1. Ita bele husu pergunta saida ba ita-nia an?

 DALA ruma Ita sente laran-taridu kona-ba buat neʼebé lakleur sei akontese, hanesan bainhira relijiaun falsu lakon, Gog husi rai-Magog nia ataka, no funu Armagedon ka lae? Karik Ita husu Ita-nia an: ‘Haʼu bele hatudu laran-metin durante tempu sira-neʼe ka lae?’ Se nuneʼe, eskritura tema ba lisaun neʼe sei ajuda Ita. Jesus hatete ba ninia dixípulu: “Keta husik imi-nia laran sente susar. Hatudu fiar.” (João 14:1) Fiar neʼebé metin sei ajuda ita atu tahan hasoru situasaun naran deʼit iha futuru.

2. Oinsá ita bele hametin ita-nia fiar, no iha lisaun neʼe ita sei aprende saida?

² Ita bele hametin ita-nia fiar atu tahan hasoru susar iha futuru liuhusi hanoin kona-ba oinsá agora ita tahan susar. Se ita halo nuneʼe, ita bele hatene se ita presiza hametin liután ita-nia fiar. Bainhira ita tahan susar ida-idak, ita-nia fiar sai metin liután. Neʼe sei ajuda ita tahan susar sira iha futuru. Iha lisaun neʼe, ita sei koʼalia kona-ba situasaun haat neʼebé hatudu katak Jesus nia dixípulu presiza hametin sira-nia fiar. Tuirmai ita sei koʼalia kona-ba oinsá ita mós hasoru susar hanesan neʼe ohin loron no oinsá neʼe bele prepara ita ba futuru.

3. Jesus nia liafuan iha Mateus 6:30, 33 ajuda ita komprende saida?

³ Baibain família nia ulun hakarak atu tau matan família nia presiza hodi fó hahán, roupa no hela-fatin. No dala ruma neʼe la fasil. Irmaun-irmán balu lakon serbisu no maski sira hakaʼas an, sira la konsege hetan serbisu seluk. Irmaun-irmán seluk hili atu la simu serbisu ruma tanba serbisu neʼe kontra Bíblia nia matadalan. Iha situasaun  sira-neʼe, ita presiza fiar metin katak Jeová sei tau matan ba ita-nia família nia presiza. Jesus hanorin ida-neʼe iha ninia diskursu iha foho. (Lee Mateus 6:30, 33.) Bainhira ita fiar metin katak Jeová sei la husik ita, neʼe ajuda ita kontinua tau fokus atu serbí Jeová. Hodi haree oinsá Jeová ajuda ita atu tau matan ita-nia presiza, ita sei hakbesik liután ba nia no ita-nia fiar sei sai metin liután.

4-5. Saida mak ajuda família ida atu tahan laran-taridu kona-ba sira-nia presiza?

⁴ Hanoin toʼok oinsá Jeová ajuda irmaun Miguel no ninia família iha rai-Venezuela neʼebé hanoin barak kona-ba sira-nia presiza loroloron nian. Uluk sira bele halo toʼos no manán osan natoon atu sustenta sira-nia presiza. Maibé tuirmai geng neʼebé kaer armas hadau sira-nia toʼos no duni sai sira husi sira-nia rai. Irmaun Miguel hatete: “Agora ami moris deʼit husi toʼos kiʼik neʼebé ami halo iha ema seluk nia rai. Haʼu hahú loron ida-idak hodi husu Jeová atu fó buat neʼebé ami presiza ba loron neʼe.” Maski sira moris susar, maibé sira tau fiar tomak ba Aman Jeová katak nia sei tau matan sira-nia presiza loroloron no sira nafatin tuir reuniaun beibeik no haklaken. Sira tau uluk Maromak nia Ukun no Jeová tau matan ba sira-nia presiza.

⁵ Durante tempu susar neʼe, irmaun Miguel no ninia feen Yurai, hanoin kona-ba oinsá Jeová tau matan ba sira. Dala ruma, Jeová uza irmaun-irmán sira atu fó buat neʼebé sira presiza ka atu ajuda irmaun Miguel hetan serbisu. Tempu seluk, Jeová uza sukursál atu fó buat neʼebé sira presiza. Jeová nunka husik sira. Rezultadu mak sira-nia família nia fiar sai metin liután. Sira-nia oan-feto boot Yoselin hatete: “Bainhira ami haree ho klaru oinsá Jeová ajuda ami, neʼe anima tebes ami. Jeová mak haʼu-nia Belun no haʼu fiar metin katak nia sei ajuda haʼu. Problema sira neʼebé haʼu-nia família hasoru prepara ami atu bele tahan problema seluk neʼebé susar liután iha futuru.”

