Irmaun sira iha tempu neʼebá serbisu ona ba tinan ida liu atu harii estasaun rádiu WBBR iha Illa Staten, Novaiorke. Depois tesi tiha ai-hun sira, sira harii uma boot ida nuʼudar irmaun sira-nia hela-fatin, no uma ida tan nuʼudar estúdiu. Tuirmai, sira hahú monta ekipamentu sira. Maibé sira hasoru problema balu.

Irmaun sira presiza monta antena boot neʼebé naruk metru 91, no harii ai-riin rua ho metru 61 atu suporta antena neʼe. Bainhira koko ba dala primeiru, sira la susesu. Maibé sira tau fiar ba Jeová nia ajuda, no ikusmai hetan susesu. Irmaun Calvin Prosser neʼebé serbisu iha projetu neʼe hatete: “Se ami susesu kedas bainhira koko ba dala primeiru, karik ami sei orgullu ba ami-nia an no hatete: ‘Haree toʼok buat neʼebé ami halo!’” Irmaun sira fó hahiʼi ba Jeová hodi rekoñese Ninia ajuda. Maibé sira mós hasoru problema seluk tan.

Iha tempu neʼebá, rádiu mak teknolojia foun, tan neʼe la fasil atu sosa ekipamentu oioin neʼebé presiza. Entaun, sira sosa ekipamentu neʼebé ema monta ho simples atu tranzmite lian. Sira mós uza parte husi telefone baibain duké sosa mikrofone. Kalan ida iha fulan-Fevereiru, sira deside atu koko ekipamentu neʼe atu buka-hatene se buat hotu laʼo diʼak ka lae. Sira presiza programa ida atu fó sai iha rádiu, tan neʼe sira kanta ita-nia knananuk balu. Irmaun Ernest Lowe konta esperiénsia komik ida kona-ba tempu neʼebá. Bainhira sira kanta hela, sira simu telefone husi Juís Rutherford, b  neʼebé rona sira-nia kanta liuhusi ninia rádiu iha Brooklyn, dook maizumenus kilómetru 25.

Irmaun Rutherford hatete: “Keta barullu. Imi-nia kanta rona hanesan busa nia lian!” Irmaun sira sente moe no taka kedas ekipamentu. Maibé sira kontente tanba hatene katak sira-nia ekipamentu prontu ona atu fó sai programa primeiru.

Iha 24 Fevereiru 1924, durante programa ofisiál primeiru husi rádiu, irmaun Rutherford dedika estasaun rádiu neʼe “atu halaʼo serbisu neʼebé apoia Mesias nia ukun”. Nia hatete katak objetivu ba estasaun neʼe mak “atu ajuda ema komprende Bíblia no hatene katak ita moris daudaun iha tempu importante”.

Programa primeiru iha rádiu hetan susesu boot. Durante tinan 33 Jeová nia organizasaun uza estasaun WBBR atu hatoʼo mensajen neʼebé importante.

Iha Jullu 1924, Estudante Bíblia halaʼo reuniaun boot iha Columbus, Ohio. Estudante Bíblia husi mundu tomak halibur hamutuk, no rona diskursu sira iha língua Alemaun, Arabi, Fransés, Gregu, Inglés, Italianu, Lituanu, Polonés, Rusu, Ukranianu, Úngaru, no língua balu iha área Eskandinávia. Ema neʼebé la tuir reuniaun boot neʼe mós bele rona programa balu liuhusi rádiu, no irmaun sira arranja ona ho jornál lokál ida atu fó sai informasaun kona-ba reuniaun boot neʼe.

Iha loron-kinta, 24 Jullu, ema naʼin-5.000 liu neʼebé tuir reuniaun boot hola parte atu haklaken. Sira fahe livru besik 30.000 no hahú estudu Bíblia rihun ba rihun. Livru Haklaken hatete katak neʼe mak “loron neʼebé kontente liu durante reuniaun boot neʼe”.

