1. Hanesan Liurai David karik ita husu pergunta saida?

ITA hotu hakarak moris hakmatek no dame. La iha ema ida neʼebé gosta atu sente laran-taridu. Maibé dala ruma, ita hotu sente laran-taridu. Jeová nia atan balu karik husu pergunta neʼebé hanesan ho David nia pergunta ba Jeová: “Haʼu sente laran-triste loron ba loron, toʼo bainhira mak haʼu tenke kontinua laran-taridu?”—Sal 13:2.

2. Iha lisaun neʼe, ita sei koʼalia kona-ba saida?

² Maski dala ruma ita hotu sente laran-taridu, maibé ita bele halo buat balu atu hamenus ita-nia laran-taridu. Iha lisaun neʼe, ita sei koʼalia uluk kona-ba buat balu neʼebé bele halo ita laran-taridu. Tuirmai, ita sei koʼalia kona-ba dalan neen oinsá ita bele nafatin kalma bainhira hasoru problema.

3. Ita hasoru susar saida deʼit? Ita iha kbiit atu kontrola ida-neʼe ka lae?

³ Karik ita la iha kbiit atu hapara situasaun balu neʼebé halo ita laran-taridu. Porezemplu, tinan-tinan presu ba hahán, roupa no hela-fatin aumenta ba beibeik, no ita la iha kbiit atu kontrola ida-neʼe. Karik ita-nia kolega serbisu no kolega eskola tenta beibeik ita atu halo hahalok neʼebé la hatudu laran-moos no la morál, no ita la iha kbiit atu kontrola sira-nia hahalok. Ita mós la iha kbiit atu hapara krime iha ita-nia área. Ita hasoru susar  sira-neʼe tanba ita moris iha mundu neʼebé nakonu ho ema neʼebé la halo tuir Bíblia nia prinsípiu. Maromak mundu neʼe nian, ka Satanás hatene katak bainhira ema “hanoin resin kona-ba moris iha mundu neʼe”, ida-neʼe bele hanetik sira atu serbí Jeová. (Mt 13:22; 1 João 5:19) Tan neʼe, mundu nakonu ho hahalok neʼebé halo ita sente laran-taridu.

4. Karik ita sente oinsá bainhira hasoru problema?

⁴ Bainhira ita hasoru problema, dala ruma ita sai laran-taridu demais toʼo la hanoin kona-ba buat seluk. Porezemplu, karik ita hanoin barak kona-ba ita-nia osan la toʼo atu sustenta ita-nia presiza, ka ita sei moras toʼo la tama serbisu no lakon ita-nia serbisu. Karik ita mós hanoin barak kona-ba ita sei la laran-metin ba Maromak bainhira hetan tentasaun. Lakleur tan Satanás sei book sira neʼebé apoia nia atu ataka Maromak nia povu. Tan neʼe, karik ita hanoin barak kona-ba saida mak ita sei halo iha tempu neʼebá. Karik ita hanoin: ‘Sala ka lae, atu hanoin barak kona-ba buat sira-neʼe?’

5. Jesus nia liafuan “keta hanoin resin” katak sá?

⁵ Ita hatene katak Jesus hatete ba ninia dixípulu sira: “Keta hanoin resin.” (Mt 6:25) Jesus nia liafuan neʼe la dehan katak ita labele hanoin barak kona-ba buat ruma. Tuir loloos, Jeová nia atan balu iha tempu uluk mós sente laran-taridu. Maski nuneʼe, Jeová nafatin simu sira. * (1 Reis 19:4; Sal 6:3) Jesus hakarak fó kmaan ba ita. Nia lakohi ita atu hanoin demais kona-ba ita-nia presiza toʼo ida-neʼe hanetik ita atu tau uluk Jeová iha ita-nia moris. Entaun saida mak ita bele halo bainhira sente laran-taridu?—Haree kaixa “ Buat neʼebé Ita bele halo”.

