1. Ema seluk tau fiar ba ema hanesan saida?

 SE EMA ida hakaʼas an kumpre ninia promesa sira no koʼalia buat neʼebé loos, ema seluk bele tau fiar ba nia. (Sal 15:4) Ema seluk hatene katak sira bele sadere ba nia. Ita hakarak irmaun-irmán sira mós atu sente hanesan neʼe ho ita. Saida mak ita bele halo atu ema seluk bele tau fiar ba ita?

2. Oinsá ita bele hatudu katak ema seluk bele tau fiar ba ita?

² Ita labele obriga ema seluk atu tau fiar ba ita. Ita tenke hatudu liuhusi ita-nia hahalok katak ema seluk bele tau fiar ba ita. Ita bele kompara tau fiar ba malu ho osan tanba susar atu hetan no fasil atu lakon. Jeová hatudu katak ita sempre bele tau fiar ba nia, no la iha razaun atu lakon fiar ba nia. Bíblia hatete: “Ema bele tau fiar ba buat hotu neʼebé [Maromak] halo.” (Sal 33:4) Jeová hakarak ita atu banati-tuir nia. (Éf 5:1) Ita sei aprende kona-ba Jeová nia atan balu neʼebé banati-tuir nia no hatudu katak ema bele tau fiar ba sira. Ita mós sei aprende kona-ba hahalok lima neʼebé ita bele hatudu atu ema seluk bele tau fiar ba ita.

3-4. Oinsá profeta Daniel hatudu katak ema seluk bele tau fiar ba nia? Ita presiza husu pergunta saida deʼit ba ita-nia an?

³ Profeta Daniel hatudu ezemplu diʼak. Maski nia sai dadur iha Babilónia, maibé nia hatudu katak ema bele tau fiar ba nia. Ema komesa tau fiar liután ba nia bainhira Jeová ajuda nia atu esplika Liurai Nabukodonozór nia mehi. Loron ida, Daniel tenke fó sai ba liurai katak Jeová la kontente ho liurai, maski karik liurai lakohi rona ida-neʼe.  Daniel presiza hatudu aten-brani tanba Liurai Nabukodonozór mak hirusdór. (Dan 2:12; 4:20-22, 25) Tinan barak liutiha, Daniel hatudu tan katak ema bele tau fiar ba nia bainhira nia esplika letra sira neʼebé mosu iha palásiu nia didin iha Babilónia. (Dan 5:5, 25-29) Depois neʼe, Dário ema Média no ukun-naʼin sira seluk nota katak Daniel “matenek tebes”. Sira rekoñese katak Daniel “laran-metin no ema la hetan buat aat ida ka sala ida iha nia”. (Dan 6:3, 4) Ukun-naʼin neʼebé la adora Jeová mós rekoñese katak sira bele tau fiar ba Daniel.

⁴ Bainhira medita kona-ba Daniel nia ezemplu, diʼak atu husu ba ita-nia an: ‘Ema neʼebé laʼós Testemuña ba Jeová koñese haʼu nuʼudar ema hanesan saida? Sira koñese haʼu nuʼudar ema neʼebé kumpre promesa no ema bele tau fiar ka lae?’ Tanbasá importante atu husu pergunta sira-neʼe ba ita-nia an? Tanba ita lori glória ba Jeová bainhira ema seluk bele tau fiar ba ita.

5. Tanbasá ema seluk bele tau fiar ba Hananias?

⁵ Depois Governadór Neemias harii moru Jeruzalein iha tinan 455 AEC, nia buka mane sira neʼebé nia bele tau fiar atu tau matan didiʼak sidade. Mane ida neʼebé Neemias hili mak Hananias, xefe ba Uma Aas Seguru. Neemias hatete: “Hananias mak ema neʼebé haʼu bele fiar liu no nia hamtaʼuk Maromak liu fali ema seluk hotu.” (Neem 7:2) Hananias hadomi Jeová no lakohi halo Jeová  laran-kanek, no neʼe book nia atu halaʼo didiʼak knaar hotu neʼebé nia simu. Bainhira ita hatudu hahalok hanesan Hananias, ema mós bele tau fiar ba ita atu halo Jeová nia serbisu.

