1. Apóstolu Paulo sente oinsá kona-ba atan ba kongregasaun sira?

 ATAN ba kongregasaun halo knaar oioin neʼebé importante. Apóstolu Paulo hafolin irmaun laran-metin sira-neʼe. Porezemplu, bainhira nia hakerek karta ba irmaun-irmán sira iha Filipe, nia fó kumprimentus liuliu ba katuas no atan ba kongregasaun sira.—Flp 1:1.

2. Irmaun Luis sente oinsá kona-ba serbí nuʼudar atan ba kongregasaun?

² Maski joven ka idade, irmaun barak sente kontente tanba bele serbí nuʼudar atan ba kongregasaun. Porezemplu, Devan tinan 18 bainhira nia komesa serbí nuʼudar atan ba kongregasaun. Maibé irmaun Luis tinan 50 liu bainhira nia simu knaar neʼe. Nia dehan: “Haʼu kontente tebes atu serbí nuʼudar atan ba kongregasaun. Irmaun-irmán sira hatudu ona domin boot mai haʼu, no haʼu bele hatudu fali domin ba sira!” Atan ba kongregasaun barak mós sente hanesan neʼe.

3. Ita sei koʼalia hamutuk kona-ba pergunta saida deʼit?

³ Se Ita mak irmaun neʼebé batizmu ona no seidauk serbí nuʼudar atan ba kongregasaun, Ita bele halo ida-neʼe sai nuʼudar Ita-nia golu ka lae? Saida mak bele motiva Ita atu halo ida-neʼe? Kritéria saida deʼit husi Bíblia mak Ita presiza kumpre? Iha lisaun neʼe, ita sei hatán ba pergunta sira-neʼe. Maibé ulukliu, ita sei koʼalia kona-ba saida mak atan ba kongregasaun nia knaar.

 SAIDA MAK ATAN BA KONGREGASAUN NIA KNAAR?

4. Atan ba kongregasaun halo knaar saida deʼit? (Haree mós foto.)

⁴ Atan ba kongregasaun mak irmaun neʼebé hetan ona batizmu no simu knaar liuhusi espíritu santu atu ajuda katuas sira halo knaar importante oioin iha kongregasaun. Atan balu tau matan ba mapa no publikasaun sira neʼebé uza ba haklaken. Sira seluk ajuda hamoos no tau matan Reuniaun-Fatin. Sira mós serbí nuʼudar asistente no tau matan ba ekipamentu áudio no vídeo durante reuniaun. Knaar barak neʼebé sira halo mak atu ajuda irmaun-irmán sira. Maibé importante liu mak atan ba kongregasaun tenke hadomi Jeová no moris tuir Ninia matadalan, no hadomi tebes irmaun-irmán sira. (Mt 22:​37-39) Oinsá mak irmaun ida neʼebé batizmu ona bele hakaʼas an atu serbí nuʼudar atan ba kongregasaun?

5. Irmaun ida presiza halo saida atu serbí nuʼudar atan ba kongregasaun?

⁵ Bíblia temi kona-ba kritéria neʼebé irmaun ida presiza kumpre atu bele serbí nuʼudar atan ba kongregasaun. (1 Tim 3:​8-10, 12, 13) Se Ita hakarak serbí nuʼudar atan ba kongregasaun, Ita presiza estuda kona-ba kritéria sira-neʼe no hakaʼas an atu kumpre. Maibé ulukliu, Ita presiza hanoin didiʼak kona-ba Ita-nia motivu.

SAIDA MAK ITA-NIA MOTIVU?

6. Ita presiza iha motivu saida atu bele serbí irmaun-irmán sira? (Mateus 20:28; haree mós dezeñu.)

⁶ Ezemplu neʼebé diʼak liu hotu mak Jesus Kristu. Buat hotu neʼebé nia halo tanba domin ba Maromak Jeová no ema. Domin book nia atu halo serbisu ho badinas no serbí ema seluk ho haraik an. (Lee Mateus 20:28; João 13:​5, 14, 15) Se Ita-nia motivu mak domin, Jeová sei fó bensaun ba Ita no ajuda Ita kumpre kritéria atu serbí nuʼudar atan ba kongregasaun.—1 Kor 16:14; 1 Ped 5:5.

