LISAUN ESTUDU 44
KNANANUK 33 Entrega Ita-nia laran-susar ba Jeová
Oinsá atu tahan hasoru situasaun la justisa
“Keta husik buat aat manán imi, maibé kontinua halo buat diʼak hodi bele manán buat neʼebé aat.”—ROM 12:21.
OBJETIVU
Aprende oinsá atu tahan hasoru situasaun la justisa atu la halo problema sai boot liután.
1-2. Iha dalan saida deʼit mak dala ruma ema trata aat ita?
JESUS konta ai-knanoik kona-ba feto-faluk neʼebé husu beibeik juís ida atu bele hetan justisa. Dixípulu sira komprende didiʼak ai-knanoik neʼe tanba iha tempu neʼebá povu sempre hasoru situasaun la justisa. (Lc 18:1-5) Ita mós bele komprende ai-knanoik neʼe tanba ita hotu hasoru ona situasaun la justisa.
2 Ohin loron, mundu nakonu ho ema neʼebé todan ba sorin, diskrimina no hanehan ema seluk. Tan neʼe ita la hakfodak kuandu ema trata aat ita. (Ecle 5:8) Maibé, karik ita bele sente laran-kraik ka hakfodak kuandu ita-nia irmaun ka irmán ida trata aat ita. Tuir loloos neʼe bele akontese. Klaru, irmaun-irmán sira laʼós ema neʼebé kontra lia-loos, sira mak sala-naʼin deʼit. Ita bele aprende buat barak husi Jesus nia reasaun kona-ba situasaun la justisa. Se ita bele hatudu pasiénsia ba ema neʼebé trata aat ita, neʼe katak ita presiza hatudu pasiénsia liután ba maluk fiar-naʼin sira! Entaun, Jeová sente oinsá bainhira ema husi kongregasaun laran ka liʼur trata aat ita? Nia interese ba buat neʼebé akontese ka lae?
3. Tanbasá ita fiar katak Jeová interese ba situasaun la justisa neʼebé ita hasoru?
3 Jeová interese duni ba ninia atan neʼebé hasoru situasaun la justisa. “Jeová hadomi justisa.” (Sal 37:28) Jesus hatete katak Jeová sei “halo [ema] hetan justisa lalais” iha tempu neʼebé loos. (Lc 18:7, 8) No lakleur tan, Jeová sei halakon ita-nia susar no situasaun hotu neʼebé la justisa.—Sal 72:1, 2.
4. Oinsá mak Jeová kontinua ajuda ita?
4 Nuʼudar ita hein ba tempu neʼebé Jeová rezolve problema hotu, nia mós kontinua ajuda ita atu tahan hasoru susar. (2 Ped 3:13) Nia hanorin ita oinsá atu la hatudu hahalok la diʼak bainhira ema trata aat ita. Liuhusi ninia Oan, Jeová fó ita ezemplu neʼebé perfeitu kona-ba oinsá atu tahan hasoru situasaun la justisa. No nia mós fó konsellu husi Bíblia atu ita bele aplika.
KUIDADU KONA-BA ITA-NIA REASAUN
5. Tanbasá ita presiza kuidadu kona-ba ita-nia reasaun ba situasaun la justisa?
5 Kuandu hasoru situasaun la justisa, neʼe bele halo ita laran-kanek no laran-susar. (Ecle 7:7) Fiar-naʼin sira hanesan Job no Habakuk mós sente hanesan neʼe. (Job 6:2, 3; Hab 1:1-3) Neʼe mak sentimentu neʼebé normál. Maibé ita presiza kuidadu kona-ba ita-nia reasaun hodi ita la halo buat neʼebé beik.
