Irmaun balu sai boot iha kultura neʼebé mane barak la hafolin feto. Porezemplu, katuas área ida iha rai-Bolívia naran Hans, dehan: “Mane balu sai boot iha kultura neʼebé mane mak domina, tan neʼe sira hanoin katak mane mak iha folin-boot liu fali feto.” Katuas kongregasaun ida iha rai-Taiwán naran Shengxian, dehan: “Mane barak iha haʼu-nia hela-fatin hanoin katak feto labele fó sai sira-nia opiniaun ba mane. Se mane ida temi feto nia opiniaun kona-ba buat ruma, ninia kolega mane sei hanoin katak nia fraku.” Iha mós dalan seluk tan neʼebé mane balu hatudu katak sira la hafolin feto. Porezemplu, karik sira goza malu hodi hatún feto sira.

Buat neʼebé diʼak mak maski mane ida boot iha kultura oioin, maibé nia bele troka ninia hanoin. Nia bele aprende katak mane no feto iha folin neʼebé hanesan. (Éf 4:​22-24) Mane sira bele halo nuneʼe hodi banati-tuir Jeová. Iha informasaun neʼe, ita sei haree oinsá Jeová trata feto sira, oinsá irmaun sira bele aprende atu trata feto sira tuir Jeová nia dalan, no oinsá katuas sira bele hatudu ezemplu hodi respeitu irmán sira.

OINSÁ JEOVÁ TRATA FETO SIRA?

Jeová hatudu ezemplu perfeitu kona-ba oinsá atu trata feto sira. Nuʼudar Aman neʼebé laran-diʼak, nia hadomi ninia oan hotu. (João 3:16) No nia haree irmán sira neʼebé laran-metin nuʼudar oan-feto neʼebé folin-boot. Haree toʼok oinsá Jeová hatudu katak nia hadomi no respeitu feto sira.

Nia la todan ba sorin. Jeová kria mane no feto tuir ninia illas. (Gén 1:27) Nia la halo  mane matenek liu ka ho abilidade barak liu fali feto, no nia mós la haree mane mak folin-boot liu fali feto. (2 Krón 19:7) Nia kria mane no mós feto ho abilidade atu komprende lia-loos husi Bíblia no banati-tuir ninia hahalok. Jeová hafolin mane no feto neʼebé tau fiar ba nia. Nia fó ba sira esperansa atu moris ba nafatin iha mundu paraízu ka serbí nuʼudar liurai no amlulik iha lalehan. (2 Ped 1:​1, nota) Klaru katak Jeová la diskrimina feto sira.

Nia rona ba sira. Jeová hatudu interese ba feto sira-nia hanoin no sentimentu. Porezemplu, nia rona no hatán ba Raquel no Ana nia orasaun. (Gén 30:22; 1 Sam 1:​10, 11, 19, 20) Jeová mós dirije ema neʼebé hakerek Bíblia atu konta kona-ba mane sira neʼebé rona ba feto. Porezemplu, Abraão halo tuir Jeová nia matadalan hodi rona ba ninia feen Sara. (Gén 21:​12-14) Liurai David rona ba Abigail. Tuir loloos, nia sente katak Jeová mak haruka Abigail atu koʼalia ho nia. (1 Sam 25:​32-35) Jesus neʼebé haleno Jeová nia hahalok ho perfeitu mós rona ba ninia inan Maria. (João 2:​3-10) Ezemplu sira-neʼe hatudu katak Jeová hatudu respeitu ba feto hodi rona ba sira.

Nia tau fiar ba sira. Porezemplu, Jeová tau fiar ba Eva atu ajuda tau matan ba mundu. (Gén 1:28) Neʼe hatudu katak Jeová la haree Eva nuʼudar folin kiʼik liu fali Adão, maibé nia haree Eva nuʼudar ajuda-naʼin. Jeová mós tau fiar ba profeta Débora no Hulda atu fó matadalan ba ninia povu, inklui ba juis ida no liurai ida. (Juís 4:​4-9; 2 Reis 22:​14-20) Ohin loron, Jeová tau fiar ba feto Kristaun sira atu halo ninia serbisu. Irmán sira-neʼe serbí nuʼudar haklaken-naʼin, pioneiru, no misionária. Sira mós ajuda atu dezeña uma, halo konstrusaun, no manutensaun ba Reuniaun-Fatin no sukursál sira. Sira balu serbí iha Betel no eskritóriu tradusaun. Irmán sira-neʼe mak hanesan tropa boot neʼebé Jeová dirije atu kumpre ninia hakarak. (Sal 68:11) Klaru katak Jeová la haree feto nuʼudar fraku ka la iha matenek.

