1. Maromak nia domin halo Ita sente oinsá?

APÓSTOLU JOÃO hakerek: “Maromak mak domin.” (1 João 4:8) Fraze simples neʼe fó-hanoin ita kona-ba lia-loos importante ida: Maromak mak Hun ba moris no mós Hun ba domin. Jeová hadomi ita. Ninia domin halo ita sente seguru, kontente no la falta buat ida.

2. Tuir Mateus 22:37-40, saida mak mandamentu rua neʼebé boot liu? Tanbasá dala ruma susar ba ita atu halo tuir mandamentu segundu?

² Ema Kristaun tenke hatudu domin, neʼe mak mandamentu ida. (Lee Mateus 22:37-40.) Bainhira ita koñese didiʼak Jeová, karik neʼe sei halo fasil ba ita atu halo tuir mandamentu primeiru. Neʼe fasil tanba Jeová mak perfeitu, nia hanoin ita no hatudu laran-diʼak ba ita. Maibé karik susar ba ita atu halo tuir mandamentu segundu. Tanbasá? Tanba ita-nia maluk sira ka ita-nia irmaun-irmán sira mak ema la perfeitu. Dala ruma sira-nia liafuan no hahalok la hatudu laran-diʼak. Jeová hatene katak ita sei hasoru susar neʼe. Tan neʼe, nia uza ema balu neʼebé hakerek Bíblia atu hanorin ita kona-ba tanbasá ita presiza hatudu domin ba malu no oinsá atu halo ida-neʼe. Ema ida neʼebé Maromak uza mak João.—1 João 3:11, 12.

3. Saida mak João hatete beibeik kona-ba domin?

³ Iha livru neʼebé João hakerek, nia temi beibeik katak ema Kristaun tenke hatudu domin. Tuir loloos, iha Evanjellu João, nia koʼalia kona-ba domin dala barak liu fali Evanjellu tolu seluk. Nia maizumenus tinan 100 bainhira nia hakerek Evanjellu João no ninia karta tolu. Livru sira  neʼebé João hakerek hatudu katak ema Kristaun tenke halo buat hotu-hotu ho domin. (1 João 4:10, 11) No João mós presiza aprende kona-ba lisaun neʼe.

4. João sempre hatudu domin ba ema seluk ka lae? Esplika toʼok.

⁴ Bainhira João sei joven, dala ruma nia la hatudu domin. Porezemplu, iha loron ida Jesus no ninia dixípulu sira halo viajen ba Jeruzalein no sira laʼo liu husi Samaria. Ema iha knua ida iha Samaria lakohi simu sira. Saida mak João halo? Nia no Tiago husu Jesus se sira bele halo ahi tun husi lalehan hodi han hotu ema sira iha knua neʼe. (Lc 9:52-56) Iha tempu seluk, João la hatudu domin ba apóstolu seluk. João no Tiago haruka sira-nia inan atu husu ba Jesus atu fó pozisaun importante ba sira iha Maromak nia Ukun. Bainhira apóstolu sira seluk rona kona-ba neʼe, sira sai hirus tebes. (Mt 20:20, 21, 24) Maski João halo sala sira-neʼe, maibé Jesus nafatin hadomi nia.—João 21:7.

5. Saida mak ita sei aprende iha lisaun neʼe?

⁵ Iha lisaun neʼe, ita sei koʼalia kona-ba João nia ezemplu no buat balu neʼebé nia hakerek kona-ba domin. Hodi halo nuneʼe, ita sei aprende oinsá atu hatudu domin ba ita-nia irmaun-irmán sira. Ita mós sei aprende kona-ba dalan importante ida oinsá ulun ba família bele hatudu domin ba ninia família.

