1-2. (a) Tanbasá feen-laʼen neʼebé foin kaben presiza tau fiar ba Jeová? (Salmo 37:3, 4) (b) Iha lisaun neʼe, ita sei aprende saida?

 SE ITA besik ona atu kaben ka foin mak kaben, klaru katak Ita hein namanas atu moris hamutuk ba tempu kleur ho ema neʼebé Ita hadomi. Maibé, dala ruma problema mosu iha moris kaben nian no Ita presiza halo desizaun importante oioin. Buat neʼebé Ita halo kuandu problema mosu no Ita-nia desizaun sira bele afeta Ita no Ita-nia kaben durante tinan barak. Se Ita sadere ba Jeová, Ita sei halo desizaun neʼebé matenek, Ita-nia moris kaben nian sei sai metin liután no Ita sei kontente liu. Maibé se Ita la halo tuir Maromak nia matadalan, karik Ita sei hasoru problema iha moris kaben nian no Ita sei la sente kontente.​—Lee Salmo 37:3, 4.

² Maski lisaun neʼe hakerek liuliu ba feen-laʼen neʼebé foin kaben, maibé lisaun neʼe mós sei koʼalia kona-ba problema sira neʼebé karik feen-laʼen hotu hasoru. Ita sei koʼalia kona-ba buat neʼebé ita bele aprende husi mane no feto fiar-naʼin sira iha Bíblia. Ita bele aprende lisaun oioin husi sira no aplika ida-neʼe iha ita-nia moris, inklui iha moris kaben nian. Ita mós sei aprende husi feen-laʼen balu iha ita-nia tempu.

3-4. Karik feen-laʼen neʼebé foin kaben hasoru problema saida deʼit?

³ Dala ruma ema balu anima feen-laʼen neʼebé foin kaben atu halaʼo moris neʼebé hanesan ho ema barak. Porezemplu, karik inan-aman ka família seluk anima feen-laʼen atu iha kedas oan. Karik belun sira ka família anima feen-laʼen atu sosa uma no sasán barak atu bele iha moris diʼak.

⁴ Se feen-laʼen la kuidadu, karik rezultadu husi sira-nia desizaun mak sira tenke debe osan barak. Karik laʼen no mós feen presiza serbisu ba oras barak atu bele selu debe. Karik sira serbisu demais toʼo ikusmai la iha tempu atu estuda Bíblia mesak, halaʼo adorasaun família no bá haklaken. Karik sira falta beibeik reuniaun atu bele serbisu overtime tanba hakarak manán osan barak liután ka taʼuk lakon sira-nia serbisu. Se sira halo nuneʼe, sira lakon oportunidade atu aumenta sira-nia serbisu ba Jeová.

5. Saida mak ita aprende husi irmaun Klaus no irmán Marisa?

⁵ Ezemplu barak hatudu katak bainhira ita tau fokus atu hetan rikusoin barak, neʼe la lori moris neʼebé kontente. Hanoin toʼok buat neʼebé irmaun Klaus no ninia feen Marisa aprende. * Bainhira sira kaben, sira naʼin-rua serbisu full-time atu bele moris diʼak. Maibé sira la sente kontente. Irmaun Klaus hatete: “Ami iha sasán barak liu fali buat neʼebé ami presiza, maibé ami la iha planu espirituál. Tuir loloos, ami-nia moris komplikadu no ami sente estrese.” Karik Ita mós nota katak bainhira Ita tau fokus atu hetan rikusoin barak, neʼe la halo Ita kontente. Se nuneʼe, keta sai laran-kraik. Hodi aprende husi ema seluk nia ezemplu diʼak, neʼe bele ajuda Ita halo mudansa sira. Primeiru, mai ita haree saida mak laʼen sira bele aprende husi Liurai Jeosafát.

