LISAUN ESTUDU 42
Fiar metin katak ita hetan ona lia-loos
“Buka-hatene uluk buat hotu se neʼe mak loos ka lae, no kaer metin ba buat neʼebé diʼak.”—1 TES 5:21.
KNANANUK 142 Kaer metin esperansa
IHA LISAUN NEʼE *
1. Tanbasá ema barak konfuzaun kona-ba relijiaun?
OHIN loron, iha relijiaun rihun ba rihun neʼebé dehan katak sira mak relijiaun Kristaun no hanoin katak sira adora Maromak iha dalan neʼebé loos. Tan neʼe ema barak konfuzaun no husu: “Iha relijiaun ida deʼit neʼebé loos, ka Maromak simu relijiaun hotu?” Ita fiar metin ka lae, katak Testemuña ba Jeová hanorin lia-loos no adora Jeová iha dalan neʼebé loos? Oinsá ita bele fiar ida-neʼe? Mai ita haree evidénsia balu.
2. Tuir 1 Tesalónika 1:5, tanbasá apóstolu Paulo fiar metin katak nia hetan ona lia-loos?
2 Apóstolu Paulo fiar metin katak nia hetan ona lia-loos. (Lee 1 Tesalónika 1:5.) Ninia fiar la bazeia ba sentimentu, maibé nia estuda didiʼak Maromak nia Liafuan. Nia fiar katak “Eskritura hotu mai husi Maromak”. (2 Tim 3:16) Saida mak nia aprende kuandu nia estuda Maromak nia Liafuan? Iha Eskritura sira, Paulo hetan evidénsia forte katak Jesus mak Mesias neʼebé Jeová promete. Ulun-naʼin relijiaun Judeu nian lakohi simu evidénsia neʼe. Sira hatudu laran-makerek hodi dehan katak sira reprezenta Maromak, maibé sira halo hahalok neʼebé Maromak hakribi. (Tito 1:16) Paulo la hanesan ho sira. Nia la tau fiar deʼit ba buat neʼebé nia gosta husi Maromak nia Liafuan. Maibé nia prontu atu hanorin no aplika “Maromak nia konsellu hotu”.—Após 20:27, nota.
3. Ita presiza hetan resposta ba pergunta hotu ka lae? (Haree mós kaixa “ Jeová nia hahalok no hanoin mak barak liu toʼo sura labele”.)
3 Ema balu hanoin katak relijiaun neʼebé loos tenke hatán ba ema nia pergunta hotu, maski Bíblia la hatán pergunta sira-neʼe. Hanoin hanesan neʼe diʼak ka lae? Hanoin toʼok Paulo nia ezemplu. Nia anima maluk fiar-naʼin atu “buka-hatene uluk buat hotu se neʼe mak loos ka lae”, maibé nia mós hatete katak iha buat barak neʼebé nia la komprende. (1 Tes 5:21) Nia hakerek: “Ita-nia koñesimentu la kompletu . . . ita haree la moos liuhusi espellu besi nian.” (1 Kor 13:9, 12) Paulo la komprende buat hotu, no ita mós la komprende buat hotu. Maibé Paulo komprende lia-loos báziku kona-ba Jeová nia hakarak no neʼe halo nia fiar metin katak nia hetan ona lia-loos.
4. Oinsá ita bele hametin ita-nia fiar katak ita hetan ona lia-loos? Ita sei aprende saida kona-ba ema Kristaun neʼebé loos?
4 Dalan ida atu bele hametin ita-nia fiar katak ita hetan ona lia-loos mak hodi kompara Jesus nia dalan atu adora Maromak ho Testemuña ba Jeová nia dalan atu adora Maromak. Iha lisaun neʼe, ita sei aprende katak ema Kristaun neʼebé loos (1) la adora estátua ka imajen, (2) respeitu Jeová nia naran, (3) hadomi lia-loos no (4) hadomi malu tebetebes.
