1. Bainhira Ita hanoin kona-ba Jeová, Ita imajina nia hanesan saida?

 ITA koko ona atu imajina Jeová hanesan saida ka lae? Bainhira Ita halo orasaun ba nia, saida mak Ita hanoin? Ita labele haree Jeová, maibé Bíblia esplika kona-ba nia iha dalan oioin. Bíblia temi Jeová nuʼudar ‘loro-matan no eskudu’ no “ahi neʼebé han mohu buat hotu”. (Sal 84:11; Ebr 12:29) Ezequiel esplika Jeová mak hanesan fatuk-safira, besi neʼebé nabilan, no arkiris. (Eze 1:​26-28) Esplikasaun kona-ba Jeová halo ita admira no karik halo ita sente katak ita la iha folin.

2. Tanbasá ema balu sente susar atu hakbesik ba Jeová?

² Karik ita bele sente susar atu tau fiar katak Jeová hadomi ita tanba ita labele haree nia. Ema balu hanoin katak Jeová la hadomi sira tanba susar neʼebé sira hasoru iha tempu uluk. Karik sira la iha aman neʼebé hadomi sira. Jeová komprende sentimentu hanesan neʼe no oinsá neʼe afeta ita. Atu ajuda ita, nia fó sai kona-ba ninia hahalok furak iha Bíblia.

3. Tanbasá ita presiza aprende kona-ba Jeová nia domin?

³ Liafuan domin mak dalan diʼak ida atu esplika kona-ba Jeová. (1 João 4:8) Bíblia hatete katak Maromak mak domin. Buat hotu neʼebé nia halo mak tanba domin. Jeová nia domin iha kbiit boot no nia hatudu ida-neʼe ho laran-luak. Tan neʼe nia hadomi ema maski sira la hadomi nia. (Mt 5:​44, 45) Iha lisaun neʼe, ita sei koʼalia liután kona-ba Jeová no ninia domin. Bainhira ita aprende liután kona-ba Maromak, ita sei hadomi nia liután.

JEOVÁ HADOMI TEBES ITA

4. Ita sente oinsá kona-ba Jeová nia domin? (Haree mós foto.)

⁴ “Jeová iha domin neʼebé boot tebes.” (Tgo 5:11) Bíblia kompara Jeová hanesan ho inan ida neʼebé hadomi ninia oan. (Isa 66:​12, 13) Imajina toʼok inan ida neʼebé tau matan  ba ninia oan. Nia koʼus ninia oan, koʼalia ba nia ho laran-diʼak no neineik. Bainhira ninia oan tanis no sente moras, nia tau matan ba oan nia presiza hotu. Bainhira ita hasoru susar, ita bele fiar katak Jeová hadomi ita. Salmo 94:19 hatete: “Bainhira haʼu laran-taridu tebes, Ita fó kmaan ba haʼu no halo haʼu kontente.”

5. Ita hetan benefísiu saida husi Jeová nia domin neʼebé laran-metin?

⁵ Jeová laran-metin. (Sal 103:8) Nia la para atu hadomi ita bainhira ita halo sala. Nasaun Izraél halo Jeová laran-triste beibeik, maibé nia fó sai ninia domin ba sira neʼebé arrepende an, hodi hatete: “Haʼu haree ó hanesan buat folin-boot, ó hetan ona glória, no haʼu hadomi ona ó.” (Isa 43:​4, 5) Jeová nia domin nunka troka. Nia sempre hatudu ida-neʼe. Maski ita halo sala neʼebé sériu, Jeová nunka husik hela ita. Bainhira ita arrepende an no fila fali ba Jeová, ita bele haree katak Jeová nafatin hadomi ita. Nia promete katak nia “sei fó perdua ho laran-luak”. (Isa 55:7) Bíblia hatete katak ita sei sente kmaan bainhira Jeová fó perdua ba ita.—Após 3:19.

