MÚZIKA mak parte importante ba ema Izraél antigu nia kultura. Iha Bíblia, eskritura barak temi kona-ba toka instrumentu múzika no kanta. Tuir loloos, maizumenus porsentu sanulu husi Bíblia mak knananuk. Porezemplu, liafuan iha livru Salmo, Salomão nia Knananuk, no Lamentasaun mak knananuk atu ema kanta. Referénsia ida kona-ba ema Izraél iha tempu antigu hatete katak Bíblia fó sai klaru oinsá ema Izraél uza beibeik múzika kuandu halaʼo atividade oioin iha sira-nia moris.

Múzika iha moris loroloron nian. Ema Izraél toka no kanta atu fó sai sira-nia sentimentu. (Isa 30:29) Feto sira baku tamborín, kanta ho haksolok, no dansa bainhira sira simu liurai foun, halaʼo selebrasaun, no sira-nia tropa manán funu. (Juís 11:34; 1 Sam 18:​6, 7; 1 Reis 1:​39, 40) Ema Izraél mós kanta atu fó sai sira-nia sentimentu triste bainhira ema mate. (2 Krón 35:25) Neʼe hatudu ho klaru katak ema Izraél gosta tebes múzika.

Múzika iha palásiu. Liurai sira iha Izraél gosta múzika. Porezemplu, Liurai Saul bolu David ba palásiu no haruka nia toka arpa. (1 Sam 16:​18, 23) Bainhira David sai liurai, nia inventa instrumentu múzika nian, halo knananuk sira neʼebé furak, no organiza ema barak atu toka instrumentu iha Jeová nia templu. (2 Krón 7:6; Amós 6:5) Liurai Salomão mós halibur kantadór mane no feto sira iha ninia palásiu.—Ecle 2:8.

Múzika nuʼudar parte adorasaun. Ema Izraél uza múzika atu adora Jeová. Tuir loloos, Bíblia konta katak iha mane naʼin-4.000 neʼebé toka instrumentu múzika iha templu iha Jeruzalein. (1 Krón 23:5) Sira uza simbala, instrumentu neʼebé iha talin, arpa, no trombeta. (2 Krón 5:12) Maibé laʼós mane sira-neʼe deʼit mak adora Jeová ho múzika. Ema Izraél barak kanta knananuk husi Salmo bainhira sira halo viajen hodi saʼe ba sidade Jeruzalein atu tuir selebrasaun tinan-tinan. (Sal 120-134) No ema Judeu sira-nia livru mós fó sai katak ema Izraél kanta knananuk Alel nian a bainhira sira han hahán Páskua.

Múzika mak parte importante ba Maromak nia povu. (Tgo 5:13) Ita kanta knananuk atu hahiʼi Jeová. (Éf 5:19) Ita sente unidade ho irmaun-irmán sira kuandu kanta hamutuk. (Kol 3:16) Bainhira ita kanta, toka, ka rona ita-nia múzika, neʼe fó forsa ba ita atu tahan hasoru susar oioin. (Após 16:25) Múzika mak dalan furak ida atu hatudu sai ita-nia fiar no domin ba Jeová.