1. Ema barak hanoin oinsá kona-ba matadalan matenek husi Bíblia? (Provérbios 1:20, 21)

 IHA rai barak, irmaun-irmán sira hamriik iha fatin públiku no fahe publikasaun sira. Ita mós haklaken ona iha dalan hanesan neʼe ka lae? Karik neʼe halo Ita hanoin kona-ba eskritura iha Provérbios neʼebé koʼalia kona-ba matenek hakilar makaʼas iha fatin públiku atu ema bele rona ba matadalan. (Lee Provérbios 1:20, 21.) Ita bele hetan “matenek neʼebé loos” ka Jeová nia matenek husi Bíblia no mós ita-nia publikasaun sira. Ema presiza tebes matenek neʼe atu bele moris ba nafatin. Ita kontente bainhira ema ida simu ita-nia publikasaun sira. Maibé ema balu lakohi simu. Sira la interese atu aprende kona-ba Bíblia. Ema seluk hamnasa ita. Sira hanoin katak Bíblia mak livru neʼebé antigu. Sira kritika Bíblia nia hanorin kona-ba morál no hanoin katak ema sira neʼebé halo tuir Bíblia nia matadalan mak ema neʼebé la hatudu laran-diʼak no gosta atu kritika ema. Maibé Jeová kontinua hatudu domin hodi fó sai ninia matenek ba ema hotu. Oinsá?

2. Ohin loron, iha neʼebé mak ita bele hetan matenek neʼebé loos, maibé ema barak hili liu atu halo saida?

² Dalan ida mak liuhusi ninia Liafuan Bíblia. Ema tradús ona Bíblia ba língua oioin. Oinsá ho ita-nia publikasaun? Ita agradese ba Jeová tanba agora ita bele hetan publikasaun sira-neʼe iha língua 1.000 liu. Ema sira neʼebé lee no aplika buat neʼebé sira aprende sei hetan benefísiu. Maibé ema barak liu deside atu lakohi rona ba Jeová. Bainhira atu halo desizaun ruma, sira hili liu atu sadere ba sira-nia an rasik ka rona ba ema seluk nia konsellu. Karik sira la respeitu ita tanba ita hili atu halo tuir Bíblia nia matadalan.  Iha lisaun neʼe, ita sei aprende tanbasá sira halo nuneʼe. Primeiru, mai ita koʼalia kona-ba oinsá ita bele hetan matenek husi Jeová.

3. Oinsá atu hetan matenek neʼebé loos?

³ Matenek bele refere ba abilidade atu uza ita-nia koñesimentu hodi halo desizaun neʼebé diʼak. Maibé matenek neʼebé loos envolve buat seluk tan. Bíblia hatete: “Hamtaʼuk Jeová mak hakat primeiru atu bele hetan matenek, no koñesimentu kona-ba Maromak neʼebé Santu Liu Hotu mak sei fó kbiit atu komprende.” (Prov 9:10) Entaun buka-hatene Jeová nia hanoin bainhira ita presiza halo desizaun neʼebé importante. Ita bele halo nuneʼe hodi estuda Bíblia no publikasaun sira neʼebé bazeia ba Bíblia. Neʼe ajuda ita atu hatudu matenek neʼebé loos.—Prov 2:5-7.

4. Tanbasá só Jeová deʼit mak bele fó matenek neʼebé loos mai ita?

⁴ Só Jeová deʼit mak bele fó ita matenek neʼebé loos. (Rom 16:27) Tanbasá Jeová mak Hun ba matenek? Primeiru, Jeová mak Kriadór no nia hatene buat hotu kona-ba ninia kriatura sira. (Sal 104:24) Segundu, buat hotu neʼebé Jeová halo hatudu sai ninia matenek. (Rom 11:33) Terseiru, Jeová nia konsellu sempre lori benefísiu ba ema neʼebé halo tuir ida-neʼe. (Prov 2:10-12) Se ita hakarak atu iha matenek neʼebé loos, ita tenke simu lia-loos báziku sira-neʼe no husik neʼe dirije ita-nia hahalok no desizaun sira.

5. Rezultadu saida mak ema hetan bainhira sira lakohi rekoñese katak Jeová mak Hun ba matenek?

⁵ Ema barak neʼebé ita hasoru bainhira haklaken konkorda katak natureza mak furak tebes, maibé sira hatete katak la iha Kriadór ida. Sira seluk hatete katak sira fiar ba Maromak, maibé sira hanoin katak Bíblia nia hanorin mak tuan ona no sira deside atu moris tuir deʼit sira-nia hakarak. Neʼe lori rezultadu saida? Rezultadu mak situasaun iha mundu sai aat liu tanba ema sadere deʼit ba sira-nia matenek rasik duké ba Maromak. Ema la hetan kontente neʼebé loos no la iha esperansa ba futuru. Entaun ita bele haree katak liafuan sira tuirmai mak loos: “Matenek, kbiit atu tetu didiʼak, no mós konsellu, sei la iha folin se buat sira-neʼe kontra Jeová.” (Prov 21:30) Neʼe motiva ita atu kontinua husu Jeová atu fó ninia matenek neʼebé loos mai ita. Triste mak ema barak lakohi halo ida-neʼe. Tanbasá?

