1. Oinsá diskursu ida iha reuniaun boot iha tinan 1935 book mane joven ida?

ULUK iha feen-laʼen ida neʼebé iha oan-mane naʼin-tolu no oan-feto naʼin-rua. Sira mak Estudante Bíblia, neʼe mak naran husi Testemuña ba Jeová iha tempu uluk. Feen-laʼen neʼe hanorin sira-nia oan atu serbí Jeová no banati-tuir Jesus Kristu. Sira-nia oan-mane ida hetan batizmu iha tinan 1926 bainhira nia tinan 18. Hanesan ho Estudante Bíblia seluk iha tempu neʼebá, mane joven neʼe han paun no hemu tua-uvas tinan-tinan iha Naʼi nia Han-Kalan. Maibé ninia esperansa ba futuru troka tanba diskursu ho títulu “Ema-lubun boot”. Iha tinan 1935, irmaun Joseph Rutherford hatoʼo diskursu neʼe iha reuniaun boot ida iha Washington, Estadus Unidus. Estudante Bíblia sira aprende saida iha reuniaun boot neʼe?

2. Irmaun Joseph Rutherford esplika hanorin furak saida iha ninia diskursu?

² Iha irmaun Joseph Rutherford nia diskursu, nia esplika kona-ba sé mak “ema-lubun boot” neʼebé temi iha Apokalipse 7:9. Antes neʼe, Estudante Bíblia sira fiar katak ema-lubun boot mak grupu neʼebé sei bá lalehan maibé ladún laran-metin. Irmaun Joseph Rutherford uza Eskritura sira atu esplika katak ema-lubun boot sei la bá lalehan maibé sira mak Kristu nia bibi-malae seluk * neʼebé  sei moris liu “terus boot” no sei moris ba nafatin iha mundu. (Apok 7:14) Jesus promete: “Haʼu iha bibi-malae seluk tan neʼebé laʼós parte ba bibi-lubun neʼe, haʼu mós tenke lori sira mai, no sira sei rona haʼu-nia lian, no sira sei sai bibi-lubun ida deʼit, no iha bibi-atan ida deʼit.” (João 10:16) Bibi-malae seluk mak Testemuña ba Jeová neʼebé laran-metin no sira iha esperansa atu moris ba nafatin iha mundu paraízu. (Mt 25:31-33, 46) Mai ita haree oinsá hanorin foun neʼe troka Testemuña barak nia moris, inklui irmaun joven neʼebé tinan 18.—Sal 97:11; Prov 4:18.

3-4. Iha reuniaun boot iha tinan 1935, ema barak rekoñese saida kona-ba sira-nia esperansa?

³ Parte ida iha reuniaun boot neʼe neʼebé halo ema kontente mak bainhira oradór hatete ba rona-naʼin: “Ema hotu neʼebé iha esperansa atu moris ba nafatin iha mundu, favór hamriik!” Irmaun ida neʼebé tuir reuniaun boot neʼe hatete katak porsentu 50 liu husi ema naʼin-20.000 mak hamriik. Tuirmai irmaun Joseph Rutherford hatete: “Haree bá! Ema-lubun boot!” Depois neʼe, ema hotu haklalak ho kontente. Sira neʼebé hamriik, komprende katak Jeová la hili sira ho ninia espíritu santu atu moris iha lalehan. Iha loron tuirmai husi reuniaun boot neʼe, ema naʼin-840 mak hetan batizmu, no maioria husi sira mak parte ba bibi-malae seluk.

⁴ Depois diskursu neʼe, irmaun joven neʼebé temi ohin no ema rihun ba rihun seluk la han tan paun no la hemu tan tua-uvas iha Memoriál. Ema barak sente hanesan ho irmaun haraik an ida neʼebé dehan: “Tinan 1935 mak tempu ikus neʼebé haʼu han paun no hemu tua-uvas iha loron Memoriál. Haʼu rekoñese katak Jeová la uza ninia espíritu santu atu fó ba haʼu esperansa atu moris iha lalehan. Maibé haʼu iha esperansa atu moris ba nafatin iha mundu no hola parte atu halo mundu sai paraízu.” (Rom 8:16, 17; 2 Kor 1:21, 22) Husi tempu neʼebá, ema-lubun kontinua aumenta no sira serbisu hamutuk ho Kristu nia alin sira neʼebé sei moris iha rai.

