1-2. Susar saida deʼit mak Jeová nia atan sira hasoru?

 BAINHIRA ita hasoru susar, ita-nia moris bele troka derrepente deʼit. Porezemplu, irmaun ida naran Luis a kona moras-kankru. Doutór hatete katak fulan balu tan nia sei mate. Monika no ninia laʼen okupadu atu halo atividade espirituál hamutuk. Loron ida, Monika rekoñese katak ninia laʼen neʼebé serbí nuʼudar katuas, halaʼo moris ho oin rua durante tinan barak. Irmán joven ida naran Olivia presiza husik ninia hela-fatin tanba anin-boot neʼebé sei akontese. Bainhira nia fila fali, nia haree katak anin-boot neʼe estraga ona ninia uma. Iha tempu badak deʼit, Luis, Monika, no Olivia, sira-nia moris troka. Ita rasik hasoru ona susar neʼebé halo Ita-nia moris troka derrepente deʼit ka lae?

² Maski ita serbí Jeová ho laran-metin, ita nafatin hasoru susar no sai moras hanesan buat neʼebé akontese ba ema barak. Karik ita presiza tahan tanba ema neʼebé odi Maromak nia povu fó-terus no kontra ita. Maski Jeová la halakon kedas susar neʼebé ita hasoru, maibé nia promete atu ajuda ita. (Isa 41:10) Ho ninia ajuda, ita bele kontinua haksolok, halo desizaun diʼak, no nafatin laran-metin ba nia maski hasoru situasaun neʼebé susar tebes. Iha lisaun neʼe, ita sei haree dalan haat oinsá Jeová ajuda ita durante tempu susar. Ita mós sei haree saida mak ita presiza halo atu hetan benefísiu husi ninia ajuda.

 JEOVÁ SEI PROTEJE ITA

3. Bainhira ita hasoru susar, karik ita sente difisil atu halo saida?

³ Dezafiu. Bainhira hasoru susar, karik difisil ba ita atu hanoin ho klaru no halo desizaun. Tanbasá? Karik tanba ita sente laran-taridu no neon-susar. Karik ita sente hanesan ita laʼo iha nakukun laran, no la hatene atu bá neʼebé. Hanoin toʼok buat neʼebé irmán naʼin-rua neʼebé temi ona sente bainhira sira hasoru susar. Olivia hatete: “Bainhira anin-boot estraga tiha haʼu-nia uma, haʼu sente laran-susar no la hatene atu halo saida.” Monika esplika kona-ba ninia sentimentu kuandu nia laʼen la laran-metin, hodi hatete: “Haʼu-nia fuan rahun no haʼu sente triste tebes. Susar ba haʼu atu halaʼo atividade loroloron nian. Haʼu nunka imajina katak neʼe bele akontese ba haʼu.” Jeová promete atu halo saida bainhira ita sente laran-susar?

4. Tuir Filipe 4:​6, 7, Jeová promete saida mai ita?

⁴ Oinsá mak Jeová sei ajuda ita? Nia promete atu fó ita buat neʼebé Bíblia bolu nuʼudar “Maromak nia dame”. (Lee Filipe 4:​6, 7.) Dame neʼe refere ba sentimentu kalma, no mós neon no laran hakmatek neʼebé ita sente tanba ita iha relasaun besik ho Jeová. Dame neʼe “aas liu ema nia hanoin hotu”, no furak liu fali buat neʼebé ita bele imajina. Porezemplu, Ita sente ona ka lae, kuandu Ita harohan ba Jeová, tuirmai Ita-nia laran sente kalma no dame? Ita bele sente hanesan neʼe tanba “Maromak nia dame”.

5. Oinsá mak Maromak nia dame bele proteje ita-nia hanoin no laran?

⁵ Filipe 4:7 mós hatete katak Maromak nia dame “sei proteje” ita-nia ‘laran no kbiit atu hanoin’. Liafuan orijinál neʼebé tradús nuʼudar “proteje” refere ba soldadu neʼebé halo seguransa ba sidade no proteje sidade husi inimigu neʼebé mai ataka. Ema neʼebé hela iha sidade neʼe sente seguru tanba hatene katak soldadu proteje sira. Hanesan neʼe mós, bainhira Maromak nia dame proteje ita-nia laran no kbiit atu hanoin, ita sente kalma tanba hatene katak ita seguru. (Sal 4:8) Hanesan Ana neʼebé temi iha Bíblia, dala ruma ita-nia situasaun la troka kedas, maski nuneʼe ita bele nafatin sente dame. (1 Sam 1:​16-18) No bainhira ita sente kalma, baibain fasil ba ita atu hanoin ho klaru no halo desizaun neʼebé matenek.

