LISAUN ESTUDU 45
Oinsá Jeová ajuda ita atu haklaken?
“Sira sei hatene duni katak profeta ida iha sira-nia leet.”—EZE 2:5.
KNANANUK 67 “Haklaken Maromak nia liafuan bá”
IHA LISAUN NEʼE a
1. Saida mak akontese bainhira ita haklaken? Maibé ita bele iha konfiansa saida?
ITA hatene katak dala ruma ema sei kontra ita kuandu ita haklaken. Ita bele fiar katak iha futuru ema sei kontra ita makaʼas liután. (Dan 11:44; 2 Tim 3:12; Apok 16:21) Maski nuneʼe, ita iha konfiansa katak Jeová sei ajuda ita. Tanbasá? Tanba Jeová sempre ajuda ninia atan sira atu kumpre sira-nia knaar, maski neʼe susar. Atu hatene kona-ba neʼe, ita sei aprende kona-ba akontesimentu oioin neʼebé mosu iha profeta Ezequiel nia moris. Ezequiel haklaken ba ema Judeu neʼebé sai nuʼudar dadur iha Babilónia.
2. Ezequiel presiza haklaken ba ema hanesan saida? Iha lisaun neʼe, ita sei aprende saida? (Ezequiel 2:3-6)
2 Ezequiel presiza haklaken ba ema hanesan saida? Jeová dehan katak sira “lakohi rona”, “laran-toos” no “kontradór”. Sira perigu hanesan ai-tarak no sakunar. Tan neʼe, Jeová hatete beibeik ba Ezequiel: “Keta taʼuk.” (Lee Ezequiel 2:3-6.) Ezequiel konsege kumpre ninia knaar atu haklaken tanba (1) Jeová mak haruka nia atu halo serbisu neʼe, (2) Maromak nia espíritu santu fó kbiit ba nia, no (3) Maromak nia liafuan hametin ninia fiar. Oinsá mak buat tolu neʼe ajuda Ezequiel? No oinsá buat sira-neʼe bele ajuda ita ohin loron?
JEOVÁ HARUKA EZEQUIEL ATU HALO SERBISU NEʼE
3. Liafuan saida mak hametin Ezequiel no oinsá Jeová hatudu katak nia sei ajuda Ezequiel?
3 Jeová hatete ba Ezequiel: “Haʼu sei haruka ó.” (Eze 2:3, 4) Ita bele fiar katak liafuan sira-neʼe hametin Ezequiel. Tanbasá? Karik Ezequiel hanoin-hetan katak Jeová uza liafuan neʼebé atu hanesan bainhira nia hili Moisés no Isaias nuʼudar profeta. (Éx 3:10; Isa 6:8) Ezequiel mós hatene oinsá Jeová ajuda ona profeta rua neʼe atu kumpre sira-nia knaar neʼebé susar. Tan neʼe, bainhira Jeová hatete ba Ezequiel dala rua: “Haʼu sei haruka ó”, nia iha razaun neʼebé diʼak atu fiar katak Jeová sei ajuda nia. No mós dala balu Ezequiel hakerek: “Jeová koʼalia ba haʼu.” (Eze 3:16) Dala barak Ezequiel mós hakerek: “Jeová koʼalia tan mai haʼu.” (Eze 6:1) Klaru katak, Ezequiel fiar metin katak Jeová mak haruka nia atu halo knaar neʼe. Liután neʼe, Ezequiel nia aman mak amlulik no karik nia aprende husi ninia aman katak Jeová sempre promete atu ajuda profeta sira. Porezemplu, Jeová hatete ba Isaac, Jacob no Jeremias: “Haʼu hamutuk ho ó.”—Gén 26:24; 28:15; Jer 1:8.