6. Oinsá mak Jeová hatudu sai ninia domin ba ita?

⁶ Baibain ita hanoin katak hatudu domin ba ema mak liuhusi koʼalia ho laran-diʼak. Maibé domin neʼebé loos presiza hatudu sai liuhusi hahalok. (Kompara ho Tiago 2:17, 26.) Jeová hadomi ita. (1 João 4:19) Nia fó sai ninia domin liuhusi liafuan furak sira neʼebé hakerek iha Bíblia laran. (Sal 25:10; Rom 8:38, 39) Maibé laʼós neʼe deʼit, ita hatene katak Maromak hadomi ita liuhusi buat neʼebé nia halo. João hakerek: “Maromak hatudu ninia domin mai ita iha dalan tuirmai neʼe: Maromak haruka ninia Oan-Mane mesak mai mundu atu ita bele hetan moris liuhusi nia.” (1 João 4:9) Jeová husik ninia Oan-Mane mesak atu hetan terus no mate ba ita. (João 3:16) Ita bele fiar katak Jeová hadomi tebes ita.

7. Oinsá Jesus hatudu sai ninia domin ba ita?

⁷ Jesus hatete ba ninia dixípulu sira katak nia hadomi sira. (João 13:1; 15:15) Nia hatudu sai ninia domin ba sira no mós ba ita liuhusi ninia liafuan no mós  hahalok. Jesus hatete: “La iha ema ida mak iha domin boot liu fali ema neʼebé entrega nia moris tanba ninia belun sira.” (João 15:13) Bainhira ita hanoin kona-ba buat neʼebé Jeová no Jesus halo ona ba ita, neʼe book ita atu halo saida?

8. Tuir 1 João 3:18, saida mak ita tenke halo?

⁸ Ita hatudu katak ita hadomi Jeová no Jesus liuhusi halo tuir sira. (João 14:15; 1 João 5:3) Jesus haruka ita atu hadomi malu. (João 13:34, 35) Ita tenke hatudu sai ita-nia domin ba irmaun-irmán sira liuhusi ita-nia liafuan no mós hahalok. (Lee 1 João 3:18.) Saida deʼit mak ita bele halo atu hatudu katak ita hadomi sira?

9. Domin book João atu halo saida?

⁹ Tuir loloos, João bele hela nafatin ho ninia aman no nia bele serbisu ho ninia aman nuʼudar peskadór. Maibé duké halo nuneʼe, nia uza ninia moris tomak atu ajuda ema seluk aprende lia-loos kona-ba Jeová no Jesus. La fasil atu halo nuneʼe. Ema fó-terus ba nia, no bainhira nia katuas ona, ema hatama nia ba komarka. (Após 3:1; 4:1-3; 5:18; Apok 1:9) Maski João tama komarka tanba haklaken kona-ba Jesus, maibé nia nafatin hanoin kona-ba ema seluk. Porezemplu, iha illa Patmos, João hakerek livru Apokalipse. No nia haruka livru neʼe ba kongregasaun sira, atu nuneʼe sira bele hatene “kona-ba buat neʼebé lakleur tan tenke akontese”. (Apok 1:1) Karik depois João sai livre husi komarka iha illa Patmos mak nia hakerek Evanjellu João neʼebé fó sai kona-ba Jesus nia moris no ninia serbisu haklaken. João mós hakerek karta tolu atu anima no hametin irmaun-irmán sira. Oinsá Ita bele banati-tuir João?

10. Oinsá Ita bele hatudu katak Ita hadomi ema?

¹⁰ Ita bele hatudu katak Ita hadomi ema liuhusi dalan neʼebé Ita halaʼo Ita-nia moris. Satanás nia mundu hakarak Ita atu gasta tempu no enerjia hotu atu tau fokus ba Ita-nia an, buka osan ka buka naran-boot. Duké halo nuneʼe, ema Kristaun iha mundu tomak uza tempu barak atu bele haklaken no ajuda ema atu hakbesik liután ba Jeová. Sira balu uza sira-nia tempu tomak atu haklaken no hanorin.

