LISAUN ESTUDU 43
KNANANUK 90 Fó laran-manas ba malu
Oinsá atu halakon dúvida
“Buka-hatene uluk buat hotu se neʼe mak loos ka lae.”—1 TES 5:21.
OBJETIVU
Buka-hatene oinsá atu halakon dúvida neʼebé bele fó impaktu ba ita-nia serbisu ba Jeová.
1-2. (a) Dala ruma Jeová nia povu duvida kona-ba saida? (b) Iha lisaun neʼe, ita sei aprende saida?
ITA hotu dala ruma sente dúvida a maski ita mak joven ka idade. Porezemplu, hanoin toʼok kona-ba haklaken-naʼin joven ida neʼebé duvida hela se Jeová hanoin duni nia ka lae, no neʼe halo nia dada an atu hetan batizmu. Ezemplu seluk mak kona-ba irmaun ida neʼebé uluk deside atu tau uluk Jeová nia serbisu duké buka rikusoin. Agora nia idade ona no sente susar atu tau matan ba ninia família, tan neʼe nia duvida se ninia desizaun uluk nian mak matenek ka lae. Ka hanoin toʼok kona-ba irmán ferik ida neʼebé ladún iha ona forsa. Nia sente laran-kraik tanba labele halo buat neʼebé uluk nia halo. Oinsá ho Ita? Karik Ita mós husu pergunta hanesan: ‘Jeová hanoin duni haʼu ka lae? Sakrifísiu sira neʼebé haʼu halo ba Jeová iha folin duni ka lae? Jeová nafatin uza haʼu ka lae?’
2 Se ita la buka resposta ba pergunta sira-neʼe, neʼe bele halo ita-nia fiar sai fraku. Iha lisaun neʼe, ita sei haree oinsá mak Bíblia nia prinsípiu sira bele ajuda ita bainhira ita duvida katak (1) Jeová hanoin ita, (2) ita-nia desizaun uluk nian mak matenek, ka (3) Jeová nafatin uza ita.
OINSÁ ATU HALAKON ITA-NIA DÚVIDA
3. Saida mak ita bele halo atu halakon ita-nia dúvida?
3 Dalan ida atu halakon ita-nia dúvida mak hodi buka Maromak nia Liafuan neʼebé hatán ba ita-nia pergunta. Se ita halo nuneʼe, ita-nia fiar ba Jeová no relasaun belun ho nia sei sai metin liu no ita bele ‘kaer metin ba ita-nia fiar’.—1 Kor 16:13.
4. Oinsá mak ita bele “buka-hatene uluk buat hotu”? (1 Tesalónika 5:21)
4 Lee 1 Tesalónika 5:21. Bíblia anima ita atu “buka-hatene uluk buat hotu”. Oinsá ita bele halo nuneʼe? Bainhira ita duvida kona-ba buat ruma, ita presiza buka-hatene saida mak Bíblia hatete kona-ba neʼe. Porezemplu, hanoin toʼok kona-ba joven ida neʼebé duvida katak nia iha folin ba Jeová. Diʼak ka lae se nia husik deʼit ninia dúvida neʼe? Lae, nia presiza “buka-hatene uluk buat hotu” hodi bele komprende Jeová nia hanoin kona-ba neʼe.
5. Oinsá mak ita bele “rona” Jeová hatán ba ita-nia pergunta?
5 Kuandu ita lee Maromak nia Liafuan, ita “rona” Jeová koʼalia mai ita. Maibé atu hetan resposta ba ita-nia pergunta neʼebé espesífiku, la toʼo atu lee liu deʼit Bíblia. Ita presiza buka-hatene no aprende kona-ba eskritura sira neʼebé bele ajuda ita hatán ba ita-nia pergunta. Ita bele halo peskiza kona-ba pontu neʼe hodi uza ekipamentu sira neʼebé Jeová nia organizasaun fó. (Prov 2:3-6) Ita mós presiza halo orasaun atu husu Jeová nia ajuda hodi bele hetan resposta. Tuirmai, ita bele buka Bíblia nia prinsípiu no informasaun neʼebé bele aplika ba ita-nia situasaun. Karik ita mós bele hetan benefísiu hodi lee istória husi Bíblia kona-ba ema neʼebé hasoru situasaun hanesan ho ita.
