1-2. (a) Ita sei hatán ba pergunta saida deʼit? (b) Saida mak hatudu katak Jeová hakarak tebes atu ajuda ita?

 JEOVÁ bele ajuda ita tahan problema sira no sente kontente nuʼudar ita serbí nia. Oinsá mak nia ajuda ita? Oinsá mak ita bele hetan benefísiu husi Jeová nia ajuda? Iha lisaun neʼe, ita sei hetan resposta ba pergunta sira-neʼe. Maibé mai ita hanoin uluk kona-ba pergunta: Jeová hakarak tebes atu ajuda ita ka lae?

² Liafuan ida neʼebé apóstolu Paulo uza iha ninia karta ba ema Ebreu bele ajuda ita hatán ba pergunta neʼe. Paulo hakerek: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?” (Ebr 13:6) Livru ida kona-ba Bíblia esplika katak liafuan “ajuda-naʼin” hanesan temi iha versíkulu neʼe refere ba ema ida neʼebé halai atu ajuda ema neʼebé husu ajuda. Imajina kona-ba Jeová neʼebé halai atu salva ema neʼebé hasoru susar. Liafuan sira-neʼe ajuda ita komprende katak Jeová prontu no hakarak tebes atu ajuda ita. Ita bele tahan susar sira ho haksolok tanba Jeová mak ajuda ita.

3. Saida mak dalan tolu neʼebé Jeová ajuda ita atu tahan problema sira ho haksolok?

³ Oinsá Jeová ajuda ita tahan problema sira ho haksolok? Atu hatán ba pergunta neʼe, mai ita haree livru Isaias. Tanbasá? Tanba profesia barak neʼebé Jeová fó sai ba Isaias bele aplika ba Maromak nia atan sira ohin loron. No mós baibain Isaias koʼalia kona-ba Jeová iha dalan neʼebé fasil ba ita atu komprende. Isaias kapítulu 30 iha ezemplu balu kona-ba neʼe. Iha kapítulu neʼe, Isaias uza  ai-knanoik furak oioin atu esplika oinsá Jeová ajuda ita (1) liuhusi rona didiʼak no hatán ita-nia orasaun, (2) liuhusi fó matadalan ba ita no (3) liuhusi haraik bensaun ba ita agora no mós iha futuru. Agora mai ita aprende liután dalan tolu neʼe.

4. (a) Jeová dehan saida kona-ba ema Judeu iha Isaias nia tempu, no ikusmai saida mak Jeová husik akontese? (b) Jeová fó esperansa saida ba ema neʼebé laran-metin? (Isaias 30:18, 19)

⁴ Iha parte primeiru husi Isaias kapítulu 30, Jeová bolu ema Judeu nuʼudar “oan-mane sira neʼebé ulun-toos” no halo sala barak. Nia mós dehan: “Sira mak povu neʼebé kontradór, . . . neʼebé lakohi rona ba Jeová nia ukun-fuan.” (Isa 30:1, 9) Tanba povu neʼe lakohi rona, Isaias fó sai nanis katak Jeová sei husik sira atu kona dezastre. (Isa 30:5, 17; Jer 25:8-11) Profesia neʼe sai loos bainhira ema Judeu sai dadur iha Babilónia. Maibé iha mós ema Judeu balu neʼebé laran-metin, no Isaias fó sai mensajen ida neʼebé fó esperansa ba sira. Isaias hatete katak loron ida Jeová sei husik sira fila fali ba Izraél. (Lee Isaias 30:18, 19.) Ikusmai sira sai livre duni husi Babilónia. Maibé tinan barak liutiha mak ida-neʼe akontese. Fraze “Jeová hein ho pasiénsia atu hatudu laran-diʼak ba imi” hatudu katak tempu balu tenke liu tiha antes Jeová salva ema neʼebé laran-metin. Tuir loloos, ema Izraél sai nuʼudar dadur iha Babilónia durante tinan 70 no tuirmai mak sira balu bele fila fali ba Jeruzalein. (Isa 10:21; Jer 29:10) Bainhira sira fila fali ba sira-nia rai, sira la tanis tan tanba triste maibé tanba sente kontente tebes.

