1, 2. Joven sira hasoru duvida saida, no oinsá mak Bíblia ajuda sira?

KOLEGA eskola hatete ba irmán joven ida iha rai-Bretaña katak ema neʼebé matenek la bele fiar ba Maromak. Irmaun ida iha rai-Alemaña dehan: “Ami-nia profesora sira haree Bíblia nia istória kona-ba kriasaun mak hanesan istória deʼit. Sira-nia hanoin mak estudante hotu fiar deʼit ba evolusaun.” Irmán joven ida iha rai-Fransa dehan: “Profesora sira husi haʼu-nia eskola hakfodak katak sei iha estudante balu mak fiar nafatin ba Bíblia.”

² Ohin loron, ema barak la fiar katak Maromak mak kria ita. Se ita mak joven ida neʼebé adora Jeová ka aprende hela kona-ba Jeová, karik ita bele hanoin saida mak bele ajuda ita atu prova katak Jeová mak Kriadór. Se nuneʼe, Bíblia bele ajuda ita atu uza ita-nia kbiit atu hanoin hodi haburas no hametin ita-nia fiar, tanba Bíblia dehan: “Kbiit atu hanoin sei tau matan ba ó.” Oinsá? Kbiit neʼe bele proteje ita husi hanorin neʼebé laloos hodi hametin ita-nia fiar ba Jeová.—Lee Provérbios (Amsal) 2:10-12. ^[1]

3. Lisaun neʼe sei koʼalia kona-ba saida?

³ Ita tenke hatene didiʼak Jeová se ita atu iha fiar neʼebé metin ba nia. (1 Timóteo 2:4) Tan neʼe mak bainhira ita lee Bíblia ka ita-nia livru sira, importante atu para no hanoin didiʼak no koko atu komprende informasaun neʼe. (Mateus 13:23) Mai ita haree dalan balu neʼebé sei ajuda ita buka-hetan evidénsia barak liután atu  prova katak Jeová mak ita-nia Kriadór no Bíblia mak ninia Liafuan.—Ebreu 11:1.

4. Esplika toʼok oinsá mak dalan ema fiar ba evolusaun atu hanesan ho dalan atu fiar katak Maromak mak kria buat hotu? No saida mak ita hotu tenke halo?

⁴ Karik ema bele hatete ba ita, “Haʼu fiar ba evolusaun tanba sientista sira mak koʼalia nuneʼe. Oinsá mak ita bele fiar fali Maromak neʼebé ema nunka haree?” Ema barak hanoin hanesan neʼe duni. Maski ema ida nunka haree Maromak ka haree nia kria buat ruma, maibé oinsá ho ema neʼebé fiar ba evolusaun? (João 1:18) Tuir loloos sira mós fiar ba buat neʼebé sira seidauk haree. Tanba la iha ema ida mak haree ona buat ruma sai fali buat seluk. Porezemplu, la iha ema ida mak haree ona katak lekirauk neineik-neineik muda an ba ema. (Jó [Ayub] 38:1, 4) Tan neʼe mak ita tenke buka didiʼak evidénsia sira, hanoin didiʼak, no depois mak fiar. Kona-ba kriasaun, apóstolu Paulo dehan: “Maski ema la bele haree Maromak nia hahalok ho matan, maibé ida-neʼe hatudu sai ona ho klaru ba ema husi tempu neʼebé nia kria mundu, basá kuandu ema hanoin kona-ba buat neʼebé nia kria, sira bele haree ninia kbiit neʼebé iha ba nafatin no ninia pozisaun nuʼudar Maromak. Tan neʼe, sira la bele nega katak Maromak iha duni.”—Roma 1:20.

5. Saida deʼit mak Jeová nia organizasaun fó hodi ajuda ita aprende kona-ba kriasaun?

⁵ Se ita haree no hanoin didiʼak ba natureza, ita bele haree katak buat hotu halo iha dalan neʼebé úniku tebes. “Liuhusi fiar mak ita hatene” katak iha Kriadór ida maski matan la haree. (Ebreu 11:3, 27) Ema neʼebé fiar uza mós sira-nia neon, laʼós liuhusi buat neʼebé sira haree ka rona deʼit. Atu ajuda ita fiar ba Kriadór, ita-nia organizasaun fó sai ona informasaun barak. (Porezemplu, vídeo Keajaiban Ciptaan Menyingkapkan Kemuliaan Allah, broxura sira Moris Hotu Mosu Mesak Deʼit ka lae?, no Asal Mula Kehidupan—Lima Pertanyaan yang Patut Direnungkan, no livru Apakah Ada Pencipta yang Mempedulikan Anda?) Baibain husi ita-nia livru Matan-moris bá! ita bele haree entrevista neʼebé halo ho sientista no ema balu, sira esplika tanbasá mak ikusmai sira mós fiar ba Maromak. Iha mós série ida ho títulu “Maromak mak kria ka lae?”. Husi série neʼe esplika  kona-ba kriasaun sira halo iha dalan neʼebé úniku tebes, no sientista barak mós koko atu inventa sasán ruma tuir modelu husi kriasaun sira-neʼe.

