“Keta husik tun ó-nia liman”
“Keta husik tun ó-nia liman.”—SOFONIAS (ZEFANYA) 3:16.
KNANANUK: 54, 32
1, 2. (a) Problema saida deʼit mak ema barak hasoru ohin loron, no neʼe lori rezultadu saida ba sira? (b) Oinsá mak Isaías 41:10, 13 hatudu katak ita lalika lakon esperansa?
IRMÁN pioneiru regulár neʼebé kaben ho katuas ida husi kongregasaun hatete: “Maski haʼu iha toman atu halo adorasaun, maibé haʼu luta hasoru neon-susar ba tinan barak. Neʼe halo haʼu toba ladiʼak, estraga haʼu-nia saúde, fó impaktu ba dalan neʼebé haʼu trata ema, no dala ruma halo haʼu hakarak rende an deʼit.”
2 Ita bele komprende duni irmán neʼe nia sentimentu, loos ka lae? Triste tebes tanba Satanás nia mundu sempre lori todan ba ita-nia moris. Neon-susar mak hanesan ró nia ankor neʼebé kesi-metin no halo todan ita hodi halo ita laran-tun no la bele book an. (Provérbios [Amsal] 12:25) Saida mak bele halo ita neon-susar? Karik tanba ita triste hela kona-ba ema neʼebé ita hadomi mate, moras ruma, ema fó terus ita, ka tanba problema ekonomia. Tahan hasoru problema sira-neʼe neineik-neineik bele xupa ita-nia forsa no halakon ita-nia ksolok. Maibé ita bele fiar ho laran tomak katak Maromak prontu atu fó liman hodi ajuda ita.—Lee Isaías (Yesaya) 41:10, 13. [1]
3, 4. (a) Bíblia uza liafuan “liman” atu refere ba saida? (b) Saida mak bele halo ita hatún ita-nia liman?
3 Baibain Bíblia uza parte isin-lolon atu halo komparasaun ba ema nia hahalok ida-idak ka buat oioin neʼebé nia halo. Porezemplu, Bíblia temi kona-ba liman dala atus ba atus. Bainhira Bíblia hatete katak ema nia liman hetan fali forsa, neʼe hatudu katak ema neʼe hetan ajuda hodi sente kmaan fali, iha fali forsa, no prontu atu halo buat ruma. (1 Samuel 23:16; Esdras [Ezra] 1:6) Neʼe mós bele hatudu katak ema neʼe iha hanoin neʼebé pozitivu no iha esperansa ba futuru.
4 Bíblia mós koʼalia kona-ba ema neʼebé hatún ninia liman, neʼe refere ba ema neʼebé laran-tun ka lakon esperansa. (2 Crônicas [Tawarikh] 15:7; Ebreu 12:12) Bainhira ita sente estrese ka kole, ka sente ita-nia relasaun ho Jeová sai fraku, neʼe fasil ba ita atu sai laran-tun no rende an deʼit. Se nuneʼe, iha neʼebé mak ita bele hetan fali kmaan? Saida mak bele ajuda ita atu iha fali forsa hodi tahan no iha ksolok?
“JEOVÁ NIA LIMAN LA BADAK DEMAIS ATU FÓ SALVASAUN”
5. (a) Bainhira problema mosu, karik ita bele sente oinsá, maibé ita tenke hanoin-hetan saida? (b) Ita sei koʼalia kona-ba saida?
5 Lee Sofonias (Zefanya) 3:16, 17. [2] Labele sente taʼuk no laran-tun, ka hatún ita-nia liman bainhira ita hasoru problema ruma. Jeová hakarak ita atu ‘entrega ita-nia laran susar hotu ba nia’. (1 Pedro 5:7) Nia hakarak ita atu hanoin-hetan liafuan neʼebé nia hatete ba ema Izraél: “Jeová nia liman la badak demais atu fó salvasaun.” (Isaías [Yesaya] 59:1) Iha lisaun neʼe ita sei koʼalia kona-ba Bíblia nia ezemplu tolu neʼebé hatudu katak Jeová hakarak no iha duni kbiit atu fó forsa ba ninia povu hodi halo tuir ninia hakarak, maski sira hasoru daudauk problema neʼebé todan. No mós haree toʼok oinsá mak ezemplu sira-neʼe bele hametin fali ita.