5. Jeová hanoin oinsá kona-ba ema neʼebé la han tan paun no la hemu tan tua-uvas iha Memoriál?

⁵ Jeová hanoin oinsá kona-ba ema sira neʼebé la han tan paun no la hemu tan tua-uvas iha Memoriál depois tinan 1935? Jeová sente oinsá ho Testemuña sira neʼebé ohin loron han paun no hemu tua-uvas iha Memoriál, maibé ikusmai sira rekoñese katak sira la iha esperansa atu moris iha lalehan? (1 Kor 11:28) Sira balu han paun no hemu tua-uvas iha loron Memoriál tanba komprende sala sira-nia esperansa. Maibé se sira rekoñese sira-nia sala no la han tan paun no la hemu tan tua-uvas iha Memoriál no mós kontinua serbí Jeová ho laran-metin, Jeová sei simu sira nuʼudar bibi-malae seluk. Maski sira la han paun no la hemu tua-uvas iha Memoriál, maibé sira nafatin tuir Memoriál tanba sira hafolin buat neʼebé Jeová no Jesus halo ona ba sira.

6. Jesus haruka anju sira atu halo saida?

⁶ Terus boot besik daudaun ona, tan neʼe ita bele hetan anima hodi aprende kona-ba buat neʼebé Apokalipse  kapítulu 7 hatete kona-ba Kristu nia alin no mós ema-lubun boot husi bibi-malae seluk. Jesus haruka anju sira atu kontinua kaer metin anin haat neʼebé hamosu terus boot. Sira halo nuneʼe toʼo tempu neʼebé Kristu nia alin hotu hetan sinál, katak Jeová haree ona sira nuʼudar ema neʼebé laran-metin. (Apok 7:1-4) Tanba sira laran-metin, sira sei sai liurai no amlulik iha lalehan hamutuk ho Jesus. (Apok 20:6) Jeová nia família tomak iha lalehan hein namanas atu haree Kristu nia alin naʼin-144.000 hetan sira-nia kolen iha lalehan.

7. Tuir Apokalipse 7:9, 10, João haree sé, no saida mak sira halo? (Haree dezeñu iha livru oin.)

⁷ Depois João koʼalia tiha kona-ba liurai no amlulik naʼin-144.000, tuirmai nia haree “ema-lubun boot” neʼebé sei moris liu Armagedon. Grupu rua neʼe la hanesan tanba ema-lubun boot mak barak liu. Ita la hatene ho loloos ema naʼin-hira mak sai parte ba ema-lubun boot. (Lee Apokalipse 7:9, 10.) Sira “hatais roupa mutin”. Neʼe hatudu katak sira “hadook an husi hahalok aat” iha Satanás nia mundu no sira nafatin laran-metin ba Maromak no mós Kristu. (Tgo 1:27) Sira hatete katak sira hetan salvasaun tanba buat neʼebé Jeová no Jesus, Maromak nia Bibi-Oan, halo ona ba sira. Sira mós kaer “ai-palmeira sanak”. Neʼe hatudu katak sira ho laran-kontente simu Jesus nuʼudar Liurai neʼebé Jeová hili.—Kompara ho João 12:12, 13.

8. Apokalipse 7:11, 12 hatete saida kona-ba Jeová nia família iha lalehan?

⁸ Lee Apokalipse 7:11, 12. Sira neʼebé iha lalehan sente oinsá bainhira haree ema-lubun boot? João haree Jeová nia família hotu iha lalehan sente kontente no fó hahiʼi ba Jeová bainhira sira haree ema-lubun boot. Jeová nia família iha lalehan sei kontente atu haree vizaun neʼe sai loos bainhira ema-lubun boot moris liu terus boot.

9. Tuir Apokalipse 7:13-15, ohin loron ema-lubun boot halo saida?

⁹ Lee Apokalipse 7:13-15. João hakerek katak ema-lubun boot “fase ona sira-nia roupa no halo mutin ona sira-nia roupa ho Bibi-Oan nia raan”. Neʼe katak sira iha konxiénsia neʼebé moos no Jeová haree sira nuʼudar ema neʼebé laran-loos. (Isa 1:18) Sira mak ema Kristaun neʼebé dedika an ona no hetan batizmu. Sira hatudu fiar ba Jesus nia sakrifísiu no iha relasaun diʼak ho Jeová. (João 3:36; 1 Ped 3:21) Sira kumpre kritéria atu hamriik iha Maromak nia kadunan nia oin hodi “halo serbisu sagradu ba nia loron no kalan” iha mundu. Maromak nia Ukun mak importante liu ba sira, tan neʼe sira halo serbisu haklaken barak ho laran-manas no mós hanorin ema atu sai dixípulu.—Mt 6:33; 24:14; 28:19, 20.

