1. Oinsá ita hatene katak Jeová hakarak hakbesik ba ita?

 JEOVÁ konvida ita atu hakbesik ba nia. (Tgo 4:8) Nia hakarak sai ita-nia Maromak, Aman no Belun. Nia hatán ita-nia orasaun no ajuda ita durante tempu susar. Nia uza ninia organizasaun atu hanorin ita no proteje ita. Maibé ita tenke halo saida atu bele hakbesik ba Jeová?

2. Oinsá ita bele hakbesik ba Jeová?

² Ita bele hakbesik ba Jeová liuhusi halo orasaun, lee Bíblia no mós medita kona-ba neʼe. Se ita halo nuneʼe, ita sei hadomi no hafolin liután nia. Neʼe mós motiva ita atu halo tuir Jeová no fó hahiʼi ba nia tanba nia merese ida-neʼe. (Apok 4:11) Bainhira ita koñese Jeová diʼak liután, ita mós sei tau fiar liután ba nia no mós ninia organizasaun neʼebé nia uza atu ajuda ita.

3. Oinsá mak Diabu koko atu haketak ita husi Jeová, maibé saida mak bele ajuda ita atu la hadook an husi Jeová no ninia organizasaun? (Salmo 31:13, 14)

³ Maibé Diabu koko atu haketak ita husi Jeová, liuliu bainhira ita hasoru susar. Oinsá nia halo ida-neʼe? Nia koko halakon ita-nia fiar ba Jeová no Jeová nia organizasaun neineik-neineik. Maibé ita bele manán hasoru Diabu. Se ita fiar metin, ita sei la hadook an husi Jeová no ninia organizasaun.​—Lee Salmo 31:13, 14.

4. Iha lisaun neʼe, ita sei koʼalia kona-ba saida?

⁴ Iha lisaun neʼe, ita sei koʼalia kona-ba situasaun tolu  neʼebé bele mosu tanba ema neʼebé laʼós Testemuña. Situasaun sira-neʼe bele halakon ita-nia fiar ba Jeová no ninia organizasaun. Oinsá mak situasaun sira-neʼe bele haketak ita husi Jeová? No saida mak ita bele halo atu defende ita-nia an husi Satanás?

5. Oinsá mak susar sira bele halakon ita-nia fiar ba Jeová no ninia organizasaun?

⁵ Dala ruma ita hasoru susar, hanesan família kontra ka ita lakon serbisu. Oinsá mak susar sira-neʼe bele halakon ita-nia fiar ba Jeová nia organizasaun no haketak ita husi Jeová? Bainhira ita hasoru susar ba tempu kleur, karik ita lakon esperansa no sente laran-kraik. Satanás aproveita ida-neʼe no koko halo ita duvida ho Jeová nia domin. Diabu hakarak ita atu hanoin katak Jeová ka ninia organizasaun mak hamosu susar ba ita. Situasaun hanesan neʼe mós akontese ba ema Izraél balu iha rai-Ejitu. Foufoun sira fiar katak Jeová hili ona Moisés no Arão atu salva sira husi situasaun nuʼudar atan. (Éx 4:29-31) Maibé ikusmai bainhira Faraó fó-terus liután ba sira, sira duun katak Moisés no Arão mak hamosu problema. Sira dehan: “Imi halo Faraó no ninia atan sira odi ami no imi tau surik iha sira-nia liman atu oho ami.” (Éx 5:19-21) Sira fó-sala ba Maromak nia atan sira neʼebé laran-metin. Neʼe triste tebes. Se Ita tahan daudaun susar durante tinan barak, oinsá mak Ita bele kontinua tau fiar ba Jeová no ninia organizasaun?