6, 7. Lisaun importante saida mak ita bele aprende husi funu neʼebé ema Izraél manán hasoru ema Ámalek?
6 Bainhira ema Izraél sai livre ona husi rai-Ejitu, lakleur ema Ámalek ataka sira. Moisés haruka Josué mak lori ema Izraél ba funu. Tuirmai Moisés lori Aarão no Hur ba foho tutun ida atu bele haree funu neʼe. Tanba taʼuk mak sira naʼin-tolu halai ba neʼebá ka lae? Lae duni!
7 Moisés uza planu ida atu ajuda ema Izraél manán hasoru ema Ámalek. Nia kaer ai-tonka ho liman rua neʼebé uluk Maromak fó ba nia no hiʼit saʼe ba leten. Bainhira nia hiʼit saʼe, Jeová fó forsa ba ema Izraél. Maibé, iha tempu neʼebé Moisés komesa hatún nia liman tanba kole, ema Ámalek mak atu manán fali funu neʼe. Bainhira Aarão no Hur haree ida-neʼe, sira halo buat ida hodi fó ajuda lalais ba Moisés. Sira “foti fatuk ida ba [Moisés] atu tuur no nia tuur iha leten. Tuirmai Aarão no Hur foti ninia liman husi sorin ida-idak atu nuneʼe ninia liman hiʼit saʼe nafatin toʼo loro-matan monu”. Ikusmai tanba Maromak nia liman neʼebé forte mak ema Izraél manán funu neʼe.—Êxodo (Keluaran) 17:8-13.
8. (a) Asa halo saida iha tempu neʼebé ema Etiópia ameasa Judá? (b) Ita bele aprende saida husi Asa nia ezemplu?
8 Iha Liurai Asa nia tempu, Jeová mós uza ninia liman neʼebé forte hodi ajuda ninia povu. Bíblia temi kona-ba funu barak, maibé funu neʼebé iha soldadu barak liu mak husi Etiópia neʼebé mai ho Zera. Soldadu sira-neʼe hamutuk naʼin-1.000.000, no barak liu Asa nia soldadu ba dala rua. Ida-neʼe halo Asa neon-susar, taʼuk, no rende an ka lae? Lae. Asa husu kedas Jeová atu ajuda nia. Se halo komparasaun ho Zera nia tropa, Asa la bele manán. Maibé “ba Maromak buat hotu bele deʼit”. (Mateus 19:26) Maromak uza ninia kbiit neʼebé boot hodi halakon ema Etiópia sira-neʼe, tanba Asa iha “laran neʼebé kompletu ba Jeová iha ninia moris tomak”.—2 Crônicas (Tawarikh) 14:8-13; 1 Reis (Raja-Raja) 15:14.
9. (a) Neemias la husik sentimentu saida atu hapara nia hodi harii fali Jeruzalein nia moru? (b) Iha dalan saida mak Maromak hatán Neemias nia orasaun?
9 Bainhira Neemias bá Jeruzalein, nia haree inimigu sira fó ameasa ba ema judeu, hodi nuneʼe, sira para husi serbisu atu harii fali Jeruzalein nia moru. Tan neʼe la iha buat ida mak atu proteje sidade Jeruzalein no neʼe halo ema judeu sira laran-tun. Maibé neʼe halo Neemias sente liman laiha forsa no laran-tun ka lae? Lae! Neemias iha ona toman hanesan Jeová nia atan sira seluk hanesan Moisés no Asa, atu sadere ba Jeová liuhusi orasaun. Iha situasaun neʼe Neemias halo orasaun ba Jeová, no Jeová hatán ba ninia orasaun. Jeová uza “ninia kbiit boot” ho “liman neʼebé forte” hodi hametin fali ema judeu sira. (Neemias 1:10; 2:17-20; lee Neemias 6:9. [3]) Ita fiar katak Jeová mós halo hanesan neʼe ohin loron hodi hametin ninia atan ka lae?