6. Zacarias 2:8 hanorin saida mai ita kona-ba Jeová?

⁶ Lee Zacarias 2:8. Tanba Jeová hadomi ita, nia hanoin kona-ba ita-nia sentimentu no hakarak tebes atu proteje ita. Nia sente triste bainhira ita triste. Tan neʼe ita bele fiar katak nia sei hatán ba ita bainhira ita hatete: “Proteje haʼu hanesan proteje Ita-nia matan-fuan.” (Sal 17:8) Ema nia matan mak sensitivu no parte neʼebé folin-boot husi ema nia isin. Tan neʼe bainhira Jeová kompara ita ho ninia matan, neʼe hanesan nia hatete: ‘Ema naran deʼit neʼebé halo aat ba imi, haʼu-nia povu, halo aat ba buat neʼebé folin-boot ba haʼu.’

7. Tanbasá ita presiza hametin ita-nia fiar ba Jeová nia domin?

⁷ Jeová hakarak ita atu fiar metin katak nia hadomi ita ida-idak. Maibé nia hatene katak situasaun neʼebé uluk ita hasoru bele halo ita duvida kona-ba ninia domin. Ka karik ita hasoru daudaun susar neʼebé koko ita-nia fiar ba Jeová nia domin.  Saida mak bele hametin ita-nia fiar? Neʼe mak hodi aprende oinsá Jeová hatudu domin ba Jesus, ba ema neʼebé iha esperansa atu bá lalehan, no ba ita hotu.

OINSÁ JEOVÁ HATUDU NINIA DOMIN

8. Tanbasá Jesus fiar metin katak ninia Aman hadomi nia?

⁸ Jeová no Jesus iha relasaun neʼebé besik no nakonu ho domin husi tempu uluk kedas. Sira hamutuk iha lalehan ba tinan barak tebes. Jeová fó sai ho klaru ninia domin ba Jesus, hanesan temi iha Mateus 17:5. Jeová bele dehan deʼit: ‘Neʼe mak ida neʼebé halo haʼu-nia laran-kontente.’ Maski nuneʼe, nia hakarak ita hatene katak nia hadomi tebes Jesus, tan neʼe nia bolu Jesus “haʼu-nia Oan-Mane neʼebé haʼu hadomi”. Jeová orgullu ho Jesus, liuliu tanba Jesus fó ninia moris. (Éf 1:7) Jesus la duvida kona-ba ninia Aman nia domin no bele sente duni domin neʼe. Jesus hatete beibeik ho fiar metin katak ninia Aman hadomi nia.—João 3:35; 10:17; 17:24.

9. Oinsá ita hatene katak Jeová hadomi ema neʼebé iha esperansa atu bá lalehan? Esplika toʼok. (Roma 5:5)

⁹ Jeová mós hatudu ninia domin ba ema neʼebé iha esperansa atu bá lalehan. (Lee Roma 5:5.) Iha lian orijinál, versíkulu neʼe fó sai ideia katak Jeová nia domin ba ema neʼebé iha esperansa atu bá lalehan mak boot tebes no bele kompara ho mota neʼebé suli makaʼas. Sira hatene katak Maromak hadomi tebes sira. (Jud 1) Apóstolu João fó sai sira-nia sentimentu bainhira nia hakerek: “Haree oinsá Aman nia domin boot tebes ba ita, tanba nia bolu ona ita nuʼudar ninia oan!” (1 João 3:1) Jeová hadomi deʼit ema neʼebé iha esperansa atu bá lalehan ka lae? Lae, Jeová hatudu katak nia hadomi ema hotu.

10. Saida mak hatudu katak Jeová hadomi tebes ita?

¹⁰ Saida mak hatudu katak Jeová hadomi tebes ita? Jeová hatudu domin neʼebé boot tebes ba ita hotu hodi fó Jesus nuʼudar sakrifísiu! (João 3:16; Rom 5:8) Jeová fó ninia Oan-Mane neʼebé nia hadomi atu mate ba ita hotu, hodi ita bele hetan perdua ba ita-nia sala no bele sai Ninia belun. (1 João 4:10) Hodi medita kona-ba folin neʼebé Jeová no Jesus fó, neʼe ajuda ita komprende liután oinsá sira hadomi tebes ita ida-idak. (Gal 2:20) Jeová halo ida-neʼe laʼós deʼit tanba ninia hahalok justisa. Neʼe mak prezente tanba nia hadomi ita. Jeová hatudu ona ninia domin mai ita liuhusi sakrifika buat neʼebé folin-boot tebes ba nia, neʼe mak Jesus. Jeová husik ninia Oan-Mane atu hetan susar no mate ba ita-nia diʼak.

