Maizumenus iha tinan 1940, haʼu-nia inan-aman estuda Bíblia ho Testemuña ba Jeová. Ikusmai sira para estuda, maski nuneʼe amá kontinua simu Livru Haklaken no Matan-moris bá! Iha tinan 1950 bainhira Testemuña sira halaʼo reuniaun boot internasionál iha sidade Novaiorke, ami-nia família mós tuir.

Lakleur, irmaun Lawrence Jeffries vizita beibeik ami, no koko atu ajuda haʼu aprende lia-loos. Foufoun, haʼu la kontente ho Testemuña ba Jeová tanba sira neutrál kona-ba buat polítiku no la tama militár. Haʼu hatete ba irmaun Lawrence katak se ema hotu iha Amérika lakohi halo funu, inimigu sei mai ataka no manán nasaun tomak. Irmaun Lawrence ho pasiénsia dehan: “Tuir ó-nia hanoin, saida mak Maromak Jeová sei halo se ema hotu iha Amérika serbí nia no inimigu mai atu ataka sira?” Ninia resposta ajuda haʼu komprende katak haʼu-nia hanoin mak sala. Tan neʼe, haʼu interese liután ba Bíblia.

Haʼu uza oras barak atu lee Livru Haklaken no Matan-moris bá! neʼebé haʼu-nia amá rai iha armazén. Ikusmai, haʼu rekoñese katak neʼe mak lia-loos, tan neʼe haʼu estuda Bíblia ho irmaun Lawrence no komesa tuir reuniaun beibeik. Haʼu hafolin tebes buat neʼebé haʼu aprende, no sai haklaken-naʼin. Haʼu troka haʼu-nia planu tanba komprende katak “Jeová nia loron boot besik ona”. (Sof 1:14) Entaun, duké hanoin atu tama universidade, haʼu hakarak ajuda ema seluk aprende lia-loos husi Bíblia.

Haʼu remata eskola sekundária iha loron 13 Juñu 1956, no loron tolu tuirmai, haʼu hetan batizmu iha asembleia ida. Iha tempu  neʼebá, haʼu la imajina katak haʼu sei hetan bensaun barak tanba uza haʼu-nia moris atu aprende no hanorin ema kona-ba Jeová.

Fulan neen depois hetan tiha batizmu, haʼu sai pioneiru regulár. Haʼu lee informasaun ho títulu “Ita bele serbí iha fatin neʼebé presiza liután haklaken-naʼin ka lae?” iha Ita-nia Serbisu Kristaun fulan-Dezembru 1956. Haʼu mós bele halo nuneʼe. Haʼu hakarak ajuda iha fatin neʼebé presiza liután haklaken-naʼin.—Mt 24:14.

Haʼu muda ba sidade Edgefield, Karolina Súl. Kongregasaun neʼe iha deʼit haklaken-naʼin haat, sura ho haʼu hamutuk naʼin-lima. Ami halaʼo reuniaun iha irmaun ida nia uma. Fulan-fulan, haʼu uza oras 100 atu haklaken. Haʼu okupadu tebes atu haklaken no hatoʼo diskursu. Bainhira haʼu serbí liután iha kongregasaun, haʼu aprende liután kona-ba Jeová.

Haʼu estuda Bíblia ho feto ida. Nia mak naʼin ba uma funerál iha sidade Johnston, neʼe besik Edgefield. Nia fó haʼu serbisu part-time no oferese uma kiʼik ida atu uza nuʼudar Reuniaun-Fatin.

Irmaun Lawrence Jeffries nia oan-mane naran Jolly Jeffries pioneiru hamutuk ho haʼu. Nia mai husi Brooklyn, Novaiorke. Irmaun ida fó uma-karreta mai ami atu hela.

Saláriu iha Estadus Unidus parte súl mak kiʼik liu. Saláriu husi serbisu ba loron ida mak dolar rua ka tolu. Loron ida, haʼu uza hotu haʼu-nia osan atu sosa hahán iha loja. Kuandu haʼu sai husi loja, mane ida husu haʼu: “Hakarak serbisu ka? Haʼu prontu selu Ita oras ida dolar ida.” Nia fó haʼu serbisu loron tolu atu hamoos fatin konstrusaun. Haʼu haree duni katak Jeová ajuda haʼu atu hela iha Edgefield. Maski haʼu iha osan uitoan deʼit, maibé haʼu konsege tuir reuniaun boot internasionál iha sidade Novaiorke iha 1958.