6. Tuir Provérbios 1:22-25, sé-sé deʼit mak lakohi rona ba Jeová nia matenek?

⁶ Ema barak lakohi rona bainhira matenek “hakilar makaʼas iha dalan”. Tuir Bíblia, iha ema grupu tolu neʼebé lakohi simu matenek, neʼe mak ‘ema neʼebé la iha esperiénsia’, “gozadór sira” no mós ‘ema neʼebé beik’. (Lee Provérbios 1:22-25.) Mai ita buka-hatene tanbasá ema sira-neʼe lakohi rona ba Maromak nia matenek no saida mak ita bele halo atu la sai hanesan sira.

7. Tanbasá ema balu hili atu kontinua sai ‘ema neʼebé la iha esperiénsia’?

⁷ ‘Ema neʼebé la iha esperiénsia’ mak ema neʼebé tau fiar ba liafuan hotu no fasil deʼit atu monu ba lia-bosok. (Prov 14:15) Ita hasoru beibeik ema hanesan neʼe bainhira haklaken. Hanoin toʼok ema millaun ba millaun neʼebé tau  fiar ba lia-bosok husi ulun-naʼin relijiaun no ukun-naʼin sira. Ema balu hakfodak tebes bainhira hatene katak ulun-naʼin sira-neʼe bosok sira. Maibé ema sira neʼebé temi iha Provérbios 1:22 hili atu kontinua sai ema neʼebé la iha esperiénsia tanba sira gosta ida-neʼe. (Jer 5:31) Sira halo tuir deʼit sira-nia hakarak no lakohi aprende Bíblia nia hanorin ka lakohi halo tuir Bíblia nia ukun-fuan. Ema barak sente hanesan feto relijiozu ida iha rai-Kanadá neʼebé dehan ba Testemuña ida: “Se ami-nia ulun-naʼin relijiaun bosok duni ami, neʼe sira-nia sala, laʼós ami-nia sala!” Ita lakohi duni halo tuir ema sira hanesan neʼe.—Prov 1:32; 27:12.

8. Saida mak sei ajuda ita atu hetan matenek?

⁸ Tan neʼe mak Bíblia anima ita atu la kontinua sai ema neʼebé la iha esperiénsia, maibé atu aumenta ita-nia “kbiit atu komprende”. (1 Kor 14:20) Ita bele hetan matenek hodi aplika Bíblia nia prinsípiu sira. Se ita halo nuneʼe, ita sei haree oinsá Bíblia ajuda ita atu hasees an husi problema no halo desizaun neʼebé matenek. Diʼak atu hanoin fali desizaun neʼebé ita halo ona. Se ita estuda Bíblia no tuir reuniaun ona ba tempu balu, karik diʼak atu husu ba ita-nia an tanbasá ita seidauk deside atu dedika an ba Jeová no hetan batizmu. Se ita batizmu ona, ita hakaʼas an aumenta ita-nia matenek atu haklaken no hanorin Bíblia ka lae? Ita-nia desizaun sira hatudu katak ita aplika Bíblia nia prinsípiu ka lae? Ita trata ema hanesan Jesus trata ema seluk ka lae? Se ita presiza halo mudansa ruma, diʼak atu hanoin kleʼan kona-ba Jeová nia matadalan neʼebé halo “ema neʼebé la iha esperiénsia sai matenek”.—Sal 19:7.

9. Oinsá “gozadór sira” hatudu katak sira lakohi rona ba Jeová nia matenek?

⁹ Ema grupu segundu neʼebé lakohi rona ba Maromak nia matenek mak “gozadór sira”. Bainhira haklaken, dala ruma ita hasoru ema hanesan neʼe. Sira gosta atu goza ema seluk. (Sal 123:4) Bíblia hatete katak iha loron ikus sira, sei mosu gozadór barak. (2 Ped 3:3, 4) Hanesan Lot nia mane-foun sira, ohin loron ema balu la tau atensaun ba Maromak nia avizu. (Gén 19:14) Ema barak goza sira neʼebé halo tuir Bíblia nia prinsípiu. Gozadór sira halo ida-neʼe tanba hakarak halo tuir “sira-nia hakarak rasik hodi halo buat neʼebé aat”. (Jud 7, 17, 18) Apóstata sira-nia hahalok no ema sira neʼebé lakohi rona ba Jeová nia hahalok mak hanesan duni ho buat neʼebé Bíblia hatete kona-ba gozadór sira.

