1. Tuir Malaquias 3:16, livru saida mak Jeová hakerek daudaun, no saida mak hakerek iha livru neʼe nia laran?

 DURANTE tinan rihun ba rihun, Jeová hakerek livru espesiál ida. Livru neʼe iha ema oioin nia naran, hahú ho Abel nia naran, nia mak testemuña primeiru neʼebé laran-metin. b (Lc 11:50, 51) Depois neʼe, Jeová kontinua aumenta naran seluk ba livru neʼe, no ohin loron ema millaun ba millaun nia naran hakerek ona iha livru neʼe. Bíblia bolu ida-neʼe nuʼudar livru atu “hanoin-hetan” ka “livru moris nian”. Iha lisaun neʼe, ita sei uza fraze “livru moris nian” atu refere ba livru neʼe.​—Lee Malaquias 3:16; Apok 3:5; 17:8.

2. Sé-nia naran mak hakerek iha livru moris nian no ita presiza halo saida atu ita-nia naran bele hakerek iha livru neʼe?

² Ema hotu neʼebé respeitu ka hamtaʼuk Jeová no mós hafolin ninia naran, Jeová hakerek sira-nia naran iha livru neʼe. Sira iha oportunidade atu moris ba nafatin. Ohin loron, Maromak bele hakerek ita-nia naran iha livru neʼe se ita haburas relasaun diʼak ho nia liuhusi tau fiar ba ninia Oan-Mane Jesus Kristu nia sakrifísiu. (João 3:16, 36) Ita hotu hakarak ita-nia naran hakerek iha livru neʼe, maski ita-nia esperansa mak atu moris iha lalehan ka iha rai.

3-4. (a) Ema hotu neʼebé naran hakerek ona iha livru moris nian sei hetan moris ba nafatin ka lae? Esplika toʼok. (b) Iha lisaun neʼe no lisaun tuirmai, ita sei aprende saida?

³ Neʼe katak ema hotu neʼebé naran hakerek ona iha  livru neʼe sei hetan moris ba nafatin ka lae? Ita bele hetan resposta husi Jeová nia liafuan ba Moisés iha Éxodo 32:33. Jeová hatete: “Ema neʼebé halo sala hasoru haʼu, haʼu sei hamoos ninia naran husi haʼu-nia livru.” Entaun, Maromak bele hamoos ka apaga ema nia naran husi livru neʼe. Neʼe hanesan naran neʼe hakerek deʼit ho lapis. (Apok 3:5, nota) Ita tenke hakaʼas an atu Maromak la hamoos ita-nia naran husi livru neʼe toʼo tempu neʼebé ita-nia naran hakerek ho permanente iha livru neʼe hanesan hakerek ho lapizeira.

⁴ Karik ida-neʼe hamosu pergunta balu. Porezemplu, saida mak Bíblia fó sai kona-ba ema neʼebé naran hakerek ona iha livru moris nian no mós ema neʼebé naran la hakerek iha livru neʼe? Bainhira mak ema neʼebé naran hakerek ona iha livru neʼe simu moris ba nafatin? Oinsá ho ema neʼebé mate ona no seidauk iha oportunidade atu koñese Jeová? Sira-nia naran bele hakerek iha livru neʼe ka lae? Iha lisaun neʼe no lisaun tuirmai, ita sei hatán ba pergunta sira-neʼe.

NARAN SIRA IHA LIVRU NEʼE

5-6. (a) Tuir Filipe 4:3, sé-nia naran mak hakerek ona iha livru moris nian? (b) Bainhira mak sira-nia naran sei hakerek permanente iha livru neʼe?

⁵ Sé-nia naran mak hakerek ona iha livru moris nian? Atu hatán ba pergunta neʼe, ita sei koʼalia kona-ba ema grupu lima. Ema sira-neʼe balu nia naran hakerek iha livru moris nian no balu lae.

⁶ Grupu primeiru mak sira neʼebé Maromak hili atu ukun hamutuk ho Jesus iha lalehan. Agora daudaun, sira-nia naran hakerek iha livru moris nian ka lae? Sin. Kona-ba ema neʼebé Maromak hili atu ukun hamutuk ho Jesus  iha lalehan, apóstolu Paulo dehan katak sira-nia naran hakerek ona iha livru moris nian. Nia fó sai ida-neʼe iha ninia karta ba “maluk serbisu-naʼin” sira iha Filipe. (Lee Filipe 4:3.) Maibé atu Maromak la hamoos sira-nia naran, sira presiza kontinua laran-metin. Bainhira sira simu sinál ikus antes sira mate ka antes terus boot hahú, sira-nia naran sei hakerek permanente iha livru neʼe.​—Apok 7:3.