JEOVÁ SEI HAMETIN ITA-NIA LIMAN
10, 11. (a) Iha dalan saida mak Satanás koko atu hapara ita hodi halaʼo ita-nia adorasaun? (b) Jeová uza saida atu hametin no fó forsa ba ita? (c) Ita hetan benefísiu saida husi treinu sira neʼebé Jeová fó?
10 Ita bele fiar katak Diabu sei nunka husik ninia liman atu kontinua hapara ita hodi halaʼo ita-nia adorasaun. Nia uza lia-bosok no uza governu, ulun-naʼin relijiaun, no ema soe-fiar sira hodi ameasa ita. Nia hakarak hapara ita atu la bele haklaken liafuan diʼak kona-ba Maromak nia Ukun. Maibé Jeová hakarak no iha kbiit atu hametin ita liuhusi ninia espíritu santu. (1 Crônicas [Tawarikh] 29:12) Importante tebes ba ita atu husu Maromak nia espíritu santu hodi bele luta hasoru Satanás ho ninia mundu aat neʼe. (Salmo [Mazmur] 18:39; 1 Korinto 10:13) Ita agradese tanba bele hetan ajuda husi Bíblia. No ita mós aprende buat barak husi ita-nia livru neʼebé ita simu fulan-fulan. Eskritura husi Zacarias (Zakharia) 8:9, 13 (lee) [4] mak liafuan sira neʼebé hatoʼo iha tempu neʼebé harii hela templu iha Jeruzalein, no liafuan sira-neʼe bele duni ajuda ita ohin loron.
11 Jeová mós hametin ita liuhusi matadalan neʼebé ita simu husi reuniaun, reuniaun boot, no eskola Bíblia sira. Treinu sira-neʼe fó laran-manas ba ita, ajuda ita atu halo planu espirituál, no oinsá atu kaer ita-nia responsabilidade ho didiʼak nuʼudar ema kristaun. (Salmo [Mazmur] 119:32) Ita aproveita didiʼak ajuda sira-neʼe hodi hetan forsa husi Jeová ka lae?
12. Ita tenkesér halo saida atu hametin relasaun ho Maromak?
12 Jeová ajuda ninia povu manán hasoru ema Ámalek no ema Etiópia. Nia fó forsa ba Neemias ho ema judeu seluk hodi harii fali Jeruzalein nia moru toʼo hotu. Jeová mós sei fó forsa ba ita atu kontinua haklaken maski dala ruma ita sente neon-susar ka tanba ema kontra ita. (1 Pedro 5:10) Maibé neʼe la dehan katak Jeová sei halo milagre atu halakon problema sira neʼebé ita hasoru, ita mak tenke hakaʼas an. Ita tenke lee Bíblia loroloron, prepara didiʼak no tuir reuniaun sira, halaʼo beibeik estuda mesak no adorasaun família nian, no kontinua sadere ba Jeová liuhusi halo orasaun. Ita labele husik buat seluk hanetik ita atu hetan forsa no laran-manas husi Jeová. Se ita mak sente katak ita komesa husik tun ona ita-nia liman hodi la halo atividade sira-neʼe ida, husu Maromak atu ajuda ita. Ita sei haree duni katak espíritu santu sei ‘halo ita iha forsa, hodi fó ba ita hakarak no kbiit atu halo buat neʼebé monu loos ba nia laran’. (Filipe 2:13) Maibé oinsá mak ita bele fó fali forsa ba ema seluk?
