1-2. Tanbasá Jeová kria ita ho abilidade atu sente kontente liu hodi fó duké simu?

 JEOVÁ kria ema ho abilidade atu sente kontente liu hodi fó duké simu. (Após 20:35) Neʼe katak ita la sente kontente bainhira ita simu prezente ka lae? Lae. Ita sente kontente duni. Maski nuneʼe, ita sei sente kontente liután bainhira ita fó. Tuir loloos, ita hetan benefísiu tanba Jeová kria ita iha dalan hanesan neʼe. Tanbasá?

² Tanba ita rasik bele halo ita-nia an atu sente kontente liu. Ita bele sente ida-neʼe bainhira ita hanoin kona-ba dalan oioin neʼebé ita bele fó ba ema seluk no mós bainhira ita halo ida-neʼe. Furak tebes tanba Jeová kria ita iha dalan hanesan neʼe.—Sal 139:14.

3. Tanbasá Bíblia dehan katak Jeová mak “Maromak neʼebé kontente”?

³ Bíblia hatete katak ema neʼebé fó ba ema seluk mak kontente, tan neʼe ita bele komprende tanbasá Jeová mak “Maromak neʼebé kontente”. (1 Tim 1:11) Nia mak ida neʼebé primeiru fó ba ninia kriatura sira no la iha ida mak laran-luak hanesan nia. Apóstolu Paulo hatete katak liuhusi Jeová mak “ita hetan moris, book an no iha”. (Após 17:28) Liután neʼe, “prezente diʼak ida-idak no prezente hotu neʼebé perfeitu” mai husi Jeová.—Tgo 1:17.

4. Saida mak ita bele halo atu sente kontente liután?

⁴ Karik ita hotu hakarak sente kontente liután kuandu ita fó. Ita bele halo nuneʼe hodi banati-tuir Jeová nia laran-luak. (Éf 5:1) Iha lisaun neʼe, ita sei aprende kona-ba Jeová nia ezemplu, no mós saida mak ita bele halo se ita sente katak ema seluk la hafolin ita-nia laran-luak. Lisaun neʼe sei ajuda ita atu mantein no haburas ita-nia kontente kuandu ita fó.

 BANATI-TUIR JEOVÁ NIA LARAN-LUAK

5. Saida deʼit mak Jeová fó ba ita?

⁵ Iha dalan saida deʼit mak Jeová hatudu laran-luak? Mai ita hanoin kona-ba ezemplu balu. Jeová fó ita buat hotu neʼebé ita presiza. Karik ita la iha rikusoin barak, maibé Jeová sempre ajuda ita atu iha buat neʼebé ita presiza. Porezemplu, nia fó ita ai-han, roupa, no hela-fatin. (Sal 4:8; Mt 6:​31-33; 1 Tim 6:​6-8) Jeová tau matan ita laʼós tanba obrigasaun. Entaun tanbasá mak nia halo nuneʼe?

6. Saida mak ita aprende husi Mateus 6:​25, 26?

⁶ Jeová tau matan ba ita-nia presiza tanba nia hadomi ita. Hanoin toʼok kona-ba Jesus nia liafuan iha Mateus 6:​25, 26. (Lee.) Jesus uza manu sira nuʼudar ezemplu hodi hatete: “Sira la kari fini, la koʼa, no la halibur ai-han ba armazén.” Maibé Jesus hatutan tan: “Imi-nia Aman iha lalehan fó ai-han ba sira.” Tuirmai Jesus husu: “Imi mak folin-boot liu fali sira, loos ka lae?” Saida mak ita aprende? Tuir Jeová nia haree, ninia atan sira mak folin-boot liu fali animál. Tan neʼe, se Jeová tau matan ba animál nia presiza, ita bele fiar metin katak nia mós sei tau matan ba ita-nia presiza! Hanesan aman neʼebé hadomi ninia oan, Jeová mós tau matan ba ninia família tanba hadomi sira.—Sal 145:16; Mt 6:32.