Iha loron segundu husi reuniaun boot neʼe, buat furak ida akontese. Haʼu hasoru Ruby Wadlington neʼebé serbí nuʼudar pioneiru regulár iha sidade Gallatin, Tennessee. Haʼu no Ruby hakarak sai misionáriu, tan neʼe ami tuir enkontru kona-ba Eskola Gilead iha reuniaun boot neʼe. No ami komesa hakerek karta ba malu. Lakleur haʼu hetan konvite atu hatoʼo diskursu iha Ruby nia kongregasaun. Haʼu uza oportunidade neʼe atu husu nia kaben ho haʼu. Depois neʼe, haʼu muda ba Ruby nia kongregasaun, no ami kaben iha tinan 1959.

Kuandu haʼu tinan 23, haʼu simu knaar ida neʼebé agora bolu nuʼudar koordenadór ba grupu katuas nian iha sidade Gallatin. Ami-nia kongregasaun mak kongregasaun  primeiru neʼebé Charles Thompson vizita nuʼudar katuas área. Nia iha esperiénsia barak, maski nuneʼe nia husu haʼu-nia hanoin kona-ba irmaun-irmán sira-nia presiza no oinsá katuas área seluk tau matan kongregasaun. Haʼu aprende husi nia katak diʼak atu husu pergunta no haree ba faktu hotu antes foti desizaun.

Iha fulan-Maiu 1964, haʼu hetan konvite atu tuir Eskola ba Katuas Kongregasaun durante fulan ida iha sidade Lansing Súl, Novaiorke. Irmaun sira neʼebé hanorin iha eskola neʼe halo haʼu hakarak aprende liután kona-ba Jeová no hakbesik liután ba nia.

Iha fulan-Janeiru 1965, haʼu no Ruby simu konvite atu serbí nuʼudar katuas área. Ami vizita kongregasaun sira iha sidade Knoxville iha Tennessee toʼo besik sidade Richmond iha Virjínia. Ami mós vizita kongregasaun sira iha Karolina Norte, Kentucky, no Virjínia Oeste. Ami bele vizita deʼit kongregasaun sira ba ema kulit metan tanba iha parte súl husi Estadus Unidus iha lei katak ema kulit metan labele halibur ho ema kulit mutin. Irmaun-irmán barak mak kiak, no ami aprende atu fahe buat neʼebé ami iha ba maluk sira neʼebé presiza. Irmaun ida neʼebé serbí nuʼudar katuas área ba tempu kleur hanorin haʼu lisaun importante tebes: “Ó presiza sai sira-nia maun ka alin. Keta sai hanesan xefe. Ó bele ajuda sira só deʼit se sira haree ó nuʼudar maun ka alin.”

Bainhira ami vizita kongregasaun kiʼik ida, Ruby hahú estuda ho feto joven ida neʼebé iha oan-feto tinan ida. La iha ema ida atu estuda ho nia, entaun Ruby mak fó estuda nia liuhusi karta. Bainhira ami vizita fali kongregasaun neʼe, feto neʼe tuir beibeik ona reuniaun. Kuandu irmán pioneiru espesiál naʼin-rua muda ba kongregasaun neʼe, sira kontinua estuda ho nia, no lakleur nia hetan batizmu. Maizumenus tinan 30 liutiha, iha tinan 1995, iha Betel Patterson, irmán joven ida hakbesik no fó koñese ninia an ba Ruby. Afinál nia mak oan-feto husi Ruby nia estudante neʼe. Irmán joven neʼe ho ninia laʼen tuir Eskola Gilead klase 100 iha Patterson.

Ami-nia área segundu mak iha Florida. Ami presiza karreta, tan neʼe ami sosa karreta ida ho folin baratu. Maibé la toʼo semana ida, karreta neʼe sai aat. Ami la iha osan atu hadiʼa. Haʼu kontaktu irmaun ida neʼebé haʼu hanoin bele ajuda ami. Nia haruka ninia serbisu-naʼin atu hadiʼa ami-nia karreta no la husu ami atu selu. Nia dehan deʼit: “Lalika selu.” Nia mós fó osan mai ami. Neʼe mak ezemplu ida kona-ba oinsá Jeová tau matan ba ninia atan sira. Ami mós aprende atu hatudu laran-luak ba ema seluk.

Bainhira vizita kongregasaun sira, ami hela ho irmaun-irmán sira. Tan neʼe ami hetan belun diʼak barak. Loron ida, haʼu seidauk ketik hotu kongregasaun nia relatóriu no haʼu bá fatin ruma. Bainhira haʼu fila ba uma iha kalan, haʼu haree katak irmaun nia oan-mane neʼebé tinan tolu ketik arbiru iha relatóriu neʼe tanba hakarak “ajuda” haʼu. Ba tinan barak haʼu sempre goza nia kona-ba neʼe.

