1. Tanbasá ita presiza Jeová atu dirije ita? Fó toʼok ai-knanoik.

 IMAJINA toʼok Ita laʼo sala dalan iha ai-laran. Iha perigu oioin: animál neʼebé siʼak, insetu neʼebé hadaʼet moras, ai-horis neʼebé iha venenu, no rai kuak no fatuk barak. Ita agradese tebes se iha ema ida neʼebé hatene área neʼe no dirije Ita atu sees husi perigu sira-neʼe! Mundu mak hanesan ai-laran neʼe. Mundu nakonu ho perigu oioin neʼebé bele estraga ita-nia saúde espirituál. Maibé ita iha Jeová, ida neʼebé dirije ita iha dalan neʼebé perfeitu. Nia dirije ita atu hasees an husi perigu no bá toʼo fatin neʼebé ita hakarak, neʼe mak moris ba nafatin iha mundu foun.

2. Oinsá mak Jeová dirije ita?

² Oinsá mak Jeová dirije ita? Primeiru, liuhusi ninia Liafuan Bíblia. Nia mós uza ema atu dirije ita. Porezemplu, nia uza “atan laran-metin no matenek” atu prepara ai-han espirituál hodi ajuda ita halo desizaun neʼebé matenek. (Mt 24:45) Jeová mós uza mane seluk neʼebé iha abilidade atu dirije ita. Porezemplu, katuas área no katuas kongregasaun sira fó matadalan no mós anima atu bele ajuda ita tahan hasoru susar. Ita agradese tebes tanba Jeová dirije ita iha dalan neʼebé diʼak durante loron ikus sira-neʼe! Neʼe ajuda ita atu nafatin iha relasaun diʼak ho Jeová no kontinua laʼo iha dalan ba moris.

3. Iha lisaun neʼe, ita sei aprende saida?

³ Maski nuneʼe, dala ruma susar ba ita atu halo tuir Jeová nia matadalan, liuliu se ita simu ida-neʼe liuhusi ema neʼebé la perfeitu. Tanbasá? Karik tanba ita la gosta matadalan neʼe. Ka karik ita sente katak matadalan neʼe ladún matenek no halo ita foti konkluzaun katak neʼe laʼós mai husi Jeová. Iha situasaun hanesan neʼe, ita presiza  tau fiar katak Jeová mak dirije ninia povu no se ita halo tuir ninia matadalan, ita sei hetan benefísiu. Atu ajuda ita hametin ita-nia fiar, iha lisaun neʼe ita sei koʼalia kona-ba (1) oinsá Jeová dirije ninia povu iha tempu uluk, (2) oinsá nia dirije ita ohin loron, no (3) oinsá ita bele hetan benefísiu bainhira ita halo tuir ninia matadalan.

OINSÁ JEOVÁ DIRIJE EMA IZRAÉL

4-5. Oinsá Jeová hatudu katak nia uza Moisés atu dirije povu Izraél? (Haree dezeñu.)

⁴ Jeová hili Moisés atu lori povu Izraél sai husi rai-Ejitu. No Nia fó prova ba ema Izraél katak Nia dirije sira liuhusi Moisés. Porezemplu, iha loron nia dirije sira liuhusi kalohan no iha kalan nia dirije sira liuhusi ahi. (Éx 13:21) Moisés no povu Izraél laʼo tuir kalohan no ahi neʼebé dirije sira ba Tasi Mean. Maibé tuirmai tropa Ejitu toman ema Izraél. Tan neʼe ema Izraél sai taʼuk tebes tanba hanoin katak tropa Ejitu sei oho sira. Sira hanoin katak Moisés halo sala tanba lori sira ba Tasi Mean. Maibé loloos Moisés la halo sala. Jeová ho neon uza Moisés atu dirije sira bá iha neʼebá. (Éx 14:2) Tuirmai Jeová salva sira iha dalan neʼebé kmanek tebes.—Éx 14:​26-28.

⁵ Durante tinan 40, Moisés kontinua tau fiar katak Jeová uza kalohan no ahi atu dirije ninia povu hodi laʼo liuhusi rai-fuik. a Ba tempu balu, Jeová tau kalohan neʼe iha Moisés nia tenda leten no povu Izraél hotu bele haree ida-neʼe. (Éx 33:​7, 9, 10) Husi kalohan neʼe, Jeová koʼalia ba Moisés, no tuirmai Moisés fó sai Jeová nia matadalan ba povu. (Sal 99:7) Ema Izraél bele haree ho klaru katak Jeová uza Moisés atu dirije sira.