10. Tuir Salmo 1:1, saida mak ita bele halo atu la sai hanesan gozadór sira?

¹⁰ Saida mak ita presiza halo atu la sai hanesan gozadór sira? Dalan ida mak keta ransu ho ema neʼebé kritika buat hotu. (Lee Salmo 1:1.) Neʼe katak ita sei la rona ka lee buat ruma husi apóstata sira. Ita rekoñese katak se ita la kuidadu, ita bele sai toman atu kritika no mós komesa duvida kona-ba Jeová no matadalan neʼebé ita simu husi ninia organizasaun. Atu bele hasees an husi hahalok neʼe, husu ba ita-nia an: ‘Haʼu sempre kritika matadalan no esplikasaun foun ka lae? Haʼu sempre buka sala husi ema sira neʼebé dirije Jeová nia povu ka lae?’ Se ita hapara kedas toman aat sira-neʼe, Jeová sei kontente ho ita.—Prov 3:34, 35.

11. ‘Ema neʼebé beik’ hanoin oinsá kona-ba Jeová nia prinsípiu kona-ba morál?

¹¹ Ema grupu terseiru neʼebé lakohi  rona ba Jeová nia matenek mak ‘ema neʼebé beik’. Sira beik tanba lakohi moris tuir Maromak nia ukun-fuan kona-ba morál. Sira halo deʼit buat neʼebé loos tuir sira-nia hanoin. (Prov 12:15) Ema hanesan neʼe lakohi simu Jeová, Hun ba matenek. (Sal 53:1) Bainhira ita hasoru ema sira hanesan neʼe iha serbisu haklaken, baibain sira kritika makaʼas ita tanba ita halo tuir Bíblia nia prinsípiu sira. Maibé sira mós labele ajuda ita atu iha moris neʼebé diʼak liu. Bíblia hatete: “Ema beik labele hetan matenek neʼebé loos; nia la iha liafuan ida atu fó sai iha sidade nia portaun.” (Prov 24:7) Ema neʼebé beik la iha konsellu neʼebé matenek. Tan neʼe mak Jeová fó avizu mai ita atu “hadook an husi ema beik”!—Prov 14:7.

12. Saida mak bele ajuda ita atu la halo tuir ema neʼebé beik?

¹² Ita la hanesan ho sira neʼebé odi Maromak nia konsellu. Ita aprende atu hadomi Maromak nia hanoin, inklui ninia matadalan sira kona-ba morál. Ita bele aumenta liután ita-nia domin liuhusi kompara rezultadu husi ema neʼebé halo tuir no ema neʼebé la halo tuir Maromak nia matadalan. Haree didiʼak problema saida deʼit mak ema hasoru bainhira lakohi rona ba Maromak nia konsellu neʼebé matenek. Tuirmai hanoin kona-ba oinsá ita iha moris neʼebé diʼak liu tanba halo tuir Maromak.—Sal 32:8, 10.

13. Jeová obriga ita atu halo tuir ninia konsellu ka lae? Esplika toʼok.

¹³ Jeová oferese ninia matenek ba ema hotu, maibé nia la obriga ema atu simu ida-neʼe. Maski nuneʼe, nia fó sai konsekuénsia neʼebé ema bele hetan se sira lakohi rona ba ninia matenek. (Prov 1:29-32) Ema sira neʼebé hili atu la halo tuir Jeová sei “lori todan kona-ba sira-nia hahalok”. Sira sei hetan susar no terus tanba dalan neʼebé sira halaʼo moris no ikusmai Jeová sei halakon sira. Maibé Maromak promete ba ema sira neʼebé rona ba ninia konsellu neʼebé matenek no aplika ida-neʼe hodi dehan: “Ema neʼebé rona haʼu sei moris hakmatek no la sente taʼuk kona-ba susar sira.”—Prov 1:33.

14-15. Ita aprende saida husi Provérbios 4:23?

¹⁴ Bainhira ita aplika Maromak nia matenek, ita sempre hetan benefísiu. Ita aprende ona katak Jeová nia matenek fasil deʼit atu hetan. Porezemplu, iha livru Provérbios, Jeová fó konsellu barak neʼebé sempre bele ajuda ita. Mai ita haree ezemplu haat kona-ba konsellu neʼebé matenek.

