Jeová hametin haklaken-naʼin sira neʼebé badinas. Durante tinan neʼe, kolportór ka pioneiru aumenta husi 225 ba 350. No ba dala primeiru, haklaken-naʼin hamutuk 8.000 liu mak entrega relatóriu haklaken ba sede-jerál. Jeová haraik bensaun ba sira hodi book ema barak simu lia-loos.

Iha loron 21 Marsu 1920, irmaun Joseph F. Rutherford neʼebé dirije Estudante Bíblia hatoʼo diskursu ho títulu “Ema rihun ba rihun neʼebé moris agora sei nunka mate”. Estudante Bíblia sira hakaʼas an atu konvida ema sira neʼebé interese atu tuir eventu neʼe. Sira aluga salaun neʼebé luan tebes iha sidade Novaiorke no sira mós fahe konvite hamutuk 320.000.

Komunidade simu konvite neʼe ho diʼak. Rona-naʼin sira hamutuk naʼin-5.000 liu halo nakonu fatin neʼe no ema naʼin-7.000 labele tama tanba fatin la toʼo. Livru Haklaken bolu ida-neʼe nuʼudar “reuniaun neʼebé susesu liu hotu husi Estudante Bíblia Internasionál”.

Ema koñese Estudante Bíblia tanba fó sai katak “ema rihun ba rihun neʼebé moris agora sei nunka mate”. Iha tempu neʼebá, sira la komprende katak lia-loos kona-ba Maromak nia Ukun tenke habelar liután. Maski nuneʼe, sira nafatin laran-manas. Irmán naran Ida Olmstead neʼebé komesa tuir reuniaun iha tinan 1902 hatete: “Ami hatene katak Jeová sei haraik bensaun barak ba ema no ami nunka para atu fó sai ida-neʼe ba ema sira neʼebé ami hasoru bainhira haklaken.”

Atu Jeová nia povu bele iha nafatin ai-han espirituál, irmaun-irmán sira iha Betel komesa print rasik publikasaun balu. Sira sosa no monta ekipamentu iha fatin neʼebé sira aluga iha 35 Myrtle Avenue, Brooklyn, Novaiorke, neʼebé ladún dook husi uma Betel.

Irmaun Leo Pelle no Walter Kessler komesa serbí iha Betel iha fulan-Janeiru tinan 1920. Irmaun Walter konta: “Kuandu ami toʼo, irmaun neʼebé tau matan serbisu atu print hatete: ‘Imi iha deʼit oras ida ho balu toʼo tempu han-meiudia.’ Nia haruka ami atu lori livru barak husi andár kraik liu.”

Irmaun Leo konta kona-ba buat neʼebé akontese iha loron tuirmai: “Haʼu no Walter hetan knaar atu hamoos didin sira iha andár  primeiru husi fatin neʼe. Neʼe mak serbisu neʼebé foʼer liu hotu. Maibé tanba ida-neʼe mak knaar husi Maromak, haʼu hafolin ida-neʼe.”

La toʼo semana balu deʼit, irmaun-irmán sira ho laran-manas print Livru Haklaken. No sira print Livru Haklaken 1 Fevereiru 1920 hamutuk kópia 60.000 iha andár segundu. Iha tempu hanesan, iha andár kraik liu, irmaun sira monta mákina print nian neʼebé hanaran Battleship. Sira mós komesa print livru The Golden Age edisaun 14 Abríl 1920. Klaru katak Jeová haraik bensaun ba serbisu-naʼin sira-neʼe.

Jeová nia povu neʼebé laran-metin komesa haklaken fali ho laran-manas no ho unidade. Maibé iha Estudante Bíblia balu neʼebé husik tiha organizasaun durante tempu susar husi tinan 1917 toʼo 1919. Saida mak ajuda Estudante Bíblia iha tempu neʼebá?

Livru Haklaken 1 Abríl 1920, fó sai informasaun ho títulu “Hela hamutuk ho unidade”. Neʼe hatete: “Ita bele fiar duni katak . . . ema ida-idak neʼebé simu ona espíritu santu husi Naʼi . . . prontu atu haluha buat hotu neʼebé liu ona, . . . atu hela hamutuk ho unidade no serbisu hamutuk nuʼudar isin ida deʼit.”

Estudante Bíblia barak halo tuir konsellu neʼe. Feen-laʼen ida hakerek: “Ami rekoñese katak ami sala tanba para atu haklaken durante tinan ida maski ema seluk nafatin kontinua haklaken. . . . Ami espera katak ami sei nunka laʼo sees fali husi Jeová nia organizasaun.” Ema Kristaun sira-neʼe iha serbisu barak atu halo.

Iha 21 Juñu 1920, Estudante Bíblia komesa halaʼo kampaña atu fahe “ZG” ka livru The Finished Mystery. * Kuandu governu bandu livru neʼe iha tinan 1918, irmaun-irmán sira rai kópia barak husi livru neʼe.