6. Absalão nia ezemplu hanorin saida mai ita? (Haree mós dezeñu.)
6 Kuandu ema trata aat ita ka ema neʼebé ita hadomi, karik ita hakarak vinga fali ema neʼe. Maibé neʼe bele halo situasaun sai aat liután. Hanoin toʼok ezemplu husi Liurai David nia oan Absalão. Bainhira ninia alin Amnon neʼebé husi inan la hanesan mak estraga ninia alin-feto Tamar, Absalão sai hirus tebes. Tuir Moisés nia Ukun-Fuan, Amnon merese hetan kastigu-mate. (Lev 20:17) Maski la sala ba Absalão atu sai hirus, maibé nia la iha direitu atu oho Amnon.—2 Sam 13:20-23, 28, 29.
Absalão la kontrola ninia hirus bainhira ninia alin-feto Tamar sai vítima ba abuzu seksuál (Haree parágrafu 6)
7. Hakerek-naʼin ba salmo sente oinsá bainhira haree situasaun neʼebé la justisa?
7 Kuandu ita haree ema aat sira la hetan kastigu, neʼe bele halo ita hanoin katak saugati deʼit atu halo buat neʼebé loos. Porezemplu, hakerek-naʼin ida ba salmo haree katak ema diʼak hasoru susar no ema aat goza moris. Nia dehan: “Sira mak ema aat neʼebé sempre moris diʼak.” (Sal 73:12) Tanba hanoin barak kona-ba situasaun la justisa, neʼe halo nia komesa hanoin katak nia serbí Jeová saugati deʼit. Nia dehan: “Bainhira haʼu koko atu komprende ida-neʼe, neʼe halo haʼu neon-susar tebes.” (Sal 73:14, 16) Nia mós hatete: “Kona-ba haʼu, haʼu-nia ain besik atu laʼo sala dalan; haʼu-nia hakat sira besik atu sidi.” (Sal 73:2) Situasaun hanesan neʼe mós akontese ba irmaun ida naran Alberto. a
8. Oinsá mak hahalok la justisa afeta irmaun ida?
8 Ema duun matak Alberto katak nia naʼok kongregasaun nia osan. Neʼe halo nia lakon ninia knaar nuʼudar katuas kongregasaun, no irmaun-irmán sira neʼebé hatene problema neʼe la respeitu tan nia. Kona-ba tempu neʼebá, nia hatete: “Haʼu laran-kanek no laran-kraik.” Alberto husik ninia sentimentu hirus afeta ninia relasaun ho Jeová no la tuir reuniaun ba tinan lima. Esperiénsia neʼe hatudu katak se ita la kontrola hirus bainhira hasoru situasaun la justisa, neʼe bele afeta ita-nia relasaun ho Jeová.
BANATI-TUIR JESUS NIA EZEMPLU
9. Jesus tahan hasoru situasaun saida deʼit? (Haree mós dezeñu.)
9 Jesus fó ezemplu perfeitu kona-ba oinsá atu tahan situasaun la justisa. Hanoin toʼok susar saida deʼit mak Jesus hetan husi ninia família no ema seluk. Ninia família rasik hatete katak nia bulak ona, ulun-naʼin relijiaun sira duun katak nia hetan kbiit husi anju aat sira, no soldadu Roma goza nia, halo violénsia, no oho nia. (Mc 3:21, 22; 14:55; 15:16-20, 35-37) Maski nuneʼe, Jesus tahan buat sira-neʼe hotu no la vinga sira. Ninia ezemplu neʼe hanorin saida mai ita?
Jesus fó ezemplu neʼebé perfeitu kona-ba oinsá atu tahan situasaun la justisa (Haree parágrafu 9-10)
10. Oinsá Jesus tahan hasoru situasaun la justisa? (1 Pedro 2:21-23)
10 Lee 1 Pedro 2:21-23. b Jesus fó ezemplu neʼebé perfeitu atu ita halo tuir kuandu hasoru situasaun la justisa. Nia hatene bainhira mak atu nonook no koʼalia. (Mt 26:62-64) Bainhira ema duun nia, dala ruma nia la koʼalia buat ida. (Mt 11:19) Maibé kuandu nia koʼalia, nia la insulta ka ameasa kontradór sira. Jesus kontrola an tanba nia “entrega ninia an ba Ida neʼebé tesi-lia tuir justisa”. Jesus hatene katak importante liu mak Jeová nia hakarak, laʼós ninian. Nia fiar katak Jeová sei hadiʼa situasaun la justisa hotu iha tempu neʼebé loos.