6. Ita aprende saida husi profeta Habakuk kona-ba tahan susar sira? (Habakuk 3:17-19)

⁶ Fakar sai Ita-nia sentimentu ba Jeová liuhusi orasaun, no buka ajuda husi nia. Profeta Habakuk hasoru susar barak. Loron ida, nia duvida kona-ba Jeová hanoin nia ka lae. Tan neʼe, nia fakar sai ninia sentimentu ba Jeová liuhusi orasaun. Nia hatete: “Oh Jeová, toʼo bainhira mak haʼu tenke halerik atu husu ajuda, maibé Ita la rona? . . . Tanbasá mak Ita husik deʼit ema haterus malu?” (Hab 1:2, 3) Jeová hatán Habakuk nia orasaun. (Hab 2:2, 3) Depois Habakuk medita tiha kona-ba oinsá uluk Jeová salva ninia povu, Habakuk sai kontente fali. Nia fiar metin katak Jeová hanoin nia no sei ajuda nia atu tahan susar naran deʼit. (Lee Habakuk 3:17-19.) Ita aprende saida? Bainhira ita hasoru susar, halo orasaun ba Jeová no fó sai ita-nia sentimentu. Tuirmai buka ajuda husi nia. Bainhira ita halo nuneʼe, ita bele fiar metin katak Jeová sei fó ita kbiit atu tahan. Bainhira ita sente katak nia apoia ita, ita-nia fiar sei sai metin liután.

7. Irmán Shirley nia família koko halo nia fiar saida? Saida mak ajuda nia atu la lakon fiar?

⁷ Mantein Ita-nia toman espirituál. Ida-neʼe ajuda irmán Shirley b iha Papua-Guiné Foun bainhira nia hasoru susar. Irmán Shirley nia família mak kiak no dala ruma susar atu hetan ai-han neʼebé natoon ba família. Irmán Shirley nia família ida koko atu halakon ninia fiar ba Jeová. Ninia família hatete: “Ó dehan Maromak nia espíritu santu ajuda ó, maibé ajuda neʼe iha neʼebé? Ó-nia família sei kontinua kiak. Ó estraga tempu deʼit atu haklaken.” Irmán Shirley dehan: “Haʼu husu haʼu-nia an: ‘Maromak hanoin duni  haʼu ka lae?’ Entaun haʼu halo kedas orasaun ba Jeová no fó sai buat hotu neʼebé haʼu sente. Haʼu la para atu lee Bíblia no publikasaun sira, no haʼu mós kontinua haklaken no tuir reuniaun.” Lakleur deʼit nia komesa komprende katak Jeová tau matan daudaun ba ninia família. Ninia família nunka falta ai-han, no sira kontente. Nia hatete: “Haʼu sente katak Jeová hatán haʼu-nia orasaun.” (1 Tim 6:6-8) Se Ita kontinua mantein Ita-nia toman espirituál, Ita mós sei la husik susar sira ka sentimentu duvida atu haketak Ita husi Jeová.

8. Saida mak bele akontese ba irmaun sira neʼebé dirije organizasaun?

⁸ Liuhusi média no mós média sosiál, inimigu sira habelar lia-bosok ka informasaun la loos kona-ba irmaun sira neʼebé dirije Jeová nia organizasaun. (Sal 31:13) Polísia kaer irmaun balu no duun sira nuʼudar kriminozu. Ema Kristaun iha apóstolu sira-nia tempu mós hasoru situasaun neʼebé hanesan bainhira ema duun matak apóstolu Paulo no kaer nia. Ema Kristaun balu halo saida?

9. Ema Kristaun balu halo saida bainhira apóstolu Paulo tama komarka?

⁹ Ema Kristaun balu iha tempu neʼebá para atu apoia apóstolu Paulo bainhira nia tama komarka iha Roma. (2 Tim 1:8, 15) Tanbasá? Karik sira sente moe tanba ema haree Paulo nuʼudar kriminozu. (2 Tim 2:8, 9) Ka karik sira sente taʼuk katak ema mós sei kontra sira. Maski karik sira iha razaun oioin, maibé hanoin toʼok saida mak Paulo sente. Nia tahan ona susar barak no mós tau ninia moris iha perigu laran atu ajuda sira. (Após 20:18-21; 2 Kor 1:8) Ita hotu lakohi sai hanesan ema sira neʼebé husik hela Paulo durante tempu neʼebé nia presiza sira. Ita presiza hanoin-hetan kona-ba saida bainhira ema fó-terus ba irmaun sira neʼebé dirije organizasaun?