11. Saida mak ita aprende husi Jeremias 31:3?

¹¹ Hanesan ita haree ona, Jeová laʼós deʼit sente domin ba ita, maibé nia mós fó sai ninia domin ba ita. (Lee Jeremias 31:3.) Jeová dada ita ba nia tanba nia hadomi ita. (Kompara ho Deuteronómio 7:​7, 8.) La iha buat ida mak bele haketak ita husi Jeová nia domin. (Rom 8:​38, 39) Ita sente oinsá kona-ba Jeová nia domin? Lee Salmo 23, no haree David sente oinsá kona-ba Jeová nia domin, no neʼe bele fó impaktu saida mai ita.

ITA SENTE OINSÁ KONA-BA JEOVÁ NIA DOMIN?

12. Salmo 23 fó sai kona-ba saida?

¹² Lee Salmo 23:​1-6. Iha Salmo 23, David fó sai kona-ba ninia konfiansa ba Jeová nia domin. Nia esplika kona-ba  ninia relasaun besik ho Jeová neʼebé nia bolu nuʼudar ninia Bibi-Atan. David sente seguru tanba Jeová dirije nia, no nia sadere tomak ba Jeová. David hatene katak Jeová sei hatudu domin ba nia iha ninia moris tomak. Saida mak halo nia fiar hanesan neʼe?

13. Tanbasá David fiar katak Jeová sei tau matan ba nia?

¹³ “Haʼu sei la falta buat ida.” David sente katak Jeová hadomi nia tanba sempre fó buat neʼebé nia presiza. David mós hatene katak Jeová mak ninia belun no Jeová simu nia. Tan neʼe nia fiar metin katak maski hasoru situasaun naran deʼit, Jeová sei kontinua tau matan ba ninia presiza. David fiar katak Jeová sei tau matan no apoia nia, no neʼe ajuda nia atu la hanoin barak no sente kontente ho buat neʼebé nia iha.—Sal 16:11.

14. Oinsá Jeová tau matan ba ita?

¹⁴ Jeová tau matan ba ita, liuliu bainhira ita hasoru susar. Claire a neʼebé serbí iha Betel ba tinan 20 liu, la hatene atu halo saida bainhira ninia família hasoru problema neʼebé sériu tuituir malu. Ninia apá hetan stroke, ninia alin-feto kongregasaun hasai, no ninia família lakon sira-nia negósiu kiʼik no mós uma. Oinsá mak Jeová hatudu ninia domin ba sira? Claire hatete: “Jeová sempre fó buat neʼebé ami presiza ba loron ida-idak. Dala barak Jeová fó ba ami liu fali buat neʼebé ami imajina! Haʼu sempre hanoin oinsá Jeová hatudu domin no ajuda ona ami. Memória neʼe ajuda haʼu atu kontinua serbí Jeová ho kontente bainhira problema mosu.”

15. Tanbasá David sente kmaan? (Haree mós dezeñu.)

 ¹⁵ “Nia fó kmaan mai haʼu.” Dala ruma David sente laran-susar tanba problema no susar neʼebé nia hasoru. (Sal 18:​4-6) Maski nuneʼe, tanba Jeová hadomi no tau matan ba nia, neʼe halo nia sente kmaan. Jeová lori ninia belun neʼebé kole ba “duʼut matak” no “fatin neʼebé iha bee barak atu deskansa”. Rezultadu mak David hetan fali kbiit no bele kontinua serbí Jeová ho kontente.—Sal 18:​28-32.

16. Oinsá mak Jeová nia domin halo ita sente kmaan?

¹⁶ Hanesan neʼe mós ohin loron, “tanba Jeová nia domin neʼebé laran-metin mak ita la lakon mohu” bainhira hasoru susar no problema. (Lam 3:22; Kol 1:11) Hanoin toʼok irmán Rachel nia ezemplu. Nia sente triste tebes bainhira nia laʼen husik hela nia no Jeová durante COVID-19. Oinsá Jeová ajuda nia? Nia hatete: “Jeová ajuda haʼu atu sente ninia domin. Nia book haʼu-nia kolega sira atu gasta tempu hamutuk ho haʼu, lori hahán ba haʼu, hatudu laran-diʼak liuhusi mensajen no eskritura, hatudu oin-midar ba haʼu, no mós kontinua fó-hanoin haʼu katak Jeová tau matan ba haʼu. Haʼu fó obrigada beibeik ba Jeová tanba fó mai haʼu família neʼebé boot tebes.”