10. Ema-lubun boot fiar saida? Promesa saida mak sei sai loos?

¹⁰ Ema-lubun boot neʼebé moris liu terus boot fiar katak Maromak kontinua tau matan ba sira, tanba “Ida neʼebé tuur iha kadunan sei harii ninia tenda atu proteje sira”. Iha tempu neʼebá, Maromak nia promesa ba bibi-malae seluk sei sai loos: “[Maromak] sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”—Apok 21:3, 4.

11-12. (a) Tuir Apokalipse 7:16, 17, ema-lubun boot sei hetan bensaun saida? (b) Saida mak bibi-malae seluk bele halo iha Memoriál, no tanbasá?

 ¹¹ Lee Apokalipse 7:16, 17. Ohin loron, Jeová nia povu balu hamlaha tanba problema ekonomia no mós funu. Sira balu tama komarka tanba sira-nia fiar. Maibé ema-lubun boot kontente tanba hatene katak sira sei moris liu sistema aat neʼe nia rohan no sei hetan ai-han fíziku no espirituál barak. Bainhira Jeová halakon Satanás nia mundu aat, nia sei proteje ema-lubun boot husi ninia hirus neʼebé hanesan ho “rai-manas makaʼas”. Depois terus boot remata, Jesus sei dirije ema neʼebé moris liu terus boot ba “bee-matan moris [rohan-laek] nian”. Ema-lubun boot iha esperansa ida neʼebé furak. Husi ema hotu neʼebé moris toʼo agora, ema-lubun boot sei nunka mate.—João 11:26.

¹² Bibi-malae seluk agradese tebes ba Jeová no Jesus tanba iha esperansa furak! Maski sira la iha esperansa atu bá lalehan, maibé sira folin-boot ba Jeová. Kristu nia alin sira no bibi-malae seluk bele fó hahiʼi ba Maromak no mós Kristu. Dalan ida sira halo nuneʼe mak hodi tuir Naʼi nia Han-Kalan.

13-14. Tanbasá ema hotu presiza tuir Memoriál?

¹³ Iha tinan hirak-neʼe nia laran, maizumenus husi ema naʼin-1.000 neʼebé tuir Memoriál só ema ida deʼit mak han paun no hemu tua-uvas. Kongregasaun barak iha mundu tomak la iha ema ida neʼebé han paun no hemu tua-uvas iha Memoriál. Maioria ema neʼebé tuir Memoriál iha esperansa atu moris ba nafatin iha mundu. Entaun tanbasá sira tuir Memoriál? Sira-nia razaun atu tuir mak atu hanesan ho ema neʼebé tuir festa kazamentu. Sira tuir festa tanba hakarak atu hatudu domin no apoia noiva no noivu. Nuneʼe mós ho bibi-malae seluk, sira tuir Memoriál tanba sira hakarak atu hatudu domin no apoia Kristu no ninia alin sira. Bibi-malae seluk mós tuir Memoriál atu hatudu agradese ba Jesus nia sakrifísiu neʼebé loke dalan ba sira atu moris ba nafatin iha mundu.

 ¹⁴ Razaun importante seluk tan tanbasá bibi-malae seluk tuir Memoriál mak atu halo tuir Jesus nia mandamentu. Bainhira Jesus hahú Naʼi nia Han-Kalan hamutuk ho ninia apóstolu sira, nia hatete ba sira: “Kontinua halo ida-neʼe hodi hanoin haʼu.” (1 Kor 11:23-26) Tan neʼe, durante Kristu nia alin sira moris hela iha rai, bibi-malae seluk sei kontinua tuir Memoriál. No sira mós sei konvida ema seluk atu tuir Memoriál.

