Haʼu moris iha tinan 1934. Haʼu-nia inan-aman husi Suisa no muda ba Kanadá, no hela iha Timmins iha Ontário. Maizumenus tinan 1939, amá komesa lee Livru Haklaken no tuir reuniaun sira husi Testemuña ba Jeová. Nia mós lori haʼu no haʼu-nia maun-alin sira. Lakleur deʼit, amá sai Testemuña ba Jeová ida.

Apá la kontente, maibé amá hadomi lia-loos no deside atu kaer metin ba lia-loos. Amá laran-metin nafatin maski ba tinan balu governu bandu Testemuña ba Jeová nia atividade iha Kanadá. Amá sempre hatudu laran-diʼak no respeitu ba apá maski apá hasai liafuan neʼebé la diʼak. Amá nia ezemplu diʼak ajuda haʼu no haʼu-nia maun-alin naʼin-neen atu aprende lia-loos. Ikusmai apá mós komesa troka ninia hahalok no hatudu laran-diʼak ba ami hotu, neʼe halo ami kontente.

Iha Agostu 1950, haʼu tuir reuniaun boot ida ho títulu Theocracy’s Increase iha Novaiorke. Iha neʼebá, haʼu hasoru irmaun-irmán sira husi mundu tomak no rona esperiénsia husi graduadu sira husi Eskola Gilead, neʼe book haʼu atu serbí Jeová liután no hakarak atu serbí tempu-tomak. Kuandu haʼu fila, haʼu hakerek kedas karta hodi husu atu serbí nuʼudar pioneiru regulár. Sukursál Kanadá hatán haʼu-nia karta, no anima haʼu atu hetan uluk batizmu. Tan neʼe haʼu hetan batizmu iha 1 Outubru 1950. Liutiha fulan ida, haʼu komesa serbí nuʼudar pioneiru regulár  no simu knaar primeiru atu serbí iha Kapuskasing. Sidade neʼe dook husi haʼu-nia hela-fatin.

Fulan balu liu tiha, sukursál konvida ema neʼebé hatene lian Fransés atu muda ba Kebeke tanba neʼe mak fatin neʼebé ema barak koʼalia lian Fransés no presiza tebes haklaken-naʼin. Husi kiʼik kedas haʼu koʼalia lian Fransés no Inglés, tan neʼe haʼu simu konvite no muda atu serbí iha Rouyn. Haʼu la koñese ema ida iha neʼebá. Buat neʼebé haʼu iha mak karta ida neʼebé hakerek diresaun, hanesan haʼu konta ona ohin. Ikusmai buat hotu laʼo ho diʼak. Marcel no haʼu sai belun diʼak, no haʼu kontente serbí iha Kebeke ba tinan haat, no durante tempu neʼe haʼu sai pioneiru espesiál.

Kuandu iha Kebeke, haʼu kontente tebes tanba simu konvite atu tuir Eskola Gilead ba klase 26 iha Lansing Súl, Novaiorke. Haʼu gradua iha 12 Fevereiru 1956, no hetan knaar atu serbí iha Gana, b Áfrika Oeste. Maibé antes bá, haʼu presiza fila uluk ba Kanadá atu hein ba “semana balu” toʼo haʼu-nia dokumentu hotu prontu.

Ikusmai haʼu presiza hein ba fulan hitu iha Torontu atu haʼu-nia dokumentu sira sai prontu. Durante tempu neʼebá, haʼu hela ho família Cripps, neʼebé hatudu laran-diʼak, no haʼu mós hasoru sira-nia oan-feto Sheila. Ami laran-monu ba malu. Iha tempu neʼebé haʼu besik husu atu kaben ho nia, haʼu-nia vistu mós sai. Haʼu no Sheila halo orasaun no deside katak haʼu tenke halaʼo knaar neʼe. Maibé ami mós deside atu hakerek karta ba malu hodi haree se iha futuru ami bele kaben ka lae. Neʼe la fasil, maibé ikusmai ami rekoñese katak neʼe mak desizaun diʼak.

Depois gasta tiha fulan ida atu halo viajen ho komboiu, ró, no aviaun, ikusmai haʼu toʼo iha Accra, Gana. Iha neʼebá haʼu serbí  nuʼudar katuas vizitante. Haʼu vizita kongregasaun sira iha área hotu iha Gana no mós Kosta Marfín no Togu neʼebé besik. Haʼu halaʼo viajen mesak hodi uza karreta Jeep neʼebé sukursál prepara. Haʼu kontente tebes ho knaar neʼe!

