1. Kontinua matan-moris katak sá? (2 Timóteo 4:5)

 BAINHIRA problema ruma mosu no hakanek ita-nia laran, neʼe bele koko ita-nia laran-metin ba Jeová no ninia organizasaun. Oinsá mak ita bele manán susar sira-neʼe? Ita presiza matan-moris no kontinua iha hanoin neʼebé loos hodi kaer metin ba ita-nia fiar. (Lee 2 Timóteo 4:5.) Kontinua matan-moris ka iha hanoin neʼebé loos signifika katak kalma nafatin, hanoin didiʼak no hakaʼas an atu haree situasaun tuir Jeová nia haree. Se ita halo nuneʼe, ita-nia emosaun sei la kontrola ita-nia hanoin.

2. Iha lisaun neʼe, ita sei aprende saida?

² Iha lisaun antes neʼe, ita koʼalia ona situasaun tolu neʼebé mosu tanba ema neʼebé laʼós Testemuña. Iha lisaun neʼe, ita sei koʼalia kona-ba situasaun tolu neʼebé mosu tanba irmaun-irmán sira no neʼe bele koko ita-nia laran-metin ba Jeová. Situasaun sira-neʼe mak (1) bainhira ita sente katak maluk fiar-naʼin sira trata aat ita, (2) bainhira ita hetan dixiplina, no (3) bainhira susar atu halo tuir mudansa husi organizasaun. Oinsá mak ita bele kontinua iha hanoin neʼebé loos no laran-metin ba Jeová no ninia organizasaun iha situasaun sira-neʼe?

3. Karik saida mak ita sei halo bainhira ita sente katak maluk Kristaun ida trata aat ita?

³ Ita sente ona maluk Kristaun ida ka irmaun ida neʼebé iha responsabilidade, hanesan katuas kongregasaun trata aat Ita ka lae? Karik irmaun neʼe la ho neon hakanek Ita-nia laran. (Rom 3:23; Tgo 3:2) Maibé ida-neʼe halo Ita laran-triste tebes. Karik Ita labele toba tanba problema  neʼe. No karik Ita mós hanoin: ‘Se irmaun ida bele hatudu hahalok hanesan neʼe, entaun neʼe mak Maromak nia organizasaun duni ka lae?’ Satanás hakarak ita hanoin hanesan neʼe. (2 Kor 2:11) Hanoin negativu hanesan neʼe bele halo ita haketak an husi Jeová no ninia organizasaun. Tan neʼe se ita sente katak irmaun ka irmán ida trata aat ita, oinsá mak ita bele kontinua iha hanoin neʼebé loos no hasees an husi hanoin negativu?

4. Oinsá José kontinua iha hanoin neʼebé loos bainhira ema trata aat nia, no ita aprende saida husi nia? (Génesis 50:19-21)

⁴ Keta rai odi. Kuandu José joven, ninia maun sira trata aat nia. Sira odi nia, no sira balu hakarak atu oho nia. (Gén 37:4, 18-22) Ikusmai, sira faʼan nia nuʼudar atan. Rezultadu mak José hasoru susar oioin durante maizumenus tinan 13. Karik José bele hanoin katak Maromak la hadomi ona nia. Nia mós bele hanoin katak Jeová husik ona nia iha tempu neʼebé nia presiza tebes ajuda. Maibé José la rai odi. Duké halo nuneʼe, nia kontinua iha hanoin neʼebé loos hodi kalma nafatin. Bainhira iha oportunidade atu selu aat fali ba ninia maun sira, nia la halo ida-neʼe maibé nia hatudu domin ba sira no mós perdua sira. (Gén 45:4, 5) José halo nuneʼe tanba nia iha hanoin neʼebé loos. Duké tau fokus ba ninia problema, nia tau fokus ba buat neʼebé importante, neʼe mak Jeová nia hakarak. (Lee Génesis 50:19-21.) Ita aprende saida? Se ema trata aat Ita, keta sai hirus ba Jeová ka hanoin katak nia husik ona Ita. Duké halo nuneʼe, medita kona-ba oinsá nia ajuda Ita atu tahan susar sira. Liután neʼe, bainhira ema trata aat Ita, hakaʼas an atu hatudu domin no sai prontu atu perdua sira.​—1 Ped 4:8.

