1-2. Ita iha razaun saida deʼit atu hatudu domin neʼebé laran-metin?

 ITA iha razaun diʼak oioin atu hatudu domin neʼebé laran-metin ba malu. Saida mak razaun balu? Liafuan sira tuirmai husi livru Provérbios bele ajuda ita hatán ba pergunta neʼe: “Keta husik hela domin neʼebé laran-metin . . . hodi nuneʼe, Maromak no ema sei kontente ho ó no haree ó nuʼudar ema neʼebé matenek.” “Mane neʼebé hatudu domin neʼebé laran-metin lori buat diʼak ba ninia an rasik.” “Ema neʼebé buka hahalok loos no domin neʼebé laran-metin sei hetan moris.”​—Prov 3:3, 4, nota; 11:17, nota; 21:21.

² Provérbios sira-neʼe fó sai razaun tolu tanbasá ita presiza hatudu domin neʼebé laran-metin. Primeiru, neʼe halo ita sai folin-boot ba Maromak. Segundu, neʼe lori buat diʼak ba ita. Porezemplu, ita-nia relasaun diʼak ho ema seluk bele dura ba nafatin. Terseiru, neʼe lori buat diʼak oioin ba ita iha futuru, hanesan moris ba nafatin. Loos duni, ita iha razaun diʼak oioin atu halo tuir Jeová nia matadalan: “Hatudu domin neʼebé laran-metin no laran-sadiʼa ba malu.”​—Zac 7:9.

3. Iha lisaun neʼe, ita sei hatán pergunta saida deʼit?

³ Iha lisaun neʼe, ita sei hatán pergunta haat. Ita presiza hatudu domin neʼebé laran-metin ba sé deʼit? Saida mak ita bele aprende husi livru Rute kona-ba domin neʼebé laran-metin? Oinsá ita bele hatudu domin neʼebé laran-metin? Ema neʼebé hatudu domin neʼebé laran-metin hetan benefísiu saida?

4. Oinsá ita bele banati-tuir Jeová hodi hatudu domin neʼebé laran-metin? (Marcos 10:29, 30)

⁴ Lisaun antes neʼe ajuda ita komprende katak Jeová hatudu domin neʼebé laran-metin ba deʼit ema neʼebé hadomi no serbí nia. (Dan 9:4) Ita hakarak “halo tuir Maromak nia ezemplu nuʼudar ninia oan doben sira”. (Éf 5:1) Tan neʼe, ita hakarak haburas domin neʼebé laran-metin ba irmaun-irmán sira.​—Lee Marcos 10:29, 30.

5-6. Oinsá hatudu domin ba ema hotu la hanesan ho domin neʼebé laran-metin?

⁵ Klaru katak bainhira ita komprende didiʼak kona-ba domin neʼebé laran-metin, neʼe sei ajuda ita hatudu hahalok neʼe ho diʼak liután ba irmaun-irmán sira. Atu ajuda ita komprende diʼak liután kona-ba domin neʼebé laran-metin, mai ita haree oinsá ida-neʼe la hanesan ho hatudu domin ba ema hotu.

 ⁶ Ezemplu ida mak istória kona-ba apóstolu Paulo no mós ema seluk neʼebé hasoru problema tanba ró sai aat besik illa Malta. Maski ema Malta la koñese apóstolu Paulo no mós ema seluk neʼebé saʼe ró, maibé sira simu ema sira-neʼe ho laran-diʼak no hatudu domin boot ba sira. (Após 28:2, 7) Sira hatudu duni laran-diʼak, maski nuneʼe neʼe laʼós domin neʼebé laran-metin, maibé domin iha dalan jerál, tanba sira hatudu neʼe ba ema oin-foun.

7-8. (a) Saida mak book ema ida atu hatudu domin neʼebé laran-metin? (b) Tanbasá ita sei estuda parte balu husi livru Rute?

⁷ Entaun, ezemplu iha  parágrafu 6 hatudu katak buat neʼebé la hanesan entre hatudu domin ba ema hotu ho domin neʼebé laran-metin mak ema nia motivu. Iha tempu antigu, tanbasá Maromak nia atan sira hatudu domin neʼebé laran-metin ba malu? Sira hatudu domin neʼebé laran-metin tanba sira-nia hakarak rasik laʼós tanba obrigasaun ruma. Hanoin toʼok kona-ba David. Ninia laran book nia atu hatudu domin neʼebé laran-metin ba ninia belun diʼak Jonatan, maski Jonatan nia aman hakarak oho David. Tinan barak depois Jonatan mate, David nafatin hatudu domin neʼebé laran-metin ba Jonatan nia oan-mane Mefiboset.​—1 Sam 20:9, 14, 15; 2 Sam 4:4; 8:15; 9:1, 6, 7.

