buat seluk tan. Irmaun neʼe la halo sala dala ida deʼit tanba nia halo desizaun neʼebé sala, maibé nia halo sala sériu durante tinan barak. Nia mós la fó sai rasik ninia sala, maibé ema seluk mak fó sai sala neʼe ba katuas sira. Tan neʼe, katuas sira presiza buka evidénsia neʼebé hatudu katak irmaun neʼe halo ona mudansa ba ninia hanoin, sentimentu no hahalok. (Lee 2 Korinto 7:11.) Karik irmaun neʼe presiza tempu atu halo mudansa hodi prova katak nia arrepende an duni. No karik katuas sira sei deside katak presiza hasai nia husi kongregasaun toʼo nia hatudu katak nia arrepende an.—1 Kor 5:11-13; 6:9, 10.

18. Oinsá ema neʼebé kongregasaun hasai bele hatudu katak nia arrepende an duni? No rezultadu mak saida?

¹⁸ Ema neʼebé kongregasaun hasai bele hatudu katak nia arrepende an ho laran hodi tuir reuniaun beibeik no halo tuir katuas sira-nia konsellu atu halo orasaun no estuda Bíblia beibeik. Nia mós sei hakaʼas an atu hasees an husi situasaun neʼebé bele tenta nia atu halo tan sala. Se nia hakaʼas an atu hadiʼa ninia relasaun diʼak ho Jeová, nia bele fiar metin katak Jeová sei fó perdua ba nia no kongregasaun sei simu fali nia. Bainhira katuas sira koko buka-hatene se ema ruma  arrepende an duni ka lae, sira presiza hanoin-hetan katak kazu ida-idak la hanesan. Tan neʼe, sira analiza didiʼak kazu ida-idak no hakaʼas an atu hatudu justisa bainhira tau matan kazu ida.

19. Oinsá ema ida hatudu katak nia arrepende an duni? (Ezequiel 33:14-16)

¹⁹ Hanesan ita aprende ona, la toʼo ba ema neʼebé halo sala sériu atu husu deʼit deskulpa. Nia presiza troka ninia hanoin, sentimentu no hahalok atu hatudu katak nia arrepende an. Nia tenke para ninia hahalok sala no halo tuir fali Jeová nia matadalan sira. (Lee Ezequiel 33:14-16.) Buat neʼebé importante liu ba nia mak hadiʼa ninia relasaun diʼak ho Jeová.

20-21. Oinsá ita bele ajuda ema ida neʼebé halo sala sériu?

²⁰ Jesus esplika kona-ba parte importante husi ninia serbisu haklaken hodi hatete: “Haʼu mai . . . atu bolu ema sala-naʼin atu arrepende sira-nia sala.” (Lc 5:32) Ita mós hakarak halo nuneʼe. Oinsá se ita hatene katak ita-nia belun ida halo sala sériu? Ita tenke halo saida?

²¹ Se ita koko atu subar ninia sala, ida-neʼe la ajuda nia. Tuir loloos, ita nunka bele subar sala ruma tanba Jeová haree buat hotu. (Prov 5:21, 22; 28:13) Ita bele ajuda nia hodi fó-hanoin nia katak katuas sira prontu atu ajuda. Se ita-nia belun lakohi fó sai ninia sala ba katuas sira, entaun ita presiza fó-hatene sira. Ida-neʼe hatudu katak ita hakarak ajuda ita-nia belun. Ninia relasaun diʼak ho Jeová iha perigu laran.

22. Iha lisaun tuirmai, ita sei aprende kona-ba saida?

²² Maibé oinsá se irmaun ka irmán ruma halo sala sériu durante tempu kleur no katuas sira deside katak tenke hasai nia husi kongregasaun? Neʼe katak sira la hatudu laran-sadiʼa ba nia ka lae? Iha lisaun tuirmai, ita sei aprende liután kona-ba oinsá Jeová hatudu laran-sadiʼa liuhusi fó dixiplina, no oinsá ita bele banati-tuir nia.