7. Tuir Apokalipse 7:16, 17, bainhira mak ema-lubun boot nia naran hakerek permanente iha livru moris nian?

⁷ Grupu segundu mak ema-lubun boot husi bibi-malae seluk. Sira-nia naran hakerek ona iha livru moris nian ka lae? Sin. Sira-nia naran nafatin iha livru neʼe depois sira liu Armagedon ka lae? Sin. (Apok 7:14) Jesus hatete katak ema-lubun boot sei “hetan moris rohan-laek”. (Mt 25:46) Maibé sira neʼebé liu Armagedon sei la hetan kedas moris rohan-laek. Neʼe hanesan sira-nia naran nafatin hakerek ho lapis. Durante Kristu nia Ukun ba Tinan Rihun Ida, Jesus “sei tau matan ba sira hanesan bibi-atan no sei dirije sira ba bee-matan moris nian”. Sira neʼebé halo tuir Kristu nia matadalan no Maromak deklara katak sira laran-metin iha tesi-lia ikus, sira-nia naran sei hakerek permanente iha livru moris nian.​—Lee Apokalipse 7:16, 17.

8. Sé-nia naran mak la hakerek iha livru moris nian, no saida mak sei akontese ba sira?

⁸ Grupu terseiru mak bibi-timur neʼebé sei lakon iha Armagedon. Sira-nia naran la hakerek iha livru moris nian. Jesus hatete katak sira “sei lakon ba nafatin”. (Mt 25:46) Maromak dirije apóstolu Paulo atu hakerek katak “Naʼi sei tesi-lia hodi kastigu ema sira-neʼe. Sira sei lakon ba nafatin”. (2 Tes 1:9; 2 Ped 2:9) Neʼe inklui ema oioin neʼebé ho neon halo sala kontra espíritu santu durante ema nia istória. Sira mós sei lakon ba nafatin. Klaru katak sira sei la hetan moris-hiʼas. (Mt 12:32; Mc 3:28, 29; Ebr 6:4-6) Mai ita koʼalia kona-ba grupu rua tan neʼebé sei hetan moris-hiʼas iha rai.

SIRA NEʼEBÉ SEI HETAN MORIS-HIʼAS

9. Tuir Apóstolu 24:15, grupu rua saida mak sei hetan moris-hiʼas iha rai, no saida mak la hanesan entre grupu rua neʼe?

⁹ Bíblia koʼalia kona-ba ema grupu rua neʼebé iha oportunidade atu moris ba nafatin iha rai, neʼe mak “ema neʼebé hatudu hahalok loos” no “ema neʼebé hatudu hahalok la loos”. (Lee Apóstolu 24:15.) “Ema neʼebé hatudu hahalok loos” mak sira neʼebé serbí Jeová ho laran-metin antes sira mate. No “ema neʼebé hatudu hahalok la loos” mak sira neʼebé la serbí Jeová antes sira mate. Dala barak, sira la hatudu katak sira ema laran-loos. Tanba grupu rua neʼe sei hetan moris-hiʼas, neʼe katak sira-nia naran hakerek iha livru moris nian ka lae? Atu hatán ba pergunta neʼe, mai ita koʼalia kona-ba grupu rua neʼe.

10. Tanbasá “ema neʼebé hatudu hahalok loos” hetan moris-hiʼas, no sira balu sei hetan priviléjiu saida? (Haree mós esplikasaun kona-ba moris hiʼas iha rai husi “Pergunta husi lee-naʼin” iha Livru Haklaken neʼe.)

¹⁰ Grupu númeru haat mak “ema neʼebé hatudu hahalok loos”. Antes mate, sira-nia naran hakerek ona iha livru moris nian. Maromak hamoos sira-nia naran husi livru neʼe bainhira sira mate ka lae? Lae, tanba sira kontinua “moris” iha Jeová nia memória. Jeová “laʼós Maromak  ba ema neʼebé mate, maibé Maromak ba ema neʼebé moris. Ba nia sira hotu sei moris hela”. (Lc 20:38) Neʼe katak bainhira ema neʼebé hatudu hahalok loos hetan moris-hiʼas iha rai, sira-nia naran nafatin hakerek iha livru moris nian, maibé seidauk permanente. (Lc 14:14) Ita bele fiar katak ema sira-neʼe balu sei serbí nuʼudar “ulun-naʼin iha mundu tomak”.​—Sal 45:16.

