1. Lakleur tan Jesus sei halo saida?

 ITA moris iha tempu neʼebé importante tebes! Lakleur tan Jesus sei tesi-lia ba ema hotu iha mundu. Jesus fó-hatene ita saida mak sei akontese iha mundu antes nia halaʼo tesi-lia. Nia fó sai “sinál” ba ninia dixípulu kona-ba buat neʼebé sei akontese kuandu nia toʼo ona mai no “mundu neʼe nia rohan mai ona”. (Mt 24:3) Profesia neʼe hakerek iha Mateus kapítulu 24 no 25, no mós iha Marcos 13 no Lucas 21.

2. Iha lisaun neʼe ita sei aprende saida, no oinsá neʼe ajuda ita?

² Jesus uza ai-knanoik tolu nuʼudar avizu atu ajuda ita. Neʼe mak ai-knanoik kona-ba bibi-malae no bibi-timur, feto virjen naʼin-sanulu, no mós osan talentu. Ai-knanoik ida-idak sei ajuda ita atu komprende katak Jesus sei tesi-lia ba ema bazeia ba ema neʼe nia hahalok. Iha lisaun neʼe, ita sei aprende kona-ba ai-knanoik sira-neʼe no haree oinsá atu aplika. Primeiru, ita sei koʼalia ai-knanoik kona-ba bibi-malae no bibi-timur.

BIBI-MALAE NO BIBI-TIMUR

3. Bainhira mak Jesus sei tesi-lia ba ema?

³ Iha ai-knanoik kona-ba bibi-malae no bibi-timur, Jesus hatete katak nia sei tesi-lia ba ema bazeia ba dalan neʼebé sira simu liafuan diʼak no apoia Kristu nia alin sira. (Mt 25:​31-46) Iha “terus boot” nia rohan, foin antes funu Armagedon hahú, Jesus sei tesi-lia ba ema. (Mt 24:21) Hanesan bibi-atan ida haketak bibi-malae husi bibi-timur, Jesus sei haketak sira neʼebé apoia ninia alin  sira ho laran-metin husi sira neʼebé la apoia.

4. Tuir Isaias 11:​3, 4, tanbasá ita bele fiar katak Jesus sei tesi-lia tuir justisa? (Haree dezeñu iha livru oin.)

⁴ Nuʼudar Juís neʼebé Jeová hili ona, Jesus sei tesi-lia tuir justisa. (Lee Isaias 11:​3, 4.) Jesus buka-hatene ema ida-idak nia hahalok, hanoin, no liafuan, inklui oinsá sira trata Jesus nia alin sira. (Mt 12:​36, 37; 25:40) Jesus sei hatene sé mak apoia ninia alin sira no serbisu neʼebé sira halo. a Dalan importante ida atu apoia Kristu nia alin sira mak hodi hola parte iha serbisu haklaken. Jesus sei haree sira nuʼudar ema “laran-loos”, no sira sei iha oportunidade atu hetan “moris rohan-laek” iha mundu. (Mt 25:46; Apok 7:​16, 17) Neʼe mak bensaun neʼebé furak ba ema neʼebé laran-metin! Hodi laran-metin durante no depois terus boot, sira-nia naran sei nafatin hakerek iha “livru moris nian”.—Apok 20:15.

5. Lisaun saida mak ita bele aprende husi ai-knanoik kona-ba bibi-malae no bibi-timur, no sé mak hetan benefísiu husi ida-neʼe?

⁵ Hatudu katak Ita laran-metin. Jesus nia ai-knanoik kona-ba bibi-malae no bibi-timur aplika liu ba ema neʼebé iha esperansa atu moris ba nafatin iha rai. Sira hatudu sira-nia fiar hodi apoia Kristu nia alin sira iha serbisu haklaken, no mós hodi halo tuir matadalan husi atan laran-metin no matenek neʼebé Jesus hili ona. (Mt 24:45) Maibé sira neʼebé iha esperansa atu bá lalehan mós presiza tau atensaun ba ai-knanoik neʼe. Tanbasá? Tanba Jesus haree didiʼak ba sira-nia hahalok, hanoin, no liafuan. Sira mós presiza hatudu laran-metin. Jesus konta ai-knanoik rua tan neʼebé fó sai avizu espesífiku ba ema neʼebé iha esperansa atu bá lalehan. Ita mós bele hetan ai-knanoik sira-neʼe iha Mateus kapítulu 25. Agora, mai ita koʼalia ai-knanoik kona-ba feto virjen naʼin-sanulu.