6. Oinsá mak ita-nia livru sira bele ajuda ita?

⁶ Kona-ba broxura rua neʼebé temi iha leten, irmaun joven ida ho tinan 19 husi Estadus Unidus hatete: “Broxura sira-neʼe ajuda tebes haʼu. Haʼu lee beibeik broxura neʼe.” Irmán ida husi rai-Fransa dehan: “Haʼu admira tebes kona-ba informasaun ‘Maromak mak kria ka lae?’. Informasaun sira-neʼe hatudu katak maski enjeñeiru matenek sira bele inventa buat ruma tuir kriasaun, maibé sira sei nunka bele inventa hanesan loos ho kriasaun sira.” Iha feto joven ida tinan 15 husi rai-Áfrika Súl. Ninia inan-aman hatete: “Buat primeiru ami-nia oan-feto lee husi livru Matan-moris bá! mak kona-ba ‘Entrevista’.” Loos duni, livru sira-neʼe bele ajuda ita atu iha fiar neʼebé metin hanesan ai nia abut. Fiar metin hanesan neʼe sei la halo ita monu arbiru ba hanorin falsu sira.—Jeremias (Yeremia) 17:5-8.

7. Tanbasá mak Maromak hakarak ita uza ita-nia “kbiit atu hanoin”?

⁷ La sala atu husu pergunta hanesan, ‘Tanbasá haʼu fiar buat neʼebé Bíblia hatete?’ Tanba Jeová lakohi ita atu fiar ba buat ida tuir ema deʼit. Nia hakarak ita uza “kbiit atu hanoin” hodi hetan koñesimentu neʼebé loos. Tanba koñesimentu neʼe mak bele halo metin ita-nia fiar. (Lee Roma 12:1, 2; 1 Timóteo 2:4.) Dalan ida atu hetan koñesimentu neʼebé loos mak liuhusi estuda kona-ba buat ruma neʼebé ita hakarak atu hatene liután.

8, 9. (a) Ema balu gosta estuda kona-ba saida? (b) Ema balu sente oinsá kona-ba hanoin kleʼan ba informasaun neʼebé sira estuda?

⁸ Ema balu gosta estuda kona-ba profesia sira husi Bíblia. Balu tan gosta uza buat neʼebé istória-naʼin, sientista, ka arkeólogu hatete hodi kompara ho istória sira husi Bíblia. Ezemplu ida mak kona-ba profesia husi Gênesis (Kejadian) 3:15. Profesia neʼe, no mós profesia barak tan husi Bíblia ajuda ita komprende oinsá Maromak nia Ukun sei hatudu sai katak só dalan neʼebé Maromak ukun deʼit mak diʼak liu hotu, no oinsá mak Ukun neʼe sei halakon terus hotu. Iha dalan saida mak ita bele estuda Gênesis 3:15? Ita bele halo lista ida kona-ba eskritura seluk neʼebé esplika oinsá Gênesis 3:15 sei sai loos. Tuirmai hakerek kona-ba bainhira mak ema hakerek profesia ida-idak no forma tuir tinan. Se ita halo nuneʼe, ita sei hakfodak hodi haree katak Bíblia nia hakerek-naʼin sira moris iha tempu neʼebé la hanesan, maibé sira ida-idak fó sai informasaun ruma hodi ajuda ita komprende liután Gênesis 3:15. Dalan neʼe bele ajuda ita fiar katak Jeová nia espíritu santu mak dirije sira hodi hakerek informasaun sira-neʼe.—2 Pedro 1:21.

⁹ Irmaun ida husi rai-Alemaña hatete: “Maski iha mane maizumenus naʼin-40 mak hakerek Bíblia, no sira barak moris iha tempu neʼebé la hanesan no la koñese malu, maibé livru ida-idak husi Bíblia sempre fó sai informasaun balu kona-ba Maromak nia Ukun.” Irmán ida husi rai-Austrália estuda informasaun ida husi Livru Haklaken 15 Dezembru 2013, no nia aprende katak tuir loloos Festa Salvasaun nian liga ho Gênesis 3:15 no Mesias. Nia dehan: “Estuda neʼe loke haʼu-nia matan hodi haree katak Jeová mak Kmanek-Naʼin duni. Haʼu gasta tempu uitoan atu hanoin didiʼak Festa Salvasaun reprezenta saida, no neʼe halo haʼu admira tebes tanba Jeová halo arranju hanesan neʼe ba ema Izraél no ikusmai kumpre iha Jesus.” Irmán neʼe sente hanesan neʼe tanba nia hanoin didiʼak no komprende ona kona-ba buat neʼebé nia lee. Neʼe ajuda hametin ninia fiar no halo nia hakbesik liután ba Jeová.—Mateus 13:23.