6. Tuir matadalan iha Provérbios 3:5, 6, Jeosafát halo saida kuandu hasoru problema?

⁶ Se Ita mak laʼen ida, karik Ita hanoin barak kona-ba Ita-nia responsabilidade oioin. Se nuneʼe, Liurai Jeosafát nia ezemplu bele ajuda Ita. Nuʼudar liurai, Jeosafát tenke tau matan ba nasaun ida tomak atu povu bele sente seguru nafatin. Oinsá nia bele kumpre responsabilidade neʼe? Jeosafát hakaʼas an atu proteje ninia povu. Nia halo sidade sira iha Judá seguru liután no organiza soldadu hamutuk millaun ida liu. (2 Krón 17:12-19) Depois neʼe, Jeosafát hasoru problema boot. Ema Ammon, ema Moab no ema husi área Seir forma tropa boot no mai ameasa nia, ninia família no mós ninia povu. (2 Krón 20:1, 2) Saida mak  Jeosafát halo? Nia buka ajuda no kbiit husi Jeová. Neʼe tuir matadalan neʼebé hakerek iha Provérbios 3:5, 6. (Lee.) Jeosafát nia orasaun neʼebé hakerek iha 2 Krónikas 20:5-12 hatudu katak nia fiar tebes Jeová. Oinsá Jeová hatán Jeosafát nia orasaun?

7. Oinsá Jeová hatán Jeosafát nia orasaun?

⁷ Jeová koʼalia ba Jeosafát liuhusi ema Levi ida naran Jaaziel. Jeová hatete: “Hamriik iha imi-nia fatin, hamriik metin no haree oinsá Jeová salva imi.” (2 Krón 20:13-17) Baibain ema la halo funu iha dalan hanesan neʼe. Maibé matadalan neʼe la mai husi ema, ida-neʼe mai husi Jeová. Jeosafát tau fiar tomak ba Jeová no halo tuir Jeová nia matadalan. Bainhira nia no ninia povu laʼo atu bá hasoru inimigu, nia haruka kantadór sira neʼebé la kaer armas atu laʼo uluk iha tropa sira-nia oin. Jeová kumpre ninia promesa ba Jeosafát. Jeová manán inimigu.​—2 Krón 20:18-23.

8. Laʼen sira bele aprende saida husi Jeosafát?

⁸ Se Ita mak laʼen ida, saida mak Ita bele aprende husi Jeosafát? Ita iha responsabilidade atu tau matan ba Ita-nia família, tan neʼe Ita presiza hakaʼas an atu proteje no sustenta Ita-nia família. Bainhira Ita hasoru problema sira, karik Ita hanoin katak Ita bele rezolve rasik problema sira-neʼe. Duké sadere ba Ita-nia kbiit rasik, diʼak atu halo orasaun ba Jeová. No mós harohan ba Jeová hamutuk ho Ita-nia feen. Buka matadalan husi Jeová liuhusi estuda Bíblia no publikasaun sira husi Maromak nia organizasaun, no halo tuir matadalan neʼebé Ita hetan. Karik ema seluk la konkorda ho Ita-nia desizaun neʼebé bazeia ba Bíblia. Karik sira hatete katak Ita halo desizaun neʼebé beik ka hatete katak osan no sasán mak fó protesaun neʼebé diʼak liu. Maibé hanoin-hetan Jeosafát nia ezemplu. Nia tau fiar ba Jeová no hatudu ida-neʼe liuhusi ninia hahalok. Jeová nunka husik Jeosafát neʼebé laran-metin, Jeová mós sei nunka husik Ita. (Sal 37:28; Ebr 13:5) Saida tan mak feen-laʼen bele halo atu iha moris kontente?

9. Isaias no ninia feen mak ema oinsá?

⁹ Buat neʼebé importante liu iha Isaias no ninia feen nia moris mak sira-nia serbisu ba Jeová. Isaias mak profeta ida no karik ninia feen mós halaʼo knaar ruma husi Jeová, tanba Bíblia bolu Isaias nia feen nuʼudar profeta. (Isa 8:1-4) Isaias no ninia feen tau uluk adorasaun ba Jeová iha sira-nia moris. Sira mak ezemplu diʼak tebes ba feen-laʼen sira.

10. Oinsá estuda profesia sira bele ajuda feen-laʼen atu hakaʼas an liután hodi serbí Jeová?

¹⁰ Ohin loron, feen-laʼen bele banati-tuir Isaias no ninia feen hodi tau uluk serbisu ba Jeová. Sira bele hametin sira-nia fiar ba Jeová liuhusi estuda Bíblia nia profesia hamutuk no buka-hatene oinsá profesia sira-neʼe sai loos ona. * (Tito 1:2) Sira mós bele hanoin kona-ba oinsá sira bele hola parte atu kumpre profesia balu. Porezemplu, sira bele hola parte atu kumpre Jesus nia profesia kona-ba haklaken liafuan diʼak iha mundu tomak antes mundu nia rohan mai. (Mt 24:14) Bainhira sira fiar metin  katak profesia balu sai loos daudaun, neʼe sei book sira atu hakaʼas an liután aumenta sira-nia serbisu ba Jeová.

