1. Jeová anima ita atu halo saida?

 JEOVÁ gosta tebes atu hatudu domin neʼebé laran-metin. (Os 6:6) Nia mós hakarak ninia atan sira atu hatudu hahalok neʼe. Liuhusi profeta Miqueias, Maromak anima ita atu hatudu domin neʼebé laran-metin. (Miq 6:8, nota) Maibé antes neʼe, ita presiza komprende domin neʼebé laran-metin katak sá.

2. Saida mak domin neʼebé laran-metin?

² Saida mak domin neʼebé laran-metin? Fraze “domin neʼebé laran-metin” mosu maizumenus dala 230 liu iha Bíblia Sagrada Tradusaun Mundu Foun. Saida mak domin neʼe? Bíblia neʼe nia Glosáriu esplika katak domin neʼebé laran-metin “refere ba domin kleʼan neʼebé motiva ho kompromisu, integridade, hahalok laran-metin no sentimentu neʼebé besik liu. Dala barak Bíblia uza liafuan neʼe atu koʼalia kona-ba Maromak nia domin ba ema, maibé ema mós bele hatudu domin hanesan neʼe ba malu”. Jeová mak ezemplu diʼak liu kona-ba hatudu domin neʼebé laran-metin. Iha lisaun neʼe, ita sei aprende kona-ba oinsá Jeová hatudu domin neʼebé laran-metin ba ema. Iha lisaun tuirmai, ita sei aprende oinsá ita bele banati-tuir Jeová liuhusi hatudu domin neʼebé laran-metin ba malu.

3. Jeová fó sai saida ba Moisés?

³ Lakleur depois nasaun Izraél sai husi rai-Ejitu, Jeová fó sai buat ruma kona-ba ninia naran no hahalok ba Moisés. Nia hatete: “Jeová, Jeová, Maromak neʼebé laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos, Maromak neʼebé hatudu domin neʼebé laran-metin ba ema rihun ba rihun, fó perdua ba  sala sira no ba hahalok kontra lei no hahalok aat.” (Éx 34:6, 7) Entaun, Jeová fó sai ba Moisés buat ruma neʼebé espesiál kona-ba ninia domin neʼebé laran-metin. Neʼe mak saida?

4-5. (a) Jeová hatete saida kona-ba ninia an? (b) Iha lisaun neʼe, ita sei koʼalia kona-ba pergunta saida deʼit?

⁴ Jeová la hatete deʼit katak nia iha domin neʼebé laran-metin, maibé nia hatete katak nia “nakonu ho domin neʼebé laran-metin”. Fraze neʼe temi dala barak tan iha Bíblia laran. (Núm 14:18; Neem 9:17; Sal 86:15; 103:8; Joel 2:13; Jonas 4:2) Kada fraze neʼe mosu iha Bíblia, neʼe sempre refere ba Jeová. Furak tebes tanba Jeová esplika katak nia nakonu ho domin neʼebé laran-metin. Entaun ita bele haree katak hahalok neʼe importante ba Jeová. Tan neʼe, Liurai David hatete: “Oh Jeová, Ita-nia domin neʼebé laran-metin aas tebes toʼo lalehan . . . Oh Maromak, Ita-nia domin neʼebé laran-metin mak folin-boot tebes! Ema buka protesaun iha Ita-nia liras okos.” (Sal 36:5, 7) Ita mós hafolin tebes Maromak nia domin neʼebé laran-metin ka lae?

⁵ Atu ajuda ita komprende didiʼak domin neʼebé laran-metin, mai ita koʼalia kona-ba pergunta rua: Jeová hatudu domin neʼebé laran-metin ba sé deʼit? Oinsá Jeová nia domin neʼebé laran-metin bele ajuda ita?

6. Jeová hatudu domin neʼebé laran-metin ba sé deʼit?

⁶ Jeová hatudu domin neʼebé laran-metin ba sé deʼit? Bíblia hatete katak ita bele hadomi buat oioin, hanesan “tua-uvas no mina”, “dixiplina”, “koñesimentu”, no “matenek”. (Prov 12:1; 21:17; 29:3) Maibé ita labele hatudu domin neʼebé laran-metin ba buat sira-neʼe. Ita bele hatudu hahalok neʼe ba deʼit Jeová no mós ema. Maibé Jeová la hatudu domin neʼebé laran-metin ba ema hotu. Nia hatudu domin neʼebé laran-metin ba deʼit ema sira neʼebé hili atu iha relasaun besik ho nia. Maromak laran-metin ba ninia belun sira. Maromak nia hakarak ba sira mak furak no nia sei nunka para atu hadomi sira.