5. Oinsá mak Miqueas kalma nafatin bainhira nia sente katak ema trata aat nia?

⁵ Hanoin toʼok kona-ba katuas kongregasaun ida iha Amérika Súl naran Miqueas. b Nia sente katak uluk irmaun ida neʼebé iha responsabilidade iha organizasaun trata aat nia. Nia hatete: “Antes neʼe, haʼu nunka sente estrese hanesan neʼe. Haʼu labele toba diʼak iha kalan, no haʼu tanis tanba haʼu sente katak haʼu labele halo buat ida. Haʼu sente laran-taridu.” Maski nuneʼe, Miqueas kontinua iha hanoin neʼebé loos no hakaʼas an atu kontrola ninia sentimentu. Nia halo orasaun dala barak hodi husu Jeová atu fó espíritu santu no kbiit ba nia atu tahan. Nia mós buka informasaun neʼebé bele ajuda nia husi ita-nia publikasaun. Ita aprende saida? Se Ita sente katak irmaun ka irmán ruma trata aat Ita, diʼak atu kalma nafatin no hakaʼas an atu kontrola hanoin neʼebé negativu. Karik Ita la hatene situasaun neʼebé book irmaun ka irmán neʼe koʼalia ka halo buat ruma neʼebé hakanek Ita-nia laran. Entaun halo orasaun ba Jeová no husu nia ajuda Ita atu haree problema neʼe tuir ema neʼe nia haree. Ida-neʼe karik bele ajuda Ita atu komprende katak Ita-nia irmaun ka irmán la iha intensaun atu hakanek Ita-nia laran no neʼe ajuda Ita perdua sira. (Prov 19:11) Hanoin-hetan, Jeová hatene Ita-nia situasaun no sei fó Ita kbiit atu tahan.​—2 Krón 16:9; Ecle 5:8.

6. Tanbasá importante atu hatene katak Jeová fó dixiplina ba ema neʼebé nia hadomi? (Ebreu 12:5, 6, 11)

⁶ Dixiplina bele halo ita laran-kanek. Maibé se ita tau fokus deʼit ba ita-nia  laran-kanek, karik ita sei komesa la hafolin dixiplina, no sente katak dixiplina neʼe la kona ita ka neʼe makaʼas liu. Neʼe bele hanetik ita atu komprende buat neʼebé importante liu, neʼe mak Jeová korrije ita tanba nia hadomi ita. (Lee Ebreu 12:5, 6, 11.) Se ita husik ita-nia emosaun mak kontrola ita, ita fó oportunidade ba Satanás atu aproveita ita-nia sentimentu. Satanás hakarak ita atu la simu dixiplina no aat liután mak nia hakarak hadook ita husi Jeová no Jeová nia organizasaun. Se Ita hetan dixiplina, oinsá mak Ita bele kontinua iha hanoin neʼebé loos?

7. (a) Hanesan hatudu iha dezeñu, oinsá Jeová uza Pedro depois nia simu tiha dixiplina? (b) Ita aprende saida husi Pedro?

⁷ Simu dixiplina no halo mudansa. Jesus korrije Pedro ba dala balu iha apóstolu seluk nia oin. (Mc 8:33; Lc 22:31-34) Neʼe bele halo Pedro sente moe. Maski nuneʼe, Pedro laran-metin nafatin ba Jesus. Nia simu dixiplina no aprende husi ninia sala. Rezultadu mak Jeová haraik bensaun ba Pedro nia laran-metin no fó knaar importante ba nia iha kongregasaun. (João 21:15-17; Após 10:24-33; 1 Ped 1:1) Ita aprende saida husi Pedro? Ita no mós ema seluk sei hetan benefísiu se ita la tau fokus ba ita-nia sentimentu moe tanba hetan dixiplina, maibé simu dixiplina no halo mudansa. Bainhira ita halo nuneʼe, Jeová no irmaun sira bele fó responsabilidade liután ba ita.

8-9. Depois hetan tiha dixiplina, foufoun Bernardo sente oinsá, maibé saida mak ajuda nia atu troka ninia hanoin?

⁸ Hanoin toʼok kona-ba irmaun Bernardo iha rai-Mosambike neʼebé lakon ninia knaar nuʼudar katuas kongregasaun. Foufoun nia sente oinsá? Nia hatete: “Haʼu sente hirus tanba haʼu la gosta dixiplina neʼebé haʼu simu.” Nia laran-taridu kona-ba oinsá irmaun-irmán seluk haree nia. Nia hatete: “Presiza fulan barak atu bele iha fali hanoin neʼebé loos kona-ba situasaun neʼe no tau fiar ba Jeová no ninia organizasaun.” Saida mak ajuda Bernardo atu iha hanoin neʼebé loos?