6. Tuir Filipe 4:6, 7, saida mak bele ajuda ita atu sente kalma?

⁶ (1) Halo orasaun beibeik. Bainhira Ita hanoin barak kona-ba problema ida, Ita bele harohan ba Jeová hodi hetan kmaan. (1 Ped 5:7) Maromak bele hatán Ita-nia orasaun no fó ninia “dame neʼebé aas liu ema nia hanoin hotu”. (Lee Filipe 4:6, 7.) Jeová bele ajuda Ita atu sente kalma liuhusi ninia espíritu santu neʼebé kbiit boot.—Gal 5:22.

7. Ita presiza hanoin-hetan kona-ba saida bainhira halo orasaun ba Maromak?

⁷ Bainhira Ita halo orasaun ba Jeová, fó sai Ita-nia sentimentu hotu ba nia. Halo orasaun kona-ba buat espesífiku. Temi kona-ba Ita-nia problema no esplika Ita-nia sentimentu kona-ba problema neʼe. Se Ita hanoin Ita bele rezolve problema neʼe, husu Maromak atu fó matenek ba Ita hodi Ita bele hatene saida mak Ita presiza halo no mós fó Ita kbiit atu halo ida-neʼe. Maibé se Ita labele rezolve problema neʼe, husu Jeová nia ajuda atu Ita la sente laran-taridu demais. Bainhira Ita halo orasaun neʼebé espesífiku, neʼe ajuda Ita atu haree oinsá Jeová sei hatán Ita-nia orasaun. Keta rende an se Jeová la hatán kedas Ita-nia orasaun. Jeová hakarak Ita atu halo orasaun neʼebé espesífiku no mós halo orasaun beibeik.—Lc 11:8-10.

8. Bainhira halo orasaun, ita labele haluha saida?

⁸ Bainhira Ita fó sai Ita-nia laran-taridu ba Jeová liuhusi orasaun, Ita mós presiza fó agradese. Maski agora  daudaun Ita hasoru problema, maibé hakaʼas an atu hanoin kona-ba buat diʼak hotu neʼebé Ita iha. Se dala ruma, Ita sente susar atu fó sai Ita-nia sentimentu ba Jeová, hanoin-hetan katak Jeová sei hatán Ita-nia orasaun maski Ita dehan deʼit: ‘Jeová ajuda haʼu.’—2 Krón 18:31; Rom 8:26.

9. Saida mak ita presiza halo bainhira sente taʼuk?

⁹ (2) Sadere ba Jeová nia matenek laʼós Ita-nian. Iha profeta Isaias nia tempu, ema Judá taʼuk ema Asíria ataka sira. Ema Judá lakohi tropa Asíria atu domina sira, tan neʼe sira husu ajuda ba ema Ejitu. (Isa 30:1, 2) Jeová fó avizu ba sira katak sira-nia desizaun neʼe sei lori susar boot ba sira. (Isa 30:7, 12, 13) Liuhusi Isaias, Jeová fó sai ba povu Judá kona-ba oinsá sira bele sente seguru. Isaias hatete: “Imi sei iha forsa se imi kalma nafatin no tau fiar” ba Jeová.—Isa 30:15b.

10. Iha situasaun saida deʼit mak ita bele hatudu katak ita tau fiar ba Jeová?

¹⁰ Iha situasaun saida deʼit mak ita bele hatudu katak ita tau fiar ba Jeová? Hanoin toʼok ezemplu balu. Ema oferese Ita serbisu ho saláriu neʼebé boot, maibé Ita presiza serbisu ba oras barak no ida-neʼe sei hanetik Ita atu halo atividade espirituál. Ka karik Ita-nia kolega serbisu ida gosta Ita, maibé nia laʼós Jeová nia atan. Ka imajina toʼok se Ita-nia família ida hatete: “Ó tenke hili, ami ka ó-nia Maromak!” Desizaun neʼebé Ita presiza halo iha situasaun sira-neʼe mak susar, maibé Jeová sei fó matadalan neʼebé Ita presiza. (Mt 6:33; 10:37; 1 Kor 7:39) Ita sei tau fiar ba Jeová no halo tuir ninia matadalan ka lae?

