Paul: Iha Novembru 1985, ami kontente tebes bainhira besik atu toʼo rai-Libéria iha Áfrika Oeste, neʼe mak ami-nia knaar primeiru nuʼudar misionáriu. Bainhira aviaun para iha Senegál, Anne hatete: “Oras ida tan, ita sei sama Libéria!” Tuirmai ami rona avizu: “Pasajeiru sira presiza tun husi aviaun. Ema foin hadau governu Libéria, no aviaun labele bá.” Durante loron sanulu, ami hela ho misionáriu sira iha Senegál, no rona notísias husi Libéria kona-ba karreta neʼebé nakonu ho mate-isin, no ema tiru sira neʼebé kontra orden kona-ba oras atu labele sai husi uma.

Anne: Ami mak ema neʼebé kuidadu an tebes. Kuandu haʼu kiʼik, ema bolu haʼu “Anne taʼuk-teen”. Hakat estrada deʼit mós taʼuk! Maibé, ami deside metin atu toʼo iha Libéria.

Paul: Haʼu no Anne nia moris-fatin dook malu kilómetru ualu deʼit iha Inglaterra parte oeste. Ami hahú kedas pioneiru kuandu remata eskola sekundária tanba hetan anima husi haʼu-nia inan-aman no Anne nia inan. Sira apoia tebes ami atu serbí Jeová tempu-tomak. Haʼu komesa serbí iha Betel kuandu tinan 19, no bainhira ami kaben iha tinan 1982, Anne mós tama Betel.

Anne: Ami gosta Betel, maibé ami sempre hakarak atu serbí iha fatin neʼebé presiza liután haklaken-naʼin. Iha Betel, ami serbisu ho irmaun-irmán sira neʼebé uluk serbí nuʼudar misionáriu, no sira-nia ezemplu halo ami hakarak atu sai misionáriu. Ami halo orasaun kona-ba neʼe kalan-kalan durante tinan tolu. Ikusmai iha tinan 1985, ami hetan konvite atu tuir Eskola Gilead klase 79, no neʼe halo ami kontente! Ami hetan knaar atu serbí iha Libéria iha Áfrika Oeste.

Paul: Kuandu iha fali aviaun atu bá Libéria, ami saʼe kedas aviaun primeiru. Libéria nafatin iha orden kona-ba oras, no mós problema. Bainhira ema rona karreta nia lian iha  merkadu, neʼe halo sira pániku. Atu ami bele kalma nafatin, ami lee livru Salmo hamutuk kalan-kalan. Ami hadomi tebes ami-nia knaar maski hasoru situasaun difisil. Anne bá haklaken loroloron nuʼudar misionária, no haʼu serbí iha Betel hamutuk ho irmaun John Charuk. Haʼu aprende buat barak husi nia, tanba nia hela kleur iha Libéria no komprende irmaun-irmán sira-nia situasaun.

Anne: Ami laran-monu lalais ba Libéria tanba irmaun-irmán sira. Sira laran-diʼak, hanoin pozitivu, no laran-metin. Sira sai ami-nia belun no família. Sira fó konsellu neʼebé diʼak no anima ami. Serbisu haklaken mós kapás. Uma-naʼin sira gosta dada lia ho ami no lakohi ami fila lalais! Ema koʼalia kona-ba Bíblia iha fatin hotu. Fasil deʼit ba ami atu hakbesik ba sira no konversa. Tanba ami hetan estudante barak, susar ba ami atu estuda ho sira hotu. Neʼe mak fatin neʼebé furak tebes!

Paul: Ba tinan haat, ami moris ho dame. Maibé iha tinan 1989, funu sivíl komesa. Iha 2 Jullu 1990, sira neʼebé kontra governu komesa domina área besik Betel. Durante fulan tolu, ami labele kontaktu ema iha rai seluk, inklui ami-nia família no sede-jerál. Situasaun sai runguranga, hahán la iha, no ema estraga feto. Situasaun neʼe kontinua ba tinan 14, no fó impaktu boot ba Libéria tomak.