11. Priscila no Áquila bele halo saida no tanbasá?

¹¹ Feen-laʼen neʼebé foin kaben bele aprende husi Priscila no Áquila, sira mak feen-laʼen Judeu neʼebé hela iha sidade Roma. Sira rona ona liafuan diʼak kona-ba Jesus no sai ema Kristaun. Ita bele fiar katak sira moris kontente. Maibé derrepente sira-nia moris troka tanba Liurai Cláudio haruka ema Judeu hotu atu sai husi Roma. Imajina oinsá situasaun neʼe afeta Priscila no Áquila. Sira tenke muda ba fatin foun, buka uma foun no hahú sira-nia negósiu atu halo tenda. Maski nuneʼe, sira-nia situasaun foun la hanetik sira atu kontinua tau uluk Maromak nia Ukun iha sira-nia moris. Iha Korinto, Priscila no Áquila komesa ajuda kongregasaun, no sira serbisu hamutuk ho apóstolu Paulo atu ajuda hametin irmaun-irmán sira. Depois neʼe, sira mós muda ba fatin seluk tan neʼebé presiza liután haklaken-naʼin. (Após 18:18-21; Rom 16:3-5) Sira serbí Jeová ho badinas no neʼe lori kontente ba sira.

12. Tanbasá feen-laʼen presiza halo planu espirituál?

¹² Ohin loron, feen-laʼen sira bele banati-tuir Priscila no Áquila liuhusi tau uluk Maromak nia Ukun iha sira-nia moris. Tempu namora mak tempu diʼak atu koʼalia kona-ba planu sira. Bainhira feen-laʼen halo desizaun hamutuk no hakaʼas an atu kumpre planu espirituál hamutuk, neʼe loke dalan ba sira atu haree oinsá Jeová ajuda sira. (Ecle 4:9, 12) Hanoin toʼok kona-ba feen-laʼen naran Russell no Elizabeth. Irmaun Russell hatete: “Bainhira ami namora, ami koʼalia kona-ba planu espesífiku atu serbí Jeová liután.” Irmán Elizabeth hatete: “Ami koʼalia kona-ba neʼe, atu nuneʼe bainhira ami presiza halo desizaun iha futuru, ami sei hakaʼas an atu la halo desizaun neʼebé hanetik ami atu kumpre ami-nia planu.” Ikusmai irmaun Russell  no irmán Elizabeth muda ba Mikronézia neʼebé presiza liután haklaken-naʼin.

13. Tuir Salmo 28:7, saida mak sei akontese bainhira ita tau fiar ba Jeová?

¹³ Hanesan ho irmaun Russell no irmán Elizabeth, feen-laʼen barak deside atu halaʼo moris neʼebé simples atu nuneʼe sira bele uza tempu barak liu atu haklaken no hanorin lia-loos. Bainhira feen-laʼen halo planu espirituál no tuirmai hakaʼas an atu kumpre planu sira-neʼe hamutuk, neʼe sei lori rezultadu diʼak. Sira sei haree oinsá Jeová tau matan ba sira, sira-nia fiar ba Jeová sei sai metin liután no sira sei moris kontente.​—Lee Salmo 28:7.

14. Oinsá apóstolu Pedro no ninia feen hatudu katak sira tau fiar ba Jeová nia promesa iha Mateus 6:25, 31-34?

¹⁴ Feen-laʼen sira mós bele aprende husi apóstolu Pedro no ninia feen. Maizumenus fulan neen toʼo tinan ida depois Pedro hasoru Jesus ba dala primeiru, Pedro presiza halo desizaun importante. Pedro serbisu nuʼudar peskadór atu sustenta ninia família. Tan neʼe, bainhira Jesus konvida Pedro atu laʼo tuir nia tempu-tomak, Pedro presiza tetu didiʼak oinsá ninia desizaun neʼe afeta ninia família. (Lc 5:1-11) Pedro hili atu bá haklaken hamutuk ho Jesus. Nia halo desizaun neʼebé matenek. No ita bele fiar katak Pedro nia feen apoia desizaun neʼe. Bíblia fó sai katak depois Jesus moris-hiʼas, Pedro no ninia feen halo viajen hamutuk durante tempu balu. (1 Kor 9:5) Klaru katak, Pedro nia feen hatudu hahalok diʼak, tan neʼe Pedro bele fó konsellu ba feen-laʼen Kristaun. (1 Ped 3:1-7) Pedro no ninia feen tau fiar ba Jeová nia promesa katak Jeová sei tau matan ba sira se sira tau uluk ninia Ukun.​—Lee Mateus 6:25, 31-34.