7. Oinsá mak ita bele banati-tuir Jeová nia laran-luak? (Haree mós foto.)

⁷ Hanesan Jeová, ita mós bele fó ba ema seluk buat neʼebé sira presiza tanba ita hadomi sira. Porezemplu, Ita hatene ka lae irmaun ka irmán ida neʼebé presiza ai-han ka roupa? Jeová bele uza Ita atu ajuda irmaun ka irmán neʼe. Jeová nia povu mós lalais atu ajuda ema seluk iha tempu susar. Porezemplu iha tempu pandemia COVID-19, irmaun-irmán sira fahe ai-han, roupa, no mós sasán seluk tan ba ema neʼebé presiza. Sira barak mós fó kontribuisaun atu apoia serbisu iha mundu tomak. Neʼe ajuda duni irmaun-irmán sira iha mundu tomak neʼebé hasoru dezastre. Sira halo tuir liafuan iha Ebreu 13:16: “Keta haluha atu halo hahalok diʼak no fahe buat neʼebé imi iha ba ema seluk, tanba buat sira-neʼe hanesan sakrifísiu neʼebé halo Maromak kontente tebes.”

8. Iha dalan saida mak ita hetan benefísiu husi Jeová nia forsa? (Filipe 2:13)

 ⁸ Jeová fó forsa. Jeová nia forsa la iha limite no nia kontente fó ida-neʼe ba ninia atan sira. (Lee Filipe 2:13.) Ita halo ona orasaun hodi husu kbiit atu tahan tentasaun ka susar ruma ka lae? Ka karik Ita mós halo ona orasaun atu iha forsa ba loron ohin. Bainhira Ita hetan resposta ba Ita-nia orasaun, Ita konkorda ho apóstolu Paulo nia liafuan neʼebé hatete: “Iha situasaun hotu haʼu hetan forsa liuhusi nia neʼebé fó kbiit mai haʼu.”—Flp 4:13.

9. Oinsá ita bele banati-tuir dalan neʼebé Jeová uza ninia kbiit? (Haree mós foto.)

⁹ Maski ita mak ema neʼebé la perfeitu, ita bele banati-tuir dalan neʼebé Jeová uza ninia kbiit ho laran-luak. Ita labele fó forsa ka kbiit ba ema seluk hanesan Jeová, maibé ita bele uza ita-nia forsa atu ajuda ema seluk. Porezemplu, karik ita bele ajuda irmaun-irmán sira neʼebé idade ka moras hodi tau matan ba sira-nia uma ka halo kompras ba sira. Se ita-nia situasaun permite, ita bele ajuda hamoos ka tau matan Reuniaun-Fatin. Bainhira ita uza ita-nia forsa atu halo buat sira-neʼe, ita bele lori benefísiu ba irmaun-irmán sira.

10. Oinsá ita bele uza kbiit husi ita-nia liafuan atu ajuda ema seluk?

¹⁰ Hanoin-hetan katak liafuan mós iha kbiit. Porezemplu, Ita hanoin-hetan ka lae ema ruma neʼebé bele hetan benefísiu husi liafuan gaba? Ita hatene ema ruma neʼebé presiza hetan kmaan? Se nuneʼe, Ita bele hakbesik ba nia atu fó-hatene katak Ita hanoin nia. Ita bele vizita nia, telefone, ka karik haruka karta, email, ka mensajen. Keta hanoin barak kona-ba saida mak Ita sei koʼalia. Liafuan simples husi laran mós bele ajuda maluk fiar-naʼin sira atu kontinua tahan ho laran-metin ka sente diʼak ho sira-nia situasaun.—Prov 12:25; Éf 4:29.

11. Oinsá Jeová fó matenek ba ema?

¹¹ Jeová fó matenek. Dixípulu Tiago hatete: “Se imi ida presiza matenek, nia tenke husu beibeik ba Maromak, no Maromak sei fó matenek ba nia, tanba Maromak fó ba ema hotu ho laran-luak no la buka ema nia sala.” (Tgo 1:​5, nota) Jeová la karak ninia matenek, nia fó ida-neʼe ho laran-luak. Tiago hatete katak bainhira Jeová fó matenek, nia “la hamoe” ka “buka ema nia sala”. Nia nunka halo ita sente la diʼak bainhira ita husu ninia matadalan. Loloos, nia hakarak ita atu husu ida-neʼe.—Prov 2:​1-6.