4. Liafuan saida mak fó kbiit ba Ezequiel?
4 Ema Izraél barak sei halo saida bainhira Ezequiel haklaken ba sira? Jeová hatete: “Umakain Izraél sei la rona ó, tanba sira lakohi rona haʼu.” (Eze 3:7) Bainhira sira lakohi rona ba Ezequiel, neʼe hatudu katak sira lakohi rona ba Jeová. Liafuan sira-neʼe fó kmaan ba Ezequiel tanba ajuda nia hatene katak nia la falla nuʼudar profeta, maski povu lakohi rona. Jeová mós promete ba Ezequiel katak bainhira liafuan neʼebé Ezequiel fó sai mak sai loos ona, povu “sei hatene duni katak profeta ida iha sira-nia leet”. (Eze 2:5; 33:33) Klaru katak liafuan sira-neʼe fó kbiit ba Ezequiel atu bele kumpre ninia serbisu haklaken.
JEOVÁ HARUKA ITA HAKLAKEN
Hanesan Ezequiel, karik ema lakohi rona ba ita ka kontra ita, maski nuneʼe ita hatene katak Jeová hamutuk ho ita (Haree parágrafu 5-6)
5. Tuir Isaias 44:8, tanbasá ita bele sai aten-brani?
5 Ita mós bele sai aten-brani tanba ita hatene katak Jeová mak haruka ita atu haklaken. Nia hafolin ita hodi bolu ita nuʼudar ninia “testemuña” sira. (Isa 43:10) Neʼe mak priviléjiu neʼebé boot! Jeová hatete ba Ezequiel: “Keta taʼuk.” Jeová mós hatete ba ita: “Keta nakdedar.” Tanbasá ita la presiza taʼuk ba ema neʼebé kontra ita? Hanesan Ezequiel, Jeová mak haruka ita no apoia ita.—Lee Isaias 44:8.
6. (a) Jeová promete atu ajuda ita iha dalan oinsá? (b) Saida mak fó kmaan no fó kbiit mai ita?
6 Jeová promete katak nia sei ajuda ita. Porezemplu, antes Jeová hatete: “Imi mak haʼu-nia testemuña”, nia hatete: “Bainhira ó laʼo liu bee sira, haʼu sei hamutuk ho ó, no bainhira ó hakur mota sira, sira sei la halo ó mout. Bainhira ó laʼo liu ahi, neʼe sei la han ó, no ahi nia lakan sei la han ó.” (Isa 43:2) Kuandu ita haklaken, dala ruma ita hasoru susar neʼebé atu hanesan ho bee neʼebé bele halo ita mout ka ahi neʼebé bele han ita. Maski nuneʼe, Jeová sei ajuda ita atu kontinua haklaken. (Isa 41:13) Hanesan Ezequiel nia tempu, ohin loron mós ema barak lakohi rona ita-nia mensajen. Maibé neʼe la dehan katak ita falla nuʼudar Jeová nia Testemuña. Ita hetan kmaan no kbiit tanba hatene katak Jeová kontente ho ita bainhira ita haklaken ho laran-metin. Apóstolu Paulo hatete: “[Ema] ida-idak sei simu kolen tuir sira-nia serbisu rasik.” (1 Kor 3:8; 4:1, 2) Irmán ida neʼebé serbí nuʼudar pioneiru ba tinan barak hatete: “Haʼu sente kontente tanba hatene katak Jeová fó kolen ba ita-nia hakaʼas an.”
ESPÍRITU SANTU FÓ KBIIT BA EZEQUIEL
Ezequiel haree vizaun kona-ba Jeová nia karreta lalehan nian no neʼe hametin ninia fiar katak Jeová sei ajuda nia atu kumpre ninia serbisu haklaken (Haree parágrafu 7)
7. Bainhira Ezequiel hanoin kona-ba vizaun neʼebé nia haree, oinsá neʼe ajuda nia? (Haree dezeñu iha livru oin.)
7 Iha vizaun ida, Ezequiel haree katak Maromak nia espíritu santu mak kbiit boot. Nia haree oinsá espíritu santu ajuda anju sira neʼebé kbiit boot no mós muda Maromak nia karreta lalehan nian neʼebé boot tebes. (Eze 1:20, 21) Saida mak Ezequiel halo kuandu haree vizaun neʼe? Nia hakerek: “Bainhira haʼu haree ida-neʼe, haʼu hakneʼak hodi hakruʼuk ho oin ba rai.” Ezequiel hakneʼak tanba admira tebes ho vizaun neʼe. (Eze 1:28) Depois neʼe, bainhira Ezequiel hanoin kona-ba vizaun neʼe, nia sai fiar metin liután katak nia bele kumpre ninia serbisu haklaken tanba espíritu santu nia ajuda.
