1-2. Tanbasá Jeová nia povu mak ema neʼebé kontente? (Tiago 1:​22-25)

 JEOVÁ no ninia Oan hakarak ita atu moris kontente. Hakerek-naʼin ba Salmo 119:2 hatete: “Ksolok ba sira neʼebé halo tuir ninia avizu sira, sira neʼebé buka nia ho sira-nia laran tomak.” Jesus mós hatete: “Ksolok ba sira neʼebé rona Maromak nia Liafuan no halo tuir!”—Lc 11:28.

² Jeová nia povu mak ema neʼebé kontente. Tanbasá? Ita iha razaun barak, no razaun importante ida mak tanba ita lee Maromak nia Liafuan loroloron no hakaʼas an atu halo tuir buat neʼebé ita aprende.—Lee Tiago 1:​22-25.

3. Benefísiu saida mak ita hetan bainhira halo tuir Maromak nia Liafuan?

³ Ita bele hetan benefísiu barak bainhira ita “halo tuir Maromak nia liafuan”. Porezemplu, kuandu ita halo nuneʼe, ita halo Jeová kontente, no ita mós kontente. (Ecle 12:13) Neʼe mós halo ita-nia moris família nian kontente, no hametin ita-nia relasaun ho irmaun-irmán sira. Karik Ita rasik sente ona ida-neʼe. Liután neʼe, ita bele hasees an husi problema sira neʼebé baibain mosu tanba la halo tuir Jeová nia matadalan. Neʼe mak buat neʼebé Liurai David hatete. Depois temi tiha Jeová nia ukun-fuan, orden, no desizaun, nia hatete: “Sira neʼebé halo tuir desizaun sira-neʼe sei simu kolen boot.”—Sal 19:​7-11.

4. Tanbasá dala ruma la fasil atu lee no halo tuir Maromak nia Liafuan?

 ⁴ Klaru katak dala ruma la fasil atu lee no halo tuir Maromak nia Liafuan. Tanba ita-nia moris mak okupadu tebes, ita presiza buka tempu atu lee no estuda Bíblia hodi bele komprende saida mak Jeová hakarak ita atu halo. Entaun, mai ita haree sujestaun balu neʼebé bele ajuda ita atu lee Bíblia loroloron. Ita mós sei haree saida mak bele ajuda ita atu hanoin kona-ba buat neʼebé ita lee, no oinsá ita bele aplika ida-neʼe iha ita-nia moris.

FAHE TEMPU ATU LEE MAROMAK NIA LIAFUAN

5. Saida deʼit mak halo ita okupadu?

⁵ Jeová nia povu barak mak okupadu tebes. Ita uza tempu barak atu halo buat importante oioin neʼebé Bíblia haruka. Porezemplu, ita barak serbisu atu tau matan ita-nia an no ita-nia família. (1 Tim 5:8) Ema Kristaun barak tau matan ba família neʼebé moras ka idade ona. No ita hotu presiza tau matan ba ita rasik nia saúde, no neʼe presiza tempu. Ita mós iha responsabilidade oioin iha kongregasaun, no importante liu mak atu haklaken ho badinas. Tanba ita hotu okupadu ho buat oioin, oinsá mak Ita bele buka tempu atu lee Bíblia loroloron, medita kona-ba buat neʼebé Ita lee, no aplika ida-neʼe?

6. Oinsá mak ita bele tau uluk lee Bíblia iha ita-nia moris? (Haree mós foto.)

⁶ Ba ema Kristaun, lee Bíblia mak ‘buat ida neʼebé importante liu’, tan neʼe ita tenke tau uluk ida-neʼe iha ita-nia moris. (Flp 1:10) Kona-ba ema neʼebé kontente, Livru Salmo hahú ho liafuan: “Nia gosta tebes Jeová nia ukun-fuan. Nia lee no medita Ninia ukun-fuan loron no kalan.” (Sal 1:​1, 2) Klaru katak ita presiza fahe tempu atu lee Bíblia. Bainhira mak tempu neʼebé diʼak atu lee Bíblia? Ema ida-idak nia resposta la hanesan. Maibé ita presiza hili tempu neʼebé diʼak atu  lee Bíblia loroloron. Irmaun ida naran Victor hatete: “Haʼu gosta lee Bíblia iha dadeer. Maski susar ba haʼu atu hadeer sedu, maibé iha dadeer ladún iha buat neʼebé bele dada haʼu-nia atensaun. Haʼu-nia neon fresku no haʼu bele fokus liután.” Ita mós sente hanesan neʼe ka lae? Husu ba Ita-nia an: ‘Bainhira mak tempu neʼebé diʼak ba haʼu atu lee Bíblia?’

MEDITA KONA-BA BUAT NEʼEBÉ ITA LEE

7-8. Saida mak bele hanetik ita atu hetan benefísiu husi buat neʼebé ita lee? Fó toʼok ilustrasaun.