7. Tanbasá irmaun sira labele foti an no halo sira-nia an importante liu?

⁷ Ema iha mundu baibain admira ho ema neʼebé halo sira-nia an nuʼudar ema importante. Maibé Jeová nia  organizasaun la hanesan neʼe. Bainhira irmaun sira banati-tuir Jesus hodi hadomi ema seluk, sira sei la buka oin no lakohi ema seluk haree sira nuʼudar ema neʼebé importante liu. Se ema neʼebé buka oin mak simu knaar iha kongregasaun, karik nia sei la serbí Jeová nia bibi sira ho haraik an. Karik nia sente nia mak ema importante no lakohi halo serbisu kiʼik sira. (João 10:12) Jeová sei la haraik bensaun ba ema neʼebé foti an no sente katak sira mak ema neʼebé importante liu.—1 Kor 10:​24, 33; 13:​4, 5.

8. Jesus fó konsellu saida ba ninia apóstolu sira?

⁸ Dala ruma, Jesus nia belun sira mós hakarak hetan priviléjiu, maibé ho motivu neʼebé sala. Hanoin toʼok kona-ba apóstolu Tiago no João. Sira husu Jesus atu fó knaar espesiál ba sira iha ninia Ukun. Jesus korrije sira no esplika ba apóstolu naʼin-12, hodi dehan: “Ema neʼebé hakarak sai ema-boot iha imi-nia leet tenke serbí imi. No mós ema neʼebé hakarak atu sai boot iha imi-nia leet tenke sai atan ba imi hotu.” (Mc 10:​35-37, 43, 44) Irmaun neʼebé iha motivu neʼebé loos hakarak atu serbí ema seluk, no nia sei sai bensaun ba kongregasaun.—1 Tes 2:8.

OINSÁ ITA BELE IHA HAKARAK ATU SERBÍ IRMAUN-IRMÁN SIRA?

9. Saida mak bele ajuda Ita haburas hakarak atu serbí nuʼudar atan ba kongregasaun?

⁹ Klaru Ita hadomi Jeová no hakarak serbí irmaun-irmán sira. Maibé karik Ita ladún iha hakarak atu serbí nuʼudar atan ba kongregasaun. Se nuneʼe, saida mak bele ajuda Ita? Hanoin toʼok ksolok neʼebé Ita sei hetan kuandu serbí irmaun-irmán sira. Jesus dehan: “Kontente liu atu fó duké simu.” (Após 20:35) Jesus rasik mós moris tuir prinsípiu neʼe. Nia sente duni ksolok tanba serbí ema seluk, no ita mós bele sente nuneʼe.

10. Oinsá mak Jesus hatudu katak nia kontente atu serbí ema seluk? (Marcos 6:​31-34)

¹⁰ Hanoin toʼok ezemplu kona-ba oinsá Jesus hatudu katak nia kontente atu serbí ema seluk. (Lee Marcos 6:​31-34.) Loron ida, Jesus no apóstolu sira sente kole no hakarak bá fatin hakmatek atu deskansa. Maibé ema-lubun toʼo uluk fatin neʼebé sira atu bá tanba hakarak Jesus hanorin sira. Jesus bele deʼit dehan “lae” tanba nia no apóstolu sira “la iha tempu atu deskansa no mós atu han”. Ka nia bele hanorin lia-loos balu deʼit ba ema-lubun no haruka sira fila. Maibé tanba domin, “nia hahú hanorin sira buat barak”, no kontinua hanorin sira toʼo “rai besik kalan”. (Mc 6:35) Nia halo ida-neʼe laʼós tanba obrigasaun, maibé tanba “hanoin tebes sira”. Nia hakarak hanorin sira tanba hadomi sira. Ba Jesus, serbí ema seluk mak lori kontente.