Iha findesemana, haʼu hetan knaar iha asembleia. Ami la iha Salaun Asembleia iha tempu neʼebá, tan neʼe irmaun-irmán sira harii fatin temporáriu hodi uza au no ai-palmeira tahan atu bele fó mahon. Tanba la iha jeleira, irmaun sira prepara animál neʼebé moris atu bele oho no teʼin ba sira neʼebé tuir asembleia.

Ami iha esperiénsia komik iha asembleia sira hanesan neʼe. Loron ida kuandu misionáriu ida naran Herb Jennings c hatoʼo hela diskursu, iha karau ida namkore no halai bá-mai iha plataforma oin. Irmaun Herb para koʼalia, no karau neʼe haree hanesan konfuzaun. Maibé irmaun naʼin-haat neʼebé forsa konsege dada sai karau no lori ba kesi, no rona-naʼin sira hasai lian makaʼas no basa liman.

Iha loron baileet, haʼu hatudu ita-nia filme The New World Society in Action iha suku sira neʼebé besik. Atu halo ida-neʼe, haʼu uza projetór no leno ba hena mutin neʼebé kesi ba ai-riin rua ka ai-hun sira. Komunidade sira gosta tebes! Ba sira barak, neʼe mak filme primeiru neʼebé sira haree. Sira basa liman ho kontente bainhira haree ema hetan batizmu. Filme neʼe ajuda sira atu rekoñese katak ita mak organizasaun neʼebé unidade iha mundu tomak.

Maizumenus tinan rua liu tiha iha Áfrika, haʼu kontente tebes atu tuir Reuniaun Boot Internasionál iha tinan 1958 iha Novaiorke. Haʼu haksolok tebes bele hasoru Sheila, neʼebé mai husi Kebeke. Nia mós serbí ona nuʼudar pioneiru espesiál. Ami sempre hakerek karta ba malu, maibé agora ami hamutuk fali no haʼu husu nia atu kaben, no nia hakarak. Haʼu hakerek karta ba irmaun Knorr d no husu se Sheila bele tuir Eskola Gilead no serbí hamutuk ho haʼu iha Áfrika. Irmaun Knorr konkorda. Ikusmai Sheila toʼo iha Gana, no ami kaben iha Accra, 3 Outubru  1959. Ami sente duni katak Jeová haraik bensaun mai ami tanba tau uluk Jeová iha ami-nia moris.

Iha tinan 1961, ami hetan knaar atu bá Kamaroins. Haʼu-nia knaar mak atu ajuda harii sukursál foun, no haʼu okupadu tebes. Nuʼudar ema neʼebé tau matan ba sukursál, haʼu presiza aprende buat barak. Maibé iha tinan 1965, Sheila isin-rua. Haʼu rekoñese katak haʼu presiza duni tempu atu prepara an atu sai aman ida. Nuʼudar ami hein namanas atu sai inan-aman, no planu atu fila ba Kanadá, ami hasoru situasaun ida neʼebé halo ami triste tebetebes.

Bebé neʼebé iha Sheila nia kabun mate. Doutór hatete katak bebé neʼe mak mane. Neʼe akontese maizumenus tinan 50 liubá, maibé haʼu nunka haluha ida-neʼe. Maski sente triste, maibé ami nafatin halaʼo ami-nia knaar neʼebé ami hadomi.

Iha Kamaroins, ema fó-terus ba irmaun-irmán sira tanba neutrál. Situasaun sai manas durante tempu eleisaun ba prezidente. Iha 13 Maiu 1970, buat neʼebé halo ami taʼuk akontese duni. Governu bandu ita-nia atividade iha neʼebá. Sukursál foun neʼebé furak, neʼebé ami foin hela ba fulan lima deʼit, governu hadau tiha. Iha semana ida deʼit, misionáriu hotu inklui haʼu no Sheila tenke sai husi nasaun neʼe. Susar atu husik hela irmaun-irmán sira tanba ami hadomi tebes sira, no ami hanoin barak saida mak sei akontese ba sira.

Tuirmai ami hela iha sukursál Fransa ba fulan neen. Iha neʼebá, haʼu hakaʼas an atu ajuda irmaun-irmán sira iha Kamaroins. Iha Dezembru 1970, ami hetan knaar atu serbí iha sukursál Nijéria, neʼebé komesa tau matan ba serbisu iha Kamaroins. Irmaun-irmán sira iha Nijéria simu ami ho domin, no ami kontente bele serbí tinan balu iha neʼebá.

