1. Tanbasá ita la hakfodak katak ema labele konfia malu?

 EMA iha Satanás nia mundu la hatene atu tau fiar ba sé. Dala barak, negósiu-naʼin sira, ulun-naʼin polítiku no ulun-naʼin relijiaun la kumpre sira-nia promesa no neʼe halo ema lakon fiar. Ema barak mós sente katak sira labele tau fiar ba sira-nia belun, viziñu no família. Ita la hakfodak ho ida-neʼe tanba Bíblia fó-hatene nanis: “Iha loron ikus sira . . . ema sei . . . la hatudu laran-metin, . . . koʼalia aat hodi hafoʼer ema seluk nia naran, . . . traidór.” Ema nia hahalok mak hanesan ho Satanás, maromak mundu neʼe nian neʼebé ita labele tau fiar.​—2 Tim 3:1-4; 2 Kor 4:4.

2. (a) Ita bele tau fiar tomak ba saida? (b) Karik ema balu duvida kona-ba saida?

² Maibé nuʼudar ema Kristaun, ita hatene katak ita bele tau fiar tomak ba Jeová. (Jer 17:7, 8) Ita fiar metin katak nia hadomi ita no sei “nunka husik hela” ninia belun sira. (Sal 9:10) Ita mós bele tau fiar ba Kristu Jesus tanba nia fó ninia moris atu sosa fali ita. (1 Ped 3:18) Ita aprende ona husi ita-nia esperiénsia rasik katak Bíblia fó sai matadalan neʼebé ita bele tau fiar. (2 Tim 3:16, 17) Ita iha konfiansa katak ita bele tau fiar ba Jeová, Jesus no mós Bíblia. Maski nuneʼe, karik ema balu duvida se sira bele tau fiar ba irmaun-irmán sira iha situasaun hotu. Maibé, tanbasá ita bele tau fiar ba sira?

3. Ita iha priviléjiu boot saida? (Marcos 10:29, 30)

³ Jeová hili ita atu sai parte ba ninia família iha mundu tomak neʼebé adora nia. Neʼe priviléjiu neʼebé boot no mós lori bensaun oioin. (Lee Marcos 10:29, 30.) Iha  mundu tomak, iha irmaun-irmán barak neʼebé hadomi Jeová hanesan ita no sira mós hakaʼas an atu halo tuir Jeová nia matadalan. Maski ita-nia língua, kultura no hatais la hanesan, maibé ita hadomi malu. No ita sente nuneʼe maski foin mak hasoru malu. Ita gosta tebes hamutuk ho sira, liuliu bainhira ita fó hahiʼi no adora Jeová.​—Sal 133:1.

4. Tanbasá ita presiza irmaun-irmán sira?

⁴ Ohin loron, importante tebes atu iha unidade ho irmaun-irmán sira. Dala ruma, sira ajuda ita kuandu ita hasoru susar. (Rom 15:1; Gal 6:2) Sira mós anima ita atu kontinua serbí Jeová ho badinas no iha fiar neʼebé metin. (1 Tes 5:11; Ebr 10:23-25) Ita sei sente oinsá se kongregasaun la ajuda ita atu hamriik metin hodi kontra ita-nia inimigu, Diabu Satanás no ninia mundu aat neʼe? Lakleur tan Satanás no sira neʼebé nia kontrola sei ataka Maromak nia atan sira. Iha tempu neʼebá, ita sei agradese tanba irmaun-irmán sira apoia ita.

5. Tanbasá dala ruma susar atu tau fiar ba irmaun-irmán sira?

⁵ Maibé karik ita sente susar atu tau fiar ba irmaun-irmán sira, tanba sira balu la rai didiʼak segredu ruma ka la kumpre sira-nia promesa. Ka karik maluk fiar-naʼin ruma koʼalia ka halo buat ruma neʼebé hakanek tebes ita-nia laran. Neʼe bele halo susar ba ita atu tau fiar ba ema seluk. Entaun, saida mak bele ajuda ita atu tau fiar ba irmaun-irmán sira?

