1-2. Tuir Mateus 5:11, ita presiza hanoin oinsá kona-ba susar sira?

JESUS promete ba ninia dixípulu sira katak sira bele sente kontente neʼebé loos. Jesus mós hatete ba sira katak sira sei hasoru susar oioin. (Mt 10:22, 23; Lc 6:20-23) Ita sente haksolok tanba sai Kristu nia dixípulu. Maibé ita sente oinsá se ita-nia família koko hanetik ita atu la serbí Jeová, governu fó-terus ba ita, ka ita-nia kolega eskola no kolega serbisu koko tenta ita atu halo sala? Kuandu ita hanoin kona-ba susar sira-neʼe, neʼe bele halo ita laran-taridu.

² Baibain ema la haksolok kuandu hasoru susar. Maibé Bíblia anima ita atu sente haksolok kuandu hasoru susar. Porezemplu, Tiago hakerek katak ita lalika sente laran-taridu demais bainhira hasoru susar. Ita presiza sente haksolok. (Tgo 1:2, 12) Jesus mós hatete katak ita presiza sente kontente maski ema fó-terus ita. (Lee Mateus 5:11.) Oinsá ita bele haksolok nafatin maski hasoru susar? Ita bele aprende buat barak husi Tiago nia karta ba ema Kristaun iha apóstolu sira-nia tempu. Maibé ulukliu, mai ita koʼalia kona-ba susar oioin neʼebé ema Kristaun sira hasoru iha tempu neʼebá.

3. Saida mak akontese depois Tiago sai dixípulu?

³ Lakleur depois Jesus nia alin Tiago sai dixípulu, ema fó-terus ba ema Kristaun iha Jeruzalein. (Após 1:14; 5:17, 18) No bainhira ema oho tiha dixípulu Estevão, ema Kristaun barak “halai namkari ba área Judeia no Samaria”, no ikusmai toʼo iha Xipre no Antiokia. (Após 7:58–8:1; 11:19) Ema Kristaun iha tempu neʼebá hasoru susar barak. Maski nuneʼe, sira haklaken ho laran-manas iha fatin hotu  neʼebé sira halai bá. Sira ajuda harii kongregasaun iha fatin oioin neʼebé Roma mak ukun. (1 Ped 1:1) Tuirmai sira mós hasoru susar seluk tan.

4. Ema Kristaun tenke tahan susar saida tan?

⁴ Ema Kristaun iha apóstolu sira-nia tempu presiza tahan susar oioin. Porezemplu, maizumenus iha tinan 50 EC, Liurai Roma naran Cláudio haruka ema Judeu hotu sai husi Roma. Entaun ema Judeu neʼebé sai ema Kristaun tenke sai husi sira-nia uma no hela iha fatin seluk. (Após 18:1-3) Maizumenus iha tinan 61 EC, apóstolu Paulo hakerek katak ema fó-terus ba ema Kristaun iha ema barak nia oin, hatama sira ba komarka, no hadau sira-nia sasán. (Ebr 10:32-34) Hanesan ema seluk, ema Kristaun mós tenke tahan susar hanesan moris kiak no moras.​—Rom 15:26; Flp 2:25-27.

5. Ita sei hatán ba pergunta saida deʼit?

⁵ Tiago hakerek ninia karta antes tinan 62 EC. Nia hatene ho didiʼak susar sira neʼebé irmaun-irmán sira hasoru. Jeová dirije Tiago atu hakerek konsellu ba ema Kristaun no neʼe bele ajuda sira atu kontente nafatin maski hasoru susar oioin. Mai ita aprende kona-ba Tiago nia karta no hatán pergunta sira tuirmai: Saida mak ksolok neʼebé loos neʼebé Tiago temi? Saida mak bele halakon ema Kristaun nia ksolok? Oinsá hatudu matenek, fiar no aten-brani ajuda ita atu haksolok nafatin maski hasoru susar oioin?