Iha tinan 1973, ami tenke halo desizaun neʼebé susar. Sheila tahan ba tempu kleur ho problema saúde oioin. Kuandu ami iha Novaiorke atu tuir reuniaun boot ida, nia tanis no hatete: “Haʼu labele ona! Haʼu kole no sente moras tebes.” Sheila serbí hamutuk ho haʼu iha Áfrika Oeste durante tinan 14 liu. Haʼu orgullu tebes ho ninia laran-metin, maibé ami presiza halo mudansa. Depois koʼalia hamutuk no halo orasaun ba dala barak, ami deside atu fila ba Kanadá, no Sheila bele hetan tratamentu neʼebé diʼak. Husik ami-nia knaar nuʼudar misionáriu mak desizaun neʼebé susar tebes.

Kuandu toʼo iha Kanadá, haʼu hetan serbisu husi haʼu-nia kolega ida neʼebé faʼan karreta iha Torontu. Ami aluga apartamentu, sosa sasán uzadu, no konsege muda hodi la iha debe ida. Ami hakarak halaʼo moris neʼebé simples, atu nuneʼe loron ida karik  ami bele serbí fali tempu-tomak. Derrepente deʼit, ami-nia planu neʼe akontese duni, lalais liu fali buat neʼebé ami espera.

Haʼu komesa ajuda nuʼudar voluntáriu kada sábadu atu harii Salaun Asembleia iha Norval, Ontário. Lakleur, haʼu hetan knaar atu tau matan Salaun Asembleia. Sheila mós komesa sai diʼak, no ami sente katak nia bele ona atu halaʼo knaar neʼe ho haʼu. Tan neʼe ami muda ba apartamentu iha Salaun Asembleia neʼe iha Juñu 1974. Ami kontente tebes bele serbí tempu-tomak!

Ami agradese tanba Sheila nia saúde mós sai diʼak liután. Tinan rua liu tiha, ami hetan knaar nuʼudar katuas área. Ami-nia área mak provínsia Manitoba, fatin neʼebé malirin tebes. Maski nuneʼe, ami kontente tanba bele sente irmaun-irmán sira-nia laran-manas. Ami aprende katak ami-nia ksolok la depende ba fatin neʼebé ami serbí, maibé importante mak kontinua serbí Jeová iha fatin naran deʼit.

Depois tinan balu serbí nuʼudar katuas área, iha tinan 1978 ami hetan konvite atu serbí iha Betel Kanadá. Lakleur, haʼu aprende lisaun importante ida. Haʼu simu knaar atu hatoʼo diskursu durante oras ida ho balu iha lian Fransés iha reuniaun espesiál ida iha Montreál. Triste mak haʼu-nia diskursu la book rona-naʼin nia laran, no irmaun ida husi Departamentu Serbisu nian fó konsellu mai haʼu. Loloos, haʼu tenke rekoñese katak haʼu laʼós diskursu-naʼin neʼebé diʼak. Maibé haʼu la simu konsellu neʼe. Ami la koʼalia didiʼak ba malu, no haʼu sente nia kritika deʼit haʼu duké gaba. Haʼu fokus liu ba irmaun neʼe nia hahalok no dalan neʼebé nia fó konsellu, no neʼe mak haʼu-nia sala.

Loron balu liu tiha, membru ida husi Komisaun ba Sukursál koʼalia ho haʼu kona-ba asuntu neʼe. Haʼu rekoñese katak haʼu la simu konsellu neʼe ho didiʼak no arrepende an. Tuirmai, haʼu koʼalia ba irmaun neʼebé fó konsellu mai haʼu, no nia simu haʼu-nia deskulpa ho laran-diʼak. Esperiénsia neʼe sai nuʼudar lisaun kona-ba haraik an, no haʼu nunka haluha ida-neʼe. (Prov 16:18) Haʼu halo ona orasaun ba Jeová dala barak kona-ba neʼe, no haʼu deside metin atu la hanoin negativu ba konsellu neʼebé haʼu simu.

Agora haʼu iha Betel Kanadá ba tinan 40 liu ona, no husi tinan 1985, haʼu iha priviléjiu atu serbí nuʼudar membru ba Komisaun ba Sukursál. Iha Fevereiru 2021, haʼu-nia feen doben Sheila mate. Nuʼudar haʼu tahan sentimentu triste, haʼu mós iha problema ho saúde. Maibé, hodi serbí Jeová halo haʼu okupadu no kontente toʼo haʼu “la hatene katak loron sira liu daudaun”. (Ecle 5:20) Maski hasoru susar oioin, kontente neʼebé haʼu sente mak boot liu fali haʼu-nia triste. Tau uluk Jeová iha haʼu-nia moris no uza tinan 70 atu serbí tempu-tomak lori duni bensaun barak. Haʼu halo orasaun atu irmaun-irmán joven sira bele nafatin tau uluk Jeová iha sira-nia moris, tanba haʼu fiar katak sira mós sei simu bensaun barak no moris kontente só deʼit kuandu serbí Jeová.