Haree toʼok Bíblia nia resposta.

Apóstolu 24:15 fó-hatene ita katak sei iha moris-hiʼas “ba ema neʼebé hatudu hahalok loos no mós ema neʼebé hatudu hahalok la loos”. Ema neʼebé hatudu hahalok loos mak ema neʼebé halo tuir Maromak antes sira mate, tan neʼe sira-nia naran hakerek iha livru moris nian. (Mal 3:16) Ema neʼebé hatudu hahalok la loos mak ema neʼebé ladún iha oportunidade atu aprende kona-ba Jeová antes sira mate, tan neʼe sira-nia naran la hakerek iha livru moris nian.

João 5:28, 29 mós koʼalia kona-ba grupu rua neʼebé temi iha Apóstolu 24:15. Jesus dehan katak “sira neʼebé halo buat diʼak sei moris-hiʼas atu hetan moris rohan-laek, no sira neʼebé halo hahalok aat sei moris hiʼas atu hetan tesi-lia”. Ema neʼebé hatudu hahalok loos halo buat diʼak antes sira mate. Sira sei moris-hiʼas atu hetan moris ba nafatin tanba sira-nia naran nafatin hakerek iha livru moris nian. Maibé ema neʼebé hatudu hahalok la loos halo hahalok aat antes sira mate. Sira sei moris-hiʼas atu hetan tesi-lia. Sira-nia naran seidauk hakerek iha livru moris nian, no durante tempu neʼe Jesus sei haree didiʼak ka ezamina sira-nia hahalok. Sira sei aprende kona-ba Jeová no sira-nia naran bele hakerek iha livru moris nian.

Apokalipse 20:12, 13 esplika katak ema hotu neʼebé moris-hiʼas tenke halo tuir “buat sira neʼebé hakerek iha livru sira-neʼe”, neʼe mak ukun-fuan foun neʼebé Maromak sei fó mai ita iha mundu foun. Jeová sei halakon tiha ema sira neʼebé lakohi halo tuir.—Isa 65:20.

Daniel 12:2 fó-hatene nanis katak ema balu neʼebé toba hela iha rate sei hadeer atu “hetan moris rohan-laek no balu seluk hetan moe ba nafatin”. Versíkulu neʼe koʼalia kona-ba buat neʼebé akontese ba ema sira neʼebé hetan moris-hiʼas. Sira balu sei “hetan moris rohan-laek” ka balu seluk sei “hetan moe ba nafatin”. Entaun iha tinan 1.000 nia rohan, ema balu sei simu moris rohan-laek no ema balu tan sei lakon tiha ba nafatin.—Apok 20:15; 21:3, 4.

Hanoin toʼok ai-knanoik ida. Ita bele kompara grupu rua neʼe nia situasaun ho ema estranjeiru sira neʼebé hakarak atu hela iha rai seluk. Ema neʼebé hatudu hahalok loos mak hanesan ho ema estranjeiru sira neʼebé simu vistu serbisu nian ka vistu rezidénsia neʼebé hatudu katak governu rekoñese sira no sira iha liberdade. Maibé ema neʼebé hatudu hahalok la loos mak hanesan ema estranjeiru neʼebé hetan vistu turista ka vistu temporáriu. Sira presiza hatudu katak sira merese kontinua hela iha rai neʼe. Nuneʼe mós ho ema neʼebé hatudu hahalok la loos neʼebé hetan moris-hiʼas presiza halo tuir Jeová nia ukun-fuan sira no hatudu hahalok loos atu bele kontinua hela iha Paraízu. Ema estranjeiru hotu neʼebé iha vistu turista ka vistu rezidénsia ikusmai bele sai sidadaun ka deporta fali. Desizaun ikus depende ba sira-nia hanoin no hahalok iha nasaun foun neʼe. Nuneʼe mós ho ema neʼebé hetan moris-hiʼas, atu bele kontinua moris, neʼe depende ba sira-nia laran-metin no hahalok iha mundu foun.

Jeová mak Maromak neʼebé laran-sadiʼa no hatudu justisa. (Deut 32:4; Sal 33:5) Nia sei hatudu domin hodi fó moris hiʼas ba ema neʼebé hatudu hahalok loos no ema neʼebé hatudu hahalok la loos. Maibé nia hakarak sira atu halo tuir ninia matadalan kona-ba buat neʼebé loos no sala. Só deʼit ema neʼebé hadomi nia no halo tuir ninia matadalan mak bele kontinua moris iha mundu foun.