6. Tuir Lucas 6:22, 23, tanbasá ema Kristaun bele sente haksolok maski hasoru susar?

⁶ Ema barak hanoin katak sira bele sente kontente se sira iha saúde diʼak,  osan barak, no moris família neʼebé kontente. Maibé ksolok neʼebé Tiago temi mai husi Maromak nia espíritu santu no neʼe la depende ba ema nia situasaun. (Gal 5:22) Ema Kristaun ida bele hetan ksolok ka sente kontente tebetebes bainhira nia hatene katak nia halo Jeová kontente no moris tuir Jesus nia ezemplu. (Lee Lucas 6:22, 23; Kol 1:10, 11) Ita bele kompara ita-nia ksolok ho ahi neʼebé lakan iha lampiaun nia laran. Ahi neʼe la mate tanba lampiaun proteje ahi neʼe husi udan no mós anin. Ita mós bele haksolok nafatin maski hasoru susar oioin. Ita haksolok nafatin maski ita moras ka ladún iha osan. Ita mós haksolok nafatin maski ema goza ita ka ita-nia família no mós ema seluk kontra ita. Tempu ida-idak neʼebé ema kontra ita, ita-nia ksolok bele aumenta liután. Susar neʼebé ita hasoru tanba ita-nia fiar, hatudu katak ita mak Kristu nia dixípulu neʼebé loos. (Mt 10:22; 24:9; João 15:20) Tan neʼe, Tiago bele hakerek: “Haʼu-nia maun-alin sira, haksolok bá kuandu imi hasoru susar oioin.”​—Tgo 1:2.

7-8. Bainhira ita-nia fiar hetan koko, neʼe lori benefísiu saida?

⁷ Tiago fó sai razaun seluk tan tanbasá ema Kristaun prontu atu tahan susar. Tiago hatete: “Imi-nia fiar neʼebé hetan ona koko . . . halo imi aprende atu tahan susar.” (Tgo 1:3) Ita bele kompara ita-nia susar sira ho ahi neʼebé ema uza bainhira tuku besi sai surik. Atu surik bele sai toos liu, baibain ema hamanas no tuirmai halo malirin ida-neʼe. Nuneʼe mós bainhira ita tahan hasoru susar sira, ita-nia fiar sai metin liután. Tan neʼe Tiago hakerek: “Hodi tahan nafatin susar, imi sei treinu didiʼak imi-nia an, atu nuneʼe imi bele sai kompletu no sai diʼak iha buat hotu.” (Tgo 1:4) Bainhira ita haree katak susar sira-neʼe hametin ita-nia fiar, ita bele tahan susar sira-neʼe ho haksolok.

⁸ Tiago nia karta mós temi kona-ba buat balu neʼebé bele halakon ita-nia ksolok. Buat balu neʼe mak saida? Saida mak ita bele halo atu haksolok nafatin?

9. Tanbasá ita presiza matenek?

⁹ Saida mak bele halakon ita-nia ksolok? Bainhira ita la hatene atu halo saida. Bainhira ita hasoru susar sira, ita hakarak halo desizaun neʼebé halo Jeová kontente, lori benefísiu ba irmaun-irmán sira, no ajuda ita atu nafatin laran-metin. (Jer 10:23) Ita presiza matenek atu hatene saida mak ita bele halo no koʼalia ba ema neʼebé kontra ita. Se ita la hatene atu halo saida, karik  ita sei sente laran-kraik no lakon ita-nia ksolok.

10. Tuir Tiago 1:5, ita presiza halo saida atu hetan matenek?

¹⁰ Buat neʼebé ita bele halo: Husu matenek husi Jeová. Atu bele tahan susar sira ho ksolok, ulukliu ita presiza halo orasaun ba Jeová atu husu matenek hodi bele halo desizaun ho diʼak. (Lee Tiago 1:5.) Saida mak ita presiza halo se ita sente katak Jeová la hatán kedas ita-nia orasaun? Tiago hatete katak ita “tenke husu beibeik ba Maromak”. Jeová la hirus bainhira ita husu beibeik matenek husi nia. Bainhira ita halo orasaun atu husu matenek hodi bele tahan susar sira, ita-nia Aman iha lalehan sei fó ida-neʼe “ho laran-luak”. (Sal 25:12, 13) Jeová haree ita-nia terus, nia hanoin ita, no hakarak atu ajuda ita. Neʼe halo ita sente kontente tebes. Maibé oinsá Jeová fó matenek mai ita?