7. Oinsá Jeová hatudu domin ba ema hotu?

⁷ Jeová hatudu domin ba ema hotu. Jesus hatete ba Nicodemos: “Maromak hadomi tebes mundu [katak ema] toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”​—João 3:1, 16; Mt 5:44, 45.

8-9. (a) Tanbasá Jeová hatudu domin neʼebé laran-metin ba ninia atan sira? (b) Tuirmai ita sei koʼalia kona-ba saida?

 ⁸ Hanesan temi ohin, Jeová hatudu domin neʼebé laran-metin ba deʼit ninia atan sira. Ita bele hatene ida-neʼe liuhusi buat neʼebé Liurai David no profeta Daniel hatete. Porezemplu, David hatete: “Favór ida, kontinua hatudu domin neʼebé laran-metin ba ema neʼebé koñese Ita.” Nia mós hatete: “Jeová hatudu domin neʼebé laran-metin ba nafatin ba sira neʼebé hamtaʼuk nia.” No Daniel hatete: “Oh Jeová, Ita mak Maromak neʼebé loos, no hatudu domin neʼebé laran-metin ba ema neʼebé hadomi Ita no halo tuir Ita-nia mandamentu sira.” (Sal 36:10; 103:17; Dan 9:4) Entaun, Jeová hatudu domin neʼebé laran-metin ba ninia atan sira tanba sira koñese nia, hamtaʼuk nia, hadomi nia no halo tuir ninia mandamentu sira. Jeová hatudu hahalok neʼe ba deʼit ema neʼebé adora nia iha dalan neʼebé loos.

⁹ Antes ita komesa serbí Jeová, nia hatudu domin ba ita hanesan nia hatudu ba ema hotu. (Sal 104:14) Maibé nia mós hatudu domin neʼebé laran-metin ba ita nuʼudar ninia atan sira. Tuir loloos, Jeová promete ba ninia atan sira: “Haʼu sei la hasai haʼu-nia domin neʼebé laran-metin husi ó.” (Isa 54:10) David rasik sente ona katak “Jeová sei hafolin tebes ema neʼebé laran-metin ba nia”. (Sal 4:3) Ita presiza halo saida tanba simu domin neʼe? Salmo 107:43 hatete: “Ema neʼebé matenek sei haree didiʼak buat sira-neʼe no sira sei hanoin didiʼak Jeová nia hahalok domin neʼebé laran-metin.” Matadalan neʼe mai husi Jeová. Entaun mai ita koʼalia kona-ba dalan tolu neʼebé Jeová hatudu domin neʼebé laran-metin no oinsá neʼe ajuda ita.

10. Bainhira hatene katak Jeová nia domin neʼebé laran-metin iha ba nafatin, oinsá neʼe ajuda ita? (Salmo 31:7)

¹⁰ Maromak nia domin neʼebé laran-metin iha ba nafatin. Salmo 136 temi kona-ba domin neʼebé laran-metin dala 26. Salmo 136:1 hatete: “Fó agradese ba Jeová, tanba nia mak diʼak; ninia domin neʼebé laran-metin iha ba nafatin.” Iha  versíkulu ida-idak husi versíkulu 2 toʼo 26, ita bele lee fraze “ninia domin neʼebé laran-metin iha ba nafatin”. Bainhira ita lee Salmo neʼe, ita admira tebes ho dalan oioin neʼebé Jeová kontinua hatudu domin neʼebé laran-metin. Fraze “ninia domin neʼebé laran-metin iha ba nafatin” fó konfiansa mai ita katak Maromak nia domin ba ninia povu nunka troka. Ita sente kmaan tanba hatene katak Jeová la rende an lalais atu hadomi ita. Bainhira nia komesa hadomi ema ruma neʼebé serbí nia, nia nunka husik ema neʼe, liuliu kuandu ema neʼe hasoru susar. Oinsá neʼe ajuda ita? Bainhira ita hatene katak Jeová nunka husik ita, neʼe halo ita sente haksolok no iha kbiit atu tahan hasoru susar sira no kontinua laʼo iha dalan neʼebé lori ba moris.​—Lee Salmo 31:7.