10. Oinsá mak hahalok laran-moos husi Bíblia nia hakerek-naʼin sira ajuda ita tau fiar ba Bíblia?

 ¹⁰ Bíblia nia hakerek-naʼin sira mós koʼalia nakloke, sira nunka taʼuk atu fó sai informasaun tuir realidade. Iha tempu antigu, ema seluk sempre hakerek deʼit liafuan diʼak kona-ba sira-nia nasaun ka ukun-naʼin sira. Maibé Jeová nia profeta sira la hanesan neʼe. Sira hakerek duni buat diʼak, maibé sira mós hakerek kona-ba hahalok aat sira neʼebé ema Izraél no liurai sira hatudu. (2 Crônicas [Tawarikh] 16:9, 10; 24:18-22) Sira mós la taka kona-ba sira rasik nia sala no Jeová nia atan sira seluk nia sala. (2 Samuel 12:1-14; Marcos 14:50) Kona-ba neʼe, joven ida husi rai-Bretaña hatete: “Hahalok laran-moos hanesan neʼe ita ladún haree. Ida-neʼe hametin liután ita-nia fiar katak Bíblia mai duni husi Jeová.”

11. Oinsá mak matadalan husi Bíblia bele ajuda ita atu fiar katak Bíblia mai duni husi Maromak?

¹¹ Bainhira ema halo tuir Bíblia nia matadalan, sira bele haree duni rezultadu neʼebé diʼak, no neʼe hametin liután sira-nia fiar katak Bíblia mai duni husi Maromak. (Lee Salmo [Mazmur] 19:7-11. ^[2]) Irmán joven ida husi rai-Japaun hatete: “Bainhira ami-nia família aplika Bíblia nia matadalan, ami sente iha ksolok, dame, unidade, no domin.” Bíblia ajuda ona ema barak hodi haree katak buat neʼebé uluk sira fiar, tuir loloos sala. (Salmo [Mazmur] 115:3-8) Bíblia ajuda ema atu sadere ba Jeová, no Bíblia mós promete katak ita-nia futuru sei sai diʼak liután. Ema balu neʼebé fiar ba evolusaun, sira halo natureza sai hanesan maromak ida ba sira. Balu tan fiar katak ema iha kbiit atu lori mudansa neʼebé diʼak ba futuru, maibé realidade mak, se ita haree ba buat hotu neʼebé ema halo, la iha ema ida mak bele rezolve problema sira husi mundu neʼe.—Salmo (Mazmur) 146:3, 4.

12, 13. Oinsá mak ita bele koʼalia ho ema kona-ba kriasaun ka Bíblia?

¹² Bainhira ita koʼalia ho ema kona-ba kriasaun ka Bíblia, diʼak atu buka-hatene uluk sira fiar saida. Ema balu neʼebé hatete katak sira fiar evolusaun, sira mós fiar katak Maromak iha. Sira fiar katak Maromak uza evolusaun hodi kria fali buat seluk. Ema seluk tan fiar katak evolusaun mak loos tanba eskola sira hanorin kona-ba neʼe. No balu tan la fiar ona Maromak tanba relijiaun nia hahalok sira. Tan neʼe diʼak atu husu uluk ema fiar saida no tanbasá mak sira hakarak fiar nuneʼe. Tuirmai rona didiʼak sira-nia razaun. Se ita halo nuneʼe, karik ema neʼe mós hakarak koʼalia liután ho ita.—Tito 3:2.

¹³ Se ema ida hatete katak la matenek atu fiar Maromak, ita bele hatán oinsá? Ho respeitu bele husu nia esplika ninia hanoin kona-ba moris mai husi neʼebé. Tuirmai esplika ba nia katak, se moris mak mai husi evolusaun, entaun sélula primeiru tenkesér iha kbiit hodi bele fó tutan fali moris. Sientista ida hatete katak, sélula neʼe presiza buat barak atu halo nuneʼe, hanesan (1) membrana ka kulit atu proteje sélula neʼe, (2) kbiit atu hetan enerjia no uza enerjia neʼe, (3) informasaun iha jene sira, no (4) kbiit atu halo kópia fali informasaun husi jene sira. Nia dehan tan: “Ema hakfodak tebes hodi hatene katak kona-ba sélula ida deʼit mós komplikadu tebes.”