11. Oinsá irmaun-irmán sira hatudu katak sira hadomi Jeová no maluk Kristaun sira?

¹¹ Ema Kristaun barak tenke serbisu full-time atu bele sustenta sira-nia an no mós sira-nia família nia presiza. Maski nuneʼe, irmaun-irmán sira-neʼe apoia Jeová nia organizasaun tuir sira-nia situasaun. Porezemplu, irmaun-irmán balu fó ajuda bainhira dezastre akontese, seluk ajuda iha serbisu konstrusaun, no irmaun-irmán hotu iha oportunidade atu fó kontribuisaun atu apoia serbisu iha mundu tomak. Sira halo buat sira-neʼe tanba hadomi Maromak no hadomi ema seluk. Semana-semana, ita hatudu sai ita-nia domin ba irmaun-irmán sira liuhusi tuir reuniaun no hola parte iha reuniaun. Maski karik ita sente kole, maibé ita nafatin tuir reuniaun sira. No maski ita taʼuk, ita nafatin fó komentáriu. Maski ita ida-idak iha problema, maibé ita nafatin anima ema seluk antes no depois reuniaun sira. (Ebr 10:24, 25) Ita agradese tebes ba serbisu neʼebé ita-nia irmaun-irmán sira halo.

12. Saida mak dalan seluk tan neʼebé João hatudu domin ba irmaun-irmán sira?

 ¹² João hatudu katak nia hadomi irmaun-irmán sira hodi gaba sira no mós fó konsellu ba sira. Porezemplu iha karta neʼebé João hakerek, nia gaba irmaun-irmán sira tanba sira-nia fiar no hahalok diʼak sira. Maibé nia mós fó konsellu ba sira tanba halo hahalok sala. (1 João 1:8–2:1, 13, 14) Ita mós presiza gaba irmaun-irmán sira tanba buat diʼak neʼebé sira halo. Maibé se irmaun ka irmán ida komesa iha hanoin ka toman neʼebé sala, ita bele hatudu domin hodi fó konsellu ba nia. Presiza aten-brani atu fó konsellu ba ita-nia belun. Maibé Bíblia hatete katak belun neʼebé loos sei fó konsellu ba malu.—Prov 27:17.

13. Saida mak ita labele halo?

¹³ Dala ruma, ita hatudu domin ba irmaun-irmán sira liuhusi kontrola ita-nia hahalok. Porezemplu, ita la sai hirus lalais ho sira-nia liafuan. Hanoin toʼok buat ida neʼebé akontese durante Jesus nia moris iha mundu. Jesus hatete ba ninia dixípulu sira katak atu bele hetan moris, sira presiza han ninia isin no hemu ninia raan. (João 6:53-57) Dixípulu barak hakfodak ho Jesus nia liafuan neʼe no deside atu husik hela nia. Maibé ninia belun neʼebé loos hanesan João la husik nia. Sira laran-metin ba nia. Sira la komprende Jesus nia liafuan no karik sira mós hakfodak ho ida-neʼe. Maski nuneʼe, sira la hanoin katak buat neʼebé Jesus hatete mak sala no la sai hirus ho ida-neʼe. Duké halo nuneʼe, sira tau fiar ba nia tanba hatene katak nia koʼalia lia-loos. (João 6:60, 66-69) Importante atu la sai hirus lalais ho buat neʼebé ita-nia irmaun-irmán sira hatete. Duké sai hirus, ita fó oportunidade ba sira atu esplika sira-nia liafuan.—Prov 18:13; Ecle 7:9.

14. Tanbasá ita labele odi ita-nia irmaun-irmán sira?

¹⁴ João mós anima ita atu labele odi ita-nia irmaun-irmán sira. Se ita la halo tuir konsellu neʼe, Satanás bele fó influénsia ba ita. (1 João 2:11; 3:15) Ida-neʼe akontese ba ema balu iha apóstolu sira-nia tempu. Satanás hakaʼas an atu book Maromak nia atan sira atu odi malu no haketak malu. Bainhira João hakerek ninia karta, ema balu iha kongregasaun  koko atu halakon unidade iha kongregasaun. Ezemplu ida mak mane ida naran Diótrefes. (3 João 9, 10) Nia la hatudu respeitu ba reprezentante husi grupu administradór. Bainhira maluk Kristaun sira hatudu laran-diʼak ba ema neʼebé nia la gosta, nia koko atu hasai sira husi kongregasaun. Neʼe mak hahalok foti an. Ohin loron, Satanás kontinua hakaʼas an atu halakon unidade iha Maromak nia povu nia leet. Ita labele odi ita-nia maluk sira no labele husik ida-neʼe halakon ita-nia unidade.