Parte kapás seluk ba reuniaun boot neʼe mak programa iha loron-sesta, 25 Jullu, bainhira irmaun Rutherford lee ho aten-brani deklarasaun ida atu kontra ulun-naʼin sira. Deklarasaun neʼe hakerek hanesan dokumentu legál, no fó sai katak ulun-naʼin polítiku, relijiaun, no negósiu-naʼin sira hanetik povu atu aprende kona-ba dalan neʼebé  Maromak uza atu haraik bensaun ba ema. Irmaun Rutherford mós fó sai sira-nia sala tanba tau fiar ba Liga Nasoins nuʼudar “Maromak nia dalan atu ukun mundu”. Estudante Bíblia sira presiza aten-brani atu fahe fali deklarasaun neʼe ba ema.

Kona-ba rezultadu husi reuniaun boot, Livru Haklaken dehan: “Naʼi nia tropa kiʼik neʼebé halibur iha Reuniaun Boot iha Columbus fila fali ho fiar metin . . . , neʼe halo sira aten-brani liután atu haklaken maski ema kontra.” Irmaun Leo Claus neʼebé tuir reuniaun boot neʼe hatete: “Bainhira ami fila husi reuniaun neʼe, ami sente laran-manas atu fahe deklarasaun neʼe iha ami-nia área.”

Iha fulan-Outubru, Estudante Bíblia komesa fahe panfletu Ecclesiastics Indicted, neʼebé fó sai irmaun Rutherford nia deklarasaun husi reuniaun boot. Iha knua kiʼik ida naran Cleveland, iha Oklahoma, irmaun Frank Johnson fahe ona panfletu iha ninia haklaken-fatin no presiza hein ba minutu 20 atu irmaun sira tula nia. Maibé nia labele hamriik deʼit iha fatin neʼe tanba mane balu hirus no buka hela nia. Irmaun Frank deside atu subar iha igreja neʼebé besik. Tanba igreja neʼe mamuk, nia rai lalais panfletu Ecclesiastics Indicted iha pastór nia Bíblia no tuur-fatin ida-idak no sai husi igreja. Nia sei iha tempu balu tan, entaun nia tama igreja rua tan hodi halo buat neʼebé hanesan.

Ikusmai Frank fila lalais ba fatin neʼebé nia tenke hein irmaun sira seluk. Nia subar iha pertamina kotuk, no hafuhu mane sira neʼebé buka hela nia. Mane sira-neʼe nia karreta liu, maibé sira la haree nia. Lakleur, irmaun sira neʼebé haklaken besik área neʼe mai tula Frank, no sira sai husi fatin neʼe.

Irmaun ida neʼebé saʼe karreta neʼe hatete: “Bainhira sai husi área neʼe, ami liu igreja tolu. Iha igreja ida-idak nia oin, maizumenus ema naʼin-50 mak hamriik. Sira balu lee hela panfletu, no balu hatudu ida-neʼe ba pastór. Ami konsege halai sees antes problema mosu! Ami agradese ba Jeová tanba proteje ami no fó matenek atu la hetan problema husi ema neʼebé kontra Maromak nia Ukun.”

Estudante Bíblia iha nasaun seluk mós haklaken ho aten-brani. Iha Fransa nia parte norte, irmaun Józef Krett haklaken ba ema husi Polónia neʼebé serbisu atu keʼe fatuk. Nia planu atu hatoʼo diskursu ho títulu “Lakleur tan ema mate sei moris hiʼas fali”. Bainhira irmaun-irmán sira fahe konvite ba ema iha knua neʼe, amlulik ida mós bandu ema iha ninia igreja atu bá rona diskursu neʼe. Maibé rezultadu mak amlulik neʼe halo ema barak liután hakarak rona. Ikusmai ema naʼin-5.000 liu mak bá rona diskursu neʼe, inklui amlulik neʼe rasik! Irmaun Krett konvida amlulik neʼe atu defende ninia fiar, maibé nia lakohi. Irmaun Krett fahe livru hotu neʼebé nia iha, no rekoñese katak ema sira-neʼe hamrook ba Maromak nia Liafuan.—Amós 8:11.

