Varanda neʼe mak parte ba entrada ba Fatin Santu iha templu. Tuir Bíblia Tradusaun Mundu Foun edisaun antes tinan 2023, “varanda iha templu oin luan metru 9 [orj. “kóvado 20”] hanesan ho uma nia luan, no varanda neʼe aas 120”. (2 Krón 3:4) Tradusaun Bíblia seluk mós hatete katak varanda neʼe aas “kóvado 120”, neʼe katak aas tebes toʼo metru 53!

Maibé Tradusaun Mundu Foun edisaun 2023 hatete: “Varanda neʼe aas metru 9”, katak kóvado 20. a Mai ita haree razaun balu tanbasá mak iha mudansa.

1 Reis 6:3 la temi varanda neʼe nia aas. Jeremias neʼebé hakerek livru neʼe temi deʼit varanda nia naruk no luan, maibé la temi kona-ba ninia aas. Tuirmai iha kapítulu 7, nia esplika kona-ba templu nia parte oioin neʼebé úniku, inklui tanke husi riti neʼebé hanaran Tasi, karrosa sanulu, no riin boot rua husi riti neʼebé harii iha varanda nia oin. (1 Reis 7:​15-37) Se varanda mak hanesan torre neʼebé aas metru 50 liu, no aas liu iha área templu, tanbasá Jeremias la temi kona-ba ninia aas? Tinan barak liu tiha, matenek-naʼin Judeu sira fó sai katak varanda neʼe nia aas mak hanesan deʼit ho konstrusaun seluk iha Salomão nia templu.

Matenek-naʼin sira duvida katak templu nia parede labele apoia torre neʼebé aas kóvado 120. Iha tempu antigu, bainhira ema harii torre ka buat neʼebé naruk no aas, porezemplu portaun templu nian iha Ejitu, sira halo fundasaun neʼebé luan no halo torre nia parte leten lotuk liu fali parte kraik. Maibé Salomão nia templu la hanesan neʼe. Matenek-naʼin sira fiar katak templu nia parede nia mahar mak kóvado 6 (metru 2,7) ka mihis liu fali ida-neʼe. Matenek-naʼin ida naran Theodor Busink neʼebé estuda kona-ba konstrusaun antigu dehan: “Kuandu bazeia ba parede nia mahar ba templu nia entrada, varanda nia parede labele aas toʼo kóvado 120.”

Karik ema neʼebé kopia manuskritu hakerek sala liafuan iha 2 Krónikas 3:4. Maski manuskritu antigu balu hatete “120” iha versíkulu neʼe, maibé manuskritu seluk neʼebé ema tau fiar hatete “kóvado 20”, porezemplu iha Kódise Alexandrinu neʼebé hakerek maizumenus tinan 1.500 liubá, no Kódise Ambrosianu neʼebé hakerek maizumenus tinan 1.400 liubá. Tanbasá mak eskriba ida hakerek sala fali dehan “120”? Iha lian Ebraiku, liafuan “atus” no “kóvado” mak liafuan neʼebé haree atu hanesan. Tan neʼe, karik nia hakerek “atus” iha parte neʼebé tuir loloos tenke hakerek “kóvado”.

Ita hakaʼas an atu hatene ho loloos kona-ba Salomão nia templu, maibé ita hakarak fokus liu kona-ba objetivu husi Salomão nia templu, neʼe mak atu ajuda ita komprende kona-ba templu espirituál nian. Ita agradese tebes tanba Jeová konvida ninia atan hotu atu adora nia iha templu espirituál neʼe!—Ebr 9:​11-14; Apok 3:12; 7:​9-17.