⁷ Realidade mak dala ruma ema lee informasaun barak, maibé tuirmai la hanoin-hetan kona-ba neʼe. Ita mós iha esperiénsia hanesan neʼe ka lae? Neʼe akontese ona ba ita hotu. No neʼe mós bele akontese bainhira ita lee Bíblia. Karik ita halo ona planu atu lee kapítulu balu husi Bíblia loroloron. Neʼe mak buat neʼebé diʼak. Ita presiza halo planu no hakaʼas an atu kumpre ida-neʼe. (1 Kor 9:26) Maibé, se ita hakarak hetan benefísiu husi Maromak nia Liafuan, la toʼo atu lee deʼit Bíblia.

⁸ Hanoin toʼok kona-ba ilustrasaun neʼe: Ai-horis presiza udan-been atu bele moris. Maibé se udan boot iha tempu badak, rai sei sai bokon demais. Bainhira udan boot akontese beibeik, neʼe sei la lori benefísiu ida. Rai presiza tempu hodi bele xupa udan-been no fó benefísiu ba ai-horis. Nuneʼe mós, ita lakohi atu lee Bíblia ho ansi toʼo labele medita, hanoin-hetan, no halo tuir buat neʼebé ita lee.—Tgo 1:24.

9. Saida mak ita presiza halo se ita iha toman atu lee Bíblia ho ansi?

⁹ Dala ruma Ita iha toman atu lee Bíblia ho ansi ka lae? Saida mak Ita presiza halo? Hakaʼas an atu la lee ho ansi hodi bele hanoin kona-ba saida mak Ita lee daudaun ka lee ona. Neʼe la susar. Karik Ita bele deside aumenta Ita-nia tempu atu lee Bíblia no medita kona-ba buat neʼebé Ita lee. Ka karik Ita mós bele deside atu lee versíkulu balu deʼit hodi  bele iha tempu barak atu medita. Victor neʼebé temi ona hatete: “Dadeer-dadeer, haʼu lee informasaun uitoan husi Bíblia, karik kapítulu ida deʼit. Tan neʼe, haʼu bele medita kona-ba buat neʼebé haʼu lee durante loron tomak.” Dalan naran deʼit neʼebé Ita uza atu lee Bíblia, importante mak atu la ansi bainhira lee, hodi bele hanoin kleʼan kona-ba buat neʼebé Ita lee ona.—Sal 119:97; haree mós kaixa “ Pergunta atu hanoin kleʼan”.

10. Fó toʼok ezemplu oinsá mak Ita bele aplika buat neʼebé Ita aprende. (1 Tesalónika 5:​17, 18)

¹⁰ Bainhira Ita lee Bíblia, diʼak atu buka dalan oinsá atu aplika buat neʼebé Ita lee. Nuʼudar Ita lee parte ida husi Bíblia, husu ba Ita-nia an: ‘Oinsá mak haʼu bele aplika informasaun neʼe agora ka iha futuru?’ Nuʼudar ezemplu, imajina toʼok Ita lee 1 Tesalónika 5:​17, 18. (Lee.) Depois lee tiha versíkulu sira-neʼe, Ita bele para no hanoin kona-ba Ita rasik nia orasaun. Porezemplu, Ita rasik halo orasaun beibeik no ho laran ka lae? Ita mós bele hanoin kona-ba razaun oioin atu fó agradese. Karik Ita bele deside atu fó agradese ba Jeová kona-ba buat espesífiku tolu. Maski Ita uza minutu balu deʼit atu halo hanesan neʼe, neʼe sei ajuda Ita atu komprende Maromak nia Liafuan no halo tuir. Se Ita iha toman atu lee Bíblia no halo tuir prosesu sira-neʼe loroloron, neʼe sei ajuda Ita atu sai Jeová nia atan neʼebé diʼak liután. Maibé oinsá se Ita nota katak iha buat barak neʼebé Ita presiza hadiʼa?

HALO PLANU NEʼEBÉ ITA BELE KUMPRE

11. Tanbasá dala ruma Ita sente estrese? Fó toʼok ezemplu.

¹¹ Bainhira Ita lee Bíblia, dala ruma Ita sente estrese tanba iha buat barak neʼebé Ita presiza hadiʼa. Hanoin toʼok kona-ba situasaun neʼe: Loron primeiru Ita-nia lee Bíblia mak inklui konsellu kona-ba labele todan ba sorin. (Tgo 2:​1-8) Ita nota katak Ita presiza hadiʼa dalan neʼebé Ita trata ema seluk, tan neʼe Ita deside atu halo mudansa. Neʼe buat neʼebé diʼak! Loron segundu, Ita lee kona-ba importante atu kontrola Ita-nia liafuan. (Tgo 3:​1-12) Ita rekoñese katak dala ruma Ita koʼalia buat neʼebé negativu. Tan neʼe Ita deside atu koʼalia deʼit buat neʼebé pozitivu hodi hametin ema seluk. Loron terseiru, Ita lee kona-ba avizu atu labele sai belun ho mundu. (Tgo 4:​4-12) Ita rekoñese katak Ita presiza kuidadu kona-ba saida mak Ita lee, haree, no rona. No iha loron tuirmai, karik Ita sente estrese tanba iha buat barak neʼebé Ita presiza hadiʼa.