11. Istória saida husi Bíblia mak bele ajuda ita nafatin kalma bainhira ema fó-terus ba ita?

¹¹ (3) Aprende husi ezemplu diʼak no mós aat. Bíblia fó sai istória barak neʼebé hatudu katak importante atu kalma nafatin no tau fiar ba Jeová. Bainhira Ita estuda istória sira-neʼe, hanoin kona-ba saida mak ajuda Maromak nia atan sira atu nafatin kalma bainhira ema kontra makaʼas sira. Porezemplu, bainhira membru husi Sinédriu haruka apóstolu sira atu para haklaken, apóstolu sira la taʼuk. Maibé sira ho aten-brani dehan: “Ami tenke halo tuir Maromak nuʼudar ukun-naʼin duké halo tuir ema.” (Após 5:29) Maski ema baku apóstolu sira ho xikote maibé sira la pániku. Tanbasá? Tanba sira hatene Jeová apoia sira. Jeová kontente ho sira. Tan neʼe, sira kontinua haklaken liafuan diʼak. (Após 5:40-42) Nuneʼe mós, bainhira ema besik atu oho dixípulu Estevão, nia nafatin hakmatek no “ninia oin kalma hanesan anju ida nia oin”. (Após 6:12-15) Tanbasá? Tanba nia fiar katak Jeová kontente ho nia.

12. Tuir 1 Pedro 3:14 no 4:14, tanbasá ita bele sente kontente bainhira ema fó-terus ba ita?

¹² Apóstolu sira bele haree ho klaru katak Jeová hamutuk ho sira tanba nia fó sira kbiit atu halo milagre oioin. (Após 5:12-16; 6:8) Maibé ohin loron, Jeová la fó ita kbiit atu halo milagre. Maski nuneʼe, nia fó sai ba ita liuhusi Bíblia katak bainhira ita hetan terus tanba halo hahalok loos, nia sei kontente ho ita no fó ninia espíritu santu ba ita. (Lee 1 Pedro 3:14; 4:14.) Tan neʼe ita la presiza hanoin barak kona-ba saida mak ita sei halo bainhira ema fó-terus ba ita iha futuru. Maibé ita presiza hametin ita-nia fiar katak Jeová sei apoia ita  no salva ita. Hanesan dixípulu sira iha tempu uluk, ita mós presiza tau fiar ba Jesus nia promesa: “Haʼu sei fó imi liafuan no matenek neʼebé halo imi-nia inimigu sira hotu labele koʼalia buat ida atu hatán.” Jesus mós promete: “Hodi tahan nafatin mak imi sei hetan imi-nia moris.” (Lc 21:12-19) Keta haluha katak Jeová hanoin-hetan buat hotu kona-ba ninia atan neʼebé mate ho laran-metin. Ho ida-neʼe, nia sei fó moris-hiʼas ba sira.

13. Oinsá ezemplu husi ema sira neʼebé sai pániku no la tau fiar ba Jeová bele ajuda ita?

¹³ Ita mós bele aprende husi ema sira neʼebé sai pániku no la tau fiar ba Jeová. Bainhira ita estuda kona-ba ezemplu sira-neʼe, neʼe ajuda ita atu la halo sala neʼebé hanesan. Porezemplu, bainhira Asa sai nuʼudar liurai ba Judá no iha tropa boot neʼebé mai atu ataka nia, nia sadere ba Jeová, no Jeová ajuda nia atu manán. (2 Krón 14:9-12) Maibé bainhira Liurai Baasa husi Izraél mai atu ataka Liurai Asa ho tropa neʼebé uitoan, Asa la sadere tan ba Jeová hanesan uluk. Nia selu ema Síria atu ajuda nia. (2 Krón 16:1-3) Bainhira nia moras todan, nia mós la sadere ba Jeová atu ajuda nia.—2 Krón 16:12.

