Iha 1 Korinto 15:8, Paulo hatete: “Ikusliu, nia mosu ba haʼu, tan neʼe haʼu hanesan bebé neʼebé moris mai sedu liu.” Uluk ita dehan katak Paulo nia liafuan sira-neʼe refere ba ninia esperiénsia bainhira nia haree vizaun kona-ba Jesus iha lalehan. Neʼe hanesan nia simu priviléjiu atu moris mai ka moris fali nuʼudar kriatura espíritu tinan barak antes ida-neʼe hahú. Maibé depois estuda liután versíkulu neʼe, ita presiza halo mudansa ba ita-nia esplikasaun.

Paulo nia liafuan sira-neʼe refere ba buat neʼebé akontese iha tempu neʼebé nia sai ema Kristaun. Maibé ninia liafuan “moris mai sedu liu” katak sá? Iha esplikasaun oioin.

Nia sai ema Kristaun derrepente no neʼe lori susar ba nia. Bebé neʼebé moris sedu liu baibain halo ema hakfodak. Saul neʼebé ikusmai ema koñese nuʼudar Paulo, halo viajen ba Damasku atu kontra ema Kristaun sira iha neʼebá, no nia la espera atu haree vizaun kona-ba Jesus neʼebé moris hiʼas ona. Ema Kristaun sira iha Damasku neʼebé Paulo hakarak fó-terus mós sente hakfodak bainhira Paulo sai ema Kristaun. Akontesimentu neʼe mós hamosu susar ba nia no nia mós labele haree ba tempu balu.—Após 9:1-9, 17-19.

Nia sai ema Kristaun iha “tempu neʼebé sala”. Liafuan Gregu orijinál neʼebé tradús nuʼudar “moris mai sedu” bele mós tradús nuʼudar “moris mai iha tempu neʼebé sala”. Bíblia Liafuan diak ba imi, segunda edisaun tradús fraze sira-neʼe, hodi dehan: “Hanesan . . . ema neʼebé moris mai iha tempu laloos.” Iha tempu neʼebé Paulo sai ema Kristaun, Jesus fila fali ona ba lalehan. La hanesan ho ema sira neʼebé Paulo temi iha versíkulu sira antes neʼe, Paulo la haree Jesus neʼebé moris hiʼas ona antes Jesus saʼe ba lalehan. (1 Kor 15:4-8) Jesus mosu derrepente ba Paulo no fó oportunidade ba Paulo atu haree Jesus, maski ida-neʼe haree hanesan iha “tempu neʼebé sala”.

Nia hatudu haraik an hodi uza liafuan sira-neʼe. Tuir matenek-naʼin balu, fraze neʼebé Paulo uza bele rona hanesan hatún ema. Se nuneʼe, nia rekoñese katak nia la merese atu simu priviléjiu nuʼudar apóstolu. Tuir loloos, Paulo hatutan tan: “Haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba uluk haʼu fó-terus ba Maromak nia kongregasaun. Maibé haʼu bele sai hanesan agora tanba Maromak nia laran-diʼak neʼebé boot.”—1 Kor 15:9, 10.

Entaun, Paulo nia liafuan bele refere ba oinsá Jesus mosu ba nia derrepente deʼit no lori susar, iha tempu neʼebé sala ka refere ba faktu katak nia la merese atu simu priviléjiu atu haree vizaun furak neʼe. Maibé, buat neʼebé importante mak Paulo hafolin akontesimentu neʼe. Neʼe ajuda nia fiar metin katak Jesus moris hiʼas ona. Tan neʼe mak dala barak nia konta esperiénsia neʼe bainhira nia haklaken kona-ba Jesus nia moris hiʼas.—Após 22:6-11; 26:13-18.