12. Se Ita presiza halo mudansa, tanbasá Ita la presiza laran-kraik? (Haree mós nota-rodapé.)

 ¹² Se Ita presiza halo mudansa barak, keta laran-kraik, tanba neʼe hatudu katak Ita haraik an no iha atitude neʼebé diʼak. Ema neʼebé haraik an lee Maromak nia Liafuan no rekoñese kona-ba mudansa saida mak nia presiza halo. a No mós, hanoin-hetan katak ita hotu presiza kontinua tau “hahalok foun”. (Kol 3:10) Saida mak bele ajuda Ita atu kontinua halo tuir Maromak nia Liafuan?

13. Oinsá mak Ita bele halo planu neʼebé Ita bele kumpre? (Haree mós foto.)

¹³ Duké koko atu aplika buat hotu neʼebé Ita lee iha tempu hanesan, diʼak atu halo planu neʼebé Ita bele kumpre tuir Ita-nia kbiit. (Prov 11:2) Karik Ita bele koko ida-neʼe: Halo lista kona-ba mudansa neʼebé Ita presiza halo. Tuirmai, hili pontu ida ka rua husi Ita-nia lista no fokus atu hadiʼa uluk ida-neʼe, no buat seluk Ita bele hadiʼa iha tempu tuirmai. Entaun, Ita sei hahú uluk husi neʼebé?

14. Planu ida-neʼebé mak Ita hakarak kumpre uluk?

¹⁴ Karik Ita bele hahú uluk ho pontu neʼebé Ita sente fasil liu atu kumpre, ka karik Ita bele hili atu hahú uluk ho pontu neʼebé Ita sente importante liu. Bainhira Ita deside ona Ita-nia planu, buka informasaun husi ita-nia publikasaun hodi uza Watchtower Biblioteka Online ka Livru atu ajuda Testemuña ba Jeová buka informasaun. Halo orasaun kona-ba Ita-nia planu hodi husu Jeová ‘fó ba Ita hakarak no kbiit atu halo buat neʼebé nia hakarak’. (Flp 2:13) Tuirmai, halo tuir buat  neʼebé Ita aprende. Kuandu Ita kumpre ona Ita-nia planu primeiru, karik neʼe sei motiva Ita atu kumpre planu tuirmai. Tuir loloos, bainhira Ita konsege halo mudansa kona-ba buat ruma iha Ita-nia moris ka haburas hahalok Kristaun ida, karik Ita sei sente fasil liu atu halo mudansa kona-ba buat seluk tan.

HUSIK MAROMAK NIA LIAFUAN AJUDA ITA

15. Oinsá mak Jeová nia povu diferente ho ema barak neʼebé lee Bíblia? (1 Tesalónika 2:13)

¹⁵ Ema balu dehan katak sira lee Bíblia dala barak ona. Maibé sira fiar duni buat neʼebé sira lee ka lae? Sira hakaʼas an atu moris tuir Bíblia nia hanorin ka lae? Triste, dala barak resposta mak lae. Neʼe diferente duni ho Jeová nia povu! Hanesan ema Kristaun iha apóstolu sira-nia tempu, ita simu Bíblia nia hanorin “nuʼudar Maromak nia liafuan”. Ita mós hakaʼas an atu aplika ida-neʼe iha ita-nia moris loroloron nian.—Lee 1 Tesalónika 2:13.

16. Saida mak bele ajuda ita atu halo tuir Maromak nia Liafuan?

¹⁶ Klaru katak dala ruma la fasil atu lee no halo tuir Maromak nia Liafuan. Karik ita sente susar atu buka tempu hodi lee Bíblia. Ka karik ita toman atu lee ho ansi no la hanoin kleʼan kona-ba buat neʼebé ita lee. Ka karik ita sente estrese tanba presiza halo mudansa barak. Maski Ita hasoru susar naran deʼit, Ita bele manán ida-neʼe ho Jeová nia ajuda. Mai ita deside metin atu simu ninia ajuda no sai ema neʼebé halo tuir Maromak nia Liafuan, laʼós ema neʼebé rona deʼit no haluha tiha. Bainhira ita lee beibeik Maromak nia Liafuan no halo tuir, ita-nia moris sei sai kontente liután.—Tgo 1:25.