6. Ita bele halo saida atu sente Maromak nia dame? (Haree mós dezeñu.)

⁶ Saida mak ita presiza halo? Bainhira ita sente laran-susar, ita bele husu Jeová nia ajuda. Oinsá? Halo orasaun  toʼo ita sente Maromak nia dame. (Lc 11:9; 1 Tes 5:17) Luis neʼebé temi ona esplika oinsá nia no ninia feen Ana bele tahan susar bainhira sira hatene katak lakleur tan nia sei mate. Nia hatete: “Iha situasaun hanesan neʼe, susar tebes atu halo desizaun kona-ba tratamentu médiku no buat seluk tan. Maibé durante tempu susar neʼe, ami bele nafatin sente dame tanba ami halo orasaun.” Luis no ninia feen hatete katak sira harohan beibeik no husu Jeová atu fó ba sira dame iha neon no laran, no matenek atu halo desizaun sira. No sira sente duni ninia ajuda. Bainhira Ita hasoru susar, halo orasaun, no Ita sei sente Jeová nia dame proteje Ita-nia neon no laran.—Rom 12:12.

JEOVÁ SEI AJUDA ITA ATU IHA BALANSU

7. Karik ita sei sente oinsá bainhira hasoru susar?

⁷ Dezafiu. Bainhira ita hasoru susar, ita-nia hanoin, sentimentu, no reasaun karik la balansu hanesan baibain. Ita bele deʼit sente katak ita-nia sentimentu troka bá-mai hanesan ró neʼebé laloran baku bá-mai. Ana neʼebé temi ona ohin hatete katak nia iha sentimentu oioin bainhira ninia laʼen Luis mate. Nia hatete: “Bainhira haʼu sente laran-triste tebetebes, haʼu komesa sente kuitadu ho haʼu-nia an. Haʼu mós hirus tanba nia mate.” Liután neʼe, Ana sente mesamesak no estrese tanba tenke halo desizaun kona-ba buat oioin neʼebé uluk Luis mak tau matan. Dala ruma, nia sente hanesan nia iha tasi neʼebé iha laloran no anin boot. Oinsá mak Jeová ajuda ita bainhira ita-nia sentimentu troka bá-mai?

8. Hanesan temi iha 1 Pedro 5:​10, oinsá mak Jeová ajuda ita?

⁸ Oinsá mak Jeová sei ajuda ita? Jeová sei ajuda ita atu iha hanoin neʼebé balansu ka hamriik metin. (Lee 1 Pedro 5:10.) Bainhira tasi komesa siʼak, ró bele iha perigu laran tanba laloran baku bá-mai. Atu ró bele balansu nafatin, ró barak iha liras husi sorin-sorin iha bee laran. Liras sira-neʼe bele ajuda ró atu la nakdoko demais, no neʼe halo ema iha ró laran sente seguru no hakmatek. Maski nuneʼe, atu liras sira-neʼe bele serbisu ho didiʼak, ró tenke kontinua halai. Hanesan neʼe mós, Jeová sei ajuda ita atu iha balansu se ita kontinua serbí nia ho laran-metin durante tempu susar.