OINSÁ IRMAUN SIRA BELE APRENDE ATU TRATA FETO SIRA TUIR JEOVÁ NIA DALAN?

Irmaun sira presiza haree didiʼak sira-nia hanoin no hahalok hodi bele hatene katak sira trata irmán sira tuir Jeová nia dalan. Atu halo ida-neʼe, sira presiza ajuda. Hanesan doutór bele uza raiu-xís atu hatene ema ida nia moras iha laran, nuneʼe mós Bíblia no belun neʼebé diʼak bele ajuda ita hatene se ita iha hanoin negativu kona-ba feto sira iha ita-nia laran ka lae. Saida mak ita bele halo atu hetan ajuda neʼe?

Husu belun neʼebé diʼak. (Prov 18:17) Ita bele husu pergunta tuirmai ba belun neʼebé laran-diʼak, balansu, no ita bele tau fiar: “Ó hanoin oinsá kona-ba dalan neʼebé haʼu trata irmán sira? Sira sente katak haʼu respeitu sira ka lae? Haʼu presiza halo tan buat seluk atu bele hatudu respeitu ba sira ka lae?” Se Ita-nia belun temi pontu balu neʼebé ita presiza hadiʼa, hakaʼas an atu halo tuir ninia sujestaun no keta buka razaun.

Estuda Bíblia. Dalan diʼak atu hatene se ita trata irmán sira ho didiʼak mak hodi uza Bíblia atu ezamina ita-nia atitude no hahalok. (Ebr 4:12) Nuʼudar ita estuda Bíblia, ita sei aprende kona-ba mane neʼebé trata feto ho didiʼak no mane neʼebé la halo nuneʼe. Tuirmai ita bele kompara sira-nia hahalok ho ita-nian. No mós hodi kompara versíkulu oioin iha Bíblia bele ajuda ita komprende kontestu no la uza sala eskritura ruma atu apoia ita-nia hanoin neʼebé sala kona-ba feto. Porezemplu, 1 Pedro 3:7 hatete katak laʼen tenke hafolin ninia feen tanba feen hanesan “vazu neʼebé fraku”. a Neʼe katak feen la iha matenek ka kapasidade hanesan laʼen  ka lae? Lae! Kompara toʼok Pedro nia liafuan ho Galásia 3:​26-29 neʼebé hatete katak Jeová hili ona feto no mane atu ukun ho Jesus iha lalehan. Bainhira ita estuda Bíblia no husu belun diʼak ida atu fó sai ninia hanoin, ita bele hatene oinsá atu hatudu respeitu ba irmán sira ho didiʼak.

OINSÁ MAK KATUAS SIRA HATUDU RESPEITU BA IRMÁN SIRA?

Irmaun sira mós bele aprende atu hatudu respeitu ba irmán sira hodi halo tuir katuas sira-nia ezemplu. Oinsá mak katuas sira bele hatudu ezemplu atu respeitu irmán sira? Haree toʼok dalan balu tuirmai.

Sira gaba irmán sira. Apóstolu Paulo hatudu ezemplu diʼak ba katuas sira atu banati-tuir. Iha ninia karta ba kongregasaun iha Roma, nia gaba irmán sira. (Rom 16:12) Imajina toʼok ksolok neʼebé irmán sira sente kuandu kongregasaun lee Paulo nia karta. Katuas sira ohin loron mós presiza gaba irmán sira kona-ba serbisu neʼebé sira halo ba Jeová no hahalok diʼak neʼebé sira hatudu. Neʼe halo irmán sira sente katak kongregasaun respeitu no hafolin sira. Irmán sira presiza duni liafuan anima husi katuas sira atu kontinua serbí Jeová ho laran-metin.—Prov 15:23.

Bainhira gaba irmán sira, katuas sira presiza gaba ho laran no espesífiku. Tanbasá? Irmán ida naran Jessica hatete: “Diʼak bainhira irmaun sira dehan ba irmán ida ‘Ita halo kapás’. Maibé ami sei kontente tebes bainhira irmaun sira gaba buat espesífiku, hanesan oinsá ami hanorin ami-nia oan atu tuur hakmatek durante reuniaun, ka tula estudante Bíblia mai tuir reuniaun.” Bainhira katuas sira gaba irmán sira, neʼe halo irmán sira sente iha folin iha kongregasaun.