FÓ FORSA BA LIMAN NEʼEBÉ KBIIT-LAEK
13, 14. (a) Oinsá mak irmaun ida hetan fali forsa bainhira ninia feen mate? (b) Iha dalan saida deʼit mak ita bele hametin ema seluk?
13 Jeová fó ba ita família boot ida iha mundu tomak hodi fó kmaan ba ita. Apóstolu Paulo dehan: “Halo loos imi-nia liman neʼebé kbiit-laek no imi-nia ain-tuur neʼebé fraku, no kontinua halo loos dalan ba imi-nia ain.” (Ebreu 12:12, 13) Neʼe mak dalan neʼebé irmaun-irmán sira apoia malu iha apóstolu sira-nia tempu. Ohin loron mós hanesan. Porezemplu, iha irmaun ida, ninia feen mate no nia mós hasoru problema seluk tan. Nia hatete: “Susar no terus sira neʼebé mosu, mai derrepente deʼit. Sira mai iha tempu naran deʼit no ita la bele hatene nanis terus neʼe kiʼik ka boot.” Irmaun neʼe dehan katak halo orasaun no estuda mesak mak importante tebes iha tempu neʼe. Nia mós hatete: “Apoia husi irmaun-irmán sira mós fó kmaan tebes haʼu. Ida-neʼe ajuda haʼu atu komprende katak antes hasoru situasaun susar, importante tebes atu iha relasaun neʼebé diʼak ho Jeová.”
Ema hotu iha kongregasaun bele ajuda fó laran-manas ba malu (Haree parágrafu 14)
14 Aarão no Hur ajuda duni hodi hametin Moisés nia liman durante ema Izraél funu hasoru ema Ámalek. Ohin loron, ita mós bele buka dalan atu apoia no fó ajuda ba ema seluk, hanesan irmaun-irmán sira neʼebé hasoru hela susar tanba idade, problema ho saúde, família fó terus, sente mesamesak, ka tanba ema neʼebé sira hadomi mate. Ita mós bele hametin ita-nia joven sira tanba sira hasoru beibeik tentasaun atu halo buat neʼebé sala ka atu sai ema susesu iha Satanás nia mundu. (1 Tesalónika 3:1-3; 5:11, 14) Koko atu hatene diʼak liután ema seluk iha ita-nia kongregasaun, iha serbisu haklaken, bainhira han hamutuk, ka iha tempu koʼalia ho ema seluk liuhusi telefone.
15. Oinsá mak ita-nia liafuan neʼebé pozitivu bele ajuda irmaun-irmán sira?
15 Bainhira Asa funu manán tiha ema Etiópia, profeta Azarias fó laran-manas ba nia ho ninia povu hodi dehan: “Maibé, ba imi, sai aten-brani bá no keta husik imi-nia liman sai kbiit-laek, tanba imi sei simu bensaun ba imi-nia hahalok.” (2 Crônicas [Tawarikh] 15:7) Liafuan sira-neʼe book Asa atu halo mudansa oioin hodi harii fali adorasaun neʼebé loos. Hanesan neʼe mós, se ita mak koʼalia liafuan neʼebé pozitivu, neʼe bele fó laran-manas ba ema no ajuda sira atu kontinua serbí Jeová. (Provérbios [Amsal] 15:23) No keta haluha katak bainhira ita fó komentáriu neʼebé pozitivu iha reuniaun, neʼe mós bele hametin ita-nia irmaun-irmán sira.
16. Iha dalan saida mak katuas kongregasaun bele banati-tuir Neemias? Konta toʼok esperiénsia ruma kona-ba oinsá mak irmaun-irmán seluk fó ajuda Ita.
16 Ho Jeová nia ajuda mak Neemias no povu judeu hetan fali forsa, no iha loron 52 nia laran, sira harii fali Jeruzalein nia moru. (Neemias 2:18; 6:15, 16) No Neemias la tuur deʼit hodi haree ema seluk mak serbisu. Nia rasik mós ajuda hodi harii fali moru sira-neʼe. (Neemias 5:16) Ohin loron, katuas husi kongregasaun sira mós banati-tuir Neemias nia ezemplu hodi fó apoiu atu harii fatin adorasaun ka hamoos no tau matan ba Reuniaun-Fatin. Katuas sira-neʼe mós hametin irmaun-irmán sira neʼebé neon-susar liuhusi vizita no haklaken hamutuk ho sira.—Isaías (Yesaya) 35:3, 4.