15. Oinsá ita rasik bele fó hahiʼi ba Maromak no Kristu iha Memoriál?

¹⁵ Durante Memoriál, ita iha oportunidade atu fó hahiʼi ba Maromak no Kristu liuhusi kanta knananuk no halo orasaun. Títulu ba diskursu Memoriál ba tinan neʼe mak “Hatudu agradese ba buat neʼebé Maromak no Kristu halo ona mai ita!” Diskursu neʼe sei ajuda ita atu sente agradese liután ba Jeová no mós Kristu. Bainhira ita pasa paun no tua-uvas, ita hanoin kona-ba buat sira-neʼe reprezenta saida, neʼe mak Jesus nia isin no mós ninia raan. Ita sei hanoin kona-ba domin neʼebé Jeová hatudu hodi fó ninia Oan-Mane atu mate ba ita atu nuneʼe ita bele hetan moris. (Mt 20:28) Ema hotu neʼebé hadomi Jeová no Jesus sei hakarak atu tuir Memoriál.

16. Iha dalan oinsá mak Kristu nia alin sira no bibi-malae seluk hanesan?

¹⁶ Iha dalan balu neʼebé Kristu nia alin sira no bibi-malae seluk mak hanesan. Jeová hatudu domin neʼebé hanesan ba grupu rua neʼe. No Jeová hafolin grupu rua neʼe. Ita hatene ida-neʼe tanba Jeová sosa Kristu nia alin sira no bibi-malae seluk ho folin neʼebé hanesan. Neʼe mak ninia Oan-Mane nia moris. Buat neʼebé la hanesan entre grupu rua neʼe mak sira-nia esperansa. Maibé grupu rua neʼe tenke laran-metin nafatin ba Maromak no mós Kristu. (Sal 31:23) No hanoin-hetan, Maromak nia espíritu bele ajuda ita hotu iha dalan neʼebé hanesan. Neʼe katak Jeová fó espíritu santu ba ita tuir ita ida-idak nia presiza.

17. Kristu nia alin sira hein namanas ba saida?

¹⁷ Ema neʼebé iha esperansa atu bá lalehan la moris-mai ho esperansa neʼe. Maromak mak tau esperansa neʼe iha sira-nia laran. Sira hanoin kona-ba sira-nia esperansa, halo orasaun kona-ba neʼe, no hein namanas atu simu sira-nia kolen iha lalehan. Sira la hatene ho loloos moris iha lalehan ho isin espíritu mak hanesan saida. (Flp 3:20, 21; 1 João  3:2) Maski nuneʼe, sira hein namanas atu hasoru Jeová, Jesus no anju sira, no mós Kristu nia alin sira seluk. No sira hein namanas atu sai parte ba Maromak nia Ukun.

18. Bibi-malae seluk hein namanas ba saida?

¹⁸ Bibi-malae seluk hein namanas atu moris ba nafatin iha rai. Neʼe mak ema hotu nia hakarak. (Ecle 3:11) Sira hein namanas atu halo mundu tomak sai paraízu. Sira hein namanas atu harii sira-nia uma, halo sira-nia toʼos, no iha saúde perfeitu hamutuk ho sira-nia oan. (Isa 65:21-23) Sira hein atu halo viajen ba fatin oioin iha mundu atu haree foho sira, ai-laran, no tasi sira, atu nuneʼe sira bele estuda buat hotu neʼebé Jeová kria. Buat neʼebé halo sira kontente liu mak sira hatene katak sira-nia relasaun ho Jeová bele sai metin liután.

19. Memoriál fó oportunidade saida ba ita? Tinan neʼe Memoriál sei halaʼo iha sá loron?

¹⁹ Jeová fó esperansa furak ba ninia atan ida-idak. (Jer 29:11) Memoriál fó oportunidade furak ba ita hotu atu fó hahiʼi ba Maromak no Kristu tanba buat hotu neʼebé sira halo atu ita bele moris ba nafatin. Memoriál mak reuniaun importante liu ba ema Kristaun neʼebé loos. Memoriál sei halaʼo iha loron-sábadu, 27 Marsu 2021 depois loro-matan monu. Karik iha tinan neʼe, ita barak iha liberdade atu tuir reuniaun importante neʼe. Maibé ema seluk sei tuir maski ema kontra sira. Ema seluk tan komemora Memoriál iha komarka laran. Ami hein katak kongregasaun hotu, grupu hotu, no ema ida-idak sei komemora Memoriál ho kontente nuʼudar Jeová, Jesus no Maromak nia família iha lalehan hateke mai ita.