14. Saida mak ita bele aprende husi Asa nia sala?

¹⁴ Foufoun, Asa buka ajuda husi Jeová bainhira nia hasoru problema. Depois neʼe, Asa la buka tan ajuda husi Jeová, maibé nia koko atu rezolve problema tuir ninia hanoin rasik. Tuir ema nia haree, Asa nia planu atu buka ajuda husi ema Síria mak desizaun neʼebé diʼak. Maibé dame neʼebé nia hetan mak temporáriu deʼit. Liuhusi profeta ida Jeová hatete ba nia: “Ó sadere ba liurai Síria no la sadere ba Jeová, ó-nia Maromak, tan neʼe liurai Síria nia tropa sira sai livre ona husi ó-nia liman.” (2 Krón 16:7) Ita presiza kuidadu atu la hanoin katak ita bele rezolve ita-nia problema rasik no la presiza buka Jeová nia matadalan iha Bíblia. Dala ruma ita presiza halo desizaun lalais, maski nuneʼe ita presiza sadere ba Jeová no nia sei ajuda ita atu hetan susesu.

15. Ita bele halo saida kuandu lee Bíblia?

¹⁵ (4) Dekór eskritura sira husi Bíblia. Bainhira ita lee eskritura sira husi Bíblia neʼebé hatudu katak importante atu kalma nafatin no tau fiar ba Jeová, koko atu dekór eskritura sira-neʼe. Atu halo nuneʼe, karik Ita bele lee ho lian, ka hakerek ida-neʼe no lee beibeik ida-neʼe. Jeová haruka Josué atu lee beibeik livru Ukun-Fuan nian ho lian neineik atu nuneʼe nia bele hatudu matenek. Buat neʼebé nia lee ajuda nia atu la taʼuk no sai aten-brani atu dirije Maromak nia povu. (Jos 1:8, 9) Eskritura barak iha Bíblia bele ajuda Ita atu sente kalma nafatin iha situasaun neʼebé bele halo Ita sai laran-taridu no mós taʼuk.—Sal 27:1-3; Prov 3:25, 26.

16. Oinsá Jeová uza irmaun-irmán sira atu ajuda ita kalma nafatin no tau fiar ba nia?

¹⁶ (5) Halibur hamutuk ho Maromak nia povu. Jeová uza irmaun-irmán sira atu ajuda ita kalma nafatin no tau fiar ba nia. Iha reuniaun sira, ita hetan benefísiu husi diskursu sira, komentáriu sira no mós ransu ho irmaun-irmán sira. (Ebr 10:24, 25) Ita mós bele hetan anima bainhira ita fahe ita-nia sentimentu ba ita-nia belun iha kongregasaun. “Liafuan neʼebé diʼak” husi ita-nia  belun bele hamenus ita-nia laran-taridu.—Prov 12:25.

17. Tuir Ebreu 6:19, oinsá ita-nia esperansa bele ajuda ita atu kalma nafatin bainhira hasoru susar?

¹⁷ (6) Kontinua hametin Ita-nia esperansa. Ita-nia esperansa mak “hanesan ankor neʼebé loos no metin ba ita-nia moris” no neʼe bele ajuda ita atu kalma nafatin bainhira hasoru susar no laran-taridu. (Lee Ebreu 6:19.) Medita kona-ba Jeová nia promesa ba futuru bainhira ema hotu sei la sente tan laran-taridu. (Isa 65:17) Imajina katak Ita iha mundu foun no la iha tan situasaun neʼebé halo Ita sente laran-taridu. (Miq 4:4) Ita mós sei hametin Ita-nia esperansa neʼe se Ita konta ida-neʼe ba ema seluk. Hakaʼas an atu hola parte iha serbisu haklaken no hanorin ema atu sai dixípulu. Se Ita halo nuneʼe, ‘Ita-nia esperansa bele metin nafatin toʼo rohan’.—Ebr 6:11.

18. Susar saida deʼit mak ita sei hasoru iha futuru? Oinsá ita bele hasoru ida-neʼe ho susesu?

¹⁸ Tanba mundu nia rohan besik daudaun ona, ita sei hasoru susar barak liután neʼebé bele halo ita laran-taridu. Eskritura tinan nian ba tinan 2021 bele ajuda ita atu tahan hasoru susar sira no nafatin kalma hodi tau fiar ba Jeová, laʼós sadere deʼit ba ita-nia kbiit rasik. Durante tinan neʼe, mai ita hatudu liuhusi ita-nia hahalok katak ita tau fiar ba Jeová nia promesa neʼebé hatete: “Imi sei iha forsa se imi kalma nafatin no tau fiar ba haʼu.”—Isa 30:15.