11. Oinsá mak Jesus serbí ema seluk? (Haree mós dezeñu.)

¹¹ Jesus serbí ema-lubun laʼós deʼit atu hanorin sira, maibé mós tau matan ba sira-nia presiza fíziku. Liuhusi milagre, Jesus halo hahán barak no husu dixípulu sira atu fahe ba ema-lubun. (Mc 6:41) Hodi halo nuneʼe, nia hanorin dixípulu sira oinsá atu serbí ema seluk. Nia mós hatudu katak serbisu hanesan neʼe mak importante, neʼe atu hanesan ho knaar neʼebé atan ba kongregasaun halo ohin loron. Imajina toʼok ksolok neʼebé apóstolu sira sente kuandu serbisu hamutuk ho Jesus hodi fahe hahán ba ema-lubun no haree “sira hotu han toʼo bosu”! (Mc  6:42) Neʼe mak ezemplu ida deʼit kona-ba oinsá Jesus tau uluk ema seluk nia presiza. Durante iha rai, Jesus serbí ema seluk. (Mt 4:23; 8:16) Nia sente kontente tebes atu hanorin no tau matan ba ema seluk. Ita mós sente kontente bainhira Ita prontu atu serbí ema seluk nuʼudar atan ba kongregasaun.

12. Tanbasá ita labele hanoin katak ita la iha abilidade atu ajuda ema seluk?

¹² Se Ita sente la iha abilidade espesiál ruma, keta laran-kraik. Klaru katak Ita iha hahalok diʼak neʼebé bele lori benefísiu ba kongregasaun. Ita bele lee Paulo nia liafuan iha 1 Korinto 12:​12-30 no husu Jeová nia ajuda atu bele haree oinsá eskritura neʼe aplika ba Ita. Paulo nia liafuan hatudu katak Jeová nia atan hotu inklui Ita mak folin-boot ba kongregasaun. Se Ita seidauk kumpre kritéria nuʼudar atan ba kongregasaun, keta rende an. Kontinua hakaʼas an atu serbí Jeová no ajuda irmaun-irmán sira. Se Ita halo nuneʼe, Ita bele fiar katak katuas sira hanoin kona-ba Ita-nia abilidade, no sei fó ba Ita knaar neʼebé tuir Ita-nia kbiit.—Rom 12:​4-8.

13. Kritéria sira neʼebé temi iha Bíblia aplika deʼit ba atan ba kongregasaun ka lae?

¹³ Iha razaun seluk tan tanbasá Ita presiza hakaʼas an atu kumpre kritéria nuʼudar atan ba kongregasaun. Tuir loloos, kritéria barak neʼebé temi iha Bíblia aplika ba ema Kristaun hotu. Ita hotu presiza hakbesik liután ba Jeová, prontu atu ajuda ema seluk, no moris tuir Maromak nia hakarak. Agora, mai ita haree kritéria husi Bíblia neʼebé irmaun sira presiza kumpre atu serbí nuʼudar atan ba kongregasaun.

KRITÉRIA BA ATAN BA KONGREGASAUN

14. Liafuan “sériu” katak sá? (1 Timóteo 3:​8-10, 12)

¹⁴ Mai ita haree kritéria neʼebé temi iha 1 Timóteo 3:​8-10, 12. (Lee.) Atan ba kongregasaun tenke “sériu”. Liafuan neʼe bele mós tradús nuʼudar “merese simu respeitu”, ka “hatudu hahalok diʼak”. Neʼe la dehan katak Ita nunka bele hamnasa ka koʼalia halimar. (Ecle 3:​1, 4) Maibé Ita presiza kaer didiʼak Ita-nia responsabilidade hotu. Se Ita halo nuneʼe, irmaun-irmán sira bele tau fiar no respeitu Ita.

15. “La laran-makerek” no “la buka atu manán buat ruma ho laran-makerek” katak sá?

 ¹⁵ “La laran-makerek” katak Ita onestu no ema bele tau fiar. Ita kumpre Ita-nia liafuan no la bosok. (Prov 3:32) “La buka atu manán buat ruma ho laran-makerek” katak Ita onestu kuandu halo negósiu no kuandu tau matan ba osan. Ita sei la aproveita irmaun-irmán sira atu manán osan.

16. (a) “La hemu tua barak” katak sá? (b) Iha “konxiénsia neʼebé moos” katak sá?

¹⁶ “La hemu tua barak” katak ema la koñese Ita nuʼudar ema neʼebé hemu tua demais. Iha “konxiénsia neʼebé moos” katak Ita moris tuir Jeová nia matadalan sira. Maski Ita la perfeitu, maibé Ita bele sente kontente no dame tanba iha relasaun diʼak ho Maromak.

17. “Koko uluk atu haree se nia diʼak ba knaar neʼe” katak sá? (1 Timóteo 3:10; haree mós foto.)