⁸ Ita bele aprende buat barak kona-ba domin neʼebé laran-metin bainhira ita estuda parte balu husi livru Rute. Ita bele aprende saida kona-ba domin neʼebé laran-metin husi fiar-naʼin sira iha livru Rute? Oinsá ita bele aplika neʼe iha ita-nia kongregasaun? *

9. Tanbasá Noemi hanoin katak Jeová kontra nia?

⁹ Iha livru Rute, ita bele lee istória kona-ba Noemi no ninia feto-foun Rute no mós mane ida naran Boaz. Boaz hadomi Maromak no Boaz mak Elimelec nia família. Tanba rai-hamlaha iha Izraél, Noemi, ninia laʼen Elimelec no sira-nia oan-mane naʼin-rua muda ba Moab. Noemi nia laʼen mate iha Moab. Tuirmai ninia oan-mane naʼin-rua kaben, maibé triste mak sira mós mate. (Rute 1:3-5; 2:1) Susar sira-neʼe halo Noemi sai laran-triste tebes. Nia sai laran-kraik tebes toʼo nia hanoin katak Jeová kontra nia. Noemi fó sai ninia sentimentu kona-ba Maromak, hodi dehan: “Jeová lolo ona  liman hodi kontra haʼu.” Nia mós hatete: “Maromak neʼebé Kbiit Boot Liu Hotu halo haʼu-nia moris susar tebes. . . . Jeová kontra ona haʼu no Maromak neʼebé Kbiit Boot Liu Hotu lori ona susar mai haʼu.”​—Rute 1:13, 20, 21.

10. Jeová halo saida bainhira Noemi fó sai ninia sentimentu?

¹⁰ Jeová halo saida bainhira Noemi fó sai ninia sentimentu? Jeová la para atu ajuda Noemi. Nia hanoin Noemi nia sentimentu. Jeová komprende katak “ema matenek mós bele sai bulak tanba ema haterus nia”. (Ecle 7:7) Maski nuneʼe, Noemi presiza ema ruma atu ajuda nia haree katak Jeová la husik nia. Oinsá Jeová ajuda Noemi? (1 Sam 2:8) Jeová book Rute atu hatudu domin neʼebé laran-metin ba Noemi. Rute hakarak hatudu domin ba Noemi, ho laran-diʼak nia ajuda Noemi atu la sente laran-kraik demais no mós ajuda Noemi atu haree katak Jeová nafatin hadomi nia. Saida mak ita aprende husi Rute?

11. Tanbasá irmaun-irmán sira ajuda ema neʼebé laran-kraik?

¹¹ Domin neʼebé laran-metin sei book ita atu ajuda ema neʼebé laran-kraik. Hanesan Rute la husik Noemi, ohin loron mós irmaun-irmán barak neʼebé laran-diʼak kontinua ajuda ema neʼebé laran-kraik iha kongregasaun. Sira hadomi irmaun-irmán sira no hakarak ajuda sira. (Prov 12:25, nota; 24:10) Apóstolu Paulo mós hatete: “Koʼalia hodi fó kmaan ba sira neʼebé laran-triste, apoia sira neʼebé fraku, no hatudu pasiénsia ba ema hotu.”​—1 Tes 5:14.

12. Saida mak dalan diʼak liu atu ajuda irmaun ka irmán neʼebé laran-kraik?

¹² Baibain dalan diʼak liu atu ajuda irmaun ka irmán neʼebé laran-kraik mak hodi rona ba sira no fó-hatene sira katak ita hadomi sira. Jeová agradese tebes bainhira ita ajuda ninia bibi ida neʼebé folin boot. (Sal 41:1) Bíblia hatete: “Ema neʼebé hatudu laran-diʼak ba ema kiak fó-empresta ba Jeová, no Nia sei selu fali buat neʼebé ema neʼe halo.”​—Provérbios 19:17.

13. Oinsá Rute nia desizaun la hanesan ho Orpa nian, no oinsá Rute hatudu domin neʼebé laran-metin? (Haree dezeñu iha livru oin.)