⁹ Bernardo hadiʼa ninia hanoin. Nia esplika: “Uluk bainhira haʼu serbí nuʼudar katuas, haʼu uza Ebreu 12:7 atu anima ema seluk atu iha hanoin neʼebé loos kona-ba Jeová nia dixiplina. Entaun haʼu  husu ba haʼu-nia an: ‘Sé mak presiza aplika eskritura neʼe?’ Jeová nia atan hotu, inklui haʼu.” Tuirmai Bernardo halo hakat oioin atu hametin fali ninia fiar ba Jeová no Jeová nia organizasaun. Nia uza tempu barak liután atu lee no hanoin kleʼan kona-ba Bíblia. Maski nia nafatin hanoin barak kona-ba oinsá irmaun-irmán sira haree nia, maibé nia haklaken ho sira no hola parte iha reuniaun sira. Ikusmai, Bernardo serbí fali nuʼudar katuas ida. Hanesan Bernardo, se Ita simu dixiplina, diʼak atu la tau fokus ba buat neʼebé halo Ita moe, maibé simu konsellu no halo mudansa. c (Prov 8:33; 22:4) Se Ita halo nuneʼe, ita bele fiar metin katak Jeová sei haraik bensaun ba Ita tanba Ita laran-metin ba nia no ninia organizasaun.

10. Mudansa saida mak karik koko ema Izraél nia laran-metin?

¹⁰ Mudansa iha organizasaun bele koko ita-nia laran-metin. Se ita la kuidadu, neʼe bele haketak ita husi Jeová. Porezemplu, hanoin kona-ba mudansa oioin neʼebé akontese ba ema Izraél iha tempu uluk. Antes iha Moisés nia Ukun-Fuan, ulun ba família sira mak halaʼo knaar neʼebé amlulik sira halo. Sira harii altár no hasaʼe sakrifísiu ba Jeová hodi reprezenta sira-nia família. (Gén 8:20, 21; 12:7; 26:25; 35:1, 6, 7; Job 1:5) Maibé bainhira iha ona Ukun-Fuan, ulun ba família tenke husik sira-nia priviléjiu neʼe. Jeová hili amlulik husi Arão nia família atu hasaʼe sakrifísiu. Husi tempu neʼebá, se ulun ba família laʼós Arão nia jerasaun no nia halo knaar ruma hanesan amlulik, nia bele hetan kastigu-mate. d (Lev 17:3-6, 8, 9) Karik mudansa hanesan neʼe mak halo Kora, Datan, Abiram no xefe na’in-250 kontra Moisés no Arão nia pozisaun. (Núm 16:1-3) Maski ita la hatene ho loloos, maibé Kora no ninia maluk sira la kontinua laran-metin ba Jeová. Se mudansa iha organizasaun koko Ita-nia fiar, Ita bele halo saida?

11. Ita aprende saida husi ema Kohat balu?

¹¹ Apoia mudansa husi organizasaun. Durante viajen iha rai-fuik, ema Kohat sira iha knaar atu halo serbisu espesiál ida. Tempu ida-idak neʼebé ema Izraél muda sira-nia hela-fatin, ema Kohat balu sei lori arka aliansa hodi laʼo iha povu nia oin. (Núm 3:29, 31; 10:33; Jos 3:2-4) Neʼe mak priviléjiu boot! Maibé situasaun troka bainhira ema Izraél hela metin ona iha Rai neʼebé Maromak Promete. Arka la presiza tan muda bá-mai beibeik. Entaun bainhira Salomão ukun nuʼudar liurai, ema Kohat balu simu knaar nuʼudar kantadór, balu guarda, no seluk tau matan ba armazén. (1 Krón 6:31-33; 26:1, 24) Bíblia nunka fó sai katak sira muramura ka hakarak hetan knaar neʼebé espesiál tanba uluk sira iha knaar espesiál. Ita aprende saida? Diʼak atu apoia mudansa sira neʼebé mai husi Jeová nia organizasaun ho laran tomak, inklui mudansa sira neʼebé afeta Ita-nia knaar. Kontente ho knaar naran deʼit neʼebé Ita halo. Hanoin-hetan katak laʼós  Ita-nia knaar mak halo Jeová hafolin Ita. Jeová hafolin liu Ita-nia laran-metin duké Ita-nia knaar.​—1 Sam 15:22.

12. Oinsá Zaina sente kona-ba sai husi Betel?

¹² Hanoin toʼok ezemplu husi irmán Zaina neʼebé simu knaar foun no presiza husik knaar neʼebé nia gosta tebes. Nia serbí iha Betel durante tinan 23 no tuirmai serbí nuʼudar pioneiru espesiál. Nia hatete: “Haʼu hakfodak ho mudansa neʼe. Haʼu sente la iha folin no husu beibeik haʼu-nia an: ‘Haʼu halo sala saida?’” Triste mak irmaun-irmán balu iha kongregasaun aumenta ninia laran-triste hodi hatete: “Se ó matenek karik, organizasaun sei la hasai ó husi Betel.” Ba tempu balu, Zaina sente laran-kraik no tanis kalan-kalan. Maibé nia hatete: “Haʼu nunka duvida ho organizasaun ka Jeová nia domin.” Saida mak ajuda Zaina?