17. Tanbasá David “la taʼuk kona-ba perigu sira”?

¹⁷ “Haʼu la taʼuk kona-ba perigu sira, tanba Ita hamutuk ho haʼu.” Dala barak David nia moris iha perigu laran, no ninia inimigu barak iha forsa boot. Maski nuneʼe tanba Jeová hadomi nia, nia sente seguru. David bele sente katak Jeová hamutuk ho nia iha situasaun hotu, no neʼe fó kmaan ba nia. Tan neʼe nia kanta: “[Jeová] salva ona haʼu husi buat hotu neʼebé halo haʼu taʼuk.” (Sal 34:4) Maski David sente taʼuk, maibé Jeová nia domin boot liu fali ninia sentimentu taʼuk.

18. Oinsá mak Jeová nia domin hametin ita bainhira ita sente taʼuk?

¹⁸ Hodi hatene katak Jeová hadomi ita, oinsá mak neʼe hametin ita bainhira ita sente taʼuk? Pioneiru ida naran Susi fó sai kona-ba buat neʼebé nia no ninia laʼen sente bainhira sira-nia oan oho an: “Bainhira buat neʼebé aat tebes kona ita, ita sente taʼuk no la iha kbiit. Maibé Jeová nia domin halo ami sente seguru no iha protesaun.” Rachel neʼebé temi ona ohin hatete: “Kalan ida bainhira haʼu sente  triste tebes, haʼu hanoin barak no taʼuk. Tan neʼe haʼu halo orasaun ba Jeová. Jeová fó kmaan mai haʼu no halo haʼu sente kalma fali, hanesan inan ida halo ba ninia bebé, no tuirmai haʼu toba-dukur. Haʼu sei nunka haluha ida-neʼe.” Katuas kongregasaun ida naran Tasos tama komarka ba tinan haat tanba lakohi tama militár. Oinsá nia sente Jeová nia domin? Nia hatete: “Jeová tau matan ba haʼu-nia presiza no buat seluk tan. No mós liuhusi ninia espíritu, Jeová fó haʼu ksolok maski haʼu iha komarka, fatin neʼebé aat tebes. Neʼe ajuda haʼu atu haree katak bainhira haʼu tau fiar ba Jeová, neʼe halo haʼu sente liután ninia domin mai haʼu. Tan neʼe haʼu komesa serbí nuʼudar pioneiru regulár bainhira haʼu sei iha komarka.”

HAKBESIK BA MAROMAK DOMIN NIAN

19. (a) Hodi hatene katak Jeová hadomi ita, oinsá mak neʼe kona ita-nia orasaun? (b) Ita gosta liu eskritura saida kona-ba Jeová nia domin? (Haree kaixa “ Eskritura sira neʼebé ajuda ita atu sente Jeová nia domin”.)

¹⁹ Esperiénsia sira neʼebé temi ona fó prova katak Jeová “Maromak domin” nian hamutuk ho ita! (2 Kor 13:11) Nia hanoin ita ida-idak. Ita bele fiar metin katak “ninia domin neʼebé laran-metin haleʼu” ita. (Sal 32:10) Bainhira ita medita kona-ba oinsá nia hatudu domin mai ita, ita bele sente besik liután ba nia. Ita bele hakbesik ba nia hodi halo orasaun no fó sai katak ita presiza tebes ninia domin. Ita bele fó sai buat hotu neʼebé halo ita hanoin barak, no fiar metin katak nia komprende no hakarak atu ajuda ita.—Sal 145:​18, 19.

20. Oinsá mak Jeová nia domin ajuda ita atu hakbesik ba nia?

²⁰ Hanesan ita gosta hakbesik no haneruk ahi iha tempu malirin, ita mós gosta hakbesik ba Jeová no sente ninia domin. Jeová nia domin mak iha kbiit boot, no nia mós tau matan ba ita. Tan neʼe ita bele sente kontente tanba Jeová hadomi ita. Mai ita hotu fó sai ita-nia sentimentu kona-ba ninia domin hodi hatete: “Haʼu hadomi Jeová”!—Sal 116:1.