8-9. (a) Saida mak akontese ba Ezequiel bainhira Jeová haruka nia atu hamriik? (b) Jeová halo saida tan atu hametin Ezequiel?
8 Jeová hatete ba Ezequiel: “Oan-mane husi ema, hamriik bá, atu nuneʼe haʼu bele koʼalia ba ó.” Liafuan sira-neʼe no mós Maromak nia espíritu santu ajuda Ezequiel hetan kbiit neʼebé nia presiza atu hamriik. Ezequiel hakerek: “Haʼu sai nakonu ho espíritu no espíritu neʼe halo haʼu hamriik.” (Eze 2:1, 2) Husi tempu neʼebá, Maromak nia “forsa” ka espíritu santu mak dirije Ezequiel. (Eze 3:22; 8:1; 33:22; 37:1; 40:1) Maromak nia espíritu fó kbiit ba Ezequiel atu halo ninia knaar atu haklaken ba ema neʼebé “ulun-toos no laran-toos”. (Eze 3:7) Jeová hatete ba Ezequiel: “Haʼu halo ona ó-nia oin sai toos hanesan sira-nia oin no ó-nia reen-toos sai toos hanesan sira-nian. Haʼu halo ona ó-nia reen-toos sai hanesan fatuk-diamante, toos liu fali fatuk-ahi. Keta taʼuk ba sira no keta nakdedar bainhira ó haree sira-nia oin.” (Eze 3:8, 9) Neʼe hanesan Jeová hatete ba Ezequiel: ‘Keta sai laran-kraik tanba ema ulun-toos. Haʼu sei hametin ó.’
9 Depois neʼe, Maromak nia espíritu santu ajuda Ezequiel iha serbisu haklaken. Ezequiel hakerek: “Haʼu sente Jeová nia forsa neʼebé boot.” Ezequiel presiza semana ida atu bele aprende no komprende didiʼak mensajen neʼebé nia simu atu nuneʼe nia bele fó sai ida-neʼe ho fiar metin. (Eze 3:14, 15) Tuirmai Jeová haruka Ezequiel atu laʼo ba rai-tetuk no iha neʼebá nia sai “nakonu ho espíritu”. (Eze 3:23, 24) Ezequiel prontu ona atu komesa haklaken.
ESPÍRITU SANTU FÓ KBIIT BA ITA
Saida mak ajuda Ezequiel no saida mak sei ajuda ita kumpre serbisu haklaken? (Haree parágrafu 10)
10. Saida mak ita presiza atu bele kumpre ita-nia serbisu haklaken no tanbasá?
10 Saida mak ita presiza atu bele kumpre ita-nia serbisu haklaken? Atu hatán ba pergunta neʼe, hanoin kona-ba buat neʼebé akontese ba Ezequiel. Antes nia komesa haklaken, Maromak nia espíritu santu fó kbiit ba nia. Ohin loron, ita bele kumpre serbisu haklaken tanba deʼit Maromak nia espíritu santu mak ajuda ita. Tanbasá? Tanba Satanás halo funu hasoru ita hodi koko hapara ita atu haklaken. (Apok 12:17) Tuir ema barak nia hanoin, ita labele manán Satanás tanba nia forsa boot. Maibé liuhusi ita-nia serbisu haklaken, ita manán duni nia! (Apok 12:9-11) Oinsá? Bainhira ita haklaken, ita hatudu katak ita la taʼuk ba Satanás nia ameasa. Tempu ida-idak neʼebé ita haklaken, ita manán Satanás. Hodi kontinua haklaken maski ita-nia inimigu sira kontra ita, ida-neʼe hatudu saida? Ita bele haree ho klaru katak Jeová fó kbiit mai ita liuhusi ninia espíritu santu no nia mós kontente ho ita.—Mt 5:10-12; 1 Ped 4:14.
