1. Saida mak hatudu katak família sira la hadomi malu?

BÍBLIA fó-hatene nanis katak iha loron ikus sira, ema sei “la hadomi malu” iha família laran. (2 Tim 3:1, 3) Ita bele haree ida-neʼe sai loos ohin loron. Porezemplu, inan-aman barak soe-malu. Rezultadu mak sira hirus malu no oan sira la sente domin. No família seluk, maski sira hela iha uma ida deʼit, maibé sira la besik malu. Matenek-naʼin kona-ba moris família nian hatete: “Inan-aman no oan sira la koʼalia ba malu no sira gasta tempu atu uza sira-nia komputadór, tablet, telemovel, no vídeo game. Maski sira hela hamutuk iha uma ida deʼit, maibé sira ladún koñese malu.”

2-3. (a) Tuir Roma 12:10, ita presiza hatudu domin ba sé? (b) Iha lisaun neʼe, ita sei aprende saida?

² Ita lakohi sai hanesan ema iha mundu neʼebé la hadomi malu. (Rom 12:2) Ita presiza haburas domin ba ita-nia família no ba ita-nia irmaun-irmán sira iha kongregasaun. (Lee Roma 12:10.) Liafuan Gregu neʼebé tradús nuʼudar “hadomi malu tebetebes” refere ba relasaun besik entre membru ba família. Ita mós tenke hatudu domin hanesan neʼe ba irmaun-irmán sira iha kongregasaun. Se ita halo nuneʼe, ita sei hametin unidade iha Jeová nia organizasaun.—Miq 2:12.

³ Mai ita haree ezemplu sira husi Bíblia neʼebé bele ajuda ita atu haburas no hatudu domin hanesan maun-alin.

4. Saida mak Tiago 5:11 hatete kona-ba Jeová nia domin?

⁴ Bíblia fó sai kona-ba Jeová nia hahalok furak oioin. Porezemplu, Bíblia hatete katak “Maromak mak  domin”. (1 João 4:8) Jeová nia hahalok sira halo ita hakarak hakbesik ba nia. Bíblia mós hatete katak Jeová “iha domin neʼebé boot tebes”. (Lee Tiago 5:11.) Neʼe mak liafuan kapás atu hatudu katak Jeová hadomi tebes ita.

5. Oinsá Jeová hatudu laran-sadiʼa? Oinsá ita bele banati-tuir nia?

⁵ Tiago 5:11 liga Jeová nia domin neʼebé boot tebes ho Jeová nia laran-sadiʼa neʼebé mós book ita atu hakbesik ba nia. (Éx 34:6) Dalan ida Jeová hatudu laran-sadiʼa ba ita mak hodi perdua ita-nia sala. (Sal 51:1) Liafuan laran-sadiʼa neʼebé temi iha Bíblia laʼós deʼit kona-ba fó perdua ba ema, maibé mós envolve buat seluk tan. Ita sente laran-sadiʼa bainhira haree ema seluk hasoru susar no ida-neʼe book ita atu ajuda. Jeová hatete katak ninia hakarak atu ajuda ita mak boot liu fali inan nia hakarak atu ajuda ninia oan. (Isa 49:15) Bainhira ita hasoru susar, Jeová nia laran-sadiʼa book nia atu ajuda ita. (Sal 37:39; 1 Kor 10:13) Ita bele hatudu laran-sadiʼa ba irmaun-irmán sira hodi fó perdua ba sira no la rai hirus bainhira sira hakanek ita-nia laran. (Éf 4:32) Dalan importante seluk atu bele hatudu laran-sadiʼa mak hodi ajuda irmaun-irmán sira bainhira sira hasoru susar. Jeová hatudu ezemplu neʼebé diʼak liu hotu kona-ba hadomi malu. Ita banati-tuir Jeová kuandu ita-nia domin book ita atu hatudu laran-sadiʼa ba ema seluk.—Éf 5:1.

6. Oinsá Jonatan no David hatudu domin ba malu?

⁶ Bíblia konta kona-ba ema la perfeitu sira neʼebé hadomi malu hanesan família. Hanoin toʼok Jonatan no David nia ezemplu. Bíblia hatete: “Jonatan no David sai belun diʼak neʼebé laran-metin ba malu, no Jonatan komesa hadomi nia  hanesan ninia an rasik.” (1 Sam 18:1) Maromak hili David atu troka Saul nuʼudar liurai. Saul sai laran-moras ba David no koko atu oho nia. Maibé Saul nia oan, Jonatan la apoia Saul nia planu atu oho David. Jonatan no David promete ba malu atu nafatin sai belun no sempre apoia malu.—1 Sam 20:42.