FETO VIRJEN NAʼIN-SANULU

6. Oinsá mak feto virjen naʼin-lima hatudu katak sira matenek? (Mateus 25:​6-10)

⁶ Iha ai-knanoik neʼe, Jesus koʼalia kona-ba feto virjen naʼin-sanulu neʼebé bá atu hasoru noivu. (Mt 25:​1-4) Sira hotu hakarak tama hamutuk ho noivu ba festa kazamentu nian. Jesus hatete katak sira naʼin-lima mak “matenek”, no naʼin-lima seluk mak “beik”. Feto virjen neʼebé matenek prepara an no matan-moris. Sira prontu atu hein ba noivu maski nia mai tarde iha kalan-boot. Tan neʼe, sira lori ahi-oan neʼebé uza mina, no mós mina estra atu sira-nia ahi-oan nafatin lakan kuandu noivu mai tarde. (Lee Mateus 25:​6-10.) Bainhira noivu mai, feto virjen neʼebé matenek tama ba festa kazamentu hamutuk ho noivu. Hanesan neʼe mós ho ema Kristaun neʼebé iha esperansa atu bá lalehan, neʼebé prepara an no matan-moris hodi laran-metin toʼo Kristu mai. Sira sei hetan kolen atu hamutuk ho Noivu, neʼe mak atu ukun hamutuk ho Jesus iha lalehan. b (Apok 7:​1-3) Maibé oinsá ho feto virjen neʼebé beik?

7. Saida mak akontese ba feto virjen naʼin-lima neʼebé beik, no tanbasá?

⁷ Feto virjen naʼin-lima neʼebé beik la  prontu kuandu noivu toʼo mai. Tanba sira-nia ahi-oan besik atu mate no sira la lori mina estra, kuandu sira rona katak lakleur tan noivu sei toʼo, sira presiza bá atu hola mina. Sira seidauk fila kuandu noivu toʼo mai. Iha tempu neʼebá, “feto virjen sira neʼebé prontu ona tama hamutuk ho noivu ba festa kazamentu nian, tuirmai odamatan taka tiha”. (Mt 25:10) Lakleur kuandu feto virjen neʼebé beik toʼo no hakarak tama, noivu hatete ba sira: “Haʼu la koñese imi.” (Mt 25:​11, 12) Feto virjen sira-neʼe la prepara an atu hein ba noivu nuʼudar noivu mai tarde. Ema neʼebé iha esperansa atu bá lalehan bele aprende saida?

8-9. Ema neʼebé iha esperansa atu bá lalehan bele aprende saida husi ai-knanoik kona-ba feto virjen? (Haree mós dezeñu.)

⁸ Hatudu katak Ita prepara an no matan-moris. Jesus la fó sai katak sei iha grupu rua husi ema neʼebé atu bá lalehan, katak grupu ida neʼebé prepara an atu hein toʼo mundu nia rohan no grupu ida neʼebé la prepara an. Maibé Jesus esplika saida mak sei akontese ba ema neʼebé iha esperansa atu bá lalehan se sira la prepara an atu tahan ho laran-metin toʼo rohan. Se sira la prepara an, sira sei la simu sira-nia kolen. (João 14:​3, 4) Neʼe mak buat neʼebé sériu duni! Maski ita-nia esperansa mak atu bá lalehan ka iha rai, ita hotu presiza hanoin-hetan avizu husi ai-knanoik kona-ba feto virjen. Ita ida-idak presiza matan-moris nafatin no prepara an atu tahan toʼo rohan.—Mt 24:13.

⁹ Depois Jesus konta tiha ai-knanoik kona-ba feto virjen atu hanorin katak importante atu prepara an no matan-moris, tuirmai nia konta ai-knanoik kona-ba osan talentu. Ai-knanoik neʼe hanorin kona-ba presiza badinas.

