ITA sente susar no baruk atu estuda Bíblia beibeik ka lae? Dala ruma ita hotu sente hanesan neʼe. Maibé hanoin toʼok kona-ba buat balu neʼebé ita halo beibeik. Porezemplu, ita hotu hariis beibeik. Ita presiza tempu no dala ruma sente baruk atu halo ida-neʼe, maibé kuandu hariis ona, ita sente fresku! Nuneʼe mós ho estuda Bíblia. Maromak nia liafuan mak hanesan “bee” neʼebé ita bele uza atu hamoos ita-nia an hodi sente fresku. (Éf 5:26) Haree toʼok sujestaun balu tuirmai:

• Halo planu. “Buat sira neʼebé importante liu” ba ema Kristaun mak inklui estudu pesoál. (Flp 1:10) Atu bele kumpre Ita-nia planu, diʼak atu taka Ita-nia oráriu iha fatin neʼebé fasil atu haree, hanesan iha kuadru ka jeleira. Ka Ita mós bele tau alarma atu fó-hanoin Ita antes Ita-nia oras atu estuda.

• Adapta tuir situasaun. Ita gosta atu estuda iha dalan oinsá? Karik Ita fokus liu kuandu estuda ba oras ida, ka karik Ita gosta liu atu estuda ba minutu balu maibé beibeik. Ema ida-idak la hanesan. Tan neʼe, adapta tuir Ita-nia situasaun. Se Ita baruk atu estuda, karik diʼak atu estuda ba minutu sanulu. Maski tempu badak deʼit, Ita bele aprende buat barak, no neʼe diʼak liu duké la estuda. Depois estuda tiha ba minutu sanulu, karik ita sei kontente atu estuda ba tempu kleur liután.—Flp 2:13.

• Deside nanis tópiku atu estuda. Se toʼo tempu atu estuda mak Ita foin hanoin kona-ba tópiku atu estuda, karik Ita la “uza didiʼak Ita-nia tempu”. (Éf 5:16) Tan neʼe, prepara nanis lista kona-ba informasaun ka tópiku neʼebé Ita hakarak estuda. Kuandu pergunta ruma mosu, hakerek ida-neʼe. Bainhira remata estuda, Ita bele hakerek ideia ka tópiku balu neʼebé Ita hakarak estuda iha tempu tuirmai.

• Halo mudansa tuir presiza. Diʼak mós atu fleksivel kona-ba Ita-nia planu. Ita bele halo mudansa kona-ba oras hira ka tópiku saida mak Ita sei estuda. Importante mak estuda semana-semana, laʼós loron saida ka oras hira, ka tópiku saida mak Ita estuda.

Ita sei hetan duni benefísiu se ita estuda beibeik. Neʼe sei ajuda ita atu hakbesik ba Jeová, halo desizaun diʼak, no sente kontente.—Jos 1:8.