13. Saida mak Zaina halo atu halakon hanoin negativu?

¹³ Zaina konsege manán ninia hanoin negativu. Oinsá? Nia lee informasaun iha ita-nia publikasaun sira neʼebé liga ho ninia situasaun. Informasaun iha Menara Pengawal 1 Fevereiru 2001 ho títulu “Saudara Dapat Mengatasi Perasaan Kecil Hati!” mak ajuda tebes nia. Neʼe esplika kona-ba Marcos neʼebé hakerek Bíblia sente oinsá bainhira simu knaar foun. Zaina hatete: “Marcos nia ezemplu ajuda tebes haʼu atu la sente laran-kraik tan.” Zaina hakbesik nafatin ba ninia belun sira. Zaina mós la hadook an husi irmaun-irmán sira, nia kontinua haklaken ho sira, no nia mós la sente kasian demais ba ninia an. Nia rekoñese katak Jeová nia espíritu santu mak ajuda organizasaun, no irmaun sira neʼebé dirije organizasaun hanoin tebes nia. Nia mós rekoñese katak buat neʼebé importante liu ba Jeová nia organizasaun mak kumpre Jeová nia serbisu.

14. Vlado sente susar atu halo tuir mudansa saida, no saida mak ajuda nia?

¹⁴ Katuas kongregasaun ida naran Vlado neʼebé tinan 73 iha rai-Eslovénia sente susar bainhira ninia kongregasaun sai ida deʼit ho kongregasaun seluk no la uza tan sira-nia Reuniaun-Fatin. Vlado hatete: “Haʼu la komprende tanbasá labele uza tan Reuniaun-Fatin furak hanesan neʼe. Haʼu sente laran-kanek tanba ami foin halo renovasaun ba fatin neʼe. Haʼu  karpinteiru, no haʼu mak halo sasán foun balu iha fatin neʼe. No mudansa neʼe mós la fasil ba haklaken-naʼin sira neʼebé idade ona.” Saida mak ajuda Vlado atu halo tuir matadalan? Nia esplika: “Halo tuir mudansa neʼebé mai husi Jeová nia organizasaun sempre lori bensaun. Neʼe prepara ita ba mudansa neʼebé boot liu iha futuru.” Ita sente susar atu halo tuir mudansa tanba Ita-nia kongregasaun sai ida deʼit ho kongregasaun seluk ka tanba Ita-nia knaar troka ka lae? Fiar metin bá katak Jeová komprende Ita-nia sentimentu. Bainhira Ita apoia mudansa sira-neʼe no laran-metin nafatin ba Jeová no ninia organizasaun, Ita sei hetan duni bensaun.​—Sal 18:25.

15. Oinsá mak ita bele kontinua iha hanoin neʼebé loos bainhira hasoru susar sira iha kongregasaun?

¹⁵ Nuʼudar ita besik liután ba sistema neʼe nia rohan, ita hatene katak sei mosu duni susar iha kongregasaun laran. Susar sira-neʼe bele koko ita-nia laran-metin ba Jeová. Tan neʼe ita tenke kontinua iha hanoin neʼebé loos. Se Ita sente irmaun-irmán sira trata aat Ita, keta sai hirus. Se Ita simu dixiplina, keta tau fokus deʼit ba buat neʼebé halo Ita moe, maibé simu konsellu no halo mudansa. No mós bainhira Jeová nia organizasaun halo mudansa neʼebé afeta Ita, ho laran tomak simu mudansa sira-neʼe no halo tuir matadalan.

16. Oinsá Ita bele mantein Ita-nia fiar ba Jeová no ninia organizasaun?

¹⁶ Ita bele mantein Ita-nia fiar ba Jeová no ninia organizasaun bainhira Ita hetan koko kona-ba Ita-nia fiar. Maibé atu bele halo nuneʼe, Ita presiza kontinua iha hanoin neʼebé loos, neʼe katak kalma nafatin, hanoin didiʼak, no haree situasaun tuir Jeová nia haree. Deside metin atu estuda ezemplu husi ema sira iha Bíblia laran neʼebé hetan susesu atu tahan problema neʼebé hanesan Ita-nian no medita kona-ba sira-nia ezemplu. Halo orasaun ba Jeová atu hetan ajuda. No keta haketak an husi kongregasaun. Hodi halo nuneʼe, maski buat naran deʼit akontese, Satanás sei labele haketak Ita husi Jeová ka ninia organizasaun.​—Tgo 4:7.