10. Ita presiza hanoin-hetan saida bainhira ema fó-terus ba irmaun sira neʼebé dirije organizasaun, no tanbasá?

 ¹⁰ Hanoin-hetan tanbasá ema kontra ita no sé mak hamosu ida-neʼe. Segundu Timóteo 3:12 hatete: “Ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus.” Entaun ita la presiza hakfodak kuandu Satanás ataka irmaun sira neʼebé tau matan organizasaun. Nia hakarak atu halakon sira-nia integridade no mós halo ita sai taʼuk.​—1 Ped 5:8.

11. Ita aprende saida husi Onesíforo nia ezemplu? (2 Timóteo 1:16-18)

¹¹ Kontinua apoia irmaun sira no laran-metin ba sira. (Lee 2 Timóteo 1:16-18.) Bainhira apóstolu Paulo tama komarka, ema Kristaun ida naran Onesíforo hatudu hahalok neʼebé la hanesan ho ema Kristaun sira seluk. “Nia la sai moe tanba [Paulo] kesi hela ho korrente iha komarka.” Onesíforo buka Paulo, no bainhira nia hetan Paulo, nia buka dalan atu apoia Paulo. Atu halo nuneʼe, Onesíforo tau ninia moris iha perigu laran. Ita aprende saida? Ita labele husik taʼuk ba ema hanetik ita atu apoia irmaun sira neʼebé ema fó-terus. Mai ita defende sira no ajuda sira. (Prov 17:17) Sira presiza ita-nia domin no apoia.

12. Ita aprende saida husi irmaun-irmán sira iha rai-Rúsia?

¹² Hanoin kona-ba oinsá irmaun-irmán sira iha rai-Rúsia ajuda sira-nia maluk fiar-naʼin neʼebé tama komarka. Bainhira irmaun-irmán balu hetan julgamentu iha tribunál, irmaun-irmán barak mai atu apoia sira. Ita aprende saida? Bainhira ema koʼalia aat, kaer ka kontra irmaun sira neʼebé tau matan organizasaun, ita labele sai taʼuk. Halo orasaun kona-ba sira, ajuda sira-nia família, no buka dalan oioin atu apoia sira.​—Após 12:5; 2 Kor 1:10, 11.

13. Oinsá mak ema nia liafuan bele halakon ita-nia fiar ba Jeová no ninia organizasaun?

¹³ Ita-nia família, kolega serbisu ka kolega eskola neʼebé laʼós Testemuña karik hatún ita tanba ita haklaken ka moris tuir Jeová nia matadalan neʼebé aas kona-ba morál. (1 Ped 4:4) Karik sira dehan: “Haʼu admira ho ó, maibé ó-nia relijiaun iha regra barak liu no la modernu.” Ema balu karik kritika dalan neʼebé ita trata ema neʼebé kongregasaun hasai, hodi dehan: “Oinsá mak imi bele dehan katak imi hadomi ema?” Liafuan sira hanesan neʼe bele halo ita duvida se Jeová nia lei mak loos ka lae. Karik ita komesa hanoin: ‘Haʼu sente Jeová ezije buat barak liu. No haʼu mós sente katak ninia organizasaun iha regra barak liu.’ Se Ita hasoru situasaun hanesan neʼe, oinsá mak Ita bele hakbesik nafatin ba Jeová no ninia organizasaun?

14. Ita presiza halo saida bainhira ema hatún ita tanba moris tuir Jeová nia matadalan sira? (Salmo 119:50-52)

¹⁴ Kontinua halo tuir Jeová nia matadalan sira. Job kontinua halo tuir Jeová nia matadalan maski ema hatún nia. Mane ida neʼebé finje sai Job nia belun koko atu halo Job fiar katak Maromak la interese se Job halo buat neʼebé loos. (Job 4:17, 18; 22:3) Maibé Job la fiar lia-bosok neʼe. Nia hatene katak Jeová nia matadalan kona-ba saida mak loos no sala mak diʼak, no nia deside metin  atu kontinua halo tuir ida-neʼe. Nia la husik ema seluk atu halakon ninia integridade. (Job 27:5, 6) Ita aprende saida? Keta husik ema nia liafuan halo Ita duvida ho Jeová nia matadalan. Hanoin kona-ba oinsá Ita rasik haree beibeik ona katak Jeová nia matadalan mak sempre loos no lori benefísiu ba Ita. Entaun deside metin atu kontinua apoia Jeová nia organizasaun neʼebé halo tuir Jeová nia matadalan sira. Hodi halo nuneʼe, Ita sei la husik ema nia liafuan haketak Ita husi Jeová.​—Lee Salmo 119:50-52.