11. “Ema neʼebé hatudu hahalok la loos” presiza aprende saida atu sira-nia naran bele hakerek iha livru moris nian?

¹¹ Grupu númeru lima mak “ema neʼebé hatudu hahalok la loos”. Karik tanba sira la hatene Jeová nia ukun-fuan, sira hatudu hahalok la loos antes sira mate. Tan neʼe sira-nia naran la hakerek iha livru moris nian. Maibé Maromak sei fó moris hiʼas ba sira no fó sira oportunidade atu sira-nia naran bele hakerek iha livru neʼe. “Ema neʼebé hatudu hahalok la loos” presiza hetan ajuda barak. Antes mate, sira balu halo hahalok neʼebé aat tebes. Tan neʼe sira presiza aprende kona-ba oinsá atu moris tuir Jeová nia matadalan. Atu bele hanorin sira, Maromak nia Ukun sei dirije programa hanorin nian neʼebé boot liu iha ema nia istória.

12. (a) Sé mak sei hanorin ema neʼebé hatudu hahalok la loos? (b) Saida mak sei akontese ba ema neʼebé lakohi halo tuir buat neʼebé sira aprende?

¹² Sé mak sei hanorin ema neʼebé hatudu hahalok la loos? Ema-lubun boot no mós ema neʼebé hatudu hahalok loos neʼebé sei hetan moris-hiʼas. Ema neʼebé hatudu hahalok la loos tenke haburas relasaun diʼak ho Jeová no dedika an ba nia, atu nuneʼe sira-nia naran bele hakerek iha livru moris nian. Jesus Kristu no mós ninia alin sira sei haree se ema sira-neʼe halo tuir ka la halo tuir buat neʼebé sira aprende. (Apok 20:4) Sira neʼebé lakohi halo tuir sei lakon ba nafatin, maski karik sira idade 100. (Isa 65:20) Jeová no  Jesus bele hatene ema nia laran no sira sei la husik ema ida atu estraga mundu foun.​—Isa 11:9; 60:18; 65:25; João 2:25.

MORIS HIʼAS ATU HETAN MORIS NO ATU HETAN TESI-LIA

13-14. (a) Iha tempu uluk, oinsá ita komprende Jesus nia liafuan iha João 5:29? (b) Ita presiza tau atensaun ba liafuan saida deʼit iha eskritura neʼe?

¹³ Jesus mós koʼalia kona-ba ema neʼebé sei hetan moris-hiʼas iha rai. Porezemplu, Jesus hatete: “Keta hakfodak kona-ba neʼe, tanba oras sei toʼo mai kuandu ema hotu neʼebé iha rate laran sei rona ninia lian no sai husi rate. Sira neʼebé halo buat diʼak sei moris hiʼas atu hetan moris rohan-laek, no sira neʼebé halo hahalok aat sei moris hiʼas atu hetan tesi-lia.” (João 5:28, 29) Neʼe katak sá?

¹⁴ Uluk ita hanoin katak Jesus nia liafuan sira-neʼe refere ba ema nia hahalok depois sira hetan moris-hiʼas, neʼe katak ema balu neʼebé moris hiʼas sei hatudu hahalok diʼak no sira seluk sei hatudu hahalok la diʼak. Maibé iha eskritura neʼe, Jesus la dehan katak ema neʼebé foin moris hiʼas sei halo buat diʼak ka sei halo hahalok aat. Tuir loloos, iha língua orijinál, Jesus uza liafuan neʼebé refere ba pasadu. Nia koʼalia kona-ba ema neʼebé uluk “halo buat diʼak” no ema neʼebé uluk “halo hahalok aat”. Liafuan sira-neʼe refere ba hahalok neʼebé ema halo ona antes sira mate. Neʼe klaru loos ka lae? Tuir loloos, Maromak sei la husik ema atu halo hahalok aat iha mundu foun. “Ema neʼebé hatudu hahalok la loos”, sira halo hahalok aat antes sira mate. Entaun oinsá ho Jesus nia liafuan “moris hiʼas atu hetan moris rohan-laek” no “moris hiʼas atu hetan tesi-lia”?