6. Oinsá ita bele hametin ita-nia fiar kuandu ita hasoru problema ekonomia?

⁶ Ita mós hasoru problema ekonomia ka lae? Se nuneʼe, neʼe mak tempu susar ba ita. Maski nuneʼe, ita bele uza situasaun neʼe atu hametin ita-nia fiar. Halo orasaun ba Jeová, lee Jesus nia liafuan iha Mateus 6:25-34 no medita kona-ba neʼe. Hanoin kona-ba irmaun-irmán sira-nia esperiénsia neʼebé hatudu katak Jeová tau matan ba ninia atan sira neʼebé badinas nafatin atu serbí nia. (1 Kor 15:58) Bainhira Ita halo nuneʼe, Ita sei hametin Ita-nia fiar katak Jeová sei ajuda Ita hanesan nia mós ajuda ona ema seluk neʼebé hasoru situasaun hanesan. Jeová hatene buat neʼebé Ita presiza no nia hatene oinsá atu fó ida-neʼe. Bainhira Ita  sente rasik Jeová nia ajuda, Ita-nia fiar sei sai metin liután, no neʼe sei ajuda Ita tahan susar neʼebé boot liután iha futuru.​—Hab 3:17, 18.

7. Tuir Mateus 8:23-26, oinsá tasi neʼebé siʼak koko dixípulu sira-nia fiar?

⁷ Bainhira Jesus no ninia dixípulu sira saʼe ró no anin boot halo tasi siʼak tebes, Jesus uza akontesimentu neʼe atu ajuda sira komprende katak sira presiza hametin sira-nia fiar. (Lee Mateus 8:23-26.) Bainhira anin boot no laloran baku makaʼas toʼo bee tama ba ró laran, Jesus toba-dukur hela. Dixípulu sira taʼuk tebes, sira fanu Jesus no husu nia atu salva sira. Jesus hatete: “Imi neʼebé fiar kiʼik, tanbasá mak imi sai taʼuk?” Tuir loloos, dixípulu sira la presiza taʼuk, sira tenke rekoñese katak Jeová bele proteje Jesus no sira. Ita aprende saida? Bainhira ita iha fiar metin, neʼe bele ajuda ita tahan problema oioin hanesan anin boot ka problema seluk neʼebé bele kompara ho anin boot.

8-9. Irmán Anel hasoru susar saida? Saida mak ajuda nia?

⁸ Hanoin toʼok kona-ba irmán klosan naran Anel husi rai-Porturriku. Ninia fiar sai metin liután tanba nia tahan susar neʼebé boot tebes. Iha tinan 2017, anin-fuik sobu ninia uma no nia mós lakon serbisu. Irmán Anel hatete: “Durante tempu susar neʼe, haʼu sente laran-taridu, maibé haʼu aprende atu tau fiar ba Jeová liuhusi halo orasaun no la husik haʼu-nia laran-taridu hanetik haʼu atu halo buat neʼebé haʼu presiza halo.”

⁹ Irmán Anel hatete katak hahalok halo tuir mós ajuda nia atu tahan hasoru ninia problema. Nia hatete: “Halo tuir matadalan husi Jeová nia organizasaun ajuda haʼu atu kalma nafatin. Jeová ajuda haʼu liuhusi irmaun-irmán sira. Sira anima haʼu no mós fó buat neʼebé haʼu presiza. Jeová fó ba haʼu barak liu fali duké buat neʼebé haʼu husu, no haʼu-nia fiar sai metin liután.”

10. Ita bele halo saida se Ita hasoru problema?

¹⁰ Ita hasoru problema boot ka lae? Karik Ita hasoru susar tanba dezastre naturais. Ka karik Ita moras todan no Ita sai laran-kraik, no la hatene atu halo saida. Karik dala ruma Ita sente laran-taridu, maibé keta husik Ita-nia laran-taridu hanetik Ita atu tau fiar ba Jeová. Hakbesik ba Jeová liuhusi orasaun. Hametin Ita-nia fiar hodi medita kona-ba oinsá Jeová ajuda ona Ita. (Sal 77:11, 12) Ita bele fiar metin katak Jeová sei nunka husik Ita.