¹⁵ Proteje Ita-nia laran. Bíblia hatete: “Proteje bá ó-nia laran, neʼe mak buat importante liu hotu neʼebé ó tenke proteje, tanba ó-nia moris depende ba ó-nia  laran.” (Prov 4:23) Hanoin toʼok kona-ba saida mak ita presiza halo atu proteje ita-nia fuan. Ita presiza han ai-han neʼebé saudavel, halo ezersísiu beibeik, no hadook an husi toman neʼebé la diʼak. Atu proteje ita-nia laran, ita mós presiza halo buat neʼebé atu hanesan. Loroloron ita presiza han ai-han espirituál husi Bíblia. Ita prepara, asiste no fó komentáriu iha reuniaun sira. Ita nafatin ativu hodi hakaʼas an haklaken beibeik. No ita hadook an husi toman neʼebé la diʼak hodi hasees an husi buat neʼebé bele hafoʼer ita-nia neon, hanesan atividade halimar nian neʼebé la morál no mós ransu neʼebé la diʼak.

16. Tanbasá Provérbios 23:4, 5 diʼak ba ita?

¹⁶ Kontente ho buat neʼebé Ita iha. Bíblia fó konsellu: “Keta halo kole ó-nia an atu hetan rikusoin. . . . Bainhira ó hateke ba rikusoin, neʼe la iha ona, tanba rikusoin neʼe sei iha liras hanesan manu-makikit no semo ba lalehan.” (Prov 23:4, 5) Osan no rikusoin fasil deʼit atu lakon. Maski nuneʼe, ema riku no mós ema kiak hanoin barak demais kona-ba buka osan. Ida-neʼe mak baibain book sira atu halo buat neʼebé bele estraga sira-nia naran diʼak, sobu sira-nia relasaun, no estraga saúde. (Prov 28:20; 1 Tim 6:9, 10) Maibé matenek ajuda ita atu la hanoin demais kona-ba osan. Ida-neʼe sei ajuda ita atu la sai kaan-teen no kontente ho buat neʼebé ita iha.—Ecle 7:12.

17. Tuir Provérbios 12:18, oinsá ita bele uza ita-nia nanál ho matenek?

¹⁷ Hanoin uluk antes koʼalia. Se ita la kuidadu, ita-nia liafuan bele halo ema laran-kanek. Bíblia hatete: “Liafuan neʼebé koʼalia sai hodi la hanoin uluk mak hanesan sona ho surik, maibé ema matenek nia nanál mak bele kura.” (Prov 12:18) Ita haburas dame bainhira ita la gosip kona-ba ema seluk nia fraku. (Prov 20:19) Se ita hakarak ita-nia liafuan atu fó kmaan ba ema laʼós atu hakanek sira-nia laran, ita presiza lee no hanoin kleʼan beibeik kona-ba Bíblia.  (Lc 6:45) Bainhira ita halo nuneʼe, ita-nia liafuan bele fó kmaan ba ema seluk.—Prov 18:4.

18. Oinsá Provérbios 24:6 ajuda ita iha serbisu haklaken?

¹⁸ Halo tuir matadalan husi organizasaun. Bíblia oferese konsellu neʼebé bele ajuda ita: “Ho matadalan neʼebé matenek mak ó sei halo ó-nia funu, no ho konsellu-naʼin barak mak ó sei hetan susesu.” (Prov 24:6, nota) Oinsá aplika eskritura neʼe bele ajuda ita atu haklaken no hanorin ho diʼak liután? Duké halo tuir deʼit ita-nia toman, koko atu halo tuir sujestaun neʼebé ita hetan husi organizasaun. Ita simu matadalan matenek iha reuniaun sira liuhusi diskursu no aprezentasaun sira no neʼe bele treinu ita. Jeová nia organizasaun mós prepara publikasaun no vídeo sira neʼebé bele ajuda ema atu komprende Bíblia. Klaru katak Ita hakarak atu uza didiʼak buat sira-neʼe.

19. Ita sente oinsá kona-ba matenek neʼebé Jeová fó ba ita? (Provérbios 3:13-18)

¹⁹ Lee Provérbios 3:13-18. Ita agradese tebes ba konsellu diʼak neʼebé ita hetan husi Bíblia. Matenek husi Jeová mak folin-boot tebes. Iha lisaun neʼe, ita haree ona ezemplu balu kona-ba konsellu diʼak husi livru Provérbios. Klaru katak Bíblia nakonu ho konsellu diʼak husi Jeová. Mai ita hakaʼas an atu aplika Bíblia nia konsellu. Ema barak iha mundu la hafolin Maromak nia matenek, maibé ita iha konfiansa katak “ema neʼebé kontinua kaer metin ba matenek sei sai kontente”.