7. Saida mak bele hanetik Jonatan no David atu sai belun?

⁷ Tuir loloos, iha buat barak neʼebé bele hanetik Jonatan no David atu sai belun neʼebé hadomi malu. Porezemplu, Jonatan boot liu David maizumenus tinan 30. Karik Jonatan bele hanoin katak nia labele habelun ho David tanba David idade kiʼik no ladún iha esperiénsia. Maibé Jonatan la hanoin hanesan neʼe, nia hatudu respeitu ba David.

8. Oinsá Jonatan hatudu katak nia mak David nia belun diʼak?

⁸ Jonatan bele sai laran-moras ba David. Jonatan mak Liurai Saul nia oan-mane, tan neʼe nia bele ezije ninia direitu atu ukun nuʼudar liurai. (1 Sam 20:31) Maibé Jonatan haraik an no laran-metin ba Jeová. Tan neʼe, nia apoia ho laran tomak liurai neʼebé Jeová hili, neʼe mak David. Jonatan mós laran-metin ba David, maski ida-neʼe halo ninia aman Saul hirus.—1 Sam 20:32-34.

9. Jonatan laran-moras ba David ka lae? Esplika toʼok.

⁹ Jonatan hadomi David hanesan ninia família, tan neʼe nia la laran-moras ba David. Jonatan matenek atu hana rama no nia mak asuwaʼin neʼebé aten-brani. Ema koñese Jonatan no ninia aman Saul nuʼudar ema neʼebé “lalais liu fali manu-makikit” no “kbiit boot liu fali leaun”. (2 Sam 1:22, 23) Tan neʼe, karik Jonatan bele gaba an kona-ba buat oioin neʼebé nia halo ona ho aten-brani. Duké halo nuneʼe, Jonatan la kompete malu ho David no la laran-moras ba David. Jonatan admira David tanba David aten-brani no sadere ba Jeová. Tuir loloos, bainhira David oho tiha Golias, Jonatan komesa hadomi David hanesan hadomi ninia an rasik. Oinsá ita bele hadomi irmaun-irmán sira hanesan Jonatan hadomi David?

10. “Hadomi malu tebetebes” katak sá?

¹⁰ Bíblia haruka ita atu ‘hadomi malu tebetebes husi laran’. (1 Ped 1:22) Jeová hatudu ezemplu kapás ba ita kona-ba neʼe. Nia hadomi tebes ita no se ita laran-metin ba nia, nia sei nunka para atu hadomi ita. (Rom 8:38, 39) Liafuan Gregu neʼebé tradús nuʼudar “tebetebes” fó ideia kona-ba ema neʼebé hakaʼas an atu hatudu domin. Dala ruma la fasil atu hatudu domin ba irmaun-irmán sira. Bainhira irmaun-irmán ruma hakanek ita-nia laran ita presiza kontinua ‘tahan malu ho domin, hakaʼas an atu kaer metin nafatin unidade hodi moris iha dame laran’. (Éf 4:1-3) Se ita hakaʼas an atu nafatin iha dame ho ita-nia irmaun-irmán sira, ita sei hakaʼas an atu la tau fokus ba sira-nia fraku. Ita sei hakaʼas an atu haree irmaun-irmán sira hanesan Jeová haree sira.—1 Sam 16:7; Sal 130:3.

11. Tanbasá dala ruma susar atu hadomi malu?

¹¹ La fasil atu hadomi irmaun-irmán sira hanesan ita hadomi ita-nia família, liuliu se ita hatene sira-nia fraku. Ema Kristaun iha apóstolu sira-nia tempu mós hasoru situasaun neʼe. Porezemplu, Evódia no Síntike karik la iha problema  atu serbisu hamutuk ho Paulo atu haklaken liafuan diʼak. Maibé tanba razaun ruma, sira naʼin-rua la iha relasaun neʼebé diʼak. Tan neʼe, Paulo anima sira atu “iha hanoin neʼebé hanesan iha Naʼi”.—Flp 4:2, 3.

12. Oinsá mak ita bele haburas domin ba irmaun-irmán sira?

¹² Oinsá mak ita bele haburas domin ba irmaun-irmán sira? Bainhira ita koñese liután irmaun-irmán sira, neʼe ajuda ita atu komprende sira no haburas domin ba sira. Ita bele habelun ho sira maski ita-nia idade ka kultura la hanesan. Hanoin-hetan, Jonatan boot liu David maizumenus tinan 30. Maski nuneʼe, sira sai belun diʼak. Ita bele habelun ho ema ruma iha kongregasaun neʼebé idade la hanesan ho Ita ka lae? Se Ita halo nuneʼe, Ita hatudu katak Ita “hadomi maluk fiar-naʼin hotu”.—1 Ped 2:17.