11. Tuir Salmo 86:5, saida mak book Jeová atu fó perdua?

¹¹ Maromak nia domin neʼebé laran-metin book nia atu fó perdua. Bainhira Jeová haree katak ema neʼebé halo sala arrepende an no hakribi ninia sala, tuirmai Jeová sei fó perdua ba nia tanba Jeová nia domin neʼebé laran-metin. David hatete kona-ba Jeová: “Nia la fó kastigu ba ita tuir ita-nia sala, no nia la selu fali ba ita ho buat neʼebé ita merese simu tuir ita-nia sala.” (Sal 103:8-11) David sente rasik ona oinsá ninia konxiénsia fó-sala ba nia no halo nia sente triste kuandu nia halo sala. Maibé nia mós aprende katak Jeová “prontu atu fó perdua”. Saida mak book Jeová atu fó perdua? Ita bele hetan resposta iha Salmo 86:5. (Lee.) Hanesan David temi iha ninia orasaun, Jeová fó perdua ba ema hotu neʼebé bolu nia tanba nia nakonu ho domin neʼebé laran-metin.

12-13. Saida mak bele ajuda ita atu la kontinua fó-sala ba ita-nia an?

¹² Bainhira ita halo sala, diʼak atu sente triste kona-ba neʼe. Sentimentu triste bele book ita atu arrepende an no troka ita-nia hahalok. Maibé Jeová nia atan balu kontinua fó-sala ba sira-nia an tanba sala neʼebé uluk sira halo. Sira hanoin katak Jeová nunka bele fó perdua ba sira, maski sira husu ona perdua no la halo tan sala. Se Ita komprende katak Jeová hakarak tebes atu hatudu domin  neʼebé laran-metin ba Ita, neʼe ajuda Ita atu la fó-sala tan ba Ita-nia an.

¹³ Oinsá neʼe ajuda ita? Maski ita la perfeitu, maibé ita bele serbí Jeová ho kontente no iha konxiénsia neʼebé moos tanba ninia “Oan-Mane Jesus nia raan bele hamoos ita-nia sala hotu”. (1 João 1:7) Bainhira Ita sente laran-kraik kona-ba Ita-nia fraku ruma, hanoin-hetan katak se Ita arrepende an, Jeová hakarak tebes perdua Ita. David esplika katak domin neʼebé laran-metin no fó perdua liga malu. Nia hakerek: “Hanesan lalehan aas liu fali rai, nuneʼe mós ninia domin ho laran-metin mak boot tebes ba sira neʼebé hamtaʼuk nia. Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.” (Sal 103:11, 12) Loos duni, Jeová prontu atu “fó perdua ho laran-luak”.​—Isa 55:7.

14. Oinsá David esplika dalan neʼebé Jeová nia domin neʼebé laran-metin proteje ita?

¹⁴ Maromak nia domin neʼebé laran-metin fó protesaun iha dalan espirituál. David halo orasaun: “Ita mak haʼu-nia subar-fatin; ita sei proteje haʼu husi haʼu-nia susar sira. Ita sei haleʼu haʼu ho haklalak haksolok nian tanba Ita salva haʼu. . . . Sira neʼebé tau fiar ba Jeová, ninia domin neʼebé laran-metin haleʼu sira.” (Sal 32:7, 10) Iha tempu antigu, moru sira haleʼu sidade ida no fó protesaun ba sidadaun sira. Jeová nia domin neʼebé laran-metin mós hanesan moru ida no proteje ita husi buat neʼebé bele estraga ita-nia relasaun diʼak ho Jeová. Liután neʼe, Jeová nia domin neʼebé laran-metin book nia atu dada ita ba nia.​—Jer 31:3.