¹⁷ “Koko uluk atu haree se nia diʼak ba knaar neʼe.” Neʼe katak Ita hatudu ona hahalok diʼak neʼebé halo ema seluk tau fiar kuandu fó knaar ba Ita. Tan neʼe, bainhira katuas kongregasaun fó knaar ba Ita, halo tuir ho didiʼak matadalan husi sira no mós husi organizasaun. Komprende ho didiʼak Ita-nia knaar envolve saida deʼit no bainhira mak Ita presiza halo hotu knaar neʼe. Se Ita halo knaar ho badinas, irmaun-irmán sira bele haree no hafolin Ita-nia serbisu diʼak. Katuas sira, hakaʼas an atu treinu irmaun neʼebé hetan ona batizmu. (Lee 1 Timóteo 3:10.) Iha ka lae irmaun ho tinan 14 ba kraik neʼebé hetan ona batizmu iha Ita-nia kongregasaun? Sira iha toman diʼak atu estuda mesak ka lae? Sira fó resposta beibeik iha reuniaun ka lae? Sira haklaken beibeik ka lae? Se nuneʼe, Ita bele fó knaar ba sira tuir sira-nia idade no situasaun. Hodi halo nuneʼe, Ita bele ‘koko uluk atu haree se sira diʼak ba knaar neʼe’ ka lae. No bainhira sira maizumenus tinan 17 toʼo 19, karik sira bele kumpre kritéria nuʼudar atan ba kongregasaun.

18. “Ema ida la iha razaun atu duun nia” katak sá?

¹⁸ “Ema ida la iha razaun atu duun nia.” Neʼe katak ema la iha razaun atu duun Ita kona-ba hahalok sala neʼebé sériu. Klaru katak ema bele duun matak  ema Kristaun. Ema mós duun matak Jesus, no nia fó-hatene nanis katak ema mós sei duun matak ninia dixípulu sira. (João 15:20) Maski nuneʼe, se Ita halo tuir Jesus hodi nafatin hatudu hahalok neʼebé moos, Ita sei iha reputasaun diʼak iha kongregasaun laran.—Mt 11:19.

19. “Iha feen ida deʼit” envolve saida?

¹⁹ “Iha feen ida deʼit.” Se Ita mak kaben-naʼin, Ita tenke kaer metin ba Jeová nia matadalan kona-ba arranju kaben nian, katak mane ida kaben deʼit ho feto ida. (Mt 19:​3-9) Mane Kristaun ida labele halo sala seksuál. (Ebr 13:4) Maibé laʼós neʼe deʼit, nia tenke laran-metin ba ninia feen no la haburas sentimentu romántiku ba feto seluk.—Job 31:1.

20. Oinsá mak irmaun ida tau matan ninia umakain “iha dalan neʼebé diʼak”?

²⁰ “Tau matan ba ninia oan sira no ninia umakain iha dalan neʼebé diʼak.” Se Ita mak ulun ba família, Ita tenke halaʼo Ita-nia responsabilidade ho didiʼak. Ita presiza halaʼo beibeik adorasaun família nian, haklaken beibeik ho Ita-nia feen no oan, no mós ajuda Ita-nia oan haburas relasaun diʼak ho Jeová. (Éf 6:4) Se irmaun ida tau matan didiʼak ba ninia família, neʼe hatudu katak nia mós bele tau matan ba kongregasaun.—Kompara ho 1 Timóteo 3:5.

21. Se Ita seidauk serbí nuʼudar atan ba kongregasaun, saida mak Ita bele halo?

²¹ Irmaun sira, se Ita seidauk serbí nuʼudar atan ba kongregasaun, favór lee didiʼak lisaun neʼe no halo orasaun ba Jeová. Estuda didiʼak kona-ba kritéria nuʼudar atan ba kongregasaun no hakaʼas an atu kumpre ida-neʼe. Hanoin kona-ba Ita-nia domin ba Jeová no irmaun-irmán sira. Haburas liután Ita-nia hakarak atu serbí sira. (1 Ped 4:​8, 10) Bainhira Ita serbí irmaun-irmán sira, Ita sei sente haksolok tebes. Jeová sei haraik bensaun ba Ita-nia hakaʼas an atu bele serbí nuʼudar atan ba kongregasaun!—Flp 2:13.