Anne: Suku ida funu hasoru suku seluk no oho malu. Ema neʼebé kaer armas mak laʼo tun-saʼe iha dalan, no foti sasán oioin husi uma ida-idak. Ba sira, oho ema mak hanesan oho manu. Sira halo pasa-revista iha fatin oioin no balu besik sukursál, no tau hamutuk mate-isin sira. Testemuña balu mate, inklui ami-nia belun misionáriu naʼin-rua.

Testemuña tau sira-nia moris iha perigu laran hodi subar maluk Testemuña husi suku seluk. Misionáriu no ema Betel mós halo nuneʼe. Betel simu Testemuña sira neʼebé halai husi sira-nia fatin. Sira balu toba iha andár primeiru, no balu toba iha kuartu iha andár segundu. Ami hamutuk ho família ida ho ema naʼin-hitu iha ami-nia kuartu.

Paul: Loroloron, ema koko tama Betel atu haree se ami subar ema ruma ka lae. Ami halo arranju atu ema naʼin-haat halo seguransa. Naʼin-rua hateke husi janela, no naʼin-rua bá hasoru ema iha portaun. Se naʼin-rua  iha portaun tau sira-nia liman iha oin, neʼe katak seguru. Maibé se sira-nia liman mak iha kotuk, neʼe katak perigu, no sira neʼebé haree husi janela bá lalais atu subar maluk sira.

Anne: Liutiha semana barak, mane lubun neʼebé hirus konsege tama iha Betel. Haʼu ho irmán ida halai tama hariis-fatin no xave odamatan. Hariis-fatin neʼe iha armáriu ida neʼebé iha fatin kiʼik ba ema ida bele subar. Irmán neʼe tama ba laran. Mane sira neʼebé lori kilat buka haʼu iha andár leten. Sira ho hirus tuku odamatan. Paul hatete: “Hein lai, haʼu-nia feen uza hela hariis-fatin.” Haʼu presiza taka fali fatin kiʼik neʼe no tau sasán oioin ba leten. Neʼe kria barullu no haʼu mós demora. Haʼu hatene mane sira-neʼe deskonfia haʼu, tan neʼe haʼu komesa nakdedar. Oinsá mak haʼu bele loke odamatan ho kondisaun hanesan neʼe? Haʼu halo orasaun no husu Jeová nia ajuda. Tuirmai haʼu loke odamatan no hasé sira ho kalma. Sira ida dudu haʼu, laʼo ba armáriu no loke, no hasai sasán hotu. Maibé nia la hetan ema ida. Sira bá fali kuartu seluk no revista iha kakuluk leten, maibé la hetan ema ida.

Paul: Ba fulan balu, ami ladún iha ai-han. Maibé ami iha ai-han espirituál. Adorasaun dadeer iha Betel mak ami-nia “matabixu”, no ami kontente tanba hetan forsa atu tahan.

Se ami sai husi Betel atu buka hahán no bee, ema bele mai oho irmaun-irmán sira neʼebé subar hela. Dala ruma Jeová fó buat neʼebé ami presiza iha tempu neʼebé loos iha dalan neʼebé haree hanesan milagre! Jeová sempre tau matan ami no ajuda ami atu kalma nafatin.

Situasaun sai aat liután, maibé lia-loos fó forsa no esperansa mai ami. Irmaun-irmán barak presiza halai beibeik atu salva sira-nia moris, maibé sira mantein sira-nia fiar no dignidade. Sira balu hatete katak tahan hasoru situasaun funu mak “treinu ba terus boot”. Katuas kongregasaun no irmaun joven sira ho aten-brani ajuda irmaun-irmán sira. Kuandu tenke halai, sira sempre hamutuk, haklaken iha fatin foun, no uza buat neʼebé sira iha atu prepara fatin ba reuniaun iha ai-laran. Reuniaun no haklaken halo sira hetan forsa atu tahan no la lakon esperansa. Bainhira ami fó ajuda umanitária, sira husu pasta haklaken duké husu roupa, no neʼe kona tebes ami-nia laran. Ema barak neʼebé hasoru ona terus oioin prontu atu rona ba lia-loos. Sira admira tebes kuandu haree Testemuña sira moris ho kontente no hanoin pozitivu. Sira mak hanesan naroman iha nakukun laran. (Mt 5:​14-16) Tanba Testemuña  hatudu laran-manas, ema balu neʼebé uluk hola parte iha funu mós tama lia-loos.