¹³ Buat neʼebé akontese depois Noemi nia laʼen no oan-mane naʼin-rua mate, bele ajuda ita komprende kona-ba domin neʼebé laran-metin. Bainhira Noemi rona katak “Jeová haraik fali ona bensaun ba Ninia povu hodi fó ai-han ba sira”, Noemi deside atu fila ba ninia rai. (Rute 1:6) Foufoun ninia feto-foun naʼin-rua hamaluk nia. Maibé kuandu sira iha dalan, dala tolu Noemi haruka ninia feto-foun sira atu fila fali ba Moab. Tuirmai saida mak akontese? Bíblia hatete: “Orpa reʼi ninia banin-feto no fila. Maibé  Rute la husik nia.” (Rute 1:7-14) Orpa fila fali ba Moab, maibé Rute hakaʼas an atu ajuda Noemi. Rute mós bele hili atu fila fali ba Moab, maibé tanba hatudu domin neʼebé laran-metin ba Noemi, nia deside atu ajuda Noemi. (Rute 1:16, 17) Rute deside atu la husik Noemi. Nia halo nuneʼe tanba ninia hakarak rasik laʼós tanba obrigasaun ruma. Rute hatudu domin neʼebé laran-metin. Saida mak ita bele aprende husi Rute?

14. (a) Oinsá irmaun-irmán barak banati-tuir Rute? (b) Tuir Ebreu 13:16, oinsá ita bele halo Maromak kontente?

¹⁴ Domin neʼebé laran-metin book ita atu hakaʼas an ajuda ema seluk. Ohin loron, irmaun-irmán barak deside atu hatudu domin neʼebé laran-metin ba maluk Kristaun, inklui maluk neʼebé sira seidauk koñese. Porezemplu, bainhira mosu dezastre naturais, irmaun-irmán sira hakarak hatene kedas oinsá atu ajuda. Bainhira ema ida iha kongregasaun hasoru problema ekonomia, irmaun-irmán sira buka-hatene kedas ema neʼe nia presiza no tuirmai fó ajuda. Hanesan ho ema Kristaun iha Masedónia iha tempu uluk, ohin loron mós irmaun-irmán sira hakaʼas an atu ajuda sira-nia maluk. Sira halo sakrifísiu oioin hodi fó “liu fali sira-nia kbiit” atu bele ajuda irmaun-irmán seluk. (2 Kor 8:3) Jeová kontente tebes bainhira nia haree ninia atan sira hatudu domin neʼebé laran-metin.​—Lee Ebreu 13:16.

15-16. Oinsá Rute la rende an atu ajuda Noemi?

¹⁵ Ita bele aprende lisaun furak oioin husi istória kona-ba Rute no Noemi. Mai ita koʼalia kona-ba lisaun balu.

¹⁶ Keta rende an atu ajuda. Bainhira Rute oferese an atu akompaña Noemi ba Judá, foufoun Noemi lakohi. Maibé Rute la rende an. Neʼe lori rezultadu saida? Bíblia hatete: “Bainhira Noemi haree katak Rute hakarak tebes atu bá hamutuk ho nia, nia la obriga tan Rute.”​—Rute 1:15-18.

17. Saida mak bele ajuda ita atu la rende an?

¹⁷ Lisaun ba ita: Presiza pasiénsia atu ajuda ema neʼebé sente depresaun, maibé ita labele rende an atu ajuda. Karik irmán ida presiza ajuda, maibé foufoun nia lakohi simu ita-nia ajuda. * Maski nuneʼe, domin neʼebé laran-metin sei book ita atu kontinua oferese ajuda. (Gal 6:2) Ita espera katak ikusmai nia hakarak simu ajuda no ita bele fó kmaan ba nia.

18. Karik saida mak halo Rute sente triste tebes?

¹⁸ Keta sai laran-kanek. Bainhira Noemi no Rute toʼo Belein, Noemi hasoru ema neʼebé uluk nia koñese no nia hatete: “Haʼu iha buat hotu bainhira haʼu bá, maibé Jeová halo haʼu fila ho liman-mamuk.” (Rute 1:21) Imajina toʼok Rute sente oinsá bainhira nia rona Noemi hatete ida-neʼe. Rute hakaʼas an tebes atu ajuda Noemi. Rute tanis hamutuk Noemi, fó kmaan ba nia no laʼo hamutuk ho nia durante loron barak. Maski Rute halo buat hotu neʼe, maibé Noemi hatete: “Jeová halo haʼu fila ho liman-mamuk.” Maski iha tempu neʼebá, Rute hamriik iha Noemi nia sorin, maibé Noemi nia liafuan rona hanesan nia la hafolin Rute nia ajuda. Karik neʼe halo Rute sente triste tebes. Maski nuneʼe nia la husik Noemi.