 Sira rona ba irmán sira. Katuas neʼebé haraik an, la hanoin katak ninia sujestaun mak diʼak liu. Katuas hanesan neʼe mós husu irmán sira-nia ideia, no prontu atu rona didiʼak ba sira. Hodi halo nuneʼe, katuas sira bele anima irmán sira no sira rasik mós bele hetan benefísiu. Oinsá? Katuas ida naran Gerardo neʼebé serbí iha Betel hatete: “Haʼu sente ona katak hodi husu irmán sira-nia ajuda, haʼu bele kumpre haʼu-nia serbisu ho diʼak liu. Dala barak sira iha ona esperiénsia barak liu fali irmaun sira kona-ba halo serbisu ruma.” Iha kongregasaun, iha irmán barak mak serbí nuʼudar pioneiru, tan neʼe sira hatene buat barak kona-ba ema iha haklaken-fatin. Katuas ida naran Bryan hatete: “Irmán sira iha hahalok diʼak no abilidade oioin neʼebé ita-nia organizasaun presiza. Tan neʼe aproveita didiʼak matenek neʼebé sira iha!”

Katuas neʼebé matenek prontu atu rona ba irmán sira-nia ideia. Tanbasá? Katuas ida naran Edward hatete: “Irmán sira-nia ideia no esperiénsia bele ajuda irmaun ida atu komprende didiʼak situasaun, no komprende ema seluk nia sentimentu.” (Prov 1:5) Maski irmaun ida la aplika irmán sira-nia ideia, maibé nia nafatin bele hatoʼo agradese tanba irmán sira fó sai ona sira-nia ideia no kumpriensaun.

Sira treinu irmán sira. Katuas neʼebé matenek buka oportunidade atu treinu irmán sira. Porezemplu, sira bele treinu irmán sira oinsá atu dirije grupu haklaken kuandu la iha irmaun ida mak dirije. Sira bele treinu irmán sira kona-ba oinsá atu uza ekipamentu oioin hodi sira bele ajuda ho serbisu manutensaun no projetu konstrusaun iha organizasaun. Irmaun neʼebé tau matan Betel mós treinu irmán sira atu halaʼo knaar oioin, inklui manutensaun, kompras, programa komputadór, no seluk tan. Bainhira katuas sira treinu irmán sira, katuas sira hatudu katak sira hafolin no tau fiar ba irmán sira.

Irmán barak uza treinu neʼebé sira simu husi katuas sira atu ajuda fali ema seluk. Porezemplu, irmán balu uza buat neʼebé sira aprende kona-ba konstrusaun atu ajuda hadiʼa ema seluk nia uma depois akontese tiha dezastre. Irmán balu uza sira-nia abilidade atu haklaken hodi treinu fali irmán seluk iha dalan oioin kona-ba haklaken. Saida mak irmán sira sente kona-ba katuas sira neʼebé fó treinu ba sira? Irmán ida naran Jennifer hatete: “Bainhira haʼu halo serbisu konstrusaun atu harii Reuniaun-Fatin ida, katuas ida uza tempu barak atu treinu haʼu. Nia nota kona-ba serbisu neʼebé haʼu halo no gaba haʼu. Haʼu kontente atu serbisu ho nia tanba sente katak nia hafolin no tau fiar ba haʼu.”

BENEFÍSIU HUSI TRATA IRMÁN SIRA HANESAN FETON

Ita hadomi irmán laran-metin sira hanesan Jeová hadomi sira! Tan neʼe ita trata sira hanesan ita-nia feton. (1 Tim 5:​1, 2) Ita orgullu tanba serbí hamutuk ho irmán sira-neʼe. No ita kontente tebes bainhira sira bele sente ita-nia domin no apoiu. Irmán ida naran Vanessa hatete: “Haʼu agradese tebes ba Jeová tanba bele sai parte ba ninia organizasaun neʼebé iha irmaun sira neʼebé hametin tebes haʼu.” Irmán ida iha rai-Taiwán hatete: “Haʼu agradese tebes tanba Jeová no ninia organizasaun hafolin tebes feto sira no komprende feto nia sentimentu. Neʼe hametin haʼu-nia fiar no halo haʼu hafolin liután priviléjiu neʼebé haʼu iha atu sai parte ba Jeová nia organizasaun.”

Jeová orgullu tebes bainhira haree mane Kristaun neʼebé laran-metin trata feto sira tuir ninia dalan! (Prov 27:11) Katuas ida iha rai-Eskósia naran Benjamin hatete: “Mane barak ohin loron la hatudu respeitu ba feto sira. Tan neʼe bainhira iha Reuniaun-Fatin, ita hakarak irmán sira sente ita-nia domin no respeitu.” Mai ita hakaʼas an atu banati-tuir Jeová hodi trata ita-nia irmán doben sira ho domin no respeitu tanba sira merese simu ida-neʼe.—Rom 12:10.