9. Oinsá mak halo peskiza bele ajuda ita atu nafatin balansu? (Haree mós dezeñu.)

⁹ Saida mak ita presiza halo? Bainhira Ita sente susar tanba sentimentu  neʼebé troka bá-mai, kontinua halo orasaun, tuir reuniaun sira, no bá haklaken. Klaru katak, karik Ita labele halo buat barak hanesan uluk, maibé hanoin-hetan katak Jeová la husu Ita atu halo buat neʼebé liu fali Ita-nia kbiit. (Kompara ho Lucas 21:​1-4.) Bainhira halaʼo atividade espirituál nian, uza mós tempu atu estuda mesak no medita. Tanbasá? Liuhusi ninia organizasaun, Jeová fó mai ita informasaun no vídeo sira neʼebé bele ajuda ita atu kontinua iha balansu. Atu hetan buat neʼebé Ita presiza, Ita bele halo peskiza hodi uza aplikasaun JW Library^®, no Livru atu ajuda Testemuña ba Jeová atu buka informasaun. Monika neʼebé temi ona ohin hatete katak nia halo peskiza atu hetan matadalan bainhira ninia sentimentu troka bá-mai. Porezemplu, nia buka liafuan “hirus”. Iha tempu seluk, nia mós buka liafuan “laran-metin” ka “la laran-metin”. Tuirmai nia sei lee informasaun neʼe toʼo nia sente kalma. Nia hatete: “Bainhira haʼu komesa halo peskiza, haʼu sente laran-taridu tebes, maibé haʼu kontinua lee no haʼu sente katak Jeová hakoʼak metin haʼu. Nuʼudar haʼu lee, haʼu rekoñese katak Jeová komprende haʼu-nia sentimentu hotu, no nia ajuda haʼu.” Liuhusi informasaun sira-neʼe, Jeová bele ajuda Ita atu nafatin balansu toʼo Ita sente kalma fali.—Sal 119:​143, 144.

JEOVÁ SEI APOIA ITA

10. Depois susar liutiha, karik ita sei sente oinsá?

¹⁰ Dezafiu. Depois susar liutiha, karik iha tempu ida neʼebé ita sente fraku iha dalan fíziku no emosaun. Karik ita sente hanesan atleta neʼebé uluk bele halai-taru maibé agora aleija no laʼo ho ain-kudeik. Karik ita sente susar atu halaʼo atividade neʼebé baibain ita halo ka karik ita la iha tan motivasaun atu halaʼo atividade neʼebé ita gosta atu halo. Hanesan Elias, ita mós bele sente susar atu hadeer no hakarak atu toba deʼit. (1 Reis 19:​5-7) Jeová promete atu halo saida bainhira ita sente fraku?

11. Iha dalan saida tan mak Jeová ajuda ita? (Salmo 94:18)

¹¹ Oinsá mak Jeová sei ajuda ita? Nia promete atu apoia ita. (Lee Salmo 94:18.) Hanesan atleta neʼebé aleija presiza apoiu atu bele halo atividade ruma, ita mós karik presiza ajuda atu kontinua halo Jeová nia serbisu. Iha situasaun hanesan neʼe, Jeová promete mai  ita: “Haʼu, Jeová, ó-nia Maromak, mak kaer ó-nia liman-loos, haʼu dehan ba ó: ‘Keta taʼuk. Haʼu sei ajuda ó.’” (Isa 41:13) Liurai David sente ona Jeová nia apoiu. Bainhira nia hasoru susar no inimigu kontra nia, nia dehan ba Jeová: “Ita-nia liman-loos apoia haʼu.” (Sal 18:35) Maibé oinsá mak Jeová apoia ita?

12. Jeová bele motiva sé atu ajuda ita bainhira ita fraku?

¹² Baibain Jeová apoia ita liuhusi motiva ema seluk atu ajuda ita. Porezemplu, bainhira David sente fraku, ninia belun Jonatan vizita nia atu apoia iha dalan emosaun no uza liafuan neʼebé hametin. (1 Sam 23:​16, 17) Jeová mós hili Eliseu atu ajuda Elias. (1 Reis 19:​16, 21; 2 Reis 2:2) Ohin loron, karik Jeová mós uza ita-nia família, belun, ka katuas kongregasaun atu ajuda ita. Maibé, bainhira ita sente laran-susar, karik ita hakarak deʼit atu hadook an husi ema seluk no hakarak atu mesamesak deʼit. Neʼe mak reasaun neʼebé normál. Saida mak ita bele halo atu simu Jeová nia apoiu?