Paul: Dala ruma ami presiza husik Libéria, dala tolu ba tempu badak, no dala rua ba tinan ida tomak. Ami konkorda ho irmán misionária ida neʼebé hatete: “Iha Gilead, ita aprende atu fó laran tomak ba ita-nia knaar. Tan neʼe, bainhira ita husik irmaun-irmán sira, ita sente laran dodok!” Ami agradese tanba maski ami dook uitoan husi Libéria, maibé ami bele kontinua ajuda maluk sira iha neʼebá.

Anne: Iha Maiu 1996, ami naʼin-haat saʼe karreta Betel nian no lori dokumentu importante sira. Ami hakarak bá fatin neʼebé seguru liu, maizumenus dook kilómetru 16. Maibé iha dalan, ema ataka ami. Ema-lubun neʼebé lori kilat tiru saʼe ba leten, hapara ami, dada ami naʼin-tolu sai husi karreta, no sira hadau no lori tiha karreta neʼe maski Paul sei iha karreta laran. Ami hotu hakfodak no la hatene atu halo saida. Derrepente, ami haree Paulo laʼo mai ami ho reen-toos neʼebé raan. Ami hanoin ema tiru nia, maibé tuirmai ami rekoñese katak se ema tiru duni nia, nia labele laʼo! Ikusmai ami hatene katak mane ida tuku nia bainhira dudu nia sai husi karreta. Ami kontente tanba ninia kanek neʼe kiʼik deʼit.

Ami haree karreta militár nian neʼebé nakonu ho ema. Ami deside atu saʼe karreta neʼe, maibé ami tenke tabele deʼit. Xofér halai makaʼas tebes, tan neʼe ami besik monu. Ami husu nia atu para, maibé tanba nia taʼuk, nia lakohi para. Ikusmai ami toʼo iha fatin neʼebé seguru uitoan, maibé bainhira ami tun, ami hotu nakdedar tanba esperiénsia aat neʼe.

Paul: Ami naʼin-haat hateke ba malu. Ami-nia roupa foʼer no naklees, ami la fiar katak ami sei bele moris. Ami toba deʼit iha rai besik elikópteru neʼebé kona bala musan barak no haree hanesan aat ona, no loron tuirmai ami saʼe elikópteru neʼe atu bá Serra Leoa. Ami agradese tanba ami sei moris, maibé ami mós hanoin barak kona-ba irmaun-irmán sira iha Libéria.

Anne: Ami toʼo ho seguru iha Betel Serra Leoa, no irmaun-irmán sira tau matan didiʼak ami. Maibé akontesimentu aat sira komesa mosu beibeik iha haʼu-nia neon. Iha loron, haʼu sempre taʼuk katak buat aat sei akontese, no labele hanoin ho loloos. Haʼu sente buat hotu mak laʼós realidade. Iha kalan, haʼu hadeer hakfodak hela deʼit, kosar suli no nakdedar. Dada iis mós susar. Paul hakoʼak haʼu no halo orasaun hamutuk. Ami kanta ita-nia knananuk sira toʼo haʼu sai kalma fali. Haʼu hanoin haʼu sei bulak, no labele tan serbí nuʼudar misionária.