12. Oportunidade saida deʼit mak ita iha atu fahe ita-nia matenek?

 ¹² Oinsá ho ita? Ita bele banati-tuir Jeová hodi fahe ita-nia matenek ba ema seluk ka lae? (Sal 32:8) Jeová nia povu iha oportunidade barak atu fahe buat neʼebé sira aprende ona. Porezemplu, dala barak ita treinu ema foun iha serbisu haklaken. Katuas sira ho pasiénsia ajuda atan ba kongregasaun no irmaun neʼebé batizmu ona atu tau matan ba sira-nia knaar iha kongregasaun. No irmaun-irmán sira neʼebé matenek atu halo konstrusaun no manutensaun mós treinu ema seluk atu halo serbisu ba fatin sira neʼebé Jeová nia organizasaun uza.

13. Oinsá ita bele banati-tuir Jeová bainhira treinu ema seluk?

¹³ Hakaʼas an atu banati-tuir Jeová bainhira treinu ema seluk. Hanoin-hetan katak Jeová fó ninia matenek ho laran-luak. Tan neʼe ita mós hakarak hatudu laran-luak kuandu fahe ita-nia koñesimentu no esperiénsia ba sira neʼebé aprende hela. Ita lakohi karak ita-nia matenek tanba taʼuk katak ema neʼebé ita treinu sei foti ita-nia knaar. Ita mós lakohi hanoin hanesan ema balu neʼebé dehan: ‘Tanba la iha ema ida mak treinu haʼu, entaun haʼu lakohi treinu ema seluk.’ Nuʼudar Jeová nia povu, ita lakohi hanoin hanesan neʼe. Ita kontente tebes atu fahe ita-nia koñesimentu no hakaʼas an atu treinu ema seluk. (1 Tes 2:8) Ita mós hakarak sira atu “kumpre kritéria atu hanorin ema seluk”. (2 Tim 2:​1, 2) Se ita ho laran-luak fahe ita-nia matenek, ita hotu sei sai matenek no kontente liu.

KUANDU ITA SENTE EMA LA HAFOLIN ITA-NIA LARAN-LUAK

14. Baibain ema halo saida bainhira ita hatudu laran-luak?

¹⁴ Bainhira ita hatudu laran-luak liuliu ba ita-nia irmaun-irmán sira, dala barak sira sei hatoʼo agradese. Karik sira hakerek karta ba ita, ka fó sai agradese iha dalan seluk. (Kol 3:15) Bainhira sira fó obrigadu, ita sente kontente liután.

15. Saida mak ita presiza hanoin-hetan kuandu ema balu la hatudu agradese?

¹⁵ Maibé realidade mak ema balu la hatudu agradese. Dala ruma ita sente katak ema seluk la hafolin buat neʼebé ita halo ba sira, ka sira la rekoñese tempu, forsa, ka osan neʼebé ita uza atu fó ajuda. Se neʼe akontese, oinsá mak ita bele sente kontente nafatin duké sai laran-kraik? Hanoin-hetan ita-nia eskritura tema Apóstolu 20:35. Ita-nia kontente la depende ba sira hafolin ka lae. Ita bele deside atu nafatin fó ho kontente maski ita sente ema la hatudu agradese. Oinsá? Hanoin toʼok kona-ba dalan balu.

16. Saida mak ajuda ita atu kontinua fó ho laran-haksolok?

¹⁶ Fokus hodi banati-tuir Jeová. Jeová fó buat diʼak barak ba ema maski sira hafolin ka lae. (Mt 5:​43-48) Jeová promete katak bainhira ita fó “hodi la hein atu ema selu fali”, ita sei simu “kolen boot tebes”. (Lc 6:35) Neʼe katak ita lakohi espera buat naran deʼit husi ema neʼe, inklui liafuan agradese. Hanoin-hetan, Jeová sei fó kolen ba buat diʼak neʼebé ita halo atu ajuda ema tanba ita “fó ho laran-haksolok”.—Prov 19:17; 2 Kor 9:7.