15. Tanbasá ema hatún Brizit?

¹⁵ Hanoin toʼok kona-ba esperiénsia husi irmán Brizit iha rai-Índia. Ninia família hatún nia tanba ninia fiar. Lakleur depois nia hetan tiha batizmu iha tinan 1997, ninia laʼen neʼebé laʼós Testemuña lakon serbisu. Entaun ninia laʼen deside katak família hotu tenke hela hamutuk ho laʼen nia família iha sidade seluk. Tuirmai Brizit hasoru susar boot liután. Tanba ninia laʼen lakon serbisu, nia mak tenke serbisu full-time atu apoia família. Liután neʼe, kongregasaun neʼebé besik liu mak kilómetru 350. Triste mak ninia laʼen nia família kontra nia tanba ninia fiar. Situasaun sai aat liu toʼo Brizit nia família tenke muda. Tuirmai, ninia laʼen mós mate. No ninia oan-feto ida neʼebé tinan 12 mós mate tanba kankru. Aat liután mak Brizit nia família duun katak buat sira-neʼe akontese tanba nia. Sira dehan katak se Brizit la sai Testemuña, susar sira-neʼe sei la kona nia. Maski nuneʼe, nia kontinua tau fiar ba Jeová no hakbesik nafatin ba ninia organizasaun.

16. Brizit hetan bensaun saida tanba hakbesik nafatin ba Jeová no ninia organizasaun?

¹⁶ Tanba Brizit hela dook husi kongregasaun, katuas área anima nia atu haklaken deʼit iha ninia área no dirije reuniaun iha ninia uma. Foufoun nia taʼuk. Maibé nia halo tuir matadalan. Nia haklaken ba ema seluk, dirije reuniaun iha ninia uma, no uza tempu atu halo adorasaun família  ho ninia oan-feto sira. Rezultadu mak saida? Brizit estuda Bíblia ho ema barak, no sira barak hetan batizmu. Iha tinan 2005, nia komesa serbí nuʼudar pioneiru regulár. Nia hetan bensaun tanba tau fiar ba Jeová no laran-metin ba Jeová nia organizasaun. Ninia oan-feto sira serbí Jeová ho laran-metin, no agora iha kongregasaun rua iha ninia área! Brizit fiar metin katak Jeová mak fó nia kbiit atu tahan susar sira no mós tahan bainhira família sira hatún nia.

17. Ita tenke deside metin atu halo saida?

¹⁷ Satanás hakarak ita fiar katak Jeová husik deʼit ita bainhira ita hasoru susar no se ita apoia Jeová nia organizasaun, neʼe sei lori deʼit susar ba ita. Satanás hakarak ita sente taʼuk bainhira ema koʼalia aat, fó-terus, ka fó-kastigu ba irmaun sira neʼebé tau matan ba organizasaun. Bainhira ema hatún ita, Satanás hakarak ita atu la tau fiar tan ba Jeová nia matadalan no ninia organizasaun. Maibé, ita hatene didiʼak Diabu nia lasu sira no ita la monu ba ida-neʼe. (2 Kor 2:11) Deside metin atu la simu Satanás nia lia-bosok hotu no nafatin laran-metin ba Jeová no ninia organizasaun. Hanoin-hetan katak Jeová sei nunka husik ita. (Sal 28:7) Tan neʼe, mai ita nunka husik buat ida atu haketak ita husi Jeová!​—Rom 8:35-39.

18. Ita sei koʼalia kona-ba saida iha lisaun tuirmai?

¹⁸ Iha lisaun neʼe, ita koʼalia ona kona-ba situasaun sira neʼebé bele mosu tanba ema neʼebé laʼós Testemuña. Maibé ita-nia fiar ba Jeová no ninia organizasaun mós bele hetan koko husi irmaun-irmán sira. Oinsá ita bele manán ida-neʼe? Ita sei koʼalia kona-ba neʼe iha lisaun tuirmai.