11. Oinsá mak ita bele kontrola ita-nia liafuan? (Haree mós foto.)
11 Kuandu hasoru situasaun la justisa, ita bele halo tuir Jesus nia ezemplu hodi kontrola ita-nia liafuan. Se problema mak kiʼik, diʼak liu husik deʼit, ka la koʼalia buat ruma atu problema neʼe la sai boot. (Ecle 3:7; Tgo 1:19, 20) Maibé, dala ruma ita presiza duni atu koʼalia kuandu ema trata aat ema ruma, ka kuandu defende buat neʼebé loos. (Após 6:1, 2) Maibé bainhira koʼalia, ita presiza hakaʼas an atu kalma nafatin no hatudu respeitu.—1 Ped 3:15. c
Kuandu ita hasoru situasaun la justisa, ita bele banati-tuir Jesus hodi kuidadu kona-ba bainhira no oinsá atu koʼalia (Haree parágrafu 11-12)
12. Oinsá ita bele tau fiar tomak ba “Ida neʼebé tesi-lia tuir justisa”?
12 Ita mós bele banati-tuir Jesus hodi tau fiar tomak ba “Ida neʼebé tesi-lia tuir justisa”. Kuandu ema seluk hanoin sala kona-ba ita ka trata aat ita, ita fiar metin katak Jeová hatene buat hotu neʼebé akontese. Neʼe bele ajuda ita atu tahan tanba hatene katak Jeová sei hadiʼa problema hotu. Kuandu ita husik buat hotu ba Jeová nia liman, ita sei la rai hirus ka odi ema. Se ita hirus nafatin, neʼe bele book ita atu hatudu hahalok la diʼak, halakon ksolok, no mós bele estraga ita-nia relasaun ho Jeová.—Sal 37:8.
13. Saida mak bele ajuda ita atu kontinua tahan?
13 Klaru, ita hotu sei nunka bele halo tuir Jesus nia ezemplu ho perfeitu. Dala ruma, ita koʼalia ka halo buat neʼebé ikusmai ita arrepende. (Tgo 3:2) No dala ruma situasaun la justisa bele fó impaktu ba ita-nia saúde fíziku no emosaun no ita presiza tahan ida-neʼe ba tempu kleur. Se Ita mós hasoru situasaun hanesan neʼe, hanoin-hetan katak Jeová hatene buat hotu neʼebé Ita hasoru. No Jesus mós komprende Ita-nia sentimentu tanba nia rasik hasoru ona situasaun la justisa. (Ebr 4:15, 16) Jeová fó ona Jesus nia ezemplu neʼebé perfeitu, maibé laʼós neʼe deʼit, nia mós fó konsellu husi Bíblia atu ajuda ita tahan. Agora mai ita haree versíkulu rua husi livru Roma.
‘HUSIK BA MAROMAK NIA HIRUS’
14. ‘Husik ba Maromak nia hirus’ katak sá? (Roma 12:19)
14 Lee Roma 12:19. Apóstolu Paulo anima ema Kristaun atu husik situasaun la justisa ba “Maromak nia hirus”. Neʼe katak husik Jeová mak lori justisa tuir ninia tempu no ninia hakarak. Irmaun ida naran John neʼebé hasoru situasaun la justisa tinan barak liubá hatete: “Haʼu presiza kontrola makaʼas haʼu-nia hakarak atu hadiʼa situasaun tuir haʼu-nia dalan. Eskritura iha Roma 12:19 ajuda haʼu atu hein ba Jeová ho pasiénsia.”