11. Tanbasá ita presiza hakaʼas an atu halo tuir ema neʼebé dirije ita?

¹¹ Saida tan mak bele ajuda ita tahan hasoru susar sira? Irmán Anel hatete katak hahalok halo tuir bele ajuda ita.  Aprende atu tau fiar ba ema sira neʼebé Jeová no Jesus tau fiar. Dala ruma ema neʼebé dirije ita, fó matadalan neʼebé ita sente oin-seluk loos. Maski nuneʼe, hanoin-hetan Jeová haraik bensaun ba ema neʼebé halo tuir. Ita aprende husi Bíblia no mós irmaun-irmán sira katak se ita halo tuir, neʼe bele salva ita-nia moris. (Éx 14:1-4; 2 Krón 20:17) Medita kona-ba ezemplu sira-neʼe. Neʼe sei hametin ita-nia hakarak atu halo tuir matadalan husi Jeová nia organizasaun ohin loron no mós iha futuru. (Ebr 13:17) No ita la presiza taʼuk ba terus boot neʼebé lakleur tan sei mosu.​—Prov 3:25.

12. Tuir Lucas 18:1-8, saida mak ligasaun entre fiar no tahan situasaun la justu?

¹² Jesus hatene katak situasaun la justu sei koko ninia dixípulu sira-nia fiar. Atu ajuda sira tahan, nia konta ai-knanoik ida neʼebé hakerek iha livru Lucas. Jesus konta istória kona-ba feto-faluk neʼebé kontinua husu beibeik justisa husi juís neʼebé la laran-loos. Feto-faluk neʼe fiar metin katak juís neʼe sei ajuda nia se nia husu beibeik. Ikusmai, juís ajuda feto-faluk neʼe. Ita aprende saida? Jeová sempre hatudu hahalok justisa. Tan neʼe Jesus hatete: “Entaun, oinsá ho Maromak? Maromak hatudu duni pasiénsia ba ema neʼebé nia hili ona, neʼebé halerik ba nia loron-kalan, no nia sei halo sira hetan duni justisa.” (Lee Lucas 18:1-8.) Tuirmai, Jesus hatete: “Kuandu Oan-Mane husi Ema toʼo mai, nia sei hetan fiar hanesan neʼe iha mundu ka lae?” Bainhira ita hatudu pasiénsia no tahan hasoru situasaun neʼebé la justu, neʼe katak ita iha fiar neʼebé metin hanesan feto-faluk neʼe no ita bele fiar katak Jeová sei ajuda ita. Ita mós presiza fiar katak orasaun iha kbiit boot. Dala ruma, Jeová hatán ita-nia orasaun iha dalan neʼebé ita la espera.

13. Oinsá orasaun ajuda família ida neʼebé hasoru situasaun la justu?

¹³ Hanoin toʼok kona-ba irmán Vero neʼebé hela iha Repúblika Demokrátika Kongu. Irmán Vero, ninia laʼen neʼebé la serbí Jeová, no mós ninia oan-feto neʼebé tinan 15 tenke halai husi sira-nia suku tanba milísia ataka. Bainhira sira toʼo iha fatin pasa-revista, milísia kaer sira no ameasa atu oho sira. Kuandu irmán Vero komesa tanis, ninia oan-feto koko halo kalma nia hodi halo orasaun ho lian no temi beibeik Jeová nia naran iha ninia orasaun. Kuandu nia halo tiha orasaun, komandante ba milísia husu: “Noi, sé mak hanorin ó atu halo orasaun?” Oan-feto neʼe hatán: “Haʼu-nia amá mak hanorin haʼu hodi uza orasaun iha Mateus 6:9-13.” Tuirmai komandante hatete: “Noi, ó no ó-nia  inan-aman bele livre, no haʼu hein katak ó-nia Maromak Jeová sei proteje ó.”

14. Karik saida mak bele koko ita-nia fiar, no saida mak ajuda ita tahan?

¹⁴ Esperiénsia hanesan neʼe hanorin ita katak orasaun mak importante tebes. Maibé se Jeová la hatán kedas ita-nia orasaun ka la hatán iha dalan neʼebé kmanek, karik neʼe bele koko ita-nia fiar. Se nuneʼe, hanesan feto-faluk iha Jesus nia ai-knanoik, ita presiza kontinua halo orasaun, fiar metin katak Maromak sei nunka husik ita no nia sei hatán ita-nia orasaun. Kontinua husu Jeová atu haraik ninia espíritu santu ba ita. (Flp 4:13) Hanoin-hetan katak lakleur tan, Jeová sei haraik bensaun barak ba ita no ita sei haluha susar hotu neʼebé uluk ita hasoru. Bainhira Jeová ajuda ita tahan susar sira, ita-nia fiar sai metin liután no ita bele tahan susar seluk tan iha futuru.​—1 Ped 1:6, 7.

15. Tuir Mateus 17:19, 20, Jesus nia dixípulu sira hasoru susar saida?

¹⁵ Jesus hanorin ninia dixípulu sira katak fiar sei ajuda sira atu la rende an maski hasoru susar. (Lee Mateus 17:19, 20.) Loron ida, dixípulu sira labele duni sai anju aat ida maski sira konsege halo ida-neʼe iha tempu seluk. Tanbasá? Jesus esplika katak sira presiza fiar liután no se sira iha fiar neʼebé natoon sira sei la rende an maski hasoru susar neʼebé haree boot hanesan foho. Ohin loron, karik ita mós hasoru susar neʼebé ita hanoin ita labele tahan.