6. Oinsá domin bele ajuda ita tau fiar ba ema seluk? (1 Korinto 13:4-8)

⁶ Domin bele ajuda ita atu tau fiar ba ema seluk. Primeiru Korinto kapítulu 13  temi parte oioin husi domin neʼebé bele ajuda ita hametin ka tau fiar fali ba ema seluk. (Lee 1 Korinto 13:4-8.) Porezemplu, versíkulu 4 hatete katak “domin mak pasiénsia no laran-diʼak”. Jeová hatudu pasiénsia mai ita, maski ita halo sala hasoru nia. Tan neʼe, ita presiza hatudu pasiénsia ba irmaun-irmán sira kuandu sira hatete ka halo buat ruma neʼebé halo ita hirus ka laran-kanek. Versíkulu 5 hatete: “[Domin] la sai hirus lalais. Domin la hanoin fali buat aat neʼebé nia simu.” Neʼe katak ita lakohi “hanoin fali buat aat” hotu neʼebé irmaun-irmán sira halo atu hakanek ita-nia laran. Eclesiastes 7:9 hatete katak ita labele “sente an lalais”. Diʼak liu atu halo tuir Éfeso 4:26 neʼebé hatete: “Keta husik loro-matan tun bainhira imi sei hirus hela.”

7. Oinsá prinsípiu iha Mateus 7:1-5 ajuda ita tau fiar ba irmaun-irmán sira?

⁷ Ita bele tau fiar ba irmaun-irmán sira bainhira ita haree sira tuir Jeová nia haree. Maromak hadomi sira no haluha tiha sira-nia sala. Ita mós tenke halo nuneʼe. (Sal 130:3) Duké tau fokus ba sira-nia fraku, ita presiza hakaʼas an atu tau fokus ba sira-nia hahalok diʼak no hanoin kona-ba buat diʼak neʼebé sira bele kumpre. (Lee Mateus 7:1-5.) Domin “fiar buat hotu”, tan neʼe ita fiar katak irmaun-irmán sira hakarak halo buat diʼak no lakohi hakanek ita-nia laran. (1 Kor 13:7) Neʼe la dehan katak Jeová hakarak ita naran fiar ema. Nia hakarak ita tau fiar ba sira tanba sira hatudu ona katak sira merese duni atu ita tau fiar. b

8. Oinsá atu haburas fiar ba irmaun-irmán sira?

⁸ Presiza tempu atu bele tau fiar ba irmaun-irmán sira. Oinsá atu halo nuneʼe? Koñese didiʼak sira. Koʼalia ba sira kuandu tuir reuniaun. Haklaken hamutuk ho sira. Hatudu pasiénsia ba sira, no fó oportunidade ba sira atu hatudu katak ita bele tau fiar ba sira. Karik foufoun, ita lakohi fó sai buat privadu ba ema neʼebé ita foin koñese. Bainhira ita-nia relasaun metin ona, karik ita kontente atu fó sai ita-nia sentimentu. (Lc 16:10) Maibé saida mak ita bele halo se irmaun ka irmán ruma hakanek ita-nia laran? Keta ansi atu hakotu ita-nia relasaun diʼak ho sira. No keta husik ema balu nia hahalok halo ita la tau fiar ba irmaun-irmán seluk. Agora ita sei aprende kona-ba Jeová nia atan balu neʼebé nafatin tau fiar ba ema, maski ema balu hakanek sira-nia laran.

9. (a) Oinsá Ana nafatin tau fiar ba Jeová nia arranju maski ema seluk halo sala? (b) Ita bele aprende saida husi Ana kona-ba tau fiar ba Jeová nia arranju? (Haree dezeñu.)

⁹ Dala ruma ema seluk nia hahalok bele hakanek ita-nia laran. Tan neʼe ita bele hetan benefísiu husi Ana nia ezemplu. Iha tempu neʼebá, Amlulik Boot Eli mak dirije ema Izraél atu adora Jeová. Maibé ema balu iha ninia família la hatudu ezemplu diʼak. Eli nia oan-mane sira neʼebé serbí nuʼudar amlulik halo beibeik hahalok la morál. No Eli ladún korrije sira. Jeová la hasai kedas Eli husi ninia knaar nuʼudar amlulik boot. Situasaun neʼe la hanetik Ana kontinua halo tuir Maromak nia arranju. Ana nafatin adora Jeová iha tenda santu maski Eli mak serbí nuʼudar amlulik boot. Bainhira Eli haree  Ana halo orasaun ho laran-susar, Eli hanoin katak Ana lanu. Eli la buka-hatene uluk faktu sira, no nia kritika Ana neʼebé laran-susar tebes. (1 Sam 1:12-16) Ana promete katak se nia tuur-ahi oan-mane ida, nia sei lori oan neʼe atu serbí iha tenda santu, maski Eli mak sei tau matan ba oan neʼe. (1 Sam 1:11) Eli nia oan sira presiza hetan kastigu ka lae? Sin, no ikusmai Jeová kastigu duni sira. (1 Sam 4:17) No Maromak haraik bensaun ba Ana hodi iha oan-mane naran Samuel.​—1 Sam 1:17-20.