6. Tanbasá Paulo bele tau fiar ba Tíkiko?

⁶ Ezemplu seluk mak Tíkiko. Apóstolu Paulo tau fiar ba nia. Bainhira Paulo sai nuʼudar dadur iha uma ida, nia tau fiar ba Tíkiko no hatete katak Tíkiko mak “serbisu-naʼin ida neʼebé laran-metin”. (Éf 6:21, 22) Paulo tau fiar ba Tíkiko atu lori ninia karta sira ba irmaun-irmán sira iha Éfeso no Koloso no mós atu anima no fó kmaan ba sira. Ohin loron iha irmaun barak neʼebé tau matan ba ita-nia presiza espirituál hanesan Tíkiko.​—Kol 4:7-9.

7. Katuas kongregasaun no atan ba kongregasaun hatudu ezemplu diʼak saida mai ita?

⁷ Ohin loron, ita hafolin tebes katuas kongregasaun no atan ba kongregasaun tanba ita bele tau fiar ba sira. Hanesan ho Daniel, Hananias no Tíkiko, irmaun sira-neʼe halaʼo didiʼak sira-nia knaar. Porezemplu, bainhira ita tuir reuniaun iha loron baileet, ita hatene katak ema oioin simu ona knaar atu halo parte iha reuniaun neʼe. Katuas sira agradese tebes bainhira ema neʼebé simu knaar prepara ho didiʼak no halaʼo sira-nia parte. No mós bainhira ita konvida estudante Bíblia atu tuir reuniaun iha findesemana, ita hatene katak sei iha irmaun ruma neʼebé hatoʼo diskursu públiku. Ita mós fiar katak sei iha publikasaun neʼebé ita presiza atu haklaken. Irmaun sira-neʼe tau matan ba ita ho didiʼak no ita agradese ba Jeová kona-ba neʼe. Maibé oinsá ita rasik bele hatudu katak ema seluk bele tau fiar ba ita?

8. Oinsá ita bele hatudu respeitu ba ema seluk? (Provérbios 11:13)

⁸ Ita hadomi irmaun-irmán sira no ita gosta atu hatene kona-ba sira-nia situasaun. Maibé ita presiza iha balansu no la fó sai sira-nia informasaun privadu. Ema Kristaun balu iha apóstolu sira-nia tempu “konta ema nia vida no mete iha ema seluk nia moris, no sira koʼalia kona-ba buat neʼebé sira la iha direitu atu koʼalia”. (1 Tim 5:13) Ita lakohi hatudu hahalok hanesan neʼe. Oinsá se ema ruma fó sai informasaun privadu ba ita no husu ita atu la konta fali ba ema seluk? Porezemplu, karik irmán ida konta ninia problema saúde ka susar seluk neʼebé nia hasoru, no nia husu ita atu la konta fali ba ema seluk. Ita tenke halo tuir ninia hakarak. b (Lee Provérbios 11:13.) Agora ita sei aprende kona-ba situasaun seluk tan neʼebé ita presiza rai didiʼak ema nia segredu.

9. Oinsá ema iha família bele hatudu katak ema seluk bele tau fiar ba sira?

⁹ Iha família laran. Ema ida-idak iha família presiza rai didiʼak informasaun privadu kona-ba família. Porezemplu, karik laʼen Kristaun ida sente katak ninia feen iha toman ida neʼebé komik. Nia sei la konta ida-neʼe ba ema seluk no hamoe ninia feen. Nia hadomi ninia feen no lakohi hakanek ninia feen nia laran. (Éf 5:33) Importante tebes atu inan-aman hanoin-hetan katak sira mós presiza hatudu respeitu ba sira-nia oan neʼebé joven. Sira labele hamoe sira-nia oan hodi  fó sai oan sira-nia sala ba ema seluk. (Kol 3:21) Oan sira mós presiza aprende atu hatudu matenek no la konta ba ema seluk buat neʼebé bele hamoe membru ba família. (Deut 5:16) Bainhira ema ida-idak iha família hakaʼas an atu la fahe informasaun privadu ba ema seluk, neʼe sei halo ema hotu iha família besik ba malu liután.