16. Oinsá fiar ajuda irmán Geydi atu tahan kuandu ema oho ninia laʼen?

¹⁶ Hanoin toʼok irmán Geydi husi rai-Guatemala. Ema oho ninia laʼen Edi bainhira sira fila husi reuniaun. Saida mak ajuda irmán Geydi tahan hasoru ninia laran-triste? Nia hatete: “Haʼu entrega haʼu-nia laran-susar ba Jeová liuhusi orasaun, no neʼe halo haʼu sente dame. Jeová tau matan mai haʼu liuhusi haʼu-nia família no mós belun sira iha kongregasaun. Hodi badinas nafatin atu halo Jeová nia serbisu, neʼe ajuda haʼu atu la sente triste demais, la rende an no mós la hanoin barak kona-ba loron aban. Situasaun susar neʼe hanorin haʼu katak haʼu bele tahan hasoru susar naran deʼit iha futuru ho ajuda husi Jeová, Jesus no Jeová nia organizasaun.”

17. Saida mak ita bele halo kuandu ita hasoru problema neʼebé susar tebes?

¹⁷ Se Ita sente laran-triste tanba ema neʼebé Ita hadomi mate, diʼak atu uza tempu hodi hametin Ita-nia fiar kona-ba moris-hiʼas liuhusi lee istória husi Bíblia kona-ba moris-hiʼas. Se Ita sente laran-triste tanba kongregasaun hasai Ita-nia família ruma, diʼak atu estuda  Bíblia hodi prova ba Ita-nia an katak Maromak nia dixiplina sempre lori buat diʼak. Aproveita situasaun susar hotu atu hametin Ita-nia fiar. Fakar sai Ita-nia sentimentu ba Jeová. Keta hadook an husi ema seluk, maibé hakbesik nafatin ba irmaun-irmán sira. (Prov 18:1) Hola parte iha atividade sira neʼebé bele ajuda Ita tahan, maski karik Ita tanis tanba hanoin fali buat neʼebé akontese ona. (Sal 126:5, 6) Kontinua tuir reuniaun, bá haklaken no lee Bíblia. Tau fokus ba bensaun furak oioin neʼebé Jeová sei haraik ba Ita iha futuru. Bainhira Ita haree oinsá Jeová ajuda Ita agora, neʼe sei hametin liután Ita-nia fiar ba nia.

18. Se Ita nota katak Ita-nia fiar fraku uitoan, Ita bele halo saida?

¹⁸ Se Ita nota katak Ita-nia fiar fraku uitoan tanba susar neʼebé uluk Ita hasoru ka agora daudaun Ita hasoru, keta laran-kraik. Aproveita oportunidade neʼe atu hametin Ita-nia fiar. Hanesan Jesus nia apóstolu sira, husu ajuda ba Jeová: “Halo ami iha fiar boot liután.” (Lc 17:5) No mós hanoin kona-ba ezemplu sira neʼebé fó sai iha lisaun neʼe. Hanesan irmaun Miguel no irmán Yurai, hanoin-hetan tempu hotu neʼebé Jeová ajuda ona ita. Hanesan irmán Vero nia oan-feto no irmán Anel, harohan ba Jeová, liuliu kuandu ita hasoru problema boot. No hanesan irmán Geydi, rekoñese katak Jeová bele ajuda ita liuhusi ita-nia família no belun sira. Bainhira Ita fó oportunidade ba Jeová atu ajuda Ita tahan susar, neʼe sei fó Ita konfiansa katak nia sei ajuda Ita tahan susar naran deʼit iha futuru.

19. Jesus iha konfiansa saida no Ita bele fiar saida?

¹⁹ Jesus ajuda ninia dixípulu sira atu hatene kona-ba situasaun saida deʼit mak sira presiza hametin sira-nia fiar, no Jesus fiar metin katak ho Jeová nia ajuda sira bele tahan susar seluk ho susesu. (João 14:1; 16:33) Jesus iha konfiansa katak sei iha ema-lubun boot neʼebé sei moris liu terus boot tanba sira iha fiar neʼebé metin. (Apok 7:9, 14) Ita mós sei moris liu terus boot ka lae? Se Ita hakaʼas an agora atu haburas no hametin Ita-nia fiar ba Jeová, Ita bele duni moris liu terus boot ho Jeová nia ajuda.​—Ebr 10:39.