6. Povu Izraél simu ema neʼebé Jeová uza atu dirije sira ka lae? Esplika toʼok. (Números 14:​2, 10, 11)

⁶ Triste mak ema Izraél barak la simu prova neʼebé hatudu katak Jeová uza Moisés nuʼudar Ninia reprezentante. (Lee Números 14:​2, 10, 11.) Dala barak sira lakohi rekoñese katak Jeová uza Moisés atu dirije sira. Rezultadu mak Jeová la husik jerasaun neʼe atu tama ba rai neʼebé nia promete.—Núm 14:30.

7. Fó toʼok ezemplu kona-ba sira neʼebé halo tuir ema neʼebé Jeová uza atu dirije sira. (Números 14:24) (Haree mós dezeñu.)

⁷ Maibé povu Izraél balu halo tuir ema neʼebé Jeová uza atu dirije sira. Porezemplu, Jeová hatete: “Caleb . . . kontinua laʼo tuir haʼu ho laran tomak.” (Lee Números 14:24.) Maromak fó bensaun ba Caleb, no husik nia atu hili fatin neʼebé nia hakarak hela iha Rai neʼebé Maromak Promete. (Jos 14:​12-14) Jerasaun tuirmai husi nasaun Izraél mós hatudu ezemplu diʼak hodi halo tuir ema neʼebé Jeová uza atu dirije sira. Bainhira Josué troka Moisés atu dirije povu, sira “hatudu respeitu neʼebé kleʼan ba nia durante ninia moris tomak”. (Jos 4:14) Rezultadu mak Jeová haraik bensaun ba sira hodi lori sira tama ba rai neʼebé nia promete.—Jos 21:​43, 44.

8. Esplika toʼok oinsá Jeová dirije ninia povu durante liurai sira-nia tempu. (Haree mós dezeñu.)

⁸ Tinan barak liutiha, Jeová hili juís sira atu dirije ninia povu. Tuirmai, durante liurai sira-nia tempu, Jeová hili profeta sira atu dirije ninia povu. Liurai sira neʼebé laran-metin halo tuir profeta  sira-nia matadalan. Porezemplu, ho haraik an Liurai David simu korrije husi profeta Natan. (2 Sam 12:​7, 13; 1 Krón 17:​3, 4) Liurai Jeosafát halo tuir matadalan husi profeta Jaaziel no anima povu Judá atu “tau fiar ba [Maromak nia] profeta sira”. (2 Krón 20:​14, 15, 20) Iha tempu susar, Liurai Ezequias buka matadalan husi profeta Isaias. (Isa 37:​1-6) Bainhira liurai sira halo tuir ema neʼebé Jeová uza atu dirije sira, sira hetan bensaun no nasaun seguru. (2 Krón 20:​29, 30; 32:22) Ema hotu bele haree ho klaru katak Jeová uza profeta sira atu dirije ninia povu. Maibé povu Izraél barak no liurai sira la rona ba Jeová nia profeta sira.—Jer 35:​12-15.

OINSÁ MAK JEOVÁ DIRIJE EMA KRISTAUN IHA TEMPU ULUK?

9. Jeová uza sé atu dirije ema Kristaun iha tempu uluk? (Haree mós dezeñu.)

⁹ Depois Jesus moris hiʼas, Jeová forma kongregasaun Kristaun. Oinsá mak nia dirije ema Kristaun iha tempu uluk? Nia hili Jesus nuʼudar ulun ba kongregasaun. (Éf 5:23) Maibé Jesus la esplika ba dixípulu ida-idak kona-ba saida mak sira presiza halo. Nia uza apóstolu no katuas sira iha Jeruzalein atu dirije ema Kristaun. (Após 15:​1, 2) No mós katuas sira seluk hetan knaar atu dirije kongregasaun sira.—1 Tes 5:12; Tito 1:5.

10. (a) Ema Kristaun iha tempu uluk halo tuir matadalan ka lae? Esplika toʼok. (Apóstolu 15:​30, 31) (b) Tanbasá ema balu iha tempu uluk lakohi rekoñese sira neʼebé reprezenta Jeová? (Haree kaixa “ Tanbasá ema balu la simu evidénsia neʼebé klaru?”)