15. Saida mak ita aprende husi irmaun Tiago no irmán Esther?

¹⁵ Se Ita kaben ona ba tinan balu, oinsá Ita bele kontinua haburas hakarak atu aumenta liután Ita-nia serbisu ba Jeová? Dalan ida mak aprende kona-ba feen-laʼen seluk nia esperiénsia. Porezemplu, Ita bele lee série ho títulu “Sira fó sira-nia an ho hakarak rasik”. Série neʼe book Tiago no Esther husi rai-Brazíl atu serbí iha fatin neʼebé presiza liután haklaken-naʼin. Irmaun Tiago esplika: “Bainhira ami lee esperiénsia sira kona-ba oinsá Jeová ajuda ninia atan sira ohin loron, ami mós hakarak halo tuir Jeová nia matadalan no sente rasik ninia ajuda.” Ikusmai, sira muda ba rai-Paraguai no husi tinan 2014 sira haklaken ho lian Portugés. Irmán Esther esplika: “Eskritura ida neʼebé ami gosta tebes mak Éfeso 3:20. Dala barak, ami haree liafuan sira-neʼe sai loos nuʼudar ami serbí Jeová.” Bainhira Paulo hakerek karta neʼe ba ema Kristaun iha Éfeso, nia hatete katak Jeová sei fó buat neʼebé ita presiza liu fali buat neʼebé ita husu. Liafuan sira-neʼe sai loos beibeik!

16. Feen-laʼen neʼebé foin kaben bele husu matadalan husi sé deʼit kuandu hanoin kona-ba sira-nia planu sira?

¹⁶ Ohin loron, feen-laʼen sira bele aprende buat barak husi ema seluk neʼebé sadere ba Jeová. Feen-laʼen balu serbí nuʼudar pioneiru durante tinan barak. Ita bele husu matadalan husi sira bainhira ita hanoin kona-ba ita-nia planu sira. Neʼe mak dalan ida atu hatudu katak  ita tau fiar ba Jeová. (Prov 22:17, 19) Katuas kongregasaun mós bele ajuda feen-laʼen neʼebé foin kaben atu halo planu espirituál no kumpre planu sira-neʼe.

17. Irmaun Klaus no irmán Marisa hasoru situasaun saida, no ita bele aprende saida?

¹⁷ Dala ruma, ita hakarak serbí Jeová liután iha dalan ida, maibé Jeová dirije ita atu serbí nia iha dalan seluk. Hanoin toʼok, kona-ba irmaun Klaus no irmán Marisa neʼebé temi ohin. Bainhira sira kaben ona ba tinan tolu, sira muda no ajuda serbisu konstrusaun iha sukursál Finlándia. Maibé afinál sira-nia knaar mak ba fulan neen deʼit. Foufoun sira sente triste. Maibé lakleur, sira simu konvite atu tuir kursu língua Arabi. Agora sira serbí iha nasaun seluk no haklaken ho lian Arabi. Irmán Marisa hatete: “Haʼu sente taʼuk atu halo buat neʼebé foun no haʼu presiza tau fiar tomak ba Jeová. Maibé haʼu haree ona oinsá Jeová ajuda ami iha dalan oioin neʼebé ami nunka espera. Neʼe hametin haʼu-nia fiar ba Jeová.” Hanesan esperiénsia neʼe, ita mós bele iha konfiansa katak Jeová sei fó kolen ba ita se ita tau fiar tomak ba nia.

18. Feen-laʼen sira bele halo saida atu kontinua tau fiar ba Jeová?

¹⁸ Moris kaben nian mak prezente husi Jeová. (Mt 19:5, 6) Nia hakarak feen-laʼen atu haksolok ho prezente neʼe. (Prov 5:18) Se Ita mak foin kaben, Ita presiza analiza oinsá Ita uza Ita-nia tempu. Ita hakaʼas an atu hatudu ba Jeová katak Ita hafolin tebes moris kaben nian ka lae? Halo orasaun ba Jeová, buka matadalan husi Bíblia neʼebé Ita bele aplika no halo tuir matadalan husi Jeová. Ita bele fiar metin katak Ita sei moris kontente se Ita tau uluk serbisu ba Jeová iha Ita-nia moris kaben nian.