17. Oinsá mak ita bele mantein hanoin neʼebé loos bainhira fó ba ema seluk? (Lucas 14:​12-14)

 ¹⁷ Atu bele mantein hanoin neʼebé loos, ita mós bele aplika prinsípiu husi Jesus nia liafuan iha Lucas 14:​12-14. (Lee.) Klaru, la sala atu hatudu laran-diʼak no laran-luak ba ema neʼebé iha kbiit atu hatudu fali laran-luak ba ita. Maibé, oinsá se ita rekoñese katak ita fó beibeik tanba hakarak hetan fali buat ruma husi ema seluk? Se nuneʼe, diʼak atu halo tuir Jesus nia konsellu hodi hatudu laran-luak ba ema neʼebé la iha kbiit atu fó fali buat ruma ba ita. Neʼe sei halo ita kontente tanba ita banati-tuir Jeová. Se ita la hein atu simu fali buat ruma, ita sei kontente bainhira ita fó maski ema la hatudu agradese.

18. Saida mak ita labele halo se ita sente katak ema seluk la hafolin ita-nia laran-luak?

¹⁸ Keta hanoin sala kona-ba ema nia motivu. (1 Kor 13:7) Se ema seluk la hatudu agradese, ita bele husu ba ita-nia an: ‘Loloos, nia hafolin buat neʼebé haʼu halo ka lae? Ka haluha deʼit atu fó agradese?’ Karik iha mós razaun seluk tanbasá sira la hatudu agradese iha dalan neʼebé ita espera. Sira balu sente agradese tebes maibé susar atu fó sai ida-neʼe. Ka karik sira moe atu simu ajuda, liuliu se uluk sira mak iha toman atu ajuda ema seluk. Se ita hadomi tebes irmaun-irmán sira, ita sei la hanoin sala kona-ba sira-nia motivu, no ita sei kontinua fó ho kontente.—Éf 4:2.

19-20. Tanbasá ita presiza pasiénsia kuandu fó ba ema seluk? (Haree mós foto.)

¹⁹ Hatudu pasiénsia. Liurai Salomão neʼebé matenek hatete kona-ba hahalok laran-luak: “Soe ó-nia paun iha bee leten, tanba liutiha loron barak ó sei hetan fali ida-neʼe.” (Ecle 11:1) Liafuan neʼe hanorin ita katak dala ruma “liutiha loron barak” mak ema fó agradese. Neʼe mak akontese ba irmán ida.

²⁰ Tinan barak liubá, katuas área nia  feen haruka karta ba irmán ida neʼebé foin hetan batizmu hodi anima nia atu laran-metin nafatin. Maizumenus tinan ualu liu tiha, irmán neʼe hakerek fali karta ba katuas área nia feen hodi hatete: “Haʼu hakerek karta neʼe atu fó-hatene katak durante tinan barak Ita ajuda ona haʼu maski loloos Ita la hatene kona-ba neʼe. Ita-nia karta fó kmaan mai haʼu no eskritura neʼebé Ita temi book tebes haʼu-nia laran toʼo labele haluha.” a Depois esplika tiha susar balu neʼebé nia hasoru, nia hatete: “Dala ruma haʼu hakarak rende an no para atu serbí Jeová, maibé eskritura neʼebé Ita hakerek fó kbiit mai haʼu atu laran-metin nafatin.” Nia hatutan tan: “Durante tinan ualu nia laran, Ita-nia karta no eskritura mak ajuda tebes haʼu liu fali buat seluk.” Imajina toʼok oinsá katuas área nia feen sente kuandu lee karta neʼe! Dala ruma tempu barak liu tiha mak ita foin simu agradese ba ajuda neʼebé ita fó ba ema seluk.

21. Tanbasá Ita hakarak banati-tuir Jeová nia laran-luak?

²¹ Hanesan temi ona, Jeová kria ita ho abilidade espesiál. Maski ita sente kontente kuandu simu, maibé ita sei sente kontente liután kuandu ita fó. Ita sente kontente kuandu ita bele ajuda ita-nia maluk fiar-naʼin, no kuandu sira hatudu agradese. Maski ema hatudu agradese ka lae, ita bele sente kontente tanba halo buat neʼebé loos. Hanoin-hetan katak “Jeová iha kbiit atu fó fali ba Ita barak liu fali” buat neʼebé Ita fó. (2 Krón 25:9) Sin, Jeová sempre fó ba ita buat barak. No bainhira ita simu kolen husi Jeová, neʼe mak kolen neʼebé diʼak liu. Tan neʼe, mai ita hakaʼas an banati-tuir ita-nia Aman Jeová neʼebé laran-luak.