Ita la iha razaun atu hanoin katak dixípulu naʼin-70 husik ona Jesus ka Jesus la simu ona sira tan deʼit sira la han hamutuk ho Jesus iha ninia han-kalan ikus. Iha momentu neʼebá, Jesus hakarak atu hamutuk deʼit ho ninia apóstolu sira.

Sira naʼin-70 ka 12 mak Jesus nia dixípulu hotu. Foufoun, Jesus hili sira naʼin-12 husi ninia dixípulu sira nuʼudar apóstolu. (Lc 6:​12-16) Jesus iha Galileia kuandu “bolu sira naʼin Sanulu-Resin-Rua” no “haruka sira atu bá haklaken Maromak nia Ukun no atu kura ema”. (Lc 9:​1-6) Tuirmai, iha Judeia, Jesus “hili ema naʼin-70 seluk no haruka sira naʼin rua-rua”. (Lc 9:51; 10:1) Tan neʼe, Jesus iha dixípulu husi fatin oioin neʼebé haklaken liafuan diʼak.

Ema Judeu neʼebé sai Jesus nia dixípulu nafatin selebra Páskua tinan ida dala ida, karik hamutuk ho sira-nia família. (Éx 12:​6-11, 17-20) Kuandu tempu besik ona atu ema oho Jesus, Jesus no ninia apóstolu sira bá Jeruzalein. Maibé, nia la bolu ninia dixípulu sira husi Judeia, Galileia, no Pereia atu selebra Páskua. Klaru katak Jesus hakarak atu hamutuk ho ninia apóstolu sira iha selebrasaun neʼe. Nia hatete ba sira: “Haʼu hakarak tebes han ai-han Páskua nian neʼe hamutuk ho imi antes haʼu hetan terus.”—Lc 22:15.

Iha razaun diʼak kona-ba neʼe. Jesus besik ona atu mate nuʼudar “Maromak nia Bibi-Oan neʼebé hamoos mundu nia sala”. (João 1:29) Nia sei mate iha Jeruzalein, fatin neʼebé ema bá atu hasaʼe sakrifísiu ba Maromak. Jesus nia mate sei halo livre ema hotu iha dalan neʼebé boot liu se kompara ho sakrifísiu bibi-malae neʼebé família Izraél han iha kalan neʼebé sira sai husi Ejitu. (1 Kor 5:​7, 8) Jesus nia sakrifísiu loke dalan ba apóstolu naʼin-12 atu sai fundasaun ba kongregasaun Kristaun. (Éf 2:​20-22) Sidade santu Jeruzalein iha “fatuk 12 iha ninia fundasaun” neʼebé hakerek “Bibi-Oan nia apóstolu naʼin-12 nia naran”. (Apok 21:​10-14) Sin, apóstolu laran-metin sira-neʼe sei iha knaar importante atu kumpre Maromak nia hakarak. Tan neʼe, ita bele komprende katak Jesus hakarak sira atu hamutuk ho nia iha loron Páskua ikus no ba buat neʼebé akontese tuirmai, neʼe mak Naʼi nia Han-Kalan.

Sira naʼin-70 no dixípulu sira seluk la partisipa iha han-kalan ikus hamutuk ho Jesus. Maibé, dixípulu hotu neʼebé laran-metin sei hetan benefísiu husi Naʼi nia Han-Kalan neʼebé Jesus hahú iha tempu neʼebá. Sira hotu neʼebé ikusmai hetan esperansa atu bá lalehan mós tama ba aliansa Ukun nian, neʼebé Jesus temi ba apóstolu sira iha kalan neʼebá.—Lc 22:​29, 30.