5. Oinsá mak Isaias 30:19 fó kmaan mai ita?

⁵ Ohin loron, ita bele hetan kmaan husi liafuan sira tuirmai: “Maromak sei hatudu duni laran-diʼak ba imi bainhira imi husu ajuda husi nia.” (Isa 30:19) Isaias nia liafuan hatudu katak Jeová sei rona didiʼak bainhira ita husu ajuda husi nia no nia sei halo buat ruma lalais atu hatán ita-nia orasaun. Isaias mós hatete: “Nia sei hatán kedas bainhira nia rona imi halerik.” Liafuan sira-neʼe fó kmaan mai ita tanba ita-nia Aman prontu no hakarak ajuda ita kuandu ita husu ajuda husi nia. Neʼe mós ajuda ita atu tahan ho haksolok.

6. Oinsá mak Isaias nia liafuan hatudu katak Jeová rona ba ninia atan ida-idak nia orasaun?

⁶ Ita aprende saida tan kona-ba orasaun husi versíkulu neʼe? Jeová rona didiʼak ba ita ida-idak nia orasaun. Tanbasá ita bele dehan nuneʼe? Iha lian orijinál, parte primeiru husi Isaias kapítulu 30 uza liafuan “imi” tanba Jeová koʼalia ba ninia povu nuʼudar grupu. Maibé iha versíkulu 19, Isaias uza liafuan “ó” tanba koʼalia ba ema ida-idak. Isaias hakerek: “Ó sei la tanis tan”; “Maromak sei hatudu duni laran-diʼak ba ó”; ‘Nia sei hatán ó’. Jeová mak Aman neʼebé domin, tan neʼe nia la hatete ba ninia oan-mane ka oan-feto neʼebé sente laran-kraik: “Ó tenke forsa hanesan ó-nia maun ka feton.” Duké halo nuneʼe, Jeová hanoin ita no rona didiʼak ba ita ida-idak nia orasaun.​—Sal 116:1; Isa 57:15.

7. Oinsá mak Isaias no Jesus hatudu katak importante atu halo beibeik orasaun?

⁷ Bainhira ita halo orasaun ba Jeová no fó sai buat neʼebé halo ita hanoin barak, karik buat primeiru neʼebé Jeová halo mak fó ita kbiit atu tahan situasaun  neʼe. No se ita hasoru susar neʼe ba tempu kleur, karik ita presiza husu beibeik Jeová atu fó ita kbiit hodi bele tahan. Jeová konvida ita atu halo nuneʼe. Ita bele hatene ida-neʼe liuhusi Isaias nia liafuan tuirmai: “Keta husik [Jeová] deskansa.” (Isa 62:7) Ida-neʼe katak sá? Ita presiza halo orasaun beibeik ba Jeová toʼo neʼe hanesan la fó tempu ba Jeová atu deskansa. Isaias nia liafuan halo ita hanoin kona-ba Jesus nia ai-knanoik kona-ba orasaun iha Lucas 11:8-10, 13. Iha eskritura neʼe, Jesus anima ita atu halo orasaun beibeik no “kontinua husu” Maromak atu fó ninia espíritu santu. Ita mós bele husu Jeová atu fó ita matadalan hodi halo desizaun neʼebé diʼak.

8. Iha tempu antigu, oinsá mak liafuan iha Isaias 30:20, 21 sai loos?

⁸ Lee Isaias 30:20, 21. Bainhira tropa Babilónia halo serku ba Jeruzalein durante tinan ida ho balu, povu hasoru susar beibeik toʼo neʼe sai hanesan sira-nia ai-han loroloron nian. Maibé tuir versíkulu 20 no 21, Jeová promete ba ema Judeu katak se sira arrepende an no troka sira-nia hahalok, nia sei salva sira. Isaias bolu Jeová nuʼudar sira-nia “Mestre Boot” no promete ba povu katak Jeová sei hanorin sira oinsá atu adora nia iha dalan neʼebé nia simu. Liafuan sira-neʼe sai loos bainhira ema Judeu sai livre husi Babilónia. Jeová sai nuʼudar “Mestre Boot” ba sira no fó matadalan ba sira, ida-neʼe ajuda povu hetan susesu atu halaʼo fali adorasaun loos. Ita sente kontente tebes tanba Jeová sai nuʼudar ita-nia “Mestre Boot” ohin loron.

9. Saida mak dalan ida neʼebé ita simu Jeová nia matadalan ohin loron?

⁹ Iha versíkulu sira-neʼe, Isaias konta ai-knanoik neʼebé hatudu katak ita mak hanesan estudante sira neʼebé simu hanorin husi Jeová iha dalan rua. Primeiru, Isaias hatete: “Imi sei haree imi-nia Mestre Boot ho imi-nia matan rasik.” Iha ai-knanoik neʼe, Isaias hatete katak Mestre hamriik iha ninia estudante sira-nia oin. Ita iha priviléjiu boot atu simu hanorin husi Jeová ohin loron. Oinsá Jeová hanorin ita? Nia hanorin ita liuhusi ninia organizasaun. Ita agradese tebes tanba simu matadalan neʼebé klaru husi Jeová nia organizasaun. Matadalan neʼebé ita simu iha reuniaun no reuniaun boot, husi ita-nia publikasaun sira,  broadcasting no dalan seluk ajuda ita atu tahan ho haksolok durante tempu susar.