13. Ita presiza sai belun diʼak ho ema hotu iha kongregasaun ka lae? Esplika toʼok.

¹³ Maski ita hadomi tebetebes ita-nia irmaun-irmán sira, maibé neʼe la dehan katak ita sei sai belun diʼak ho ema hotu iha kongregasaun. La sala atu sai besik liu ho ema balu tanba ita gosta buat neʼebé hanesan. Jesus bolu apóstolu hotu nuʼudar ninia “belun”, maibé nia sente besik liu ba João. (João 13:23; 15:15; 20:2) Maski nuneʼe, Jesus la trata João iha dalan neʼebé espesiál. Porezemplu bainhira João no Tiago husu pozisaun neʼebé importante iha Maromak nia Ukun, Jesus hatete ba sira: “Kona-ba tuur iha haʼu-nia liman-loos ka liman-karuk, laʼós haʼu mak deside.” (Mc 10:35-40) Hodi banati-tuir Jesus, ita sei la trata ita-nia belun iha dalan neʼebé espesiál demais. (Tgo 2:3, 4) Se ita halo nuneʼe, ita sei halakon unidade iha kongregasaun.—Jud 17-19.

14. Tuir Filipe 2:3, saida mak sei ajuda ita atu la kompete malu?

¹⁴ Bainhira ita hadomi malu, ita hakaʼas an atu la kompete malu. Hanoin-hetan, Jonatan la laran-moras ba David,  no la koko atu kompete malu ho David atu sai liurai. Ita hotu bele banati-tuir Jonatan nia ezemplu. Keta laran-moras ba irmaun-irmán sira tanba sira-nia abilidade, ‘maibé ho haraik an haree ema seluk boot liu fali ita’. (Lee Filipe 2:3.) Hanoin-hetan katak irmaun-irmán hotu bele ajuda kongregasaun. Hodi hatudu haraik an, ita bele haree irmaun-irmán sira-nia hahalok diʼak no aprende husi sira-nia ezemplu.—1 Kor 12:21-25.

15. Ita aprende saida husi irmán Tanya no ninia família nia esperiénsia?

¹⁵ Bainhira susar kona ita, Jeová fó kmaan ba ita liuhusi irmaun-irmán sira neʼebé hatudu domin no ajuda ita. Hanoin toʼok buat neʼebé akontese ba família ida neʼebé iha oan naʼin-tolu iha Estadus Unidus bainhira sira fila fali husi reuniaun boot internasionál ho tema: “Domin Nunka Lakon!” Inan neʼebé naran Tanya hatete: “Bainhira ami lori karreta atu fila fali ba otél, karreta seluk xoke ami-nia karreta. Ami la hetan kanek, maibé ami hakfodak loos. Ami tun husi karreta no hamriik bilán iha estrada. Irmaun ida neʼebé foin fila husi reuniaun boot hamriik iha dalan ninin no bolu ami ba ninia karreta atu ami bele sente seguru. Laʼós nia deʼit mak para atu ajuda. Irmaun-irmán naʼin-lima husi rai-Suésia mós para. Irmán sira hakoʼak haʼu no haʼu-nia oan no ami presiza duni ida-neʼe. Haʼu hatete ba irmaun-irmán sira katak ami diʼak hela, maibé sira lakohi husik hela ami. Maski ambulánsia toʼo ona, sira nafatin hamaluk ami no sira tau matan didiʼak ba ami. Durante tempu susar neʼe, ami sente Jeová nia domin.  Situasaun neʼe hametin ami-nia domin ba irmaun-irmán sira. Ida-neʼe hametin ami-nia domin ba Jeová no book ami atu hatudu agradese liután ba Jeová.” Ita hanoin-hetan tempu ruma neʼebé Ita presiza ajuda no irmaun-irmán sira hatudu domin ba Ita ka lae?

16. Ita iha razaun saida deʼit atu hatudu domin ba malu?

¹⁶ Bainhira ita hatudu domin ba malu, neʼe sei lori rezultadu diʼak. Ita fó kmaan ba irmaun-irmán sira kuandu sira hasoru susar. Ita hametin unidade iha Maromak nia povu nia leet. Ita hatudu katak ita mak Jesus nia dixípulu no neʼe book ema laran-loos atu serbí Jeová. Importante liu mak ita fó hahiʼi ba Jeová, “Aman neʼebé laran-sadiʼa no Maromak neʼebé fó kmaan ba ema iha situasaun hotu”. (2 Kor 1:3) Mai ita hotu kontinua haburas no hatudu domin ba malu.