“KETA HUSIK TUN Ó-NIA LIMAN”
17, 18. Bainhira ita hasoru problema ruma ka neon-susar, tanbasá ita lalika taʼuk?
17 Serbisu hamutuk ho ita-nia irmaun-irmán sira bele hametin unidade. Serbisu hamutuk mós bele hametin ita-nia relasaun no haburas ita-nia fiar kona-ba bensaun sira neʼebé ita sei simu liuhusi Jeová nia Ukun iha futuru. Bainhira ita hametin ema seluk, ita ajuda sira atu bele tahan hasoru situasaun susar iha sira-nia moris no atu iha fiar neʼebé metin kona-ba esperansa sira iha futuru. Ajuda ema seluk mós bele hametin ita rasik no ajuda ita atu hanoin nafatin kona-ba ita-nia futuru.
18 Haree ona oinsá Jeová ajuda no proteje ninia atan sira iha tempu uluk, ajuda duni ita haburas ita-nia fiar no sadere ba Jeová. Tan neʼe mak bainhira ita hasoru susar no problema ruma, ‘keta husik tun ita-nia liman’, lolo liman ba Jeová liuhusi orasaun, no husik ninia liman neʼebé forte atu hametin ita no lori ita ba bensaun husi ninia Ukun iha futuru.—Salmo (Mazmur) 73:23, 24.
^ [1] (parágrafu 2) Isaías 41:10, 13 10 Keta taʼuk tanba haʼu hamutuk ho imi. Keta laran-taridu tanba haʼu mak imi-nia Maromak. Haʼu sei hametin imi, sin, haʼu sei ajuda imi, haʼu sei kaer metin duni imi ho haʼu-nia liman-loos justisa nian.’ 13 Tanba haʼu, Jeová imi-nia Maromak, mak kaer imi-nia liman-loos, Ida neʼebé dehan ba imi: ‘Keta taʼuk. Haʼu sei ajuda imi.’
^ [2] (parágrafu 5) Sofonias 3:16, 17 16 Iha loron neʼebá sei hatete ba Jeruzalein: “Keta taʼuk, oh Siaun. Keta hatún ó-nia liman. 17 Jeová ó-nia Maromak mak iha ó-nia leet. Nuʼudar Ida neʼebé forsa boot, nia sei salva ó. Nia sei haksolok ho laran kontente tanba ó. Nia sei sai nonook iha ninia domin. Nia sei haklalak ho haksolok tanba ó.
^ [3] (parágrafu 9) Neemias 6:9 Tanba sira hotu koko atu halo ami taʼuk no dehan: “Sira-nia liman sei sai fraku hodi halo serbisu neʼe, no serbisu neʼe sei la hotu.” Agora, haʼu harohan, hametin haʼu-nia liman bá.
^ [4] (parágrafu 10) Zacarias 8:9, 13 9 “Neʼe mak buat neʼebé Jeová, ukun-naʼin ba tropa lalehan nian hatete: ‘Halo forte imi-nia liman bá, liafuan sira neʼebé ohin loron imi rona husi profeta sira-nia ibun, liafuan sira-neʼe duni mak fó sai iha loron neʼebé nahe fundasaun ba Jeová, ukun-naʼin ba tropa lalehan nia uma atu harii fali templu. 13 No hanesan imi sai ona buat malisan ida iha nasaun sira-nia leet, oh umakain ba Judá no umakain ba Izraél, tan neʼe haʼu sei salva imi, no imi sei sai fali bensaun ida. Keta taʼuk! Halo forte imi-nia liman bá.’