10. Oinsá mak ita rona lian ida husi ita-nia kotuk?

¹⁰ Isaias mós esplika dalan seluk neʼebé Jeová hanorin ita, hodi dehan: “Imi-nia tilun rasik sei rona lian ida husi imi-nia kotuk.” Isaias hatete katak Jeová mak hanesan Mestre neʼebé laʼo iha estudante sira-nia kotuk no dirije sira atu laʼo iha dalan neʼebé sira tenke laʼo. Ohin loron, ita rona Maromak nia lian husi ita-nia kotuk. Oinsá? Maromak nia liafuan hakerek iha Bíblia laran tinan barak liubá, neʼe hanesan iha ita-nia kotuk. Tan neʼe, bainhira ita lee Bíblia, neʼe hanesan ita rona Maromak nia lian husi ita-nia kotuk.​—Isa 51:4.

11. Atu tahan ho haksolok, ita presiza halo hakat saida no tanbasá?

¹¹ Oinsá mak ita bele hetan benefísiu husi matadalan neʼebé Jeová fó liuhusi ninia organizasaun no ninia Liafuan? Hanoin kona-ba fraze rua neʼebé Isaias uza. Primeiru, “dalan mak neʼe”. Segundu, “laʼo tuir ida-neʼe bá”. (Isa 30:21) La toʼo atu hatene deʼit “dalan”. Ita mós presiza “laʼo tuir ida-neʼe”. Jeová nia Liafuan no esplikasaun sira husi ninia organizasaun ajuda ita hatene saida mak Jeová hakarak ita atu halo. Ita mós aprende oinsá atu halo tuir buat neʼebé ita aprende. Atu bele kontinua serbí Jeová ho haksolok, ita presiza halo hakat rua neʼe. Bainhira ita halo nuneʼe, ita bele fiar katak Jeová sei fó kolen mai ita.

12. Tuir Isaias 30:23-26, oinsá mak Jeová haraik bensaun ba ninia povu?

¹² Lee Isaias 30:23-26. Oinsá profesia neʼe sai loos ba ema Judeu neʼebé fila fali ba Izraél? Sira simu bensaun barak iha dalan fíziku no mós espirituál. Jeová haraik bensaun ba ninia povu liuhusi fó ai-han barak ba sira. Maibé importante liu mak nia fó buat hotu neʼebé sira presiza atu bele hakbesik ba nia no halaʼo fali adorasaun loos. Bensaun espirituál neʼebé Maromak nia povu simu iha tempu neʼebá mak barak liu fali se kompara tempu seluk antes neʼe. Versíkulu 26 hatudu katak Jeová aumenta sira-nia naroman espirituál, neʼe katak nia ajuda sira komprende liután ninia Liafuan. (Isa 60:2) Jeová nia bensaun sira ajuda ninia povu atu kontinua serbí nia ho haksolok no dame iha laran tanba sira “laran-kontente”.​—Isa 65:14.

13. Oinsá profesia kona-ba halaʼo fali adorasaun loos sai loos ohin loron?

 ¹³ Profesia kona-ba halaʼo fali adorasaun loos mós aplika ba ita ohin loron ka lae? Sin. Iha dalan oinsá? Husi tinan 1919 EC, ema millaun ba millaun sai livre husi Babilónia Boot, ka relijiaun falsu iha mundu tomak. Jeová dirije sira ba fatin neʼebé diʼak liu fali Rai neʼebé Maromak Promete ba ema Izraél. Jeová dirije sira ba paraízu espirituál. (Isa 51:3; 66:8) Saida mak paraízu espirituál?

14. Saida mak paraízu espirituál, no sé mak tama iha neʼebá? (Haree Esplikasaun ba fraze.)

¹⁴ Husi tinan 1919 EC, ema neʼebé iha esperansa atu bá lalehan komesa tama iha paraízu espirituál. b Ema neʼebé iha esperansa atu moris iha rai ka “bibi-malae seluk” mós tama ona ba paraízu espirituál no hetan ona bensaun barak husi Jeová.​—João 10:16; Isa 25:6; 65:13.