6. Oinsá mak reuniaun bele ajuda ita halakon ita-nia dúvida?
6 Ita mós “rona” Jeová koʼalia mai ita bainhira tuir reuniaun sira. Se ita tuir beibeik reuniaun, ita bele rona pontu balu liuhusi diskursu ka ema ruma nia komentáriu neʼebé hatán ba ita-nia pergunta. (Prov 27:17) Mai ita haree oinsá ita bele halakon ita-nia dúvida balu.
BAINHIRA DUVIDA KATAK JEOVÁ HANOIN ITA
7. Karik ema balu husu pergunta saida?
7 Dala ruma Ita husu pergunta hanesan: ‘Jeová hanoin duni haʼu ka lae?’ Se Ita sente la iha folin, karik neʼe halo Ita hanoin katak Ita labele habelun ho Kriadór ba universu neʼe. Liurai David mós karik hanoin hanesan neʼe. Kuandu nia hanoin kona-ba Jeová neʼebé iha kbiit boot bele hanoin ema, nia admira tebes, no husu: “Oh Jeová, ema iha folin saida hodi Ita haree ba nia? Ema iha folin saida hodi Ita tau atensaun ba nia?” (Sal 144:3) Iha neʼebé mak Ita bele hetan resposta ba pergunta neʼe?
8. Tuir 1 Samuel 16:6, 7, 10-12, Jeová haree saida husi ema?
8 Ita aprende husi Bíblia katak Jeová haree ba sira neʼebé ema seluk la hafolin. Porezemplu, Jeová haruka Samuel bá Jessé nia uma atu hili ninia oan-mane ida atu sai Izraél nia liurai iha futuru. Jessé bolu ninia oan-mane naʼin-hitu atu hasoru Samuel, maibé nia la bolu ninia oan ikun David. b Maski nuneʼe, Jeová hili David. (Lee 1 Samuel 16:6, 7, 10-12.) Jeová haree didiʼak David nia laran, no hatene katak joven neʼe hadomi tebes Nia.
9. Tanbasá Ita bele fiar metin katak Jeová hanoin Ita? (Haree mós foto.)
9 Hanoin toʼok oinsá Jeová hatudu ona katak nia hanoin duni Ita. Nia fó ba Ita matadalan neʼebé kona Ita-nia situasaun. (Sal 32:8) Neʼe prova katak nia hatene Ita ho didiʼak. (Sal 139:1) Kuandu Ita aplika Jeová nia matadalan no haree oinsá neʼe ajuda Ita, Ita sei fiar metin katak Jeová hanoin Ita. (1 Krón 28:9; Após 17:26, 27) Jeová haree Ita-nia hakaʼas an no hahalok diʼak sira, no neʼe book nia atu hakarak habelun ho Ita. (Jer 17:10) Nia sei kontente tebes se Ita mós hakarak sai ninia belun.—1 João 4:19.
‘Se ó buka Jeová, ó sei hetan nia.’—1 Krón 28:9 (Haree parágrafu 9) c
BAINHIRA DUVIDA KATAK ITA-NIA DESIZAUN ULUK NIAN MAK MATENEK
10. Bainhira hanoin kona-ba ita-nia desizaun uluk nian, karik neʼe bele hamosu pergunta saida?
10 Karik ema ida hanoin kona-ba desizaun neʼebé nia halo iha tempu uluk no duvida kona-ba ninia desizaun. Karik nia husik ona serbisu ho saláriu diʼak, ka deside atu husik ninia negósiu hodi bele serbí Jeová liután. Maibé nuʼudar tempu liu daudaun, karik tinan barak liu ona, nia haree ninia família ka kolega sira agora iha osan barak no haree hanesan moris diʼak tanba halo desizaun neʼebé la hanesan. Karik neʼe halo nia hanoin: ‘Sakrifísiu neʼebé haʼu halo ba Jeová iha folin duni ka lae? Ka diʼak liu uluk haʼu serbisu deʼit hodi bele rai osan barak?’