11. Ita presiza halo saida tan atu hetan matenek?

¹¹ Jeová fó ita matenek liuhusi Bíblia. (Prov 2:6) Atu bele hetan matenek neʼe, ita presiza estuda Bíblia no ita-nia publikasaun sira. Maibé la toʼo atu hetan deʼit koñesimentu. Ita mós presiza halo tuir Maromak nia matadalan iha ita-nia moris. Tiago hakerek: “Imi tenke sai ema neʼebé halo tuir Maromak nia liafuan, laʼós ema neʼebé rona deʼit.” (Tgo 1:22) Bainhira ita halo tuir Maromak nia matadalan, ita sei buka dame, la ulun-toos, no hatudu laran-sadiʼa. (Tgo 3:17) Hahalok sira-neʼe bele ajuda ita atu tahan hasoru susar naran deʼit ho ksolok.

12. Tanbasá importante atu hatene didiʼak Bíblia?

¹² Bíblia mak hanesan espellu. Neʼe ajuda ita atu haree saida mak ita presiza hadiʼa liután no oinsá atu halo ida-neʼe. (Tgo 1:23-25) Porezemplu, karik depois ita lee Bíblia, ita komprende katak ita presiza kontrola ita-nia hirus. Ho  Jeová nia ajuda, ita aprende oinsá atu hatudu laran-maus bainhira ema ka situasaun ruma halo ita hirus. Laran-maus mós ajuda ita atu tahan susar sira, iha hanoin neʼebé loos no halo desizaun neʼebé diʼak. (Tgo 3:13) Tan neʼe importante tebes atu hatene didiʼak Bíblia.

13. Tanbasá ita presiza aprende kona-ba ezemplu sira husi Bíblia?

¹³ Dala ruma ita bele aprende husi ita-nia sala rasik. Maibé neʼe laʼós dalan diʼak atu aprende. Diʼak liu atu aprende husi ema seluk nia susesu no mós sala. Tan neʼe mak Tiago anima ita atu aprende husi ezemplu sira iha Bíblia hanesan Abraão, Raab, Job, no Elias. (Tgo 2:21-26; 5:10, 11, 17, 18) Jeová nia atan sira-neʼe konsege tahan susar neʼebé bele halakon sira-nia ksolok. Sira-nia ezemplu hatudu katak ho Jeová nia ajuda, ita mós bele tahan susar ho ksolok.

14-15. Tanbasá ita presiza halakon ita-nia dúvida?

¹⁴ Saida mak bele halakon ita-nia ksolok? Bainhira ita duvida kona-ba ita-nia fiar. Dala ruma ita sente susar atu komprende buat ruma husi Bíblia. Ka dala ruma Jeová hatán ita-nia orasaun iha dalan neʼebé la tuir ita-nia hanoin. Karik neʼe hamosu dúvida. Se ita la halakon ita-nia dúvida, neʼe bele halo fraku ita-nia fiar no estraga ita-nia relasaun diʼak ho Jeová. (Tgo 1:7, 8) Se ita duvida, neʼe mós bele halakon ita-nia esperansa ba futuru.

¹⁵ Apóstolu Paulo kompara ita-nia esperansa ba futuru ho ankor ida. (Ebr 6:19) Ankor ajuda ró atu metin nafatin bainhira anin-fuik no proteje ró atu la xoke fatuk sira. Maibé se korrente neʼebé liga ankor ho ró mak kotu, neʼe saugati deʼit. Hanesan ferrujen bele estraga ankor nia korrente, nuneʼe mós dúvida bele halo fraku ita-nia fiar. Bainhira hasoru problema no sente duvida, neʼe bele halakon ita-nia fiar ba Jeová nia promesa. Se ita lakon ita-nia fiar, ita lakon ita-nia esperansa. Tiago dehan, ema neʼebé duvida “mak hanesan tasi nia laloran neʼebé anin huu bá-mai”. (Tgo 1:6) Se ita duvida, susar ba ita atu sente haksolok.