15. Ohin loron, paraízu espirituál mak iha neʼebé?

¹⁵ Ohin loron, paraízu espirituál mak iha neʼebé? Jeová nia atan sira moris iha fatin oioin iha mundu tomak. Tan neʼe ita bele hetan paraízu espirituál iha fatin oioin iha mundu tomak. Entaun maski ita hela iha fatin neʼebé deʼit, ita bele sai parte ba paraízu espirituál naran katak ita apoia adorasaun loos.

16. Oinsá ita bele kontinua haree buat furak husi paraízu espirituál?

¹⁶ Atu bele kontinua hela iha paraízu espirituál, ita presiza halo buat oioin. Porezemplu ita presiza kontinua hafolin kongregasaun Kristaun iha mundu tomak. Oinsá ita bele halo ida-neʼe? Ita presiza tau fokus ba irmaun-irmán sira-nia hahalok diʼak, laʼós ba sira-nia fraku. (João 17:20, 21) Tanbasá neʼe importante? Hanoin toʼok komparasaun neʼe. Baibain kuandu ita laʼo iha jardín furak ida, ita sei haree ai-hun ho modelu oioin. Nuneʼe mós ho ita-nia kongregasaun sira, iha ema oioin neʼebé hanesan ho ai-hun sira. (Isa 44:4; 61:3) Ita presiza kontinua  tau fokus ba “jardín” nia furak, laʼós ba fraku husi “ai-hun” ida-idak neʼebé besik liu ba ita. Ita labele tau fokus ba ita-nia fraku sira ka irmaun-irmán seluk nia fraku toʼo la haree buat furak husi kongregasaun Kristaun iha mundu tomak.

17. Oinsá ita ida-idak bele ajuda kongregasaun atu kontinua iha unidade?

¹⁷ Oinsá ita ida-idak bele ajuda kongregasaun atu kontinua iha unidade? Ita presiza buka dame. (Mt 5:9; Rom 12:18) Tempu ida-idak neʼebé ita iha inisiativu atu buka dame ho ema seluk iha kongregasaun, ita halo paraízu espirituál sai furak liután. Diʼak atu hanoin-hetan katak Jeová dada ema ida-idak atu tama paraízu espirituál hodi adora nia. (João 6:44) Jeová nia atan ida-idak mak folin-boot ba nia. Tan neʼe imajina toʼok kontente neʼebé Jeová sente bainhira nia haree ita hotu hakaʼas an atu hametin dame no unidade iha ita-nia leet.​—Isa 26:3; Ageu 2:7.

18. Ita presiza medita beibeik kona-ba saida no tanbasá?

¹⁸ Jeová fó buat diʼak oioin ba ninia atan sira. Entaun oinsá ita bele hetan benefísiu husi buat sira-neʼe? Ita bele hanoin kleʼan kona-ba buat neʼebé ita aprende husi Bíblia no ita-nia publikasaun sira. Bainhira ita estuda no medita kona-ba Bíblia, neʼe sei ajuda ita haburas hahalok Kristaun neʼebé book ita atu “hadomi malu tebetebes hanesan maun-alin”. (Rom 12:10) Bainhira ita hanoin kleʼan kona-ba bensaun neʼebé ita simu agora, neʼe sei hametin ita-nia relasaun diʼak ho Jeová. No bainhira ita hanoin kleʼan kona-ba bensaun neʼebé Jeová sei haraik ba ita iha futuru, neʼe hametin ita-nia esperansa atu serbí Jeová ba nafatin iha futuru. Buat hotu neʼe sei ajuda ita atu kontinua serbí Jeová ho haksolok agora.

19. (a) Tuir Isaias 30:18, ita bele iha konfiansa saida? (b) Saida mak sei ajuda ita tahan ho haksolok?

¹⁹ Jeová sei “hamriik” hodi ajuda ita bainhira nia halakon mundu aat neʼe. (Isa 30:18) Ita hatene katak Jeová mak “Maromak justisa nian” no nia sei halakon Satanás nia mundu iha tempu neʼebé loos. (Isa 25:9) Ita hein ho pasiénsia hamutuk ho Jeová ba loron neʼebé nia sei salva ita. Antes neʼe, mai ita hakaʼas an atu kontinua hafolin orasaun, estuda Bíblia no aplika ida-neʼe no mós hanoin kleʼan kona-ba bensaun neʼebé ita simu. Bainhira ita halo nuneʼe, Jeová sei ajuda ita tahan ho haksolok hodi adora nia.