 Haklaken-naʼin hotu, laʼós deʼit pioneiru sira hetan konvite atu hola parte iha serbisu neʼe. Iha Juñu 1920 livru Bulletin hatete: “Ema ida-idak neʼebé hetan ona batizmu no bele hola parte tenke halo ida-neʼe ho kontente.” Irmaun sira hetan anima atu tau uluk serbisu atu fahe ZG. Irmaun Edmund Hooper konta katak ba ema barak, kampaña neʼe mak dala primeiru ba sira atu haklaken husi uma ba uma. Nia hatutan: “Ami komesa haree katak serbisu neʼe habelar lalais liu fali buat neʼebé ami imajina.”

Durante Funu Mundiál Primeiru, susar ba Estudante Bíblia sira iha nasaun oioin atu komunika ba malu, tan neʼe irmaun Rutherford hakarak anima irmaun-irmán sira-neʼe no arranja fali serbisu haklaken. Iha 12 Agostu 1920, nia no irmaun naʼin-haat halo viajen ba rai-Bretaña, Europa, no Médiu Oriente.

Bainhira irmaun Rutherford vizita rai-Bretaña, Estudante Bíblia halaʼo reuniaun boot tolu no reuniaun hamutuk 12. Ema hotu neʼebé tuir mak hamutuk maizumenus naʼin-50.000. Livru Haklaken esplika kona-ba vizita neʼe hodi hatete: “Maluk Kristaun sira hetan kmaan no laran-manas. Sira ransu hamutuk, serbisu hamutuk no neʼe halo sira kontente.” Iha sidade París, irmaun Rutherford hatoʼo tan diskursu ho títulu “Ema rihun ba rihun neʼebé moris agora sei nunka mate”. Kuandu nia komesa ninia diskursu, salaun neʼe nakonu tebes. Ema naʼin-atus tolu husu atu hetan informasaun liután.

Iha semana tuirmai, irmaun balu bá vizita Atenas, Kairu, no Jeruzalein. Irmaun Rutherford organiza sukursál iha sidade Ramallah atu bele ajuda ema neʼebé interese atu hatene liután, no fatin neʼe la dook husi sidade Jeruzalein. Tuirmai nia fila fali ba Europa no organiza sukursál iha Europa Sentrál no halo arranju atu print publikasaun iha neʼebá.

Iha fulan-Setembru 1920, Estudante Bíblia fó sai revista The Golden Age No. 27, no neʼe fó sai informasaun espesiál kona-ba oinsá ema fó-terus ba Estudante Bíblia durante tinan 1918. Mákina print nian neʼebé hanaran Battleship kontinua print revista neʼe loron no kalan, no halo kópia hamutuk millaun haat liu.

Lee-naʼin sira mós aprende kona-ba kazu úniku husi irmán Emma Martin. Nia mak kolportór ka pioneiru iha San Bernardino, Kalifórnia.  Iha loron 17 Marsu 1918, nia no irmaun naʼin-tolu, Edward Hamm, Edward J. Sonnenburg, no Ernest A. Stevens, tuir reuniaun hamutuk ho Estudante Bíblia.

Mane ida mós tuir reuniaun neʼe, maibé ninia objetivu laʼós atu estuda Bíblia. Mane neʼe fó sasin: “Haʼu tuir enkontru neʼe . . . tanba Prokuradór Jerál mak haruka. Haʼu tuir enkontru neʼe atu halibur evidénsia.” No nia hatete katak nia hetan “evidénsia” neʼebé nia buka, neʼe mak kópia husi The Finished Mystery. Loron balu liutiha, ema kaer irmán Emma no irmaun naʼin-tolu neʼe, no duun katak sira fahe livru neʼebé governu bandu.

Juís fó sai katak Emma no ninia maluk sira mak sala no sira presiza tama komarka ba tinan tolu. Iha loron 17 Maiu 1920, sira tenke tama komarka tanba labele lori tan kazu neʼe ba tribunál rekursu. Maibé lakleur deʼit situasaun troka.

Iha 20 Juñu 1920, irmaun Rutherford temi sira-nia esperiénsia iha reuniaun boot iha San Francisco. No rona-naʼin sira la kontente ho dalan neʼebé ema trata ema Kristaun sira-neʼe, tan neʼe sira hakerek mensajen badak ba prezidente Estadus Unidus. Sira hakerek: “Tuir ami-nia hanoin . . . desizaun neʼebé tribunál halo kona-ba señora Emma . . . mak la justu . . . Governu uza sira-nia kbiit atu lasu . . . señora Emma . . . atu bele hatama nia ba komarka, hahalok neʼe mak aat tebes.”

Loron tuirmai, Prezidente Woodrow Wilson haruka atu hasai irmán Emma no irmaun Edward Hamm, Edward Sonnenburg, no Ernest Stevens husi komarka. Sira-nia terus remata.

Bainhira tinan 1920 besik atu remata, Estudante Bíblia haree ona akontesimentu oioin neʼebé halo sira kontente. Serbisu iha sede-jerál mós aumenta ba beibeik, no ema Kristaun neʼebé loos kontinua fó sai katak Maromak nia Ukun deʼit mak bele rezolve ema nia problema. (Mt 24:14) Iha tinan 1921, serbisu haklaken aumenta liután.