14. Ita bele uza dalan simples saida atu esplika kona-ba kriasaun?

¹⁴ Se ita mak hakarak koʼalia kona-ba kriasaun, karik bele uza dalan simples neʼebé apóstolu Paulo esplika. Nia dehan: “Uma ida-idak ema mak harii, maibé ida neʼebé harii buat hotu mak Maromak.” (Ebreu 3:4) Loos duni, uma deʼit presiza ema atu harii, sá tan ho kriasaun neʼebé komplikadu  tebes, presiza duni matenek-naʼin ida atu halo. Ita mós bele uza ita-nia livru sira bainhira atu koʼalia kona-ba kriasaun. Irmán ida koʼalia ba mane joven ida, no joven neʼe la fiar katak Maromak iha. Irmán neʼe fó broxura rua kona-ba kriasaun ba nia, no semana ida liutiha, mane joven neʼe hatete, “Agora haʼu fiar ona iha Maromak.” Nia hahú estuda Bíblia no ikusmai sai ita-nia irmaun ida.

15, 16. Dalan saida mak diʼak atu koʼalia kona-ba Bíblia, no ita-nia hakarak mak saida?

¹⁵ Ita mós bele uza dalan neʼe atu esplika ba ema neʼebé ladún fiar Bíblia. Ulukliu, husu nia fiar saida no koko atu buka-hatene tópiku saida mak nia gosta. (Provérbios [Amsal] 18:13) Se nia gosta siénsia, bele fó ezemplu balu neʼebé hatudu katak bainhira Bíblia koʼalia kona-ba siénsia, informasaun sira-neʼe sempre hanesan ho buat neʼebé sientista sira hatete. Se nia gosta istória, bele hatudu oinsá Bíblia nia profesia fó-hatene nanis kona-ba akontesimentu ruma iha ema nia istória. Karik ema seluk sei rona se ita hatudu oinsá Bíblia nia matadalan bele ajuda ema nia moris, hanesan matadalan iha Jesus nia diskursu neʼebé nia hatoʼo husi foho ida.

¹⁶ Ita-nia hakarak mak laʼós atu diskute malu ho ema. Ita hakarak sira gosta koʼalia ho ita no aprende kona-ba Bíblia. Atu halo nuneʼe, husu pergunta sira ho respeitu, depois rona didiʼak ba buat neʼebé sira koʼalia. Bainhira ita koʼalia kona-ba ita-nia fiar, halo ida-neʼe ho laran-maus no respeitu, liuliu bainhira koʼalia ho ema neʼebé idade boot liu ita. Se ita halo buat sira-neʼe, sira mós sei respeitu ita, no sira sei hakfodak atu haree katak maski ita sei joven, maibé ita hanoin didiʼak ona kona-ba ita-nia fiar. Maibé, se ema ida hakarak diskute malu deʼit, ita la presiza gasta tempu koʼalia ho nia.—Provérbios (Amsal) 26:4.

17, 18. (a) Saida mak bele ajuda ita atu hametin ita-nia fiar ba Bíblia? (b) Pergunta saida mak ita sei koʼalia iha lisaun tuirmai?

¹⁷ Se hakarak iha fiar neʼebé metin, la toʼo atu hatene deʼit hanorin báziku husi Bíblia. Presiza keʼe kleʼan liután Maromak nia Liafuan, hanesan ita buka rikusoin. (Provérbios [Amsal] 2:3-6) Dalan diʼak atu hametin ita-nia fiar mak lee Bíblia tomak. Karik ita bele halo planu atu lee Bíblia tomak iha tinan ida nia laran. Neʼe mak buat neʼebé katuas área ida halo bainhira nia sei joven. Nia hatete: “Hodi lee hotu Bíblia, neʼe ajuda haʼu atu fiar katak Bíblia mak Maromak nia Liafuan duni. Istória sira neʼebé haʼu aprende husi kiʼik, afinál haʼu foin komprende.” Diʼak mós atu uza buat neʼebé ita-nia organizasaun halo, hanesan Livru Haklaken BIBLIOTEKA ONLINE no mós Livru atu ajuda Testemuña ba Jeová buka informasaun.

¹⁸ Inan-aman, imi mak iha oportunidade espesiál atu hanorin imi-nia oan kona-ba Jeová. Oinsá mak bele ajuda sira atu hametin sira-nia fiar ba nia? Lisaun tuirmai sei koʼalia kona-ba ida-neʼe.