15. Oinsá Jeová nia domin neʼebé laran-metin mak hanesan ho fatin protesaun?

¹⁵ David halo komparasaun seluk tan atu hatudu oinsá Maromak proteje ninia povu. Nia hakerek: “Maromak mak haʼu-nia fatin protesaun neʼebé seguru, Maromak neʼebé hatudu domin ho laran-metin ba haʼu.” David mós hatete kona-ba Jeová: “Nia mak haʼu-nia fatin seguru no nia hatudu domin neʼebé laran-metin ba haʼu, haʼu-nia fatin protesaun neʼebé seguru no haʼu-nia salvadór, nia mak haʼu-nia eskudu no haʼu buka ona mahon husi nia.” (Sal 59:17; 144:2) Tanbasá David kompara Jeová nia domin neʼebé laran-metin ho fatin protesaun no fatin seguru? Se ita serbí Jeová nafatin maski iha fatin naran deʼit, Jeová sei proteje ita husi buat naran deʼit neʼebé bele estraga ita-nia relasaun diʼak ho nia. Salmo 91 mós fó sai buat neʼebé hanesan, hodi hatete: “Haʼu sei hatete ba Jeová: ‘Ita-Boot mak haʼu-nia fatin protesaun no haʼu-nia fatin seguru.’” (Sal 91:1-3, 9, 14) Moisés mós temi kona-ba Jeová mak ita-nia fatin protesaun. (Sal 90:1, nota) Lakleur antes Moisés mate, nia mós halo komparasaun seluk tan. Nia hakerek: “Maromak mak fatin protesaun nian husi tempu antigu, ninia liman neʼebé iha ba nafatin mak apoia ó.” (Deut 33:27) Ita bele aprende saida kona-ba Jeová husi fraze “ninia liman neʼebé iha ba nafatin mak apoia ó”?

16. Oinsá Jeová ajuda ita? (Salmo 136:23)

¹⁶ Bainhira ita fiar katak Jeová sei proteje ita, ita bele sente seguru. Maski nuneʼe, karik dala ruma ita sente laran-kraik no sentimentu neʼe labele lakon. Bainhira ita sente hanesan neʼe, oinsá Jeová bele ajuda ita? (Lee Salmo 136:23.) Ho laran-diʼak, nia sei apoia ita hodi koʼus ita ho ninia liman no ajuda ita atu la sente tan laran-kraik. (Sal 28:9; 94:18) Oinsá neʼe ajuda ita? Ita hatene katak Jeová sei  sempre apoia ita, no neʼe ajuda ita iha dalan rua. Primeiru, ita hatene katak Jeová sei sempre proteje ita, maski ita hela iha fatin naran deʼit. Segundu, ita hatene katak ita-nia Aman Jeová hadomi tebes ita.

17. Ita bele iha konfiansa saida? (Salmo 33:18-22)

¹⁷ Ita aprende ona katak bainhira ita hasoru susar, ita bele fiar metin katak Jeová sei ajuda ita atu kontinua laran-metin ba nia. (2 Kor 4:7-9) Profeta Jeremias hatete: “Tanba Jeová nia domin neʼebé laran-metin mak ita la lakon mohu, tanba ninia laran-sadiʼa la iha rohan.” (Lam 3:22) Ita bele iha konfiansa katak Jeová sei kontinua hatudu domin neʼebé laran-metin tanba Bíblia hatete katak “Jeová nia matan hateke ba sira neʼebé hamtaʼuk nia, sira neʼebé hein ba ninia domin neʼebé laran-metin”.​—Lee Salmo 33:18-22.

18-19. (a) Ita presiza hanoin-hetan saida? (b) Iha lisaun tuirmai, ita sei koʼalia kona-ba saida?

¹⁸ Ita presiza hanoin-hetan saida? Antes ita komesa serbí Jeová, Jeová hatudu domin ba ita hanesan nia hatudu domin ba ema hotu. Maibé tanba ita serbí Jeová, nia mós hatudu domin neʼebé laran-metin ba ita. Domin neʼe book Jeová atu proteje ita. Nia sempre besik ita no sei kumpre ninia promesa hotu ba ita. Nia hakarak ita atu sai ninia belun ba nafatin. (Sal 46:1, 2, 7) Entaun, maski ita hasoru susar oioin, Jeová sei fó ita kbiit atu laran-metin nafatin.

¹⁹ Ita aprende ona kona-ba oinsá Jeová hatudu domin neʼebé laran-metin ba ninia atan sira. Nia mós hakarak ita atu hatudu domin neʼebé laran-metin ba malu. Oinsá ita bele halo ida-neʼe? Iha lisaun tuirmai, ita sei koʼalia kona-ba tópiku importante neʼe.