11. Hakerek-naʼin ba Salmo 73 iha hanoin negativu saida?
11 Se pergunta hanesan neʼe mosu iha Ita-nia neon, haree toʼok saida mak Salmo 73 hatete. Hakerek-naʼin ba salmo neʼe haree katak ema seluk goza moris, iha saúde diʼak, no la hasoru problema. (Sal 73:3-5, 12) Nuʼudar nia nota katak sira-nia moris haree hanesan susesu, nia sente katak ninia hakaʼas an atu serbí Jeová mak saugati deʼit. Hanoin negativu neʼe halo nia “hetan susar loron tomak”. (Sal 73:13, 14) Oinsá mak nia bele halakon ninia hanoin neʼe?
12. Tuir Salmo 73:16-18, oinsá mak hakerek-naʼin ba salmo halakon ninia hanoin negativu?
12 Lee Salmo 73:16-18. Ema neʼebé hakerek salmo neʼe tama ba Jeová nia fatin santu neʼebé nakonu ho dame. Iha fatin neʼe, nia bele hanoin ho loloos. Nia komprende katak maski ema seluk haree hanesan moris diʼak, maibé sira la iha esperansa ba futuru. Hodi hanoin hanesan neʼe, nia bele sente dame iha laran, tanba rekoñese katak tau uluk Jeová mak desizaun neʼebé diʼak liu hotu. Rezultadu mak nia deside metin atu kontinua serbí Jeová.—Sal 73:23-28.
13. Oinsá mak Ita bele sente dame se Ita duvida kona-ba Ita-nia desizaun iha tempu uluk? (Haree mós foto.)
13 Hanesan ema neʼebé hakerek Salmo 73, ita mós bele sente dame. Oinsá? Hanoin kona-ba buat diʼak neʼebé Ita iha ona, inklui Jeová nia bensaun, no hanoin-hetan katak ema neʼebé la serbí Jeová la hetan ninia ajuda. Ba sira, buka rikusoin mak buat neʼebé importante liu tanba sira la iha esperansa ba futuru. Maibé ba Ita rasik, Jeová promete atu haraik bensaun neʼebé barak liu fali buat neʼebé Ita imajina. (Sal 145:16) Tuir loloos, ita labele hatene ho klaru ita-nia moris agora mak oinsá se ita halo desizaun la hanesan iha tempu uluk. Maibé, ita hatene katak bainhira ita halo desizaun tanba domin ba Maromak no ema seluk, ita sempre iha moris neʼebé kontente.
Hanoin kona-ba bensaun sira neʼebé Jeová promete ona (Haree parágrafu 13) d
BAINHIRA DUVIDA KATAK JEOVÁ NAFATIN UZA ITA
14. Ema balu hasoru situasaun saida, no karik sira husu pergunta saida?
14 Jeová nia povu balu labele halo buat barak neʼebé sira hakarak tanba idade, moras, ka situasaun susar ruma. Karik neʼe halo sira sente katak sira la iha folin ba Jeová. Karik sira husu: ‘Jeová nafatin uza haʼu ka lae?’
15. Hakerek-naʼin ba Salmo 71 fiar metin kona-ba saida?
15 Hakerek-naʼin ba Salmo 71 mós iha sentimentu neʼebé hanesan. Nia halo orasaun: “Keta husik hela haʼu bainhira haʼu-nia forsa lakon ona.” (Sal 71:9, 18) Maibé nia kontinua fiar katak se nia serbí Jeová ho laran-metin, Jeová sei dirije no apoia nia. Jeová kontente ho ema neʼebé hakaʼas an atu serbí nia maski iha limitasaun oioin.—Sal 37:23-25.