OSAN TALENTU

10. Oinsá atan naʼin-rua hatudu katak sira laran-metin? (Mateus 25:​19-23)

¹⁰ Iha ai-knanoik kona-ba osan talentu, Jesus koʼalia kona-ba atan naʼin-rua neʼebé  laran-metin ba sira-nia naʼi no atan ida neʼebé la laran-metin. (Mt 25:​14-18) Atan naʼin-rua hatudu katak sira laran-metin hodi serbisu makaʼas atu aumenta naʼi nia osan. Antes halo viajen ba rai seluk, sira-nia naʼi fó osan talentu ba sira. Neʼe mak osan neʼebé boot. Atan naʼin-rua neʼebé laran-metin mak badinas no uza osan ho matenek. Rezultadu mak kuandu sira-nia naʼi toʼo mai, sira aumenta naʼi nia osan ba dala rua. Sira-nia naʼi gaba sira no sira hola parte iha “naʼi nia ksolok”. (Lee Mateus 25:​19-23.) Maibé oinsá ho atan terseiru? Saida mak nia halo ho osan neʼebé naʼi fó ba nia?

11. Saida mak akontese ba atan neʼebé “baruk-teen”, no tanbasá?

¹¹ Atan terseiru simu talentu ida maibé nia “baruk-teen”. Ninia naʼi hakarak nia uza osan talentu neʼe ho matenek. Maibé, nia subar osan talentu iha rai okos. Kuandu naʼi toʼo mai, atan neʼe fó fali deʼit osan talentu ba nia. Atan neʼe la hatudu hahalok diʼak. Duké husu deskulpa tanba nia la manán tan osan ba ninia naʼi, atan neʼe duun katak naʼi mak ema “siʼak-teen”. Naʼi la kontente ho atan neʼe. Liután neʼe, naʼi foti tiha osan talentu neʼe husi nia no duni sai atan neʼe husi ninia uma.—Mt 25:​24, 26-30.

12. Atan naʼin-rua neʼebé laran-metin reprezenta sé?

¹² Atan naʼin-rua neʼebé laran-metin reprezenta Kristu nia alin sira neʼebé laran-metin. Naʼi Jesus konvida sira atu ‘hola parte iha sira-nia naʼi nia ksolok’. Sira simu kolen atu bá lalehan, neʼe mak moris-hiʼas primeiru. (Mt 25:​21, 23; Apok 20:5a) Maibé, ezemplu kona-ba atan neʼebé baruk-teen sai nuʼudar avizu ba Kristu nia alin sira. Oinsá?

13-14. Ema Kristaun neʼebé atu bá lalehan bele aprende saida husi ai-knanoik kona-ba osan talentu? (Haree mós dezeñu.)

¹³ Hatudu katak Ita badinas. Iha ai-knanoik kona-ba feto virjen no osan talentu, Jesus la dehan katak ema Kristaun neʼebé atu bá lalehan sei sai baruk-teen. Maibé nia esplika kona-ba  buat neʼebé sei akontese se sira lakon sira-nia badinas. Sira sei la sai ema neʼebé “Maromak bolu no hili ona” no labele hola parte iha Ukun lalehan nian.—2 Ped 1:10.

¹⁴ Jesus nia ai-knanoik kona-ba feto virjen no osan talentu hatudu ho klaru katak ema hotu neʼebé iha esperansa atu bá lalehan presiza prepara an, matan-moris, no badinas. Maibé Jesus fó avizu seluk tan ba sira ka lae? Sin. Ita bele hetan avizu neʼe iha Mateus 24:​40, 41.

SÉ MAK “MAROMAK SEI LORI”?

15-16. Oinsá mak Mateus 24:​40, 41 hatudu katak Kristu nia alin sira presiza matan-moris nafatin?

¹⁵ Antes konta ai-knanoik tolu, Jesus esplika kona-ba tesi-lia ikus ba Kristu nia alin sira. Nia koʼalia kona-ba mane naʼin-rua neʼebé serbisu iha toʼos, no feto naʼin-rua neʼebé dulas trigu. Mane sira-neʼe halo serbisu neʼebé hanesan, nuneʼe mós ho feto sira. Maibé, Jesus hatete katak “Maromak sei lori tiha ida no husik hela ida seluk”. (Lee Mateus 24:​40, 41.) Tuirmai, nia hatete ba dixípulu sira: “Matan-moris nafatin bá, tanba imi la hatene loron neʼebé imi-nia Naʼi sei mai.” (Mt 24:42) Jesus fó sai buat neʼebé hanesan bainhira konta tiha ai-knanoik kona-ba feto virjen. (Mt 25:13) Liafuan sira-neʼe liga malu ka lae? Haree hanesan neʼe duni. Maromak sei “lori” deʼit Kristu nia alin sira neʼebé laran-metin atu ukun hamutuk ho Jesus iha lalehan.—João 14:3.