15. Ulun ba família tenke hanoin-hetan saida?

¹⁵ Dalan importante ida oinsá ulun ba família hatudu domin ba ninia família mak liuhusi sustenta família nia presiza. (1 Tim 5:8) Maibé nia tenke hanoin-hetan katak buat neʼebé importante liu ba nia mak atu ajuda ninia família atu iha relasaun diʼak ho Jeová. (Mt 5:3) Hanoin toʼok Jesus nia ezemplu ba ulun ba família sira. Tuir Evanjellu João, bainhira Jesus besik atu mate iha ai-riin terus nian, nia nafatin hanoin kona-ba ninia família. Iha fatin neʼebé Jesus hetan kastigu-mate, João hamriik hamutuk ho Jesus nia inan Maria. Maski Jesus terus loos, nia husu João atu tau matan ba Maria. (João 19:26, 27) Jesus iha alin sira neʼebé bele sustenta Maria nia presiza. Maibé iha tempu neʼebá, sira ida seidauk sai Jesus nia dixípulu. Tan neʼe, Jesus hakarak ema ida atu tau matan ba Maria nia presiza fíziku no mós espirituál nian.

16. João iha responsabilidade saida deʼit?

¹⁶ João iha responsabilidade oioin. Nia mak apóstolu ida, tan neʼe nia presiza haklaken ho laran-manas. Karik nia mós kaben-naʼin. Tan neʼe nia presiza tau matan ba ninia família nia presiza fíziku no mós espirituál nian. (1 Kor 9:5) Ulun ba família sira bele aprende saida?

17. Oinsá mak ulun ba família hatudu domin ba ninia família?

¹⁷ Irmaun neʼebé sai nuʼudar ulun ba família iha responsabilidade oioin. Porezemplu, nia tenke badinas iha serbisu-fatin atu nuneʼe ninia hahalok fó glória ba Jeová. (Éf 6:5, 6; Tito 2:9, 10) No karik nia iha responsabilidade iha  kongregasaun hanesan tau matan ba irmaun-irmán sira no badinas iha serbisu haklaken. Importante mós atu nia estuda Bíblia beibeik ho ninia feen no ninia oan sira. Ninia feen no oan sira sei hafolin ninia hakaʼas an atu tau matan ba sira-nia presiza fíziku, emosaun no espirituál nian.—Éf 5:28, 29; 6:4.

18. João fiar saida?

¹⁸ João moris kleur no iha esperiénsia barak. Nia hasoru situasaun susar oioin neʼebé bele halo fraku ninia fiar. Maibé nia sempre hakaʼas an atu halo tuir Jesus nia mandamentu hotu, inklui mandamentu atu hadomi irmaun-irmán sira. Tan neʼe, João fiar katak Jeová no Jesus hadomi nia no sira sei fó kbiit ba nia atu tahan hasoru susar hotu. (João 14:15-17; 15:10; 1 João 4:16) Satanás no ninia mundu labele hapara João atu hadomi irmaun-irmán sira no hatudu sai ninia domin liuhusi ninia liafuan no hahalok.

19. Tuir 1 João 4:7, ita presiza halo saida no tanbasá?

¹⁹ Hanesan João, ita moris iha mundu neʼebé Satanás mak ukun. (1 João 3:1, 10) Satanás hakarak ita atu la hadomi tan ita-nia irmaun-irmán sira. Maibé nia sei la hetan susesu se ita la fó oportunidade ba nia. Tan neʼe, mai ita hakaʼas an atu hadomi ita-nia irmaun-irmán sira no mós hatudu sai ita-nia domin liuhusi liafuan no hahalok. Bainhira ita hatudu domin, ita sei haksolok tanba sai parte ba Jeová nia família no ita mós bele moris ho kontente.—Lee 1 João 4:7.