16. Oinsá Jeová nafatin uza sira neʼebé idade ona? (Salmo 92:12-15)
16 Se Ita mak idade ona, hanoin toʼok kona-ba oinsá Jeová haree Ita. Nia bele ajuda Ita serbí nia ho laran-metin maski Ita iha limitasaun oioin. (Lee Salmo 92:12-15.) Duké fokus ba buat neʼebé Ita labele halo ona, fokus deʼit ba buat neʼebé Ita bele halo. Porezemplu, Ita bele hametin ema seluk liuhusi Ita-nia ezemplu kona-ba laran-metin no hatudu domin ba sira. Ita bele fó-hatene ema seluk oinsá Jeová apoia ona Ita ba tinan barak no koʼalia kona-ba Bíblia nia promesa neʼebé Ita hein namanas. No mós hanoin-hetan katak Ita-nia orasaun ba ema seluk mak iha kbiit boot. (1 Ped 3:12) Maski hasoru situasaun naran deʼit, ita hotu iha duni buat ruma atu fó ba Jeová no ema seluk.
17. Tanbasá ita labele kompara ita-nia an ho ema seluk?
17 Se Ita sente estrese tanba labele halo buat barak ba Jeová, fiar bá katak nia hafolin buat naran deʼit neʼebé Ita halo ba nia. Karik Ita komesa kompara buat neʼebé Ita halo ho buat neʼebé ema seluk halo. Keta halo nuneʼe! Jeová la kompara Ita ho ema seluk. (Gal 6:4) Porezemplu, Maria fó mina-morin neʼebé karun tebes ba Jesus. (João 12:3-5) Maibé feto-faluk ida fó osan-besi rua neʼebé folin kiʼik nuʼudar kontribuisaun iha templu. (Lc 21:1-4) Jesus la kompara feto naʼin-rua neʼe, maibé nia gaba sira-nia fiar. Jesus banati-tuir ninia Aman ho perfeitu. Tan neʼe ita bele iha konfiansa katak Jeová hafolin duni buat neʼebé ita halo tanba ita fiar no hadomi nia maski buat neʼebé ita fó mak kiʼik deʼit tuir ita-nia haree.
18. Saida mak bele ajuda ita atu halakon ita-nia dúvida? (Haree mós kaixa “ Jeová nia Liafuan bele ajuda Ita halakon Ita-nia dúvida”.)
18 Ita hotu dala ruma sente dúvida. Maibé hanesan ita aprende ona, Bíblia bele ajuda ita atu halakon hanoin neʼebé negativu. Tan neʼe, hakaʼas an atu halakon ita-nia dúvida, tanba neʼe sei ajuda ita atu iha konfiansa. Jeová hatene didiʼak ita ida-idak. Nia hafolin Ita-nia sakrifísiu no sei fó kolen ba Ita. Fiar bá katak Jeová hanoin no hadomi ninia atan hotu neʼebé laran-metin.
KNANANUK 111 Iha razaun barak atu haksolok
a ESPLIKASAUN BA FRAZE: Liafuan dúvida neʼebé ita koʼalia iha lisaun neʼe laʼós dúvida kona-ba ita-nia fiar ba Jeová ka ninia promesa sira. Maibé neʼe kona-ba dúvida katak ita iha folin ba Jeová ka lae, ka desizaun neʼebé uluk ita halo mak matenek ka lae.
b Maski Bíblia la fó-hatene David nia tinan bainhira Jeová hili nia, maibé karik iha tempu neʼebá nia seidauk toʼo tinan 20.—Haree Livru Haklaken 1 Outubru 2011, p. 27, par. 2.