Iha Áfrika, irmaun Claude Brown lori liafuan diʼak ba Kosta do Ouro, neʼebé agora rai-Gana. Ninia diskursu no livru sira neʼebé nia fahe ajuda habelar lia-loos ho lalais iha área neʼe. John Blankson, neʼebé eskola hela kona-ba farmásia, rona ba irmaun Brown nia diskursu ida no rekoñese kedas katak nia  hetan ona lia-loos. John dehan: “Haʼu kontente tebes ho lia-loos neʼebé haʼu hetan, no haʼu koʼalia kona-ba neʼe ba ema barak iha eskola.”

John komprende ho klaru katak Bíblia la hanorin doutrina Trindade. Tan neʼe, loron ida, nia bá hasoru igreja Anglikana nia amlulik atu husu kona-ba neʼe. Amlulik neʼe sai hirus no hakilar nia: “Ó laʼós ema Kristaun, ó mak Diabu nia atan. Sai husi neʼe!”

Bainhira John fila ba uma, nia hakerek karta hodi konvida amlulik atu defende doutrina Trindade iha ema barak nia oin. Amlulik haruka fali John atu bá hasoru mestre ida neʼebé iha pozisaun boot iha ninia eskola. Mestre neʼe husu John se nia hakerek duni karta ba amlulik ka lae.

John hatán: “Sin, mestre.”

Mestre haruka John hakerek karta ba amlulik atu husu deskulpa. Tan neʼe John hakerek:

“Señór, mestre haruka haʼu atu hakerek karta hodi husu deskulpa, no haʼu prontu halo ida-neʼe só deʼit se Ita rekoñese katak doutrina neʼebé Ita hanorin mak la loos.”

Mestre hakfodak no husu ba John: “Ó atu hakerek hanesan neʼe ka?”

“Sin mestre. Mak neʼe deʼit, tanba haʼu la halo sala ida.”

“Ó tenke sai husi eskola neʼe. Oinsá mak ó brani koʼalia hasoru amlulik husi relijiaun neʼebé governu apoia no iha tempu hanesan ó hakarak sai funsionáriu?”

“Maibé mestre, kuandu Ita hanorin buat ruma no ami la komprende, ami husu pergunta, loos ka lae?”

“Sin, loos.”

“Entaun mestre, neʼe mak buat neʼebé akontese. Amlulik neʼe hanorin Bíblia, no haʼu husu pergunta. Se nia labele fó resposta, tanbasá haʼu presiza husu deskulpa?”

Ikusmai John la presiza sai husi eskola, no la presiza hakerek karta atu husu deskulpa.

Kona-ba atividade iha tinan 1924, Livru Haklaken dehan: “Ita bele hatete duni hanesan ho David: ‘Ita sei fó haʼu kbiit atu halo funu.’ (Salmo 18:39) Tinan neʼe mak kapás tebes, tanba ita haree Maromak nia ajuda . . . Ninia atan sira haklaken ho haksolok.”

Iha tinan 1924 nia rohan, irmaun sira halo planu atu aumenta haklaken liuhusi rádiu. Sira komesa projetu atu harii estasaun rádiu ida tan besik Chicago, Estadus Unidus. Sira hanaran estasaun neʼe WORD, neʼebé signifika “Liafuan”. Iha tempu neʼebá, sira konsege sosa ekipamentu neʼebé diʼak liu, neʼebé bele hatoʼo programa ba fatin neʼebé dook tebes, inklui Kanadá.

Iha tinan 1925, Jeová ajuda Estudante Bíblia atu komprende liután Apokalipse kapítulu 12. Neʼe halo ema balu sidi, maibé ema barak simu kumpriensaun foun kona-ba buat neʼebé akontese iha lalehan no oinsá neʼe fó impaktu ba Maromak nia povu iha mundu.