¹⁰ Ema Kristaun iha tempu neʼebá halo tuir matadalan ka lae? Maioria ema hotu kontente atu halo tuir matadalan neʼebé sira simu. Bíblia hatete: “Sira haksolok tanba liafuan sira-neʼe anima sira.” (Lee Apóstolu 15:​30, 31.) Entaun, oinsá mak Jeová dirije ninia povu iha tempu modernu?

OINSÁ JEOVÁ DIRIJE ITA OHIN LORON?

11. Fó toʼok ezemplu neʼebé hatudu katak Jeová dirije ninia povu iha tempu modernu.

¹¹ Ohin loron, Jeová kontinua dirije ninia povu. Nia halo nuneʼe liuhusi ninia  Oan-Mane, neʼebé mak Ulun ba kongregasaun no mós Bíblia. Ita bele haree duni evidénsia katak Jeová kontinua dirije ita hodi uza ema nuʼudar ninia reprezentante. Porezemplu, hanoin toʼok kona-ba buat neʼebé akontese depois tinan 1870. Charles Taze Russell no ninia maluk sira komesa komprende katak tinan 1914 mak tinan importante ba Maromak nia Ukun. (Dan 4:​25, 26) Sira komprende ida-neʼe liuhusi estuda Bíblia nia profesia. Jeová mak dirije sira iha sira-nia estuda Bíblia ka lae? Klaru katak sin. Iha tinan 1914, akontesimentu iha mundu prova katak Maromak nia Ukun hahú ona. Funu Mundiál Primeiru hahú, tuirmai mosu moras-peste, rai-nakdoko, no rai-hamlaha. (Lc 21:​10, 11) Jeová uza duni mane Kristaun sira-neʼe atu ajuda ninia povu.

12-13. Durante Funu Mundiál Segundu, irmaun sira iha sede-jerál halo arranju saida?

¹² Hanoin toʼok buat neʼebé akontese durante Funu Mundiál Segundu. Depois estuda tiha Apokalipse 17:​8, irmaun sira iha sede-jerál komprende katak funu neʼe sei la lori sira ba funu Armagedon, maibé loloos neʼe lori ba tempu dame nian no sei lori oportunidade ba serbisu haklaken atu aumenta liután. Entaun irmaun sira komesa hahú Eskola Gilead atu treinu misionáriu sira kona-ba halaʼo serbisu haklaken no hanorin iha rai oioin iha mundu tomak, maski neʼe rona hanesan ladún matenek iha tempu neʼebá. Durante tempu funu, misionáriu sira mós simu knaar atu bá fatin oioin. Atan laran-metin no matenek mós arranja Kursu ba Haklaken-Naʼin sira b atu treinu irmaun-irmán hotu atu sai haklaken-naʼin no mestre ka mestra neʼebé diʼak. Ho ida-neʼe, Maromak nia povu sai prontu atu halaʼo serbisu haklaken.

¹³ Ohin loron, ita bele haree ho klaru katak Jeová dirije ninia povu durante tempu susar. Hahú husi Funu Mundiál Segundu, Jeová nia povu haklaken ho livre iha fatin oioin. Loloos, ema barak liután mak hatene kona-ba Jeová.

14. Tanbasá ita bele tau fiar ba matadalan neʼebé mai husi Jeová nia organizasaun no katuas sira? (Apokalipse 2:1) (Haree mós foto.)

 ¹⁴ Ohin loron Grupu Administradór kontinua buka matadalan husi Kristu. Sira hakarak atu matadalan neʼebé sira fó ba irmaun-irmán sira mak haleno Jeová no Kristu nia hanoin. Tuirmai, katuas área no katuas kongregasaun fó matadalan ba kongregasaun. c Katuas kongregasaun mak iha Kristu nia “liman-loos”. (Lee Apokalipse 2:1.) Klaru katak katuas sira-neʼe la perfeitu no halo sala. Dala ruma Moisés no Josué mós halo sala, hanesan buat neʼebé apóstolu sira halo. (Núm 20:12; Jos 9:​14, 15; Rom 3:23) Maski nuneʼe, Kristu nafatin dirije atan laran-metin no matenek no katuas sira, no nia sei kontinua halo nuneʼe “toʼo mundu neʼe nia rohan”. (Mt 28:20) Tan neʼe, ita iha razaun barak atu tau fiar ba matadalan neʼebé mai husi sira neʼebé dirije ita.