16. Ita presiza halo saida se ita duvida?

¹⁶ Buat neʼebé ita bele halo: Halakon ita-nia dúvida no hametin ita-nia fiar. Keta sai laran-rua. Iha profeta Elias nia tempu, Jeová nia povu sai laran-rua. Elias hatete ba sira: “Toʼo bainhira mak imi sei laran-rua? Se Jeová mak Maromak neʼebé loos, halo tuir nia bá! Se Baal mak Maromak neʼebé loos, halo tuir nia bá!” (1 Reis 18:21) Oinsá se ita sente laran-rua? Ita presiza halo riset atu prova ba ita-nia an katak Jeová mak Maromak neʼebé loos, Bíblia mak Maromak nia Liafuan, no Testemuña ba Jeová mak ninia povu. (1 Tes 5:21) Se ita halo nuneʼe, ita sei halakon ita-nia dúvida no hametin ita-nia fiar. Se ita presiza ajuda atu halakon ita-nia dúvida, ita bele hakbesik ba katuas sira. Ita presiza halakon kedas ita-nia dúvida atu bele serbí Jeová ho haksolok.

17. Saida mak sei akontese se ita lakon aten-brani?

¹⁷ Saida mak bele halakon ita-nia ksolok? Bainhira ita sai laran-triste. Bíblia hatete: “Se ó sai laran-triste iha tempu susar, ó-nia forsa sei menus.” (Prov 24:10) Liafuan Ebraiku neʼebé tradús nuʼudar “sai laran-triste” bele signifika “lakon aten-brani”. Se ita lakon aten-brani, ita mós sei lakon ita-nia ksolok.

18. Liafuan tahan katak sá?

¹⁸ Buat neʼebé ita bele halo: Sadere ba Jeová atu hetan aten-brani hodi  tahan susar. Atu bele tahan susar sira ita presiza aten-brani. (Tgo 5:11) Tiago uza liafuan neʼebé tradús nuʼudar “tahan” atu halo ita hanoin kona-ba ema ida neʼebé hamriik metin iha ninia fatin. Karik ita hanoin kona-ba soldadu ida neʼebé hamriik metin ho aten-brani hodi kontra hasoru inimigu. Nia la halai bainhira inimigu ataka.

19. Ita bele aprende saida husi apóstolu Paulo?

¹⁹ Apóstolu Paulo hatudu ezemplu diʼak kona-ba aten-brani no kbiit atu tahan. Maski dala ruma nia sente fraku, maibé nia bele tahan tanba nia sadere ba Jeová atu fó nia kbiit neʼebé nia presiza. (2 Kor 12:8-10; Flp 4:13) Ita mós bele iha kbiit no aten-brani se ita ho haraik an rekoñese katak ita presiza Jeová nia ajuda.​—Tgo 4:10.

20-21. Ita bele fiar metin kona-ba saida?

²⁰ Ita bele fiar metin katak susar neʼebé ita hasoru, laʼós kastigu husi Jeová. Tiago hatete: “Kuandu hasoru susar, ema ida labele dehan: ‘Maromak koko haʼu.’ Tanba ema labele koko Maromak no nia mós la koko ema ida ho buat neʼebé aat.” (Tgo 1:13) Bainhira ita fiar ida-neʼe, ita sei hakbesik liután ba ita-nia Aman Jeová.​—Tgo 4:8.

²¹ Jeová “la muda ka la troka”. (Tgo 1:17) Nia apoia ema Kristaun sira iha tempu uluk neʼebé hasoru susar. Nia mós sei ajuda ita ida-idak ohin loron. Ho laran tomak husu Jeová atu fó Ita matenek, fiar no aten-brani. Nia sei hatán Ita-nia orasaun. Ita bele fiar katak nia sei ajuda Ita atu haksolok nafatin maski hasoru susar.