Iha tinan 1971, haʼu simu knaar foun nuʼudar katuas vizitante iha sidade Novaiorke. Ami hakfodak tebes. Iha tempu neʼebá, haʼu tinan 34 deʼit. Irmaun-irmán sira simu haʼu ho laran-diʼak nuʼudar sira-nia katuas vizitante primeiru neʼebé kulit metan.

Nuʼudar katuas vizitante, haʼu kontente atu hanorin kona-ba Jeová semana-semana iha asembleia. Katuas área barak iha esperiénsia barak liu fali haʼu. Sira ida mak hatoʼo haʼu-nia diskursu batizmu. Iha mós irmaun Theodore Jaracz neʼebé ikusmai serbí nuʼudar membru ba Grupu Administradór, no mós irmaun barak neʼebé serbí iha Betel Brooklyn. Haʼu agradese tebes tanba katuas área sira no irmaun sira husi Betel ajuda haʼu atu serbí ho kontente. Haʼu haree rasik katak sira mak bibi-atan neʼebé hatudu domin, tau fiar ba Bíblia, no apoia Jeová nia  organizasaun ho laran-metin. Tanba sira haraik an, neʼe halo fasil ba haʼu atu serbí nuʼudar katuas vizitante.

Iha tinan 1974, Grupu Administradór fó knaar ba katuas área sira seluk atu sai katuas vizitante, no haʼu sai fali katuas área no muda ba Karolina Súl. Iha tempu neʼebá, irmaun-irmán kulit mutin no kulit metan bele halibur hamutuk ona nuʼudar kongregasaun, neʼe halo sira kontente tebes.

Iha tinan 1976, ami muda ba área entre sidade Atlanta no sidade Kolombus iha Jeórjia. Haʼu hanoin-hetan bainhira haʼu hatoʼo diskursu iha labarik kulit metan naʼin-lima nia funerál. Sira mate tanba ema balu soe bomba molotov ba sira-nia uma. Sira-nia inan hetan kanek no baixa iha ospitál. Testemuña kulit mutin no kulit metan bá ospitál beibeik atu konsola inan-aman neʼe. Sira hatudu domin boot tebes. Hahalok hanesan neʼe ajuda Maromak nia atan sira atu tahan hasoru susar boot oioin.

Iha tinan 1977, ami ajuda iha projetu ida ba fulan balu iha Betel Brooklyn. Bainhira projetu neʼe besik atu remata, membru rua husi Grupu Administradór husu se haʼu no Ruby hakarak serbí ba nafatin iha Betel. Ami simu konvite neʼe.

Durante tinan 24, haʼu serbí iha Departamentu Serbisu nian iha Betel neʼebé dala barak ajuda hatán pergunta sira neʼebé komplikadu. Grupu Administradór fó ona matadalan barak neʼebé bazeia ba Bíblia nia prinsípiu sira. Ami uza ida-neʼe atu hatán ba pergunta sira, no mós atu treinu katuas área, katuas, no pioneiru sira. Treinu neʼe ajuda Testemuña barak sai maduru, no hametin Jeová nia organizasaun.

Husi tinan 1995 toʼo 2018, haʼu vizita sukursál oioin nuʼudar reprezentante ba sede-jerál, uluk bolu nuʼudar katuas neʼebé vizita sukursál. Haʼu hasoru Komisaun ba Sukursál, ema Betel, no misionáriu sira atu anima no ajuda sira tahan hasoru susar oioin. Haʼu no Ruby mós sempre hetan anima husi maluk sira-nia esperiénsia. Porezemplu kuandu ami vizita rai-Ruanda iha tinan 2000, ami rona esperiénsia husi irmaun-irmán no mós família Betel kona-ba tempu masakre iha tinan 1994. Sira-nia istória book tebes ami-nia laran. Sira barak lakon família no belun. Maski hetan susar boot, sira nafatin fiar metin, iha esperansa, no sente ksolok.

Ami-nia idade 80 liu ona. Haʼu serbí iha Komisaun ba Sukursál iha Estadus Unidus ba tinan 20. Haʼu la bá universidade, maibé haʼu hetan ona edukasaun neʼebé diʼak liu husi Jeová no ninia organizasaun. Neʼe ajuda haʼu atu hanorin ema seluk kona-ba lia-loos husi Bíblia neʼebé lori benefísiu ba sira ba nafatin. (2 Kor 3:5; 2 Tim 2:2) Haʼu haree ona oinsá Bíblia ajuda ema atu hadiʼa sira-nia moris no hakbesik ba Kriadór. (Tgo 4:8) Haʼu no Ruby hakaʼas an anima ema seluk hafolin sira-nia priviléjiu atu aprende kona-ba Jeová no hanorin lia-loos ba ema seluk. Neʼe mak priviléjiu boot liu neʼebé Jeová nia atan bele hetan.