Haʼu nunka haluha buat neʼebé akontese tuirmai. Iha semana neʼe duni, ami simu revista rua. Ida mak Matan-moris bá! 8 Juñu 1996, neʼebé fó sai informasaun “Menghadapi Serangan Panik”. Agora haʼu komprende saida mak akontese mai haʼu. Revista tuirmai mak Livru Haklaken 15 Maiu 1996, neʼebé fó sai informasaun “Dari Manakah Mereka Mendapatkan kekuatan?” Livru Haklaken neʼe mós iha dezeñu borboleta neʼebé liras tohar. Informasaun neʼe esplika katak hanesan borboleta neʼebé bele kontinua buka ai-han no semo maski liras tohar, ita mós bele simu Jeová nia espíritu hodi bele kontinua ajuda ema seluk maski ita rasik hasoru susar. Liuhusi revista rua neʼe, Jeová fó forsa mai haʼu iha tempu neʼebé loos. (Mt 24:45) Haʼu mós buka informasaun seluk tan neʼebé ajuda haʼu. Nuʼudar tempu liu daudaun, haʼu-nia trauma sai menus ba beibeik.

Paul: Ami sempre kontente tebes kuandu fila ba Libéria. Ikusmai iha tinan 2004 nia rohan, ami hela iha Libéria besik tinan 20 ona. Funu mós remata. Irmaun sira halo  planu kona-ba konstrusaun iha sukursál. Maibé derrepente deʼit ami hetan knaar foun.

Neʼe susar tebes. Ami besik loos ho ami-nia família espirituál, tan neʼe ami lakohi husik sira. Maibé ami hanoin fali tempu neʼebé ami husik ami-nia família rasik atu bá Gilead, no oinsá Jeová haraik bensaun mai ami. Tan neʼe ami simu knaar atu serbí iha rai-Gana, besik Libéria.

Anne: Ami tanis beibeik kuandu atu husik Libéria. Maibé irmaun Frank neʼebé idade ona hatete: ‘Imi tenke haluha ami! Ami hatene imi nunka haluha ami, maibé imi tenke hadomi irmaun-irmán sira iha Gana ho laran tomak. Knaar neʼe husi Jeová, entaun imi tenke fokus ba sira.’ Liafuan neʼe ajuda ami atu sai prontu hodi hetan belun foun iha fatin foun.

Paul: Loloos, ami la presiza tempu kleur atu hadomi família foun iha Gana. Rai-Gana iha Testemuña barak tebes! Ami aprende buat barak husi sira-nia fiar no laran-metin. Ami serbí iha Gana ba tinan 13, no tuirmai buat neʼebé halo ami hakfodak akontese. Ami hetan knaar atu serbí iha sukursál Áfrika Leste iha Kénia. Maski ami triste atu husik belun sira, maibé ami hetan kedas belun foun iha Kénia. Hanesan iha Gana no Libéria, ami mós presiza halo buat barak iha Kénia.

Anne: Haʼu hasoru ona akontesimentu barak neʼebé halo haʼu trauma. Kuandu hasoru perigu no situasaun susar, neʼe fó impaktu ba ita-nia saúde fíziku no emosaun. Ita labele hein milagre atu hetan protesaun husi buat sira-neʼe. Toʼo agora, kuandu haʼu rona kilat tarutu, haʼu sente kabun moras no liman maten. Maibé haʼu aprende atu sadere ba Jeová nia ajuda, inklui ajuda husi irmaun-irmán sira. No hodi kaer metin ba ami-nia toman espirituál, Jeová ajuda ami atu kontinua halaʼo ami-nia knaar.

Paul: Dala ruma ema husu: “Imi hadomi imi-nia knaar ka lae?” Maski fatin ida mak furak, maibé situasaun bele troka no sai perigu. Tuir loloos, ami hadomi liu irmaun-irmán sira neʼebé sai hanesan ami-nia família. Maski ita-nia kultura no situasaun moris la hanesan, ita iha hanoin ida deʼit. Ami hanoin katak ami mak sei anima sira, maibé loloos sira mak anima ami.

Kuandu ami muda ba fatin foun, ami sempre haree milagre ida, neʼe mak ita-nia unidade. Kuandu ita sai parte ba kongregasaun, ita sempre iha família no uma iha fatin naran deʼit. Ami fiar metin katak se ami sadere ba Jeová, nia sei fó forsa mai ami tuir ami-nia presiza.—Flp 4:13.