10. Oinsá David kontinua tau fiar ba ema seluk maski ema balu la laran-metin ba nia?

¹⁰ Ita-nia belun ida la laran-metin ba Ita ka lae? Se nuneʼe, hanoin toʼok kona-ba Liurai David. Nia iha belun naran Ahitofel. Maibé bainhira David nia oan-mane naran Absalão koko atu sai liurai, Ahitofel mós apoia Absalão atu kontra David. Ita bele fiar katak David sente laran-kanek tebes tanba ninia oan-mane no ninia belun ida la apoia tan nia. Maski sira la laran-metin ba nia, maibé neʼe la hanetik nia atu tau fiar ba ema seluk. Nia kontinua tau fiar ba ninia belun seluk naran Husai neʼebé la kontra nia. David iha razaun neʼebé diʼak atu tau fiar ba Husai. Husai mak belun neʼebé diʼak no prontu tau ninia moris iha perigu laran atu ajuda David.​—2 Sam 17:1-16.

11. Oinsá mak Nabal nia atan ida hatudu fiar ba Abigail?

¹¹ Hanoin toʼok kona-ba Nabal nia atan ida. David no ninia ema sira hatudu laran-diʼak hodi proteje Nabal nia atan sira. Liutiha tempu balu, David husu ba Nabal neʼebé riku atu fó ai-han balu ba ninia ema sira. Bainhira Nabal lakohi fó ai-han, David sai hirus tebes no deside atu oho mane hotu iha Nabal nia umakain. Nabal nia atan ida fó sai situasaun neʼe ba Nabal nia feen Abigail. Atan neʼe mak parte ba Nabal nia umakain, tan neʼe ninia moris mós iha perigu laran. Nia hatene katak Abigail bele salva ninia moris. Duké halai deʼit, nia fiar katak Abigail bele hadiʼa situasaun neʼe. Ema hotu koñese Abigail nuʼudar feto neʼebé  matenek, tan neʼe karik atan neʼe tau fiar ba Abigail. Buat neʼebé akontese tuirmai hatudu katak nia iha razaun neʼebé loos atu tau fiar ba Abigail. Abigail hatudu aten-brani no hanetik David atu kumpre ninia planu. (1 Sam 25:2-35) Abigail fiar katak David sei la ulun-toos.

12. Oinsá Jesus hatudu katak nia tau fiar ba ninia dixípulu sira maski sira halo sala?

¹² Jesus tau fiar ba ninia dixípulu sira maski sira halo sala. (João 15:15, 16) Bainhira Tiago no João husu Jesus atu fó sira knaar importante iha Maromak nia Ukun, Jesus la duvida ho sira-nia motivu atu serbí Jeová ka hasai sira-nia knaar nuʼudar apóstolu. (Mc 10:35-40) Jesus nia dixípulu hotu mós husik hela nia iha kalan neʼebé ema kaer nia. (Mt 26:56) Maibé Jesus la lakon fiar ba sira. Nia hatene didiʼak sira-nia fraku, maski nuneʼe nia “hadomi sira toʼo rohan”. (João 13:1) Bainhira Jesus hetan tiha moris-hiʼas, nia mós fó knaar importante ba ninia apóstolu naʼin-11 neʼebé laran-metin atu tau matan ba serbisu haklaken no ninia bibi sira. (Mt 28:19, 20; João 21:15-17) Jesus iha razaun neʼebé diʼak atu tau fiar ba mane sira-neʼe neʼebé la perfeitu. Sira hotu serbí Jeová ho laran-metin toʼo sira mate. Klaru katak, Ana, David, Nabal nia atan ida, Abigail no Jesus mak ezemplu diʼak kona-ba tau fiar ba ema neʼebé la perfeitu.

13. Saida mak bele halo susar ba ita atu tau fiar ba ema seluk?

¹³ Karik ita fó sai buat privadu ba irmaun ka irmán ruma, no liutiha tempu balu ita hatene katak nia la rai didiʼak ita-nia segredu. Klaru katak neʼe halo ita sente laran-kanek tebes. Porezemplu, irmán ida fó sai buat privadu ba katuas kongregasaun ida no fiar katak katuas neʼe sei rai didiʼak ninia segredu. Iha loron tuirmai, katuas neʼe nia feen kontaktu irmán neʼe atu anima nia tanba hatene irmán neʼe nia problema. Tan neʼe irmán neʼe sente susar atu tau fiar tan ba katuas neʼe. Maibé nia hakbesik ba katuas seluk, no katuas neʼe ajuda nia atu tau fiar fali ba katuas sira. Irmán neʼe halo buat neʼebé diʼak tanba nia husu ajuda.

