Maski nuneʼe, Jeová hakarak ita atu hein ho pasiénsia ba tempu neʼebé nia deside ona atu hadiʼa buat hotu. Tanbasá Jeová hakarak ita atu hein ho pasiénsia? Saida mak bele ajuda ita sente kontente nuʼudar ita hein?

TANBASÁ JEOVÁ HAKARAK ITA ATU HEIN?

Bíblia hatete: “Jeová hein ho pasiénsia atu hatudu laran-diʼak ba imi, no nia sei hamriik hodi hatudu laran-sadiʼa ba imi. Tanba Jeová mak Maromak justisa nian. Ksolok ba ema sira neʼebé hein nafatin ba nia.” (Isa 30:18) Loloos liafuan sira-neʼe hakerek ba ema Judeu neʼebé ulun-toos. (Isa 30:1) Maibé iha mós ema Judeu balu neʼebé laran-metin, no liafuan sira-neʼe fó esperansa ba sira. Liafuan sira-neʼe mós bele fó esperansa ba Jeová nia atan sira ohin loron.

Ita tenke hein ho pasiénsia tanba Jeová mós hein ho pasiénsia. Nia deside ona loron no oras atu halakon sistema aat neʼe, no nia hein daudaun ba tempu neʼe. (Mt 24:36) Iha tempu neʼebá, ema hotu sei hatene katak buat neʼebé Satanás duun kona-ba Jeová no ninia atan mak la loos. Jeová sei halakon Satanás no sira neʼebé apoia Satanás, maibé nia sei “hatudu laran-sadiʼa ba” ita.

Antes tempu neʼe toʼo mai, Jeová sei la halakon ita-nia susar hotu, maibé nia promete katak ita bele sente kontente nuʼudar ita hein. Hanesan Isaias hatete, ita bele sente kontente nuʼudar ita hein ba buat diʼak atu akontese. (Isa 30:18) Oinsá? Iha hakat haat neʼebé bele ajuda ita.

OINSÁ ATU SENTE KONTENTE NUʼUDAR ITA HEIN?

Fokus ba buat pozitivu. Liurai David haree hahalok aat oioin durante ninia moris. (Sal 37:35) Maski nuneʼe, nia hakerek: “Hein ho nonook deʼit iha Jeová nia oin no hein nia ho pasiénsia. Keta sai laran-nakali tanba ema neʼebé hetan susesu hodi kumpre ninia planu aat sira.” (Sal 37:7) David rasik halo tuir matadalan neʼe hodi fokus ba Jeová nia promesa atu salva nia. Nia mós agradese  ba bensaun hotu neʼebé nia simu husi Jeová. (Sal 40:5) Nuneʼe mós ho ita, se ita fokus ba buat pozitivu iha ita-nia moris no la fokus ba problema neʼebé ita hasoru, neʼe sei halo fasil liu ba ita atu hein ba Jeová.

Sai okupadu nafatin atu fó hahiʼi ba Jeová. Karik David mak hakerek Salmo 71 neʼebé hatete: “Haʼu sei kontinua hein ba Ita; haʼu sei hahiʼi Ita liután.” (Sal 71:14) Oinsá mak nia fó hahiʼi ba Jeová? Nia koʼalia ba ema seluk kona-ba Jeová no kanta knananuk atu fó hahiʼi ba nia. (Sal 71:​16, 23) Hanesan David, Ita bele hetan ksolok nuʼudar ita hein ba Jeová. Ita bele fó hahiʼi ba Jeová bainhira ita haklaken, koʼalia kona-ba nia ba ita-nia belun no família sira, no kanta ita-nia knananuk sira. Iha tempu tuirmai bainhira kanta ita-nia knananuk ida, hanoin didiʼak kona-ba knananuk neʼe nia liafuan no oinsá neʼe lori kontente ba Ita.

Hetan anima hodi gasta tempu ho irmaun-irmán sira. Bainhira David hasoru susar, nia hatete ba Jeová: “Iha Ita-nia atan laran-metin sira-nia oin, haʼu sei tau esperansa ba Ita-nia naran.” (Sal 52:9) Ita mós bele hetan anima husi ita-nia maluk fiar-naʼin neʼebé laran-metin, laʼós deʼit kuandu asiste reuniaun no bá haklaken, maibé mós hodi ransu hamutuk.—Rom 1:​11, 12.

Hametin Ita-nia esperansa. Salmo 62:5 hatete: “Haʼu hein deʼit ba Maromak ho pasiénsia tanba haʼu-nia esperansa mai husi nia.” Importante atu iha esperansa neʼebé metin, liuliu se mundu nia rohan la mai tuir tempu neʼebé ita espera. Ita tenke fiar metin katak Jeová nia promesa sira sei sai loos, maski ita presiza hein ba tempu kleur. Ita bele hametin ita-nia esperansa hodi estuda Bíblia. Porezemplu, ita bele estuda kona-ba profesia sira, oinsá istória sira iha Bíblia la kontra malu, no Jeová nia hahalok oioin. (Sal 1:​2, 3) Ita mós presiza kontinua “halo orasaun tuir espíritu santu” atu bele nafatin iha relasaun diʼak ho Jeová nuʼudar ita hein ba nia atu kumpre ninia promesa kona-ba moris ba nafatin.—Jud 20, 21.

Hanesan Liurai David, fiar bá katak Jeová haree sira neʼebé hein ba nia no nia hatudu domin neʼebé laran-metin ba sira. (Sal 33:​18, 22) Kontinua hein ba Jeová ho pasiénsia hodi fokus ba buat pozitivu, fó hahiʼi ba nia, buka anima husi irmaun-irmán sira, no kontinua hametin Ita-nia esperansa neʼebé folin-boot.