11. Oinsá Maromak nia espíritu santu bele ajuda ita, no saida mak ita presiza halo atu kontinua simu espíritu santu?
11 Saida tan mak ita aprende kona-ba oinsá Jeová fó kbiit ba Ezequiel atu haklaken? Maromak nia espíritu santu bele fó kbiit neʼebé ita presiza atu manán problema naran deʼit neʼebé ita hasoru iha serbisu haklaken. (2 Kor 4:7-9) Entaun saida mak ita presiza halo atu ita bele kontinua simu Maromak nia espíritu santu? Ita presiza husu beibeik espíritu santu liuhusi orasaun, no fiar metin katak Jeová sei rona ita-nia orasaun. Jesus hanorin ninia dixípulu: “Kontinua husu, . . . Kontinua buka, . . . Kontinua dere odamatan.” No Jeová sei “fó duni espíritu santu ba ema neʼebé husu ba nia”.—Lc 11:9, 13; Após 1:14; 2:4.
MAROMAK NIA LIAFUAN HAMETIN EZEQUIEL NIA FIAR
12. Tuir Ezequiel 2:9–3:3, surat-tahan lulun mai husi neʼebé no saida mak hakerek iha surat-tahan lulun neʼe?
12 Maromak nia liafuan mós hametin Ezequiel nia fiar, laʼós deʼit Maromak nia espíritu santu. Iha vizaun ida, Ezequiel haree liman ida neʼebé kaer surat-tahan lulun. (Lee Ezequiel 2:9–3:3.) Surat-tahan lulun neʼe mai husi neʼebé? Saida mak hakerek iha surat-tahan lulun neʼe? Oinsá ida-neʼe hametin Ezequiel? Mai ita haree. Surat-tahan lulun neʼe mai husi Maromak nia kadunan. Antes neʼe, Ezequiel haree ona anju haat, karik Jeová haruka anju sira-neʼe ida atu fó surat-tahan lulun ba Ezequiel. (Eze 1:8; 10:7, 20) Iha surat-tahan lulun hakerek Maromak nia liafuan kona-ba mensajen tesi-lia neʼebé Ezequiel presiza fó sai ba ema Judeu neʼebé kontra. (Eze 2:7) Mensajen neʼe hakerek iha surat-tahan nia oin no kotuk.
13. Jeová haruka Ezequiel atu halo saida, no tanbasá surat-tahan neʼe midar?
13 Jeová haruka Ezequiel atu han surat-tahan lulun neʼe no “halo [ninia] kabun bosu” ho ida-neʼe. Ezequiel halo tuir Jeová hodi han hotu surat-tahan lulun neʼe. Neʼe signifika saida? Ezequiel presiza komprende didiʼak mensajen neʼebé nia atu fó sai. Nia tenke tau fiar ba mensajen neʼe atu neʼe bele book nia atu haklaken. Tuirmai buat neʼebé oin-seluk akontese. Bainhira Ezequiel komesa han, nia sente katak surat-tahan lulun neʼe “midar hanesan bani-been”. (Eze 3:3) Tanbasá? Tanba Ezequiel sente katak priviléjiu atu reprezenta Jeová mak buat neʼebé diʼak ka midar. (Sal 19:8-11) Nia agradese tebes tanba Jeová simu no hili nia atu sai nuʼudar profeta.
14. Saida mak ajuda Ezequiel sai prontu atu haklaken?
14 Depois neʼe, Jeová hatete ba Ezequiel: “Rona didiʼak ba haʼu-nia liafuan hotu neʼebé haʼu koʼalia ba ó no rai ida-neʼe iha ó-nia laran.” (Eze 3:10) Liafuan sira-neʼe hatudu katak Jeová hakarak Ezequiel atu hanoin-hetan buat neʼebé hakerek iha surat-tahan lulun no medita kona-ba neʼe. Bainhira Ezequiel halo ida-neʼe, nia sai fiar metin liután. Ida-neʼe mós iha mensajen makaʼas neʼebé Ezequiel presiza fó sai. (Eze 3:11) Bainhira Ezequiel komprende didiʼak no fiar Maromak nia mensajen, nia prontu atu komesa haklaken no kontinua halo ida-neʼe toʼo nia kumpre ninia knaar.—Sal 19:14.