¹⁶ Hatudu katak Ita matan-moris nafatin. Kristu nia alin sira neʼebé la kontinua matan-moris sei la sai “ema neʼebé Maromak hili ona”. (Mt 24:31) Nuneʼe mós Maromak nia povu hotu, maski sira iha esperansa atu bá lalehan ka moris iha rai, sira hotu presiza matan-moris no laran-metin nafatin.

17. Tanbasá ita la hanoin barak kuandu Jeová hili ema neʼebé iha esperansa atu bá lalehan iha ita-nia tempu?

¹⁷ Ita hatene didiʼak Jeová, tan neʼe ita tau fiar ba Jeová nia desizaun hotu. Ita la hanoin barak kuandu Jeová hili ema balu neʼebé laran-metin atu bá lalehan iha ita-nia tempu. c Ita hanoin-hetan Jesus nia ai-knanoik kona-ba toʼos-uvas no serbisu-naʼin neʼebé hahú serbisu iha tuku lima lokraik. (Mt 20:​1-16) Sira neʼebé simu konvite atu serbisu ba oras uitoan deʼit mós simu kolen neʼebé hanesan ho sira neʼebé serbisu ba oras barak. Ema neʼebé iha esperansa atu bá lalehan mós sei simu kolen neʼebé hanesan maski Jeová hili sira iha tempu neʼebé la hanesan, naran katak sira laran-metin nafatin.

HALO TUIR AVIZU SIRA

18-19. Saida mak ita aprende ona iha lisaun neʼe?

¹⁸ Saida mak ita aprende ona? Ba sira neʼebé iha esperansa atu moris ba nafatin iha rai, ai-knanoik kona-ba bibi-malae no bibi-timur fó-hanoin sira atu laran-metin nafatin ba Jeová agora no tempu terus boot. Iha futuru, Jesus sei tesi-lia ba sira neʼebé laran-metin nuʼudar ema neʼebé sei “hetan moris rohan-laek”.—Mt 25:46.

¹⁹ Ita mós haree ai-knanoik rua nuʼudar avizu ba ema neʼebé iha esperansa atu bá lalehan. Iha Jesus nia ai-knanoik kona-ba feto virjen naʼin-sanulu, naʼin-lima mak  beik no naʼin-lima mak matenek. Sira neʼebé matenek prepara an no matan-moris, no prontu atu hein ba noivu maski nia demora. Maibé feto virjen neʼebé beik la prepara an, tan neʼe noivu lakohi husik sira tama ba festa kazamentu. Ita mós presiza prepara an hein ba Jesus atu halakon mundu aat neʼe, maski tenke hein kleur. Iha ai-knanoik kona-ba osan talentu, ita aprende kona-ba atan naʼin-rua neʼebé badinas. Sira serbisu makaʼas ba sira-nia naʼi no naʼi kontente ho sira. Maibé naʼi la kontente ho atan ida neʼebé baruk-teen. Lisaun mak saida? Ita presiza kontinua halo Jeová nia serbisu ho badinas toʼo mundu neʼe nia rohan. Ikusliu, ita aprende katak Kristu nia alin sira presiza matan-moris nafatin hodi bele simu sira-nia kolen atu bá lalehan. Sira hein namanas atu “halibur hamutuk” ho Jesus iha lalehan. Depois funu Armagedon, sira sei sai Jesus nia noiva iha Bibi-Oan nia festa kazamentu.—2 Tes 2:1; Apok 19:​7, 9.

20. Saida mak Jeová sei halo ba ema neʼebé tau atensaun ba ninia avizu?

²⁰ Lakleur tan Jesus nia tempu atu tesi-lia sei toʼo mai, maibé ita la presiza taʼuk. Se ita kontinua laran-metin, ita-nia Aman iha lalehan sei fó ita “kbiit neʼebé la hanesan baibain” atu nuneʼe “Oan-Mane husi Ema bele simu” ita. (2 Kor 4:7; Lc 21:36) Maski ita-nia esperansa mak atu bá lalehan ka iha rai, ita sei halo kontente ita-nia Aman, se ita tau atensaun ba avizu sira husi Jesus nia ai-knanoik. Tanba Jeová mak laran-diʼak tebes, ita-nia naran sei ‘hakerek iha Maromak nia livru’ moris nian.—Dan 12:1; Apok 3:5.