10. Belun neʼebé diʼak presiza halo saida? (Provérbios 17:17)

¹⁰ Ho belun sira. Dala ruma, ita hotu sente katak ita presiza fó sai ita-nia sentimentu ba ema ida. Dala ruma neʼe susar. Karik ita la toman atu fahe ita-nia sentimentu ba ema seluk no ita sente laran-kanek tebes bainhira ita-nia belun ida konta fali ba ema seluk buat neʼebé ita fó sai ba nia. Maibé ita agradese ba belun sira neʼebé rai didiʼak informasaun neʼebé ita fahe ba sira. Ema hanesan neʼe mak “belun neʼebé loos”.​—Lee Provérbios 17:17.

11. (a) Oinsá katuas kongregasaun no sira-nia feen hatudu katak ema bele tau fiar ba sira? (b) Saida mak ita bele aprende husi katuas ida neʼebé tau matan asuntu ruma iha kongregasaun no tuirmai hamutuk ho ninia família? (Haree foto.)

¹¹ Iha kongregasaun. Katuas kongregasaun neʼebé rai didiʼak ema nia informasaun privadu mak hanesan “subar-fatin husi anin, no fatin mahon” ba irmaun-irmán sira. (Isa 32:2) Ita bele koʼalia ho katuas sira kona-ba buat naran deʼit tanba ita hatene katak sira sei la konta fali ida-neʼe ba ema seluk. Ita mós labele obriga sira atu fó sai ema seluk nia informasaun privadu. Ita mós hafolin katuas sira-nia feen tanba sira la husu informasaun privadu husi sira-nia laʼen. Tuir loloos feen sira sente kontente tanba sira la hatene informasaun privadu kona-ba irmaun-irmán sira. Katuas kongregasaun ida nia feen hatete: “Haʼu agradese tebes tanba haʼu-nia laʼen la fó sai informasaun privadu husi ema neʼebé nia ajuda iha dalan espirituál no nia vizita  nuʼudar bibi-atan. Nia mós la fó sai sira-nia naran mai haʼu. Haʼu agradese tanba la rona kona-ba problema ruma neʼebé haʼu rasik labele ajuda atu rezolve. Tan neʼe haʼu la hanoin barak bainhira koʼalia ho ema ruma iha kongregasaun. No haʼu fiar katak bainhira haʼu fó sai haʼu-nia sentimentu ka problema ba haʼu-nia laʼen, nia mós sei la konta fali ba ema seluk.” Klaru katak ita hotu hakarak ema seluk tau fiar ba ita. Hahalok saida mak bele ajuda ita halo ida-neʼe? Ita sei koʼalia kona-ba hahalok lima.

12. Tanbasá ita presiza domin atu bele tau fiar ba malu? Fó toʼok ezemplu ida.

¹² Atu bele tau fiar ba malu ita presiza iha domin. Jesus dehan katak mandamentu rua neʼebé boot liu mak atu hadomi Jeová no hadomi ema seluk. (Mt 22:37-39) Ita hadomi Jeová no ita hakarak banati-tuir nia kona-ba hatudu hahalok neʼebé ema bele tau fiar. Porezemplu, domin ba irmaun-irmán sira book ita atu la konta fali sira-nia informasaun privadu ba ema seluk. Ita lakohi fahe informasaun ruma neʼebé bele hakanek, hamoe ka lori susar ba ema ida.​—João 15:12.

13. Tanbasá ita bele tau fiar ba ema neʼebé haraik an?

¹³ Ema mós bele tau fiar ba ita bainhira ita hatudu haraik an. Ema Kristaun neʼebé haraik an lakohi buka oin hodi fó sai uluk-uluk informasaun ruma ba ema seluk. (Flp 2:3) Nia la koko atu halo ema seluk hanoin katak nia hatene informasaun ruma neʼebé importante no labele fó sai ba ema seluk. Bainhira ita haraik an, neʼe mós sei ajuda ita atu la fó sai ita-nia opiniaun rasik kona-ba hanorin ruma neʼebé la fó sai iha Bíblia ka ita-nia publikasaun sira.