15. Tanbasá diʼak liu hein ba Jeová atu hadiʼa problema?
15 Ita hetan benefísiu bainhira hein ba Jeová atu hadiʼa problema neʼebé mosu. Se ita halo nuneʼe, ita sei la sai estrese tanba la koko atu rezolve problema neʼe ho ita-nia kbiit rasik. Jeová oferese ajuda mai ita, neʼe hanesan nia dehan: ‘Entrega neʼe mai haʼu. Haʼu mak sei rezolve.’ Se ita tau fiar ba Jeová nia promesa neʼebé dehan “Haʼu sei selu fali”, neʼe sei ajuda ita atu la rai hirus tanba hatene katak Jeová sei hadiʼa situasaun neʼe iha dalan neʼebé diʼak liu. Neʼe mak buat neʼebé ajuda irmaun John. Nia dehan: “Se haʼu hein ba Jeová atu rezolve haʼu-nia problema, rezultadu sei sai diʼak liu.”
“KONTINUA HALO BUAT DIʼAK HODI BELE MANÁN BUAT NEʼEBÉ AAT”
16-17. Oinsá orasaun bele ajuda ita atu “kontinua halo buat diʼak hodi bele manán buat neʼebé aat”? (Roma 12:21)
16 Lee Roma 12:21. Paulo mós anima ema Kristaun atu “kontinua halo buat diʼak hodi bele manán buat neʼebé aat”. Iha Diskursu iha Foho, Jesus hatete: “Hadomi nafatin imi-nia inimigu no harohan ba ema neʼebé haterus imi.” (Mt 5:44) No nia halo nuneʼe duni. Karik Ita hanoin-hetan tempu neʼebé soldadu Roma prega Jesus iha ai-riin. Ema trata Jesus iha dalan neʼebé aat no nia sente moras tebes. Susar atu imajina kona-ba terus neʼebé Jesus sente.
17 Jesus la husik buat aat manán nia. Duké husu ninia Aman atu fó kastigu ba soldadu sira, nia hatete: “Aman, perdua sira bá, tanba sira la hatene buat neʼebé sira halo.” (Lc 23:34) Bainhira ita halo orasaun kona-ba ema neʼebé trata aat ita, neʼe bele ajuda ita sente kalma no iha hanoin pozitivu kona-ba ema neʼe.
18. Oinsá mak orasaun ajuda Alberto no John?
18 Orasaun ajuda ona irmaun naʼin-rua neʼebé temi iha lisaun neʼe. Alberto hatete: “Haʼu halo orasaun kona-ba sira neʼebé trata aat haʼu. Dala barak haʼu husu Jeová atu ajuda haʼu husik deʼit problema neʼebé mosu.” Ikusmai, Alberto serbí fali Jeová ho laran-metin. John mós hatete: “Dala barak haʼu halo orasaun kona-ba irmaun neʼebé hakanek haʼu-nia laran. Neʼe ajuda haʼu atu fó perdua duké tesi-lia, no haʼu sente dame iha laran.”
19. Saida mak ita presiza halo toʼo mundu neʼe nia rohan? (1 Pedro 3:8, 9)
19 Toʼo mundu neʼe nia rohan, situasaun la justisa bele mosu no afeta ita. Maski hasoru susar naran deʼit, mai ita kontinua halo orasaun hodi husu Jeová nia ajuda. No mai ita halo tuir Jesus nia ezemplu no kontinua aplika Bíblia nia prinsípiu. Hodi halo nuneʼe, ita bele fiar katak Jeová sei haraik bensaun mai ita.—Lee 1 Pedro 3:8, 9.
KNANANUK 38 Nia sei halo ó forsa
a Laʼós naran neʼebé loos.
b Iha 1 Pedro kapítulu 2 no 3, Pedro koʼalia kona-ba situasaun susar balu neʼebé ema Kristaun hasoru, porezemplu husi patraun neʼebé la hanoin atan, ka laʼen neʼebé fiar la hanesan.—1 Ped 2:18-20; 3:1-6, 8, 9.
c Haree vídeo iha jw.org Oinsá domin lori dame neʼebé loos.