BENEFÍSIU KUANDU HALO TUIR JEOVÁ NIA MATADALAN

15-16. Saida mak ita bele aprende husi sira neʼebé halo tuir Jeová nia matadalan?

¹⁵ Bainhira ita halo tuir Jeová nia matadalan, ita mós bele hetan benefísiu agora. Porezemplu, Andy no Rose d halo tuir sujestaun atu halaʼo moris neʼebé simples. (Mt 6:​22, nota) Rezultadu mak sira bele hola parte iha projetu konstrusaun. Rose hatete: “Dala ruma ami hela iha fatin neʼebé kloot tebes, no la iha dapur. Haʼu tenke faʼan ekipamentu oioin neʼebé uza atu hasai foto, maski haʼu gosta loos atu hasai foto. Haʼu tanis kuandu faʼan sasán sira-neʼe. Maibé hanesan Abraão nia feen Sara, haʼu hakaʼas an atu hateke ba oin, laʼós ba kotuk.” (Ebr 11:15) Feen-laʼen neʼe hetan benefísiu saida? Rose hatete: “Ami kontente tebes tanba hatene katak ami fó buat hotu neʼebé ami iha ba Jeová. Bainhira ami halo serbisu ba Jeová, ami bele imajina moris iha mundu foun mak oinsá.” Andy mós hatete: “Ami kontente tanba fó ami-nia tempu no enerjia hotu ba Jeová.”

¹⁶ Ita hetan benefísiu saida tan kuandu ita halo tuir Jeová nia matadalan? Bainhira  Marcia remata eskola sekundária, nia hakarak halo tuir Jeová nia matadalan hodi serbí nuʼudar pioneiru. (Mt 6:33; Rom 12:11) Nia hatete: “Haʼu hetan bolsa-estudu ba universidade neʼebé sei halaʼo ba tinan haat. Maibé haʼu hakarak atu aumenta haʼu-nia serbisu ba Jeová. Tan neʼe haʼu deside atu tuir eskola tékniku atu aprende skill ida hodi ajuda haʼu atu bele hetan serbisu no mós pioneiru. Neʼe mak desizaun ida neʼebé diʼak liu iha haʼu-nia moris. Agora haʼu serbí nuʼudar pioneiru regulár, no haʼu bele deside haʼu-nia oras serbisu, tan neʼe haʼu bele ajuda iha Betel no halaʼo knaar seluk tan ba Jeová.”

17. Ita hetan benefísiu saida bainhira kontinua halo tuir Jeová nia matadalan? (Isaias 48:​17, 18)

¹⁷ Dala ruma ita simu matadalan husi organizasaun neʼebé bele proteje ita husi materializmu no atividade neʼebé bele book ita atu kontra Maromak nia ukun-fuan. Iha situasaun sira-neʼe, ita mós hetan benefísiu hodi halo tuir matadalan husi Jeová. Porezemplu, ita iha konxiénsia neʼebé moos nafatin no hasees an husi problema oioin. (1 Tim 6:​9, 10) Rezultadu mak ita bele serbí Jeová ho laran tomak, no neʼe lori ksolok, dame, no kontente.—Lee Isaias 48:​17, 18.

18. Tanbasá ita hakarak halo tuir Jeová nia matadalan?

¹⁸ Klaru katak Jeová sei kontinua uza ema atu dirije ninia povu durante terus boot no durante Kristu nia Ukun ba Tinan Rihun Ida. (Sal 45:16) Maski ita la gosta, ita sei halo tuir matadalan neʼebé ita simu ka lae? Fasil ba ita atu halo ida-neʼe se ita kontinua halo tuir Jeová nia matadalan agora. Tan neʼe, mai ita kontinua halo tuir Jeová nia matadalan, inklui matadalan neʼebé Jeová fó mai ita liuhusi ema neʼebé nia hili atu dirije ita. (Isa 32:​1, 2; Ebr 13:17) Bainhira ita halo nuneʼe, ita sei iha razaun barak atu tau fiar ba Jeová nuʼudar nia dirije ita atu sees husi perigu neʼebé bele estraga ita-nia espiritualidade, no lori ita ba moris ba nafatin iha mundu foun.