MAROMAK NIA LIAFUAN HAMETIN ITA-NIA FIAR
15. Atu bele kontinua haklaken, saida mak ita presiza rai didiʼak iha ita-nia laran?
15 Ita mós presiza Maromak nia liafuan atu hametin ita-nia fiar hodi ita bele kontinua haklaken. Ita presiza rai didiʼak iha ita-nia laran buat hotu neʼebé Jeová fó sai ba ita. Ohin loron, Jeová koʼalia ba ita liuhusi Bíblia. Ita presiza halo saida atu Maromak nia Liafuan kontinua afeta ita-nia hanoin, sentimentu no motivu?
16. Oinsá ita bele komprende Maromak nia Liafuan?
16 Bainhira ita han hahán no ita-nia isin xupa vitamina husi hahán neʼe, ita-nia isin hetan kbiit. Nuneʼe mós, bainhira ita estuda Bíblia no medita kona-ba neʼe, ita-nia fiar sai metin liután. Neʼe mak lisaun neʼebé ita aprende husi vizaun kona-ba surat-tahan lulun. Jeová hakarak ita atu ‘halo ita-nia kabun bosu’ ho ninia Liafuan. Nia hakarak ita komprende didiʼak ninia Liafuan. Ita bele halo nuneʼe liuhusi orasaun, lee no medita. Primeiru, halo orasaun hodi prepara ita-nia laran atu simu Maromak nia hanoin. Segundu, lee versíkulu balu. Terseiru, para uitoan no medita ka hanoin kleʼan kona-ba buat neʼebé ita lee. Rezultadu mak saida? Bainhira ita medita barak liután, ita sei komprende diʼak liután Maromak nia Liafuan no ita-nia fiar sei sai metin liután.
17. Tanbasá importante atu lee no medita kona-ba Bíblia?
17 Tanbasá importante atu lee no medita kona-ba Bíblia? Bainhira ita halo nuneʼe, ita hetan kbiit neʼebé ita presiza atu haklaken kona-ba Maromak nia Ukun agora no mós atu haklaken mensajen tesi-lia nian neʼebé lakleur tan ita sei fó sai. No mós bainhira ita medita kona-ba Jeová nia hahalok diʼak, ita-nia relasaun diʼak ho nia sei sai metin liután. Rezultadu mak ita sei sente dame no kontente, no ida-neʼe mak hanesan buat neʼebé midar.—Sal 119:103.
KBIIT ATU TAHAN
18. Ema iha ita-nia haklaken-fatin tenke rekoñese saida no tanbasá?
18 Ezequiel mak profeta ida, maibé ita laʼós profeta. Maski nuneʼe, ita hakaʼas an atu kontinua haklaken Jeová nia mensajen neʼebé hakerek iha Bíblia, no ita sei kontinua halo ida-neʼe toʼo Jeová haruka ita para. Bainhira tempu tesi-lia toʼo ona, ema iha ita-nia haklaken-fatin labele dehan katak sira la simu avizu ka Maromak la haree sira. (Eze 3:19; 18:23) Sira tenke rekoñese katak mensajen neʼebé ita haklaken mai husi Maromak.
19. Saida mak sei fó kbiit mai ita atu kumpre ita-nia serbisu haklaken?
19 Saida mak sei fó kbiit mai ita atu kumpre ita-nia serbisu haklaken? Buat tolu neʼebé hametin Ezequiel, mós bele hametin ita. Ita kontinua haklaken tanba hatene katak Jeová mak haruka ita atu halo serbisu neʼe, ita hetan kbiit husi Maromak nia espíritu santu no ninia Liafuan. Ho Jeová nia ajuda, ita hetan motivasaun atu kumpre ita-nia serbisu haklaken no “tahan toʼo rohan”.—Mt 24:13.
KNANANUK 65 Laʼo ba oin!
a Ita sei aprende kona-ba dalan tolu neʼebé Jeová ajuda profeta Ezequiel atu kumpre ninia knaar atu haklaken. Bainhira ita aprende kona-ba neʼe, neʼe sei ajuda ita iha konfiansa katak Jeová sei ajuda ita kumpre ita-nia serbisu haklaken.