“HAʼU batizmu bainhira haʼu tinan 15, no fulan neen liutiha neʼe haʼu komesa pioneiru estra. Depois tinan ida tiha haʼu mós foti pioneiru regulár. Bainhira ramata eskola sekundária, haʼu husu atu serbí iha fatin neʼebé presiza tan haklaken-naʼin sira. Tempu neʼebá, haʼu hela hamutuk ho haʼu-nia avó-feto neʼebé laʼós Testemuña. Haʼu hakarak muda husi haʼu-nia moris-fatin no sai husi haʼu-nia avó nia uma. Maibé katuas área nian dehan katak haʼu-nia moris-fatin sei sai haʼu-nia knaar foun. Haʼu triste tebes maibé haʼu subar haʼu-nia sentimentu husi katuas área neʼe. Haʼu laʼo ho hakruʼuk no hanoin didiʼak irmaun neʼe nia liafuan. Haʼu dehan ba haʼu-nia pár haklaken nian ‘Haʼu sente haʼu-nia hahalok hanesan Jonas. Maibé ikusmai, Jonas bá duni Nínive. Entaun haʼu mós sei simu knaar neʼe.’

“Tinan haat ona haʼu pioneiru iha sidade neʼebé haʼu hela bá, no haʼu bele haree katak halo tuir matadalan neʼebé haʼu simu mak matenek. Uluk, haʼu-nia problema mak haʼu sempre hanoin negativu. Maibé agora haʼu sente haksolok loos iha haʼu-nia serbisu haklaken. Iha tempu ida, haʼu konsege halaʼo estudu Bíblia 24 iha fulan ida nia laran. No Jeová fó bensaun ba haʼu tanba agora haʼu mós estuda ho haʼu-nia avó neʼebé uluk kontra.”

Estudante Bíblia ida iha rai-Fijí presiza foti desizaun importante ida. Nia tenke hili atu tuir reuniaun boot, ka tuir ninia laʼen bá família nia festa halo-tinan. Ninia laʼen hatán nia atu tuir reuniaun boot no feen neʼe dehan katak reuniaun boot neʼe hotu mak nia bá asiste festa neʼe. Maibé bainhira nia fila husi reuniaun boot, nia sente katak diʼak liu nia la tau ninia an iha situasaun neʼebé bele lori perigu ba ninia relasaun ho Jeová. Entaun nia deside atu la bá.

Durante festa neʼe laʼo hela, nia laʼen hatete ba ninia família katak bainhira ninia feen nia reuniaun hotu ona, nia sei mai asiste. Maibé ninia família dehan: “Nia sei la mai tanba Testemuña ba Jeová la selebra festa halo tinan!” *(Haree nota iha kraik.)

Laʼen neʼe orgullu tebes tanba ninia feen halo tuir ninia konxiénsia hodi la kontra buat neʼebé nia rasik fiar. Tanba feen neʼe laran-metin, neʼe fó oportunidade ba nia atu haklaken ba ninia laʼen, no mós ema seluk. Ikusmai, ninia laʼen komesa estuda Bíblia no tuir reuniaun ho nia.