15. Sé mak sei “moris hiʼas atu hetan moris rohan-laek”, no tanbasá?

¹⁵ Ema neʼebé hatudu hahalok loos antes mate sei “moris hiʼas atu hetan moris rohan-laek” tanba sira-nia naran hakerek ona iha livru moris nian. Ema neʼebé “halo buat diʼak” neʼebé temi iha João 5:29 mak hanesan ho “ema neʼebé hatudu hahalok loos” neʼebé temi iha Apóstolu 24:15. Esplikasaun neʼe tuir duni Roma 6:7 neʼebé hatete: “Ema neʼebé mate, nia selu ona tusan hotu ba ninia sala.” Bainhira sira mate, Jeová perdua tiha sala neʼebé uluk sira halo, maibé Jeová kontinua hanoin-hetan sira-nia laran-metin. (Ebr 6:10) Ema neʼebé hatudu hahalok loos no hetan moris-hiʼas, presiza kontinua hatudu laran-metin atu nuneʼe sira-nia naran labele hamoos husi livru moris nian.

16. “Moris hiʼas atu hetan tesi-lia” refere ba saida?

¹⁶ Oinsá ho ema neʼebé halo hahalok aat antes sira mate? Maski Maromak perdua ona sira-nia sala bainhira sira mate, maibé antes sira mate, sira la serbí Jeová. Sira-nia naran la hakerek iha livru moris nian. “Sira neʼebé halo hahalok aat” mak hanesan ho “ema neʼebé hatudu hahalok la loos” neʼebé temi iha Apóstolu 24:15. Sira sei “moris hiʼas atu hetan tesi-lia”, c neʼe katak Jesus sei haree ka ezamina sira-nia hahalok. (Lc 22:30) Liutiha tempu balu mak Jesus sei hatene se sira-nia naran bele hakerek iha livru moris nian ka lae. Ema sira-neʼe tenke husik tiha sira-nia hahalok uluk  nian no dedika an ba Jeová atu sira-nia naran bele hakerek iha livru neʼe.

17-18. Ema hotu neʼebé moris hiʼas iha rai presiza halo saida, no saida mak “hahalok” neʼebé temi iha Apokalipse 20:12, 13?

¹⁷ Maski ema ida hatudu hahalok loos ka la loos antes nia mate, maibé bainhira nia moris hiʼas, nia presiza halo tuir ukun-fuan iha livru foun neʼebé sei fó sai durante tinan 1.000. Apóstolu João fó sai kona-ba vizaun ida, hodi dehan: “Haʼu haree ema sira neʼebé mate ona, kiʼik no boot, sira hamriik iha kadunan nia oin, no livru sira loke tiha. Maibé, iha mós livru ida seluk neʼebé loke tiha; neʼe mak livru moris nian. Liuhusi buat sira neʼebé hakerek iha livru sira-neʼe mak ema mate sira sei hetan tesi-lia tuir sira-nia hahalok.”​—Apok 20:12, 13.

¹⁸ Maromak sei tesi-lia ba ema tuir “hahalok” saida? Hahalok neʼebé sira hatudu antes mate ka lae? Lae. Hanoin-hetan katak Maromak perdua ona sira-nia sala bainhira sira mate. Entaun neʼe katak “sira-nia hahalok” la refere ba sira-nia dalan moris uluk nian. Maibé neʼe refere ba dalan neʼebé sira halo tuir buat neʼebé sira aprende iha mundu foun. Ema laran-metin sira hanesan Noé, Samuel, David no Daniel tenke aprende kona-ba Jesus Kristu no tau fiar ba Jesus nia sakrifísiu sá tan ho ema neʼebé uluk hatudu hahalok la loos, sira presiza aprende buat barak liután.

19. Saida mak sei akontese ba sira neʼebé lakohi simu oportunidade furak neʼe?

¹⁹ Saida mak sei akontese ba sira neʼebé lakohi simu oportunidade furak neʼe? Apokalipse 20:15 hatete: “Ema sira neʼebé naran la hakerek iha livru moris nian sei soe tiha ba tasi neʼebé iha ahi-lakan.” Sin, sira sei lakon ba nafatin. Entaun, importante tebes atu hakaʼas an hodi ita-nia naran hakerek iha livru moris nian no hakerek permanente iha livru neʼe.

20. Serbisu furak saida mak ita sei halo durante Kristu nia Ukun ba Tinan Rihun Ida? (Haree dezeñu iha livru oin.)

²⁰ Jesus nia Ukun ba Tinan Rihun Ida sei furak tebes! Iha tempu neʼebá, ita sei halaʼo programa hanorin neʼebé boot liu iha ema nia istória. Maibé neʼe mós tempu neʼebé Jesus ezamina ema neʼebé hatudu hahalok loos no mós hatudu hahalok la loos. (Isa 26:9; Após 17:31) Oinsá serbisu hanorin nian sei halaʼo iha mundu foun? Lisaun tuirmai sei ajuda ita komprende no hafolin serbisu furak neʼe.