14. Saida mak ajuda irmaun ida atu hametin fali ninia fiar?

¹⁴ Ba tempu kleur, irmaun ida sente katak nia labele tau fiar ba katuas naʼin-rua tanba problema entre sira. Tuirmai nia komesa hanoin kona-ba liafuan husi irmaun ida neʼebé nia respeitu: “Satanás mak ita-nia inimigu, laʼós irmaun-irmán sira.” Irmaun neʼe hanoin kleʼan kona-ba liafuan sira-neʼe, halo orasaun, no ikusmai nia konsege hadame malu fali ho katuas sira-neʼe.

15. Tanbasá presiza tempu atu tau fiar fali ba ema ruma? Fó toʼok ezemplu ida.

¹⁵ Ita lakon ona knaar ruma ka lae? Se nuneʼe, karik ita sente laran-kanek tebes. Irmán Grete ho ninia inan mak Testemuña neʼebé laran-metin bainhira Nazi ukun rai-Alemaña antes Funu Mundiál Segundu. Iha tempu neʼebá, governu Alemaña bandu ita-nia atividade sira. Irmán Grete simu knaar atu ketik kópia husi Livru Haklaken hodi bele fahe ba maluk fiar-naʼin sira. Maibé bainhira irmaun sira hatene katak ninia aman kontra lia-loos, sira la fó tan knaar neʼe ba irmán Grete tanba sira taʼuk ninia aman sei fó sai informasaun kona-ba kongregasaun ba inimigu sira. Irmán Grete mós hasoru susar seluk tan. Durante Funu Mundiál  Segundu, irmaun sira lakohi fahe revista sira ba irmán Grete no ninia inan, no bainhira hasoru malu iha dalan, irmaun-irmán lakohi koʼalia ho sira. Ida-neʼe hakanek tebes ninia laran no presiza tempu kleur atu perdua sira no tau fiar fali ba sira. Ikusmai, nia rekoñese katak Jeová perdua ona sira, entaun nia mós tenke perdua sira.

16. Tanbasá ita presiza hakaʼas an atu tau fiar fali ba irmaun-irmán sira?

¹⁶ Se Ita hasoru ona situasaun hanesan neʼe, hakaʼas an atu tau fiar fali ba ema neʼebé hakanek Ita-nia laran. Karik presiza tempu kleur, maibé Ita-nia hakaʼas an sei la sai saugati deʼit. Porezemplu, kuandu ita kabun moras tanba han sala buat ruma, baibain ita sei kuidadu liután ho buat neʼebé ita han. Maibé neʼe la dehan katak ita para atu han ai-han tanba deʼit ita hetan kabun moras dala ida. Nuneʼe mós, maski ita hasoru situasaun ida neʼebé la diʼak, ita labele husik ida-neʼe atu hapara ita tau fiar ba irmaun-irmán sira neʼebé la perfeitu. Bainhira ita tau fiar fali ba ema seluk, ita sei sente kontente liu no neʼe sei ajuda ita tau fokus ba buat neʼebé ita bele halo atu ema hotu iha kongregasaun fiar malu.

17. Tanbasá tau fiar ba ema seluk mak importante? Iha lisaun tuirmai, ita sei aprende saida?

¹⁷ Ohin loron, ema ladún fiar malu, maibé ita tau fiar ba irmaun-irmán sira tanba ita hadomi malu. Rezultadu mak ita sente haksolok no iha unidade agora no neʼe mós sei ajuda ita kuandu hasoru susar iha futuru. Maibé oinsá se ema ruma hakanek Ita-nia laran no Ita la fiar tan sira? Koko atu haree situasaun neʼe tuir Jeová nia haree, aplika Bíblia nia prinsípiu sira, haburas domin ba irmaun-irmán sira no aprende husi ezemplu sira iha Bíblia. Ita bele kura ita-nia laran-kanek no tau fiar fali ba ema seluk. Bainhira ita halo ida-neʼe, ita sei hetan bensaun boot tanba iha belun barak neʼebé “laran-metin liu fali maun-alin”. (Prov 18:24) Ema seluk mós presiza hatene katak sira bele tau fiar ba ita. Iha lisaun tuirmai, ita sei aprende kona-ba saida mak ita bele halo atu irmaun-irmán sira bele tau fiar ba ita.