14. Tanbasá ita bele tau fiar ba ema neʼebé iha kbiit atu tetu didiʼak?

¹⁴ Bainhira ema Kristaun iha kbiit atu tetu didiʼak, neʼe sei ajuda nia hatene “tempu atu nonook no tempu atu koʼalia”. (Ecle 3:7) Iha kultura balu, iha lia-dadolin ida neʼebé dehan: “Kbiit atu koʼalia mak hanesan osan-mutin, maibé ema neʼebé nonook mak hanesan osan-mean.” Neʼe katak dala ruma diʼak liu atu nonook duké koʼalia. Tan neʼe Provérbios 11:12 hatete: “Ema neʼebé hatene tetu didiʼak sei nonook nafatin.” Hanoin toʼok kona-ba katuas kongregasaun ida neʼebé iha esperiénsia barak no ajuda beibeik kongregasaun seluk neʼebé hasoru problema. Katuas ida dehan: “Irmaun neʼe nunka fahe informasaun privadu husi kongregasaun seluk.” Tanba katuas neʼe iha kbiit atu tetu didiʼak, grupu katuas iha ninia kongregasaun respeitu tebes nia. Sira bele fiar katak nia sei nunka fó sai kongregasaun nia informasaun privadu ba kongregasaun seluk.

15. Tanbasá ita bele tau fiar ba ema neʼebé onestu? Fó toʼok ezemplu ida.

¹⁵ Ita mós presiza hatudu hahalok onestu atu ema seluk bele tau fiar ba ita. Baibain ita tau fiar ba ema neʼebé onestu tanba ita hatene katak ema neʼe sei la bosok. (Éf 4:25; Ebr 13:18) Porezemplu, karik Ita hakarak aumenta Ita-nia matenek nuʼudar mestre Bíblia. Tan neʼe Ita husu ema ruma atu rona ba Ita-nia diskursu no husu ninia sujestaun kona-ba oinsá atu halo diʼak liután. Ita sei husu sé-nia sujestaun? Ema neʼebé fó sai deʼit buat neʼebé Ita hakarak rona ka ema neʼebé ho laran-diʼak koʼalia nakloke no fó sujestaun? Resposta  mak klaru. Bíblia hatete: “Koʼalia nakloke atu korrije mak diʼak liu fali domin neʼebé subar deʼit. Belun neʼebé laran-metin fó konsellu maski neʼe bele hakanek ninia maluk nia laran.” (Prov 27:5, 6) Maski susar atu rona, maibé bainhira belun ida koʼalia nakloke no fó sujestaun, ida-neʼe sei lori benefísiu mai ita.

16. Tuir Provérbios 10:19, saida mak dalan ida atu kontrola an?

¹⁶ Se ita hakarak ema atu tau fiar ba ita, ita presiza kontrola an. Hahalok neʼe ajuda ita kontrola ita-nia ibun atu nuneʼe ita la fó sai informasaun privadu ruma. (Lee Provérbios 10:19.) Dala ruma susar atu kontrola an bainhira ita uza média sosiál. Se ita la kuidadu, karik ita fó sai informasaun privadu ba ema barak iha tempu ida deʼit. No bainhira ita fahe informasaun liuhusi internét, ita labele kontrola oinsá ema seluk sei uza informasaun neʼe no ita mós la hatene problema saida mak bele mosu. Hahalok kontrola an mós bele ajuda ita atu nafatin nonook bainhira kontradór sira koko lasu ita atu fó sai informasaun neʼebé bele lori perigu ba irmaun-irmán sira. Karik neʼe bele akontese se ita hela iha nasaun neʼebé governu bandu ita-nia atividade no polísia halo interrogasaun ba ita. Ita bele halo tuir prinsípiu atu “kuidadu no taka [ita-nia] ibun” iha situasaun neʼe no mós situasaun seluk. (Sal 39:1) Ita hakarak ita-nia família, belun sira, irmaun-irmán sira no ema seluk atu tau fiar ba ita. Atu sira bele halo nuneʼe, ita presiza kontrola an.

17. Oinsá ema hotu iha kongregasaun bele tau fiar ba malu?

¹⁷ Ita agradese tebes tanba Jeová dada ita ba família boot neʼebé ema hotu hatudu domin no bele tau fiar ba malu. Ita hotu presiza hatudu katak irmaun-irmán sira bele tau fiar ba ita. Bainhira ita ida-idak hakaʼas an atu hatudu domin, haraik an, kbiit atu tetu didiʼak, onestu no kontrola an, neʼe sei ajuda ema hotu iha kongregasaun atu tau fiar ba malu. Ita presiza kontinua hakaʼas an atu ema seluk bele tau fiar ba ita. Mai ita banati-tuir Maromak Jeová no kontinua hatudu katak ema seluk bele tau fiar ba ita.