LA ADORA ESTÁTUA KA IMAJEN
5. Ita aprende saida husi Jesus kona-ba dalan neʼebé loos atu adora Maromak? Oinsá ita bele aplika ninia hanorin?
5 Jesus hadomi tebes Maromak, tan neʼe nia adora Jeová mesak deʼit bainhira nia iha lalehan no mós iha rai. (Lc 4:8) Nia mós hanorin ninia dixípulu sira atu adora Jeová mesak deʼit. Jesus no ninia dixípulu sira neʼebé laran-metin nunka uza estátua ka imajen atu adora Maromak. Maromak mak Espíritu, tan neʼe ema ida labele halo estátua ka imajen atu reprezenta ninia glória. (Isa 46:5) Maibé sala ka lae atu uza santu-santa sira-nia imajen no halo orasaun ba sira? Iha Ukun-Fuan segundu husi Ukun-Fuan Sanulu, Jeová hatete: “Imi labele halo estátua ba imi-nia an ka halo buat naran deʼit atu reprezenta buat neʼebé iha lalehan ka iha rai . . . Imi labele hakruʼuk ba sira.” (Éx 20:4, 5) Ema sira neʼebé hakarak halo Maromak kontente komprende katak Maromak lakohi ita atu adora estátua ka imajen ruma.
6. Testemuña ba Jeová halo tuir sé-nia ezemplu kona-ba adorasaun?
6 Matenek-naʼin sira kona-ba istória rekoñese katak ema Kristaun iha apóstolu sira-nia tempu adora Maromak mesak deʼit. Porezemplu, livru ida kona-ba ema Kristaun nia istória hatete katak ema Kristaun iha tempu uluk “odi tebes” ideia atu uza imajen iha fatin adorasaun. Ohin loron, Testemuña ba Jeová halo tuir ezemplu husi ema Kristaun iha apóstolu sira-nia tempu. Ita la halo orasaun ba imajen santu-santa sira ka anju sira, no ita mós la halo orasaun ba Jesus. Ita mós la kontinénsia ba bandeira ka halo buat seluk atu adora governu ka nasaun neʼebé ita hela bá. Iha situasaun hotu, ita hakaʼas an atu halo tuir Jesus nia liafuan: “Imi tenke adora Jeová, imi-nia Maromak.”—Mt 4:10.
7. Oinsá mak Testemuña sira la hanesan ho relijiaun seluk?
7 Ohin loron, ema barak gosta rona ba ulun-naʼin relijiaun neʼebé populár. Dala ruma ema admira tebes ulun-naʼin sira-neʼe, no neʼe hanesan sira adora ulun-naʼin sira-neʼe. Ema barak bá sira-nia igreja, sosa sira-nia livru sira no fó osan barak ba sira ka ba organizasaun neʼebé sira apoia. Ema balu fiar liafuan hotu husi ulun-naʼin sira-neʼe. Sira kontente tebes atu haree ulun-naʼin relijiaun sira-neʼe hanesan sira haree rasik Jesus. Maibé iha Jeová nia povu nia leet, la iha ema ida mak sai hanesan ulun-naʼin. Maski ita respeitu ema neʼebé dirije ita, maibé ita simu Jesus nia hanorin neʼebé klaru: “Imi hotu mak maun-alin.” (Mt 23:8-10) Ita la adora ema, maski sira mak ulun-naʼin relijiaun ka ulun-naʼin polítiku. No ita mós la apoia sira-nia relijiaun ka planu polítiku. Ita mak neutrál no ketak husi mundu. Tan neʼe, ita la hanesan duni ho relijiaun seluk neʼebé dehan katak sira mak ema Kristaun.—João 18:36.
ITA RESPEITU JEOVÁ NIA NARAN
Ema Kristaun loos sente orgullu atu haklaken ba ema seluk kona-ba Jeová (Haree parágrafu 8-10) *
8. Oinsá ita hatene katak Jeová hakarak ema atu uza no fó sai ninia naran ba ema?
8 Loron ida, Jesus halo orasaun hodi hatete: “Aman, fó glória ba Ita-nia naran.” Jeová rasik mak hatán ba orasaun neʼe ho lian boot husi lalehan no promete katak nia sei fó glória ba ninia naran. (João 12:28) Bainhira Jesus haklaken iha mundu, nia fó glória ba ninia Aman nia naran. (João 17:26) Tan neʼe, ema Kristaun loos mós sente orgullu atu uza Maromak nia naran no fó sai naran neʼe ba ema seluk.
9. Oinsá ema Kristaun iha apóstolu sira-nia tempu hatudu katak sira respeitu Maromak nia naran?
9 Lakleur depois kongregasaun Kristaun harii ona, Jeová “tau atensaun ba nasaun seluk, hodi hili povu ida husi sira-nia leet atu lori ninia naran”. (Após 15:14) Iha tempu neʼebá, ema Kristaun sente orgullu atu uza Maromak nia naran no fó sai naran neʼe ba ema seluk. Apóstolu sira no dixípulu sira uza Maromak nia naran kuandu sira haklaken no kuandu sira hakerek livru sira iha Bíblia laran. * Sira hatudu katak sira mak povu neʼebé Maromak hili ona atu lori ninia naran.—Após 2:14, 21.