19. Saida mak bele ajuda ita atu kontinua ajuda ema neʼebé laran-kraik?

 ¹⁹ Lisaun ba ita: Karik ita hakaʼas an ajuda irmán ida neʼebé laran-kraik, maibé nia hakanek ita-nia laran ho ninia liafuan. Maski nuneʼe, ita koko atu la sai laran-kanek. Ita kontinua ajuda nia no ita husu Jeová atu ajuda ita hetan dalan atu fó kmaan ba nia.​—Prov 17:17.

20. Oinsá Rute hetan ajuda atu la rende an?

²⁰ Fó anima ba ema bainhira sira presiza. Rute hatudu domin neʼebé laran-metin ba Noemi, maibé Rute mós presiza hetan anima. No Jeová book Boaz atu anima Rute. Boaz hatete ba Rute: “Haʼu hein katak Jeová sei haraik bensaun ba ó tanba buat neʼebé ó halo ona, no ó sei simu kolen neʼebé perfeitu husi Jeová, Izraél nia Maromak, tanba ó mai buka protesaun iha ninia liras okos.” Liafuan sira-neʼe furak no fó kmaan ba Rute. Tuirmai Rute hatete ba Boaz: “Ita fó ona kmaan ba haʼu no koʼalia hodi hametin haʼu.” (Rute 2:12, 13) Boaz anima Rute iha tempu neʼebé loos, no neʼe fó kbiit ba Rute atu la rende an.

21. Tuir Isaias 32:1, 2, katuas kongregasaun bele halo saida?

²¹ Lisaun ba ita: Dala ruma ema neʼebé hatudu domin neʼebé laran-metin ba ema seluk presiza hetan anima. Boaz gaba Rute bainhira nia nota katak Rute hatudu laran-diʼak ba Noemi. Ohin loron mós katuas kongregasaun sira gaba irmaun-irmán bainhira sira ajuda malu. Bainhira irmaun-irmán sira simu gaba hanesan neʼe iha tempu neʼebé loos, neʼe bele ajuda sira atu la rende an.​—Lee Isaias 32:1, 2.

22-23. Oinsá Noemi nia hanoin troka no tanbasá? (Salmo 136:23, 26)

²² Ho laran-luak Boaz fó hahán ba Rute no Noemi. (Rute 2:14-18) Noemi sente  oinsá kona-ba neʼe? Noemi hatete: “Haʼu hein katak Boaz sei hetan bensaun husi Jeová, Maromak neʼebé sempre hatudu domin neʼebé laran-metin ba ema moris no ema mate.” (Rute 2:20a) Noemi troka ninia hanoin. Uluk Noemi sente laran-susar no hatete: ‘Jeová kontra haʼu.’ Maibé ikusmai nia hatete: ‘Jeová sempre hatudu domin neʼebé laran-metin.’ Tanbasá Noemi troka ninia hanoin?

²³ Noemi komesa komprende oinsá Jeová ajuda nia. Jeová uza Rute atu ajuda Noemi halo viajen ba Judá. (Rute 1:16) Noemi mós komprende katak Jeová ajuda sira bainhira Boaz neʼebé “iha direitu atu sosa fali” sira fó hahán ba Noemi no Rute. * (Rute 2:19, 20b) Karik Noemi hanoin: ‘Agora haʼu komprende, Jeová nunka husik haʼu. Nia sempre hamutuk haʼu.’ (Lee Salmo 136:23, 26.) Ita bele fiar katak Noemi agradese tebes tanba Rute no Boaz la rende an atu ajuda nia. Sira kontente tebes kuandu Noemi sente haksolok fali no hetan kbiit atu serbí Jeová.

24. Tanbasá ita hakarak kontinua hatudu domin neʼebé laran-metin ba ita-nia maluk Kristaun?

²⁴ Saida mak ita aprende husi livru Rute kona-ba domin neʼebé laran-metin? Domin neʼebé laran-metin book ita atu la rende an lalais kuandu irmaun-irmán sira sente laran-kraik no mós book ita atu hakaʼas an ajuda sira. Katuas sira presiza fó anima ba ema neʼebé hatudu domin neʼebé laran-metin. Bainhira ita haree ema neʼebé presiza ajuda sente haksolok fali no hetan kbiit atu serbí Jeová, ita mós sente haksolok tebes. (Após 20:35) Maibé saida mak razaun importante liu atu kontinua hatudu domin neʼebé laran-metin? Ita hakarak halo Jeová kontente no banati-tuir Jeová neʼebé “nakonu ho domin neʼebé laran-metin”.​—Éx 34:6; Sal 33:22.