13. Saida mak ita presiza halo atu bele simu Jeová nia apoiu? (Haree mós dezeñu.)

¹³ Saida mak ita presiza halo? Hakaʼas an atu la mesamesak. Bainhira ita izola an, baibain ita komesa hanoin deʼit kona-ba ita-nia an no problema neʼebé ita hasoru daudaun. Hanoin hanesan neʼe bele kona ita-nia desizaun. (Prov 18:1) Klaru katak ita hotu presiza tempu balu atu mesamesak, liuliu bainhira ita foin hasoru susar ruma. Maibé, se ita izola an ba tempu naruk, neʼe bele hanetik ita atu simu ajuda husi ema neʼebé Jeová uza atu apoia ita. Tan neʼe maski susar, diʼak atu simu ajuda husi família, belun, no katuas sira durante tempu susar. Haree sira nuʼudar ema neʼebé Jeová uza atu apoia ita.—Prov 17:17; Isa 32:​1, 2.

JEOVÁ SEI FÓ KMAAN BA ITA

14. Situasaun hanesan saida mak bele halo ita sente taʼuk?

¹⁴ Dezafiu. Karik ita mós hasoru situasaun neʼebé halo ita sente taʼuk. Iha Bíblia, Maromak nia atan sira neʼebé laran-metin koʼalia kona-ba susar neʼebé sira hasoru tanba inimigu ka ema seluk kontra sira. (Sal 18:4; 55:​1, 5) Hanesan neʼe mós, karik ema kontra ita iha eskola, serbisu-fatin, família, ka governu mak kontra ita. Ita mós bele taʼuk kona-ba mate tanba problema saúde. Durante tempu hanesan neʼe, karik ita bele sente  hanesan labarik kiʼik neʼebé presiza ajuda. Oinsá mak Jeová ajuda ita iha situasaun sira hanesan neʼe?

15. Tuir Salmo 94:​19, oinsá mak Jeová ajuda ita?

¹⁵ Oinsá mak Jeová sei ajuda ita? Nia fó kmaan no halo ita kontente. (Lee Salmo 94:19.) Karik eskritura iha salmo neʼe halo ita hanoin kona-ba labarik-feto neʼebé taʼuk no labele toba tanba rai-lakan no rai-tarutu makaʼas. Ita bele imajina ninia apá mai, koʼus nia, no hakoʼak nia toʼo nia toba-dukur. Maski rai-lakan no rai-tarutu nafatin, maibé tanba ninia apá hakoʼak nia, neʼe halo nia sente seguru. Bainhira ita hasoru situasaun neʼebé halo ita taʼuk, karik ita presiza ita-nia Aman iha lalehan atu hakoʼak ita toʼo ita sente kalma. Oinsá mak ita bele hetan kmaan hanesan neʼe husi Jeová?

16. Saida mak ita bele halo atu hetan kmaan husi Jeová? (Haree mós dezeñu.)

¹⁶ Saida mak ita presiza halo? Uza tempu barak ho Jeová liuhusi halo orasaun no lee ninia Liafuan. (Sal 77:​1, 12-14) Se Ita toman ona atu halo ida-neʼe, bainhira hasoru susar Ita sei buka kedas Jeová nia ajuda. Fó-hatene ba Jeová kona-ba buat neʼebé halo Ita taʼuk no hanoin barak. Husik nia koʼalia no fó kmaan ba Ita liuhusi Bíblia. (Sal 119:28) Karik Ita sei hetan eskritura balu husi Bíblia neʼebé fó kmaan ba Ita bainhira Ita taʼuk. Porezemplu, karik Ita bele hetan aten-brani liuhusi livru Job, Salmo, no Provérbios, no mós Jesus nia liafuan iha Mateus kapítulu 6. Bainhira Ita halo orasaun ba Jeová no lee ninia Liafuan, Ita sei sente kmaan.

17. Ita bele fiar metin kona-ba saida?

¹⁷ Ita bele fiar metin katak Jeová sei ajuda ita durante ita-nia tempu susar. Ita sei nunka mesak. (Sal 23:4; 94:14) Jeová promete atu proteje, ajuda ita atu iha balansu, apoia, no fó kmaan mai ita. Kona-ba Jeová, Isaias 26:3 hatete: “Ita-Boot sei proteje ema neʼebé sadere ba Ita ho laran tomak; Ita sei fó dame nafatin ba sira, tanba sira tau fiar deʼit ba Ita.” Tan neʼe tau fiar ba Jeová, no aproveita dalan oioin neʼebé nia uza atu ajuda Ita. Se Ita halo nuneʼe, Ita sei hamriik metin nafatin durante tempu susar.