Dala ruma Ita sente susar atu hanoin-hetan buat neʼebé Ita foin aprende ka lae? Neʼe akontese ba ita hotu. Saida mak bele ajuda? Halo revizaun ba pontu importante.

Kuandu Ita estuda, diʼak atu para uitoan no hanoin kona-ba buat neʼebé Ita foin aprende. Haree toʼok oinsá apóstolu Paulo ajuda ema neʼebé lee ninia karta atu halo nuneʼe. Nia hakerek: “Ida-neʼe mak pontu importante.” (Ebr 8:1) Hodi hatete hanesan neʼe, Paulo ajuda lee-naʼin sira atu komprende buat neʼebé nia hanorin, no oinsá mak pontu neʼebé nia fó sai liga ho pontu seluk neʼebé nia koʼalia ona.

Antes remata estudu, Ita bele fahe tempu uitoan, porezemplu uza minutu sanulu atu halo revizaun kona-ba pontu importante neʼebé Ita foin estuda. Se Ita labele hanoin-hetan, haree fali subtítulu ka fraze neʼebé importante. Baibain fraze importante mak fraze primeiru iha parágrafu ida-idak. Se Ita foin aprende buat foun ruma, koko toʼok atu esplika ida-neʼe ho Ita-nia liafuan rasik. Kuandu Ita halo revizaun ba pontu importante, neʼe sei ajuda Ita atu la haluha, no mós atu komprende oinsá Ita bele aplika informasaun neʼe iha Ita-nia moris.