10. Evidénsia saida mak hatudu katak Testemuña sira lori Jeová nia naran?
10 Testemuña ba Jeová mak povu neʼebé lori Jeová nia naran ka lae? Mai ita haree evidénsia balu. Ohin loron, ulun-naʼin relijiaun hakaʼas an tebes atu subar Maromak nia naran. Sira hasai Maromak nia naran husi sira-nia Bíblia no la fó lisensa ba ema atu uza Maromak nia naran iha misa. * Klaru katak Testemuña ba Jeová mesak deʼit mak respeitu no hahiʼi Maromak nia naran. Ita fó sai Maromak nia naran ba ema barak liu duké relijiaun sira seluk. Ita hakaʼas an atu moris tuir ita-nia naran. Ita mak Testemuña ba Jeová. (Isa 43:10-12) Ita prodús ona Bíblia Sagrada Tradusaun Mundu Foun hamutuk millaun 240 liu. No Bíblia neʼe uza Maromak nia naran iha fatin neʼebé tradusaun Bíblia seluk hasai. No ita prodús publikasaun sira neʼebé bazeia ba Bíblia no uza Jeová nia naran iha língua 1.000 liu.
ITA HADOMI LIA-LOOS
11. Oinsá ema Kristaun iha apóstolu sira-nia tempu hatudu sai sira-nia domin ba lia-loos?
11 Jesus hadomi lia-loos. Nia hadomi lia-loos kona-ba Maromak no Maromak nia hakarak. Jesus moris tuir lia-loos neʼe no fó sai ida-neʼe ba ema seluk. (João 18:37) Jesus nia dixípulu sira mós hadomi tebes lia-loos. (João 4:23, 24) Apóstolu Pedro bolu relijiaun Kristaun nuʼudar “dalan lia-loos nian”. (2 Ped 2:2) Ema Kristaun iha apóstolu sira-nia tempu hadomi tebes lia-loos, tan neʼe sira la simu ideia husi relijiaun, tradisaun no ema nia opiniaun neʼebé kontra lia-loos. (Kol 2:8) Ohin loron mós ema Kristaun loos hakaʼas an atu “kontinua laʼo iha lia-loos”, no sira-nia fiar no dalan moris bazeia ba Jeová nia Liafuan.—3 João 3, 4.
12. Saida mak Grupu Administradór halo bainhira sira rekoñese katak ita presiza troka hanorin ruma, no tanbasá sira halo nuneʼe?
12 Ohin loron, Testemuña ba Jeová la dehan katak sira komprende buat hotu iha Bíblia. Dala ruma sira esplika Bíblia nia hanorin ruma ka organiza kongregasaun iha dalan neʼebé sala. Ida-neʼe la halo ita hakfodak. Bíblia hatudu ho klaru katak Maromak nia povu nia koñesimentu kona-ba lia-loos sei sai diʼak liután nuʼudar tempu liu daudaun. (Kol 1:9, 10) Jeová fó sai lia-loos neineik-neineik, no ita tenke hein ho pasiénsia atu naroman lia-loos nian sai nabilan liután. (Prov 4:18) Bainhira Grupu Administradór rekoñese katak presiza troka dalan neʼebé ita komprende hanorin ruma ka dalan atu halo buat ruma, sira halo kedas mudansa neʼe. Ohin loron, relijiaun barak troka sira-nia hanorin tanba hakarak halo kontente sira-nia membru ka hakarak ema gosta sira. Maibé Testemuña ba Jeová halo mudansa tanba hakarak hakbesik liután ba Maromak no adora nia tuir Jesus nia dalan atu adora Maromak. (Tgo 4:4) Kuandu ita-nia organizasaun halo mudansa ruma, ida-neʼe tanba ita komprende Bíblia diʼak liután, laʼós tanba tuir buat neʼebé ema gosta. Ita hadomi lia-loos.—1 Tes 2:3, 4.
ITA HADOMI MALU TEBETEBES
13. Ema Kristaun hatudu hahalok importante saida? Oinsá mak Testemuña ba Jeová hatudu hahalok neʼe?
13 Ema Kristaun iha apóstolu sira-nia tempu hatudu hahalok diʼak oioin, maibé hahalok importante liu mak domin. Jesus hatete: “Se imi hadomi malu, ema hotu sei hatene katak imi mak haʼu-nia dixípulu.” (João 13:34, 35) Ohin loron, Testemuña ba Jeová iha mundu tomak hadomi malu no iha unidade. Ita la hanesan ho relijiaun sira seluk tanba ita mak família ida maski ita mai husi nasaun no kultura neʼebé la hanesan. Bainhira ita tuir reuniaun no reuniaun boot sira ita bele haree ida-neʼe. No ida-neʼe ajuda ita fiar metin liután katak ita adora Jeová iha dalan neʼebé loos.
14. Tuir Koloso 3:12-14, oinsá ita bele hatudu katak ita hadomi malu tebetebes?
14 Bíblia anima ita atu “hadomi malu tebetebes”. (1 Ped 4:8) Ita bele hatudu katak ita hadomi malu liuhusi fó perdua ba malu no hatudu pasiénsia ba maluk sira-nia fraku. Ita mós buka oportunidade atu hatudu laran-luak no laran-diʼak ba ema hotu iha kongregasaun, inklui ema neʼebé hakanek ita-nia laran. (Lee Koloso 3:12-14.) Bainhira ita hadomi malu, ita hatudu katak ita mak ema Kristaun loos.
“FIAR IDA DEʼIT”
15. Iha dalan saida tan mak ita halo tuir ezemplu husi ema Kristaun iha apóstolu sira-nia tempu?
15 Ita mós halo tuir ezemplu husi ema Kristaun iha apóstolu sira-nia tempu iha dalan seluk tan. Porezemplu, ita-nia organizasaun halaʼo iha dalan neʼebé hanesan ho ema Kristaun iha tempu uluk. Ita iha katuas área, katuas kongregasaun no mós atan ba kongregasaun. (Flp 1:1; Tito 1:5) No hanesan ema Kristaun iha tempu uluk, ita mós respeitu Jeová nia ukun-fuan kona-ba relasaun seksuál no moris kaben nian, ita respeitu raan no ita proteje kongregasaun husi ema neʼebé halo sala no la arrepende an.—Após 15:28, 29; 1 Kor 5:11-13; 6:9, 10; Ebr 13:4.
16. Saida mak ita aprende husi Éfeso 4:4-6?
16 Jesus hatete katak ema barak sei dehan katak sira mak Jesus nia dixípulu, maibé sira laʼós ninia dixípulu neʼebé loos. (Mt 7:21-23) Bíblia mós hatete katak iha loron ikus sira, ema barak sei dehan sira adora Maromak maibé finje deʼit. (2 Tim 3:1, 5) Maibé Bíblia fó sai ho klaru katak Maromak simu “fiar ida deʼit”.—Lee Éfeso 4:4-6.
17. Ohin loron, sé mak halo tuir Jesus no adora Maromak iha dalan neʼebé loos?
17 Ohin loron, sé mak adora Maromak iha dalan neʼebé loos? Resposta mak Testemuña ba Jeová. Ita bele dehan nuneʼe tanba ita haree ona evidénsia oioin. Ita mós estuda ona kona-ba oinsá Jesus no ema Kristaun iha tempu uluk adora Maromak. Ita iha priviléjiu boot atu sai parte ba Jeová nia povu no hatene lia-loos kona-ba Jeová no ninia hakarak. Mai ita kontinua kaer metin ba lia-loos ho fiar neʼebé metin.
KNANANUK 3 Ami-nia forsa no esperansa
^ par. 5 Ita sei aprende Jesus nia ezemplu kona-ba oinsá atu halaʼo adorasaun loos no oinsá ninia dixípulu sira iha tempu uluk halo tuir ninia ezemplu. Ita mós sei haree evidénsia neʼebé hatudu katak Testemuña ba Jeová mós halo tuir Jesus nia ezemplu kona-ba halaʼo adorasaun loos.
^ par. 9 Haree kaixa ho títulu “Ema kristaun primeiru uza Maromak nia naran ka lae?” husi Livru Haklaken, 1 Outubru 2010, pájina 6.
^ par. 10 Porezemplu, iha tinan 2008, Amu-Papa Bento XVI hatete katak ema labele uza ka temi Maromak nia naran iha relijiaun Katólika nia misa, knananuk ka orasaun.
^ par. 63 ESPLIKASAUN BA DEZEÑU: Jeová nia organizasaun fó sai ona Bíblia Tradusaun Mundu Foun iha língua 200 liu, atu nuneʼe ema bele